yuhayki的個人專頁

Lunch time一行同事去食日本野，點咗和牛火鍋，雜錦壽司定食。和牛火鍋: 賣相好靚，可惜湯底有啲淡，豆腐唔夠滑，和牛有牛味，可惜有根，有根既和牛，真係第一次食。至於個雜錦壽司，等了都有個半鐘，仲未有得食，催咗好幾次，最終係要取消order走人。價錢已唔係平民價，但質素麻麻，效率亦不行，真心失望。…查看更多

呢間百份百，食品味道，份量，造法，跟其他有啲唔同。沙爹牛肉麵，無乜沙爹汁。半焗流心蛋，好多鑊屎。咖啡比較淡啲，不過我喜歡，其他的太濃。樓面員工幾nice；收工嗰位，我應該無得罪佢丫。…查看更多

同朋友敘舊，行過見到新開咗間串燒店，就入去試一下，本身只係諗住朋友敘舊食餐飯，點知有驚喜。前身係船麵，但因為各種原因，所以轉型做串燒。串燒種類非常吸引，火喉掌握得好好，調味亦好出色，帶到食物鮮味，食完又不會口渴。佢哋而家仲未拎到酒牌，但店員可以比顧客自攜酒精類飲品入內進食，不設另外開瓶費，非常貼心。食物方便，足份量，唔偷工，特別推介：邪惡燒牛腸：口感非常一流，好有𡁻口，牛腸準備過程都幾複雜，可以食得出廚師嘅心機鵝肝多士：多士好脆口，鵝肝都大件，味道香濃燒開心蕉：一食入口覺得非常好味，焦糖配香蕉再加雪糕，食完之後再encore叫多一客惹味辣雞腎：佢哋嘅雞腎大大隻，好厚身，可以做到軟硬適中，口感又係非常正秘製牛叉燒：店員推介，話呢道菜是他們的signature，入口第一啖，果然超級正，同豬叉燒完全唔同食法，配埋秘製醬汁，好淋好入味佢哋依家凡點夠10串可以以優惠價$68點半打燒蠔，啲蠔都算肥美，雖然加咗蒜蓉，但仍然可以食到蠔既鮮味，加埋少少蟹子喺上面，一啖一食，又抵食又好味，再encore多一客。其實好多食物都好好味，掛住食和同朋友傾偈，所以都冇影齊啲食物相片。服務方面，餐店老闆同埋員工都非常友善，好funny好好玩，亦感覺到廚師的用心製作，仲同我哋傾偈和玩小遊戲。等食過程雖然比較耐，相信係因為新開店所以仍在改善當中，相信之後一定會有所改善，不過同朋友傾偈飲吓食吓嘢，呢度會係一個非常好嘅食店推介。…查看更多

記得幾年前同太太去呢度食，服務同食物質素都幾好，不過依家退步了。入座前先點餐及鍋底，選好後店員帶我入座，一路行，我就問店員是否有啤酒，店員話有，39蚊位，我話一位加啤酒，佢就話要兩位一齊加先得，咁我就話諗一諗轉頭決定，坐座就同另一店員講兩位都加啤酒，呢個店員就同我講佢哋無啤酒，我即是覺得被騙，有啲失望，算吧，起身出去攞配菜，點知發現拎配菜嗰邊有小強，我同店員講，本身都係諗住講聲，等佢快啲處理一下，點知佢應我一聲”好”，然之後走咗去，佢再行返過來嘅時候理都唔理，淨係望住我一眼，即係佢哋已經見慣不怪嗎？我就唯有影張相，有證有據吧。食物方面，昆布鰹魚清湯，關東風壽喜燒，兩個鍋底都好淡，食物方面，牛和豬都無乜肉味，羊肉反而有少少驚喜。鍋底冇晒湯嘅時候叫店員加湯，原來佢哋係加水而唔係加湯，加完水之後個湯底更加淡而無味。服務方面，除左之前嗰位店員唔處理小強外，其他都係麻麻哋，有個仲張個點餐牌飛去我隔離張檯，又行過親都撞一下我張椅，都唔緊要，sorry都無句。…查看更多

想食壽司，見到呢間就諗住試下，點知，結論得兩個字，就係”後悔”。服務方面，得個女侍應有禮貌有笑容，其他男侍應都係態度唔友善，收銀個男職員仲好似趕客走咁。環境方面，音樂太大聲，嘈到覺得好頭痛，一路聽只係令人心情好煩燥。食物方面，螢光魷魚本身係我最愛，不過呢度既螢光魷魚簡單非常差，太乾身，魷魚入面嗰啲唔知係什麼，如果我第一次食螢光魷魚就係喺呢度既話，我諗我一定唔敢再食。手卷方面，塊紫菜係靭到咬唔開既。油甘魚個顏色係牙色，唔新鮮，食完即刻有反胃感覺。拉麵，感覺似好重味精，食完夜晚不停要飲水。結論，非常失望，都係寧願排長龍去返其他壽司店食好過！…查看更多

同朋友兩個人食晚飯，喺坑口村泊好車行出去，見檔檔都好多人，行多幾步見到呢間無乜人，諗住無所謂就過去坐低。 點了個羊腩煲同匙油皇鵝腸，加兩支啤酒。 羊腩煲上檯，份量好足，味道適中，食到中段嗰汁開始”傑”，店員幫我哋加湯，加完湯都同樣好好味，食完又唔會口渴，兩個男人食都食到好飽，足料，真心覺得唔錯。 而嗰碟鵝腸，條條都好長，同店員講，佢都好好人幫我哋剪短啲，味道又係幾正喎，味道適中。間店人少少，坐得舒服，下次一定會再來幫襯。…查看更多

呢間麥當勞，啲員工既待人處事態度簡直不知所謂，黑面，鬧客，不負責任，無清潔，等等等等。當日最令我激氣，等餐的時候，等得耐，都不是問題，電視螢光幕顯示了我點既餐已經可以取，我前往櫃檯取餐時，職員話仲爭一杯咖啡，我見很多人在那個位置等餐，只是出於好心情況下同佢哋職員講如果未有就不要顯示出來以免造成混亂，點知個職員態度非常之惡劣，喝罵我一句「只是差一杯咖啡咋！」我聽了之後當然不滿，為什麼麥當勞啲職員可以在大庭廣眾下咁對客人 ？ ？我要求他提供名字以及員工編號，他只是告訴我佢的簡稱英文名，然後我叫佢寫俾我，佢再喝我話”你自己寫，我唔會寫俾你”，這樣的態度真的非常差，我再跟他們經理說，他們經理的態度亦是非常之惡劣。一個質素咁差既經理，唔怪得會有一班質素差既員工，原全明白！…查看更多

食過咁多間壽司郎，呢間質素真係最差，睇吓個青瓜卷個賣相就知道，一條短一條長，完全都唔平均。 而個螢光魷魚，新開張嘅時候都好好食，之後每次都係乾爭爭，一啲汁都冇，又細隻，不過我本人真係好鍾意食螢光魷魚，所以今次都再俾多次機會佢，竟然有驚喜，食完一疊想encore多一點，但係發現其中一件得一隻螢光魷魚加幾條魷魚鬚，夾埋隻半都冇，叫個侍應來睇，侍應仲話呢度係有兩隻，話夾開面頭嗰隻就會見到，好，我就拎開面頭嗰隻俾佢睇，得嗰幾條魷魚鬚，個侍應睇到眼都突咗，然後話同我換返碟，之後再嚟嗰碟就靚仔返晒。…查看更多

呢間譚仔，質素越來越差，叫咗確豬潤腩肉5小辣，連小朋友都話唔辣，米線既份量，半隻碗都無，豬潤就只有兩片咁多，同個侍應講，佢竟然話係因為湯少咗所以感覺少啲，不知所謂！…查看更多

之前都幾鍾意呢間食店，不過服務態度及服務效率就每放越下，帶入坐既服務員無笑容都算，我du緊安心出行啦，仲要大大聲好似喝我咁，我都du緊啦，有咩問題呢，禮貌啲得唔得。沙嗲牛肉通粉：啲牛肉碎濕濕；五香肉丁麵：肉丁份量少咗好多；問店員要杯熱水，但係杯水入面有啲葱粒碎，痴住隻杯又有，杯底又有，超級dirty。手機點餐時，因為無得點爆漿拉絲菠蘿包，就叫店員落單，直到我食晒碗通粉，個菠蘿包都未到，就問返個店員，佢就話我無落單，態度當然又係差啦，我話之前同佢講咗，然後再問佢落返單要唔要等，佢就話唔駛等，轉頭過來放返低張單，再隔咗都有20分鐘，都未到，我叫返同一個店員，我話唔等啦要取消，佢一句都唔答，一支箭去拎，我再講要取消，佢仲大大聲講”有啦”，我再一句”取消張單呀”，個店員就將個包收返埋，一句唔好意思都無，我真係成肚氣囉！我唔駛你好好服務，不過唔係差到咁呀！…查看更多

天氣悶熱，剛剛喺西灣河工作完，約咗個朋友喺附近搵間餐店食個lunch休息下，行過見到呢間店，我哋二口同聲就話試下佢，於是就開門入去，店員知道我哋身水身汗，仲開大啲冷氣俾我哋舒服吓。坐低抹下汗，就開始睇下個餐牌，店員仲好好招呼介紹有咩特別選擇，我本身諗住食海鮮炒烏冬，後來聽到店員介紹滑蛋咖哩秋葵蝦肉丼，我即刻望一望，因為我呢排愛上了食秋葵，店員仲話蝦肉係老闆自己親手一隻一隻咁樣釀入去秋葵度，我就即刻落決定試吓佢，我朋友就點了招牌鮮茄汁焗飯。等咗陣，兩個飯送上檯了，先睇個份量，好足料，肯定好飽，試啖先，個咖哩汁好fresh，唔似其他餐店嗰啲咖哩一係就濃，一係就甜，呢度個咖哩好特別，之後問下老闆，先知佢自己調製的，加入了水果蓉一起煮，唔怪得個味咁fresh，再食條秋葵蝦肉，外脆內熱，火喉剛剛好，珍珠飯質感軟硬適中。之後再同個老闆傾咗一陣，感覺到老闆真係用心創作每一款菜式，需要之前疫情影響左一段時間，希望佢可以繼續努力，我一定會再來的，下次要再約朋友過來試吓佢呢度啲串燒！…查看更多

估唔到普普通通食個早餐，都有野寫，我今日叫咗份珍寶早餐，其實我成日都係食呢份set，都無乜特別，但今次真係好特別，特別之處是勁勁勁多油，薯餅有油都正常，豬柳漢堡啲油多到要用餐紙索吓啲油先稍為好啲，就連炒蛋都係油浸咁，總之食完之後覺得成個口都係油，唔知係今日個員工重手咗，還是係呢間店既特色呢！用餐紙索油後稍為好啲……查看更多

午餐$48包埋嘢飲幾大碗，湯底比較淡，另加辣椒油夠香辣，蘿蔔好淋好甜，魚蛋彈牙，香茅豬扒好香好大塊，瑞士汁雞翼大大隻都幾入味，反而豬紅冇味最失色！見隔離枱啲西餐，碟頭飯賣相都好靚仔又一碟，轉型之後進步咗好多…查看更多

經常經過都見到好多人喺門口等，就同老婆去試下，放工就去拎飛，見到門口好多人，以為要等好耐，但不出5分鐘，一下子就入晒所有人，原來入面有好多檯都未有人，唔知係唔係要做個勢比人以為真係好受歡迎呢。坐低睇完餐牌就叫人落單港式米線小辣+豬大腸+豬紅+豬潤，加凍檸茶湯底味道幾好，胡椒味都算香，配料份量好足，豬大腸有口感夠彈牙，豬紅都夠味，但係就只得4粒，而豬潤就比較差，唔起沙，入口感覺唔似豬潤。杯凍檸茶冰塊唔夠，攪多幾吓已經融晒，個杯野仲係暖既，要叫店員另外比多杯冰塊先得，個店員好funny，一路唱歌一路拎比我。小鍋米線中小辣+豬軟骨+墨魚丸同樣配料好足，夠辣，豬軟骨得1舊加2小粒，亦一啲軟骨都無，只係肉，食豬軟骨就係想食啲軟骨之麻，而墨魚丸就只有3粒，口感好差，一啲都唔彈牙，實的的，唔係眼見到都唔會相信佢係墨魚丸。總結係，港式胡椒湯味係好既，小鍋湯就一般，墨丸豬軟骨豬潤就最差，豬大腸最欣賞，下次都係去返譚X啦。…查看更多

去咗梅窩玩，晚餐時間想搵檔海邊海鮮檔食下，見呢間有張邊邊檯，就坐低咗。本身諗住呢啲都係一般飯店，但竟然有驚喜。蠔餅- 蠔仔唔算好多，但都算份量適中，有鑊氣，一啲都唔咸，正炒硯- 好好味，足料，味道適中，熱辣辣，如果加啲配料，例如三色椒同洋蔥，應該會更好，不過可能老闆想比足啲硯既份量，所以先咁既安排。椒鹽鮮魷- 炸粉唔厚，魷魚好好肉，可惜略為咸咗啲。總括食物質素係好味既，服務質素都ok。唯一想提一下，當我哋食食吓既時候，都滿座了，有兩個客人到了，然後話訂咗檯，但店員話佢訂嗰張檯有人坐咗，個客話訂咗位架喎，店員就話”訂咗檯但有人坐低了都無辦法”，咁訂檯有咩用呢？！😂😂😂…查看更多