joeychanwy的個人專頁

平時同屋企人久唔久都會嚟屋企附近呢間小店買外賣做晚餐，今日單拖食晏，心心念念想食個漢堡包，又唔想太熱氣，所以嚟鄰居嗌咗個薑汁豬肉片漢堡包+新出嘅紫色薄荷梳打。唔好睇佢舖面小店格局，呢個包係homemade感覺亦絕對係水準之作。個薑汁調得好惹味，甜度同鹹度平衡得好好，而且好夾豬肉。包裡面嘅芝士同蛋一齊食真係好香，份量亦絕對對得住40幾蚊單點價錢。同場加映紫色薄荷梳打（蝶豆花+檸檬薄荷梳打），整體上薄荷味比較重，唔算甜，啱曬炎炎夏日嘅天氣。小店嘅店主同Boss好好人，同埋會研發推出啲新飲品、季節限定食品等，真係好用心👍🏻加油呀！…查看更多

今次係我第三次幫襯呢間小店，我嗌咗個金菇牛柳絲炒烏冬，屋企人就叫咗佢平時食開（食過翻尋味）嘅客家炆豬肉飯。今次記得攞埋飯盒去裝飯，環保啲之餘仲有自備餐具嘅優惠㗎！個烏冬攞到返屋企已經唔太熱，可能因為咁樣，聞起上嚟冇平時去茶餐廳嗰啲炒烏冬咁香。不過食落覺得入味得來唔會太鹹，亦比起平時出街食嘅落得少油。牛柳絲同金菇都唔韌，加埋我自己鍾意食嘅洋蔥一齊食又夾喎，側邊仲有時菜！成件事真係好似食緊阿媽整嘅住家飯咁！小店每日都會有唔同嘅是日主菜，大家諗緊下餐食乜嘅時候，不妨去佢嘅社交平台page望吓今日嘅1號午餐係乜。（最近開埋晚市，不過未有機會試食）之前有一次食咗個1號餐「茄汁蝦碌配沙爹肉絲炒蛋時菜飯」，跟埋香茅檸檬飲品。兩隻蝦碌本身已經大隻，用茄汁整真係惹味，再加埋唔肥嘅沙嗲肉絲、炒得幾香嘅炒蛋，連埋嘢飲四十幾蚊真係相當唔錯。小店食物質素高，好味又健康，員工有禮，又係與港人同行嘅良心小店，希望街坊同附近嘅打工仔多多懲罰…查看更多

話說我住附近既，不過平時基本上唔會食太興，因為印象中頗貴。今晚屋企人諗唔到食乜，結果話好耐冇食太興，不如食吓。點知就出事了。我嗌咗一個去皮雞胸飯。唔好問我味道如何，因為我食都食唔到。眼見加單嗰份食物都嚟埋，但係我個飯都未到，我就攞住第一張單，追吓佢啦，我餓啦嘛。點知佢睇下張再印嘅單，竟然冇咗個飯！個侍應解釋話冇晒呢個系列既飯(我心諗：咁你擺咩餐牌出嚟啫)，叫咗第二個同事同我哋講，但係根本冇人同我地講過...... 就直接喺我地張單上面砸走咗。我白坐咗十幾分鐘。個人㷫㷫地拍咗吓枱，冇再嗌其他嘢，去咗隔離買壽司返屋企食。仲有值得一提嘅係，間鋪好_多烏蠅呀大佬。門又唔閂，防蟲又做唔好。有隻烏蠅喺我「等餐」嘅時候喺咁嬲住我，從我件衫上撥走咗之後就停喺我手臂上。食附近其他餐廳又唔見咁多昆蟲。以後唔再食(呢間)太興。…查看更多