北斗星曲奇的個人專頁

平日甚少出外進餐嘅我，第一次幫襯呢間餐廳，請細妹、家姐& Joey 妹一齊食lunch!細妹同Joey到先，等咗三分鐘有位，地方唔算闊落，但尚算舒適，佈置亦幾靚！午餐menu主打套餐，冇素食、冇扒餐，全部都跟飯或天使麵或拉麵，起初我都有啲失望，因我本身唔食肉！慶幸套餐可以加錢換小食，有得換兩款素食：長柄西蘭花&葡汁芝士焗什菜，呢兩款都好好味，我都喜歡！尤其長柄西蘭花，我覺得好爽脆好入味，但我細妹&家姐就話好硬、冇牙咬，結果三碟我食哂！葡汁芝士焗什菜雖然都好味，但就膩咗啲，裡面仲有pat薯蓉，感覺有少少呃咗啲菜嘅感覺！餐牌本來有椰菜花飯同芝士炸雞，兩款都係我細妹至愛，可惜又話冇！呢個係第二個失望！如果有椰菜飯就好，起碼俾食客多個輕食選擇！今餐我請，佢哋點到成枱食物，結果兩張枱唔夠擺，要拼埋隔離張枱，夾埋三張枱先勉強放得落，侍應都好震驚！整體食物質素唔錯，我見我家姐食哂成個牛扒定食，侍應亦算有禮貌，係環境嘈吵啲！食到尾聲，因有好多人等位，侍應要求我哋退返張枱出嚟，我哋亦樂意配合，佢哋都不停同我哋講唔該！埋單$439, 我覺得都ok！起碼大家都食得開心，最重要係有機會重聚！…查看更多

我有位失明朋友好鍾意食麵包，每次經過呢間麵包店我都會諗起佢，好想買啲麵包送俾佢！今日終於有機會喇！因為我約咗佢出嚟，送我嗰本著作「寄往天國的情書」俾佢！我去呢間麵包店買咗三款麵包：肉鬆怪獸波、特濃朱古力脆脆同班蘭紅豆包，三款各有特色，有鹹有甜；班蘭紅豆包好靚，直情成朵花咁！希望佢會鍾意啦！衷心希望佢喺新嘅一年生活依舊多姿多彩！日日開開心心！…查看更多

聖誕節快到了，很想送盒蝴蝶酥給跳舞教練，在網上看了很多間售賣蝴蝶酥店的資料，最終揀選了這一間，因我whatsapp對方查詢時，對方很快回覆我，我覺得對方蠻親切的！那裡的女店員也很好，尤其接待我那位年輕女店員，外貌漂亮亦十分有禮貌！其實我很喜歡原味蝴蝶酥禮盒那個淺藍色罐，但因我很想要那塊Thank You曲奇餅片，最終選了這罐金碧輝煌、極像月餅的蝴蝶酥！希望Tony能考慮製作生酮朱古力甜點(包括蝴蝶酥)，因我妹妹有嚴重糖尿病，我希望能送給她品嚐，謝謝！…查看更多

行過呢間餅店好幾次，見佢啲貨品琳瑯滿目，色彩繽紛，每樣產品都有好多口味選擇，但幫襯就真係第一次！眼見呢款紫菜肉鬆怪獸波波個名幾趣緻，睇網上食評話加熱仲會有芝士拉絲麻糬餡，所以特登買咗一盒，送俾我最喜歡嘅跳舞教練！我見教練成日好鍾意食芝士漢堡包，希望佢會鍾意呢款有芝士餡嘅趣怪肉鬆包！唔知其他食品味道如何？…查看更多

唸小學時已跟肥媽去幫襯，如今肥媽已飛往天國，今天剩我和姊姊、妹妹、Joey妹四人一起在這裡聚餐。這素食店屹立在荃灣超過卅年，原址在眾安街，搬到現址後，轉為經營自行出去選擇食物的素自助餐。地方闊落、環境清幽、光線充足、我頗喜歡！食物方面選擇亦多，熱葷超過廿款，冷盤、炸物、甜品款式也多，補菜速度亦快，不用怕不夠食物；我個人最喜歡白汁雙花(西蘭花、椰菜花)、菜心(超稔、超嫩、超好味)、紅燒豆腐、蕃茄炒蛋、涼拌青瓜、齋鹵味和綠豆沙等！妹妹最愛炸物，新鮮炸起卜卜脆，最具特色的炸蜜瓜奶，那種香甜令人回味！Joey妹則欣賞粟米粥和紅燒翅；總之每位$104.5(已連加一)，能夠吃到捧著肚子走，我個人覺得很不錯！其實我很少出外進餐，亦很怕和人應酬聚會，但想起肥媽這麼愛錫我們三個女兒，我想她會開心看見我們聚在一起，為姊姊預祝生日。寶蓮素食，盛載著我兒時的回憶，有機會我一定再去支持，加油！…查看更多

七一公眾假期，和Joey妹補祝生日，首次帶來到這間分店，環境和氣氛和旺角及荃灣分店不同，雖然選擇比旺角少，但我喜歡這裡的寧靜和寬敞，且食物質素相當不錯！炸物很多，但我沒試(妹妹說炸物很香脆，炸金菇因剛炸起，尤其美味)。我喜歡他們的涼拌青瓜、木耳和肉鬆豆腐；車厘茄、西瓜和哈密瓜也很爽甜和新鮮，我吃了很多。蒸南瓜很軟甜，我連皮也吃了；瓜菜款式多，有通菜、菜心、菜仔、娃娃菜、青瓜、翠玉瓜等，款款也很甜，軟硬度適中；我最喜歡豆腐和蒸蛋，豆腐款式很多，鹵水豆腐和冬菇超美味，我吃了多件；唯一遺憾的是沒有蕃茄炒蛋、豆漿和紅豆沙(只有五花茶、羅漢果茶和南瓜西米露)，如有就更完美了！雖然熱葷的盤不像旺角分店和銅鑼灣《樂園》般多，但職員密密換盤和換款，吸引我們多次走出去覓食，我前後吃了五輪，十分滿足！接待我們那位收銀女職員很有禮貌，向每位顧客致謝；唯一感覺有點怪的是由客人自己揀位，我們清理碟子準備離開時，下午茶時段開始，有食客站在我們枱旁等位，感覺有點古怪，如果付了錢開始計時又沒座位怎算呢？午餐每位$98，價錢合理，有機會我會再來的！…查看更多

細妹就快生日，為咗滿足佢嘅生日願望，請佢&Joey妹一齊去食佢哋誠意推介嘅素自助餐！復活節假期第二日，細妹預約下午11：30時會，每位$118，可以食90分鐘！款式頗多，尤其甜品；熱葷方面，我最愛嘅蟹柳西蘭花同紅燒豆腐；其他如炆雜菇同炒炆茄子都好味！關東煮亦有誠意，竟然有芋絲！見之前有食客推薦花生脆蘋果，我食咗一件 ，係用花生醬黐啲穀物脆粒喺蘋果面，鹹鹹哋又甜甜哋，蘋果亦爽脆，OK好味；但我更欣賞佢嘅綠茶芋泥煎餅同芝麻卷，前者外皮脆芝麻香芋泥甜甜哋熱熱哋，好味！後者係我兒時最愛，肥媽以前成日買俾我，好濃黑芝麻味，勾起好多回憶！最後要激讚同我食咗三碗嘅係我嘅至愛甜品紅豆沙！同樣係以前肥媽成日煲俾我嘅美食！紅豆綿，糖水甜度偏淡少少，但我好鍾意！大家如果有時間，可以去埋我個Fb Page：小北斗的夜空，感受呢餐素自助餐背後重要嘅意義！多謝大家！…查看更多

上次去旺角那間吃晚市自助餐，款式多又好味，坐亦舒服；今天來佐敦這間吃午市自助餐，簡單八個字：質素低劣，十分失望！今天5．1紅假，午市每位$88，全場約有廿盆熱葷，最少6盆食材接近九成半相同，全部都是西蘭花+黑木耳，絲瓜就佔2盆！且部份份量很少，不見密密加添！餘下14盆，只得素鮑片生菜較熱較好味，但素鮑片只得幾塊薄片，很難才夾到3小塊！其餘就是清炒菜心和白菜仔各1盆、茄子1盆、炒麵炒飯各1盆、豆卜白蘿蔔1盆、苦瓜1盆、蓮藕1盆、馬拉糕拼蘿蔔糕1盆、腐乳通菜1盆、還有2盆我完全忘記了！炸物放在那裡很久，但不見有新炸起的端出來，甜品只得淡淡的紅豆糕和疑似椰汁糕，$88只換來一餐西蘭花自助餐！本想加點茄汁調調味，可惜連茄汁也沒有！還有，空氣侷促、冷氣不夠，現場氣溫近28度；很多碟子有一點點污漬，令人感覺很不舒服！從今以後，不會再去！！！！！…查看更多

返完教會，同細妹食午餐；呢間小店，論食物質素同份量，都絕對值得支持！店主同員工亦好親切、好好人！我只係點咗碗四餸米線(娃娃菜、腐竹、雞肉同魚蛋)，點知上枱時嚟咗一大窩！令我大吃一驚！真係晚餐都唔駛食喇！論味道，娃娃菜新鮮爽甜、魚蛋肉質彈牙紥實，我喜歡；雞肉嫩滑入味，一啲渣都冇；係唯獨腐竹煮得唔夠腍，略嫌硬咗少少！配菜好多，我最喜歡芽菜；不過可能因我叫小辣關係，有頗多辣椒籽，飲湯不時咬到啲硬粒，感覺怪怪地！講開湯，我覺得都好夠味，基本上我全碗清哂！細妹嗰碗更加唔駛講，直情勁辣勁豐富(我細妹好喜歡食辣嘢)！我亦試食咗佢哋嘅娃娃菜肉水餃，味道唔錯、菜肉均勻、甜甜哋、頗美味！由於我唔食炸嘢，碟豬扒雞翼細妹一個KO哂！佢食到讚不絕口！我聽到佢咬落去時好酥脆，齋聞都覺得好香、好吸引！兩個人食到飽，只需一百多少少！呢間小店係店主夫婦開嘅，兩人夫妻檔上陣，再加個樓面姨姨；平日有做學生餐同下午茶九折優惠！論味道同服務態度，我覺得都值得支持！大家下次有時間，不妨行入去試試！…查看更多

年廿八，同獨居兩老長者攪party準備迎接新一年，又再幫襯呢間愛心飯店，上次攪大合唱活動時訂過兩款三餸飯盒，大獲好評！年廿三攪團年飯活動訂咗腿蛋治同豬扒包各90份俾同事&義工，又係大件抵食熱辣辣！今次決定幫襯訂到會，睇吓係咪一樣咁好味又抵食？點知唔訂猶自可，一訂嚇親我，每盤嘅份量足足多咗二份一！用咗四千幾蚊訂咗廿幾盤，本打算招呼87位老友記，點知嚟到嘅份量足夠食飽130人老仲有剩！老闆娘好好人，話見係老人家，特登叫廚師炒多啲！個個老友記都食得好滿足！好開心！話夜晚都唔駛煮飯！真係好多謝愛心老闆同老闆娘！仲有不得不提嘅係，除咗新鮮熱辣又美味，盤盤滿到瀉咁滯之外，我叫老闆娘提供埋餐具俾我，佢唔單止立刻答應，又碟又叉又筷子，仲送埋廿個每個價值$6(連價錢牌都未搣)嘅夾麵包不銹鋼鉗！我真係覺得好唔好意思，本來想支持佢哋愛心飯店，點知變咗要佢哋做善事！送貨嗰位B哥又好人，準時嚟到有禮貌之餘，仲幫我逐盤搬上枱放好，即時回收埋所有保凍保溫發泡膠箱！咁好嘅服務質素同態度，你叫我之後唔繼續支持點得？所以，嚟緊大年初七，義工團拜，又要拜託佢哋幫手喇！順帶幫老闆同老闆娘提一提，為咗令所有人都有飽飯食，無論單身定低收入人士，飯店年終無休，連大年初一都照做生意，寧願自己唔休息，都希望同客人一齊過節！桂香燒腊飯店，我小北斗阿肥姑娘誠意推薦！…查看更多

【一起支持愛心飯店！】今日機構一年一度大型活動，要訂65個飯盒俾同事&義工，統籌同事正懊惱物價騰貴，我即自動請纓幫手，幫襯同我細妹合作多年、經常派大大盒美味飯盒俾區內長者同有需要人士嘅愛心飯店～桂香燒腊餐廳！三餸飯盒實有五餸，拎上手已十分重手，未打開已香氣撲鼻，一打開即時O嘴，足足夠我食足三日！衷心多謝老闆&老闆娘落足重料，用心製作，準備送貨，個個同事&義工都食到讚不絕口，等陣活動一定Sure Win！現今嘅香港，家庭式經營嘅商店越嚟越少，不計成本嘅愛心飯店更值得我哋支持！如果大家下次經過或需要訂飯盒，不妨幫襯吓！願意同人分享愛嘅人，絕對值得讓人愛！支持小店！支持桂香！…查看更多

妹妹買回來，一如標題，螺肉應由蒟蒻造成，似螺肉，口感佳，多醬汁，頗美味！但對我來說味道偏淡，如點甜醬更美味，不過價錢偏貴，要$40一盒！其他齋鹵味也不便宜，眾款之中以齋鴨腎最入味，其他各款都是偏淡，因此建議只試螺肉和鴨腎！…查看更多

幫襯第八次了！通常吃通粉，味道中規中矩，清炒西蘭花也不錯，點茄汁吃，可全清！但今晚感覺有點不好，話說我們叫了三個小炒，其中一個是半隻雞，原來餐廳正做優惠，叫兩個小炒加$10可加半隻雞，但我們落單時看不見banner,女侍應竟不作聲照計正價$73！我們看見了banner隨即向她查詢，她才說幫我們改回加$10優惠！！！三個小炒中，蝦仁炒蛋滑，蝦亦爽；XO醬西蘭花炒鮮魷亦好味；但嗰半隻十蚊雞………老到似食雞肉乾！！！若不是媽咪不幸入了醫院，過去十多年我絕少出外進餐，但這一次，幫襯八次了，竟有這樣的經歷，有點令人失望！(第一次在長沙灣廣場分店，感覺不錯！)…查看更多

同細妹喺醫院探完媽咪，大家都未食lunch，決定去呢度食個豐富嘅晚餐。心情係十分悲傷低落嘅！但遇見有禮貌親切肥哥哥老闆，佢友善嘅招待，頓感片刻溫暖！我同細妹一人一份套餐，要乜有乜，多粥多飯得，多菜唔要飯又得，因素扒賣哂變咗兩條珍寶size鮮竹卷，邊食仲邊問答我哋夠唔夠？話有乜需要即管講！嗰刻真係感動到有啲想喊！我諗起昏迷中嘅肥媽，如果我能帶埋佢一齊嚟食就好，可惜，今生已再冇機會…講返啲餸，我同細妹唔要粥飯係啱嘅，因為淨係餸已經係四人份量！南瓜大大舊，出奇地軟腍又微甜、雞蛋同豆腐本身係我至愛，兩款同樣好味，我點咗私伙七包茄汁！茄子亦夠腍，炒雜菜就係椰菜同白菜，總之卅八蚊一大份，真係抵到唔知邊度搵？細妹要湯我要豆漿，豆腐甜淡適中，如果大杯啲就更好了！總而言之，小店本身已值得支持，食物美味價錢又合理，再加埋親切友善嘅服務，下次有機會，我會再去嘅！（只係希望下次唔係帶住悲傷嘅心情去！大家到我嘅專頁或blog就知我悲傷嘅原因！)肥哥哥，俾心機！…查看更多

Joey妹就嚟生日 ，細妹建議嚟呢度慶祝，呢間係我去過嘅第四間素食自助餐廳，同之前三間完全唔同！《寶蓮素食》係傳統齋舖，唔能夠比較！感覺比《無肉食》少款式、少份量同少啲人；比Red Mango價錢實惠啲！我食咗兩轉，倒咗好多茄汁；飲咗兩杯微甜嘅熱夏枯草，好舒服；最鍾情係佢個紅豆沙，我自撈咗pat豆腐花，前後encore兩次，好味！飽哂！煎炸嘢我完全唔啱，太油嘅亦冇興趣掂，最欣賞係佢個口水雞、素肉餅同皮蛋豆腐！咕嚕肉唔好食！菜心口感正常，通菜好黑冇夾到！Brownie朱古力味道濃郁，感覺好甜好rich！好似細個食過嘅莎莉雪芳蛋糕！其他款式唔多，全部普普通通！公眾假期每位$88，我哋一行四人早上11：30開門就去到，少人啲、寧靜啲、夾嘢食方便啲，不過我食嘅份量就少啲，應該回唔到本！枱與枱之間出奇地窄，出入要十萬個小心！整體感覺係，去吓無妨，但食量小嘅最好平日$68先去！Anyway, 多謝細妹！…查看更多