Caisy Cheng的個人專頁

環境超靚！望住維港夜景，燈光閃閃浪漫到爆。本身諗住去馬灣分店可以望埋青馬仲正，不過驚太趕，北角依間係個商場都幾多嘢行仲寵物friendly。第一道菜西班牙烤辣椒，外面烤到香脆，內裡啲子keep到juicy，開胃得嚟唔會太刺激。烤蘆筍食落好脆，但保持鮮甜。簡單烤煮同鹽調味令蘆筍嘅鮮味出晒嚟。主食叫咗香煎銀鱈魚，外面金黃酥脆，魚肉嫩滑，個汁有啲酒味，清新得嚟微醺，食落唔會膩。最後烤豬排骨無得頂，肉質軟嫩，表面厚厚一層芝士焗到可以拉絲，加埋唔同醬汁味道好豐富，配埋熱辣辣薯條好野味。唔單好味，每碟仲好靚，拍照打卡一流！…查看更多

食完飯諗住轉場甜品舖hea下，點知中哂伏。勸大家walkin小心，上網research吓先好，唔好好似我哋咁傻下傻下見舖頭就入。見佢個樣似傳統糖水舖，連中式糖水都出哂事，芝麻糊好稀好淡，似溝水，似黑芝麻湯圓個芝麻醬。喳喳係酸咖？？估計可能加咗百合定唔知咩，應該唔係變壞嘅酸，但真係唔好食，啲豆都煮得唔夠爛，芋頭都未煮淋。環境同服都中規中矩，但野食真係出哂事。一上網睇評分先食唔係個別事件，可惜食完先知。。。…查看更多

想搵個坐得舒服又唔限時嘅地方，突發奇想去咗board game cafe。想坐得舒服傾計為主，點知嘢食好有驚喜。試咗個牛肋條飯，肉質鮮嫩細緻，煮到好入味好腍完全唔老唔鞋，韓式甜辣汁好惹味。朋友食肉醬鴨胸意粉，偷食幾啖發現完全唔頹，茄汁芝士粉配到個汁好好食，鴨胸煙燻過好香口。另外加咗客瑞士雞翼，炆得好腍，瑞士汁好香濃入味，勁好食。完全冇諗到樓上cafe啲嘢食咁好食，同老闆傾咗兩句發覺佢煮嘢食好有熱誠，牛肋條會預先又醃又炆咗幾個鐘，連杯凍朱古力都係精挑可可粉溝鮮奶打出嚟，對食物質素好有堅持。老闆仲好好介紹我哋玩啲輕鬆board game，收工放鬆紓緩吓都市壓力，好似返返中學時期約埋同學仔去樓上cafe飲杯果汁特飲玩board game嘅快樂時光，係90後嘅情懷haha…查看更多

Cafe裝修簡約但精緻，和諧嘅大地色，坐得寬鬆，同閨蜜傾偈嘆個精緻晚餐一流。:)鵝肝多士超肥美，好香口加埋塊脆多士中和返個油膩，口感豐富。牛舌串燒都燒到好啱火喉，唔會太韌太乾，留意到佢有happy hour個餐牌幾抵仲要去到10點，不過今日冇諗住飲酒，純粹叫咗一串嚟過癮一下。龍蝦汁蟹肉意粉個汁調得好好，意粉夾埋啲蟹肉蘑菇同蕃茄仔配得好惹味好夾。賣相都好精緻。花雕醉雞有啲中西合璧嘅fusion菜嘅感覺。焗雞應該係浸咗花雕酒拎咗去焗，所以食落脆皮，亦有淡淡嘅酒香。加配埋燒蜜汁出奇地有幾夾，同埋份量都多，配埋雞髀。個環境真係好舒服，好有情調可以慢慢坐飲吓嘢打吓卡傾偈傾成晚。啲職員都好helpful會解釋餐牌。同埋佢有室外位置可以比寵物friendly或者俾人包場搞event chill吓。…查看更多

裝修懷舊型格，沙發卡位坐得幾舒服，仲有上菜極快！啱晒lunch hour完要趕返工嘅人士試咗冬陰功湯，酸味好夠，唔會太辣，湯裡面有好多蘑菇，開胃到停唔到口～～和牛炒粿條鑊氣十足，口感滑順，媲美大排檔嘅乾炒牛河，加埋一點辣椒醬，好過癮！Pad Thai配菜有蛋、芽菜，啲蝦肉厚實，味道少甜。杯西瓜smoothie出想像中正，似鮮榨，清新解渴冰涼，油膩感完全消失個芒果冰冰甜甜口感滑嫩，配合唔會太甜嘅糯米飯，refresh啱啱好。…查看更多

依間餐廳環境超寬敞，金光閃閃嘅裝修，感覺好似宮廷貴族，好啱打卡冷知識餐牌見到招牌菜，特登上網查咩叫chutney，原來係印度醬料，坐低完餐廳亦自動上咗三款喺枱，味道辣得嚟幾清新，綠色薄荷黃色芒果紅色估唔到馬拉炒蜆配菜勁多，層次好豐富好惹味！再加埋杯芒果lassi，creamy清新中和返啲辣味。羊膝咖喱唔係嗰種油膩嘅creamy咖喱，湯汁味道都好濃郁，煮到好腍好入味。好鍾意個炭燒八爪魚，好腍但又唔韌，味道開胃口感又好正，仲有麵包烤肉串，食完個待應搭訕，原來個廚之前喺巴基斯坦高級酒店學廚，專攻香料同燒烤，係正宗巴基斯坦菜…查看更多

平日中午都要等位，難得今日條隊比較短。食咗蟹黃生煎包，真心爆汁熱辣辣超好食，蟹黃味好足，超級滿足。雞湯小雲吞湯底清清地，唔會太咸，個皮又薄又滑，一啖一個啱啱好。同埋好鍾意呢間舖頭豆漿係任添，仲要係低糖感覺好健康。豆沙鍋餅同埋炸雞扒都係即叫即整，雖然等得有啲耐，但係見到佢熱辣辣上枱都值得。好鍾意鍋餅個脆皮，加埋軟綿綿嘅豆沙，甜而不膩，口感好正。最後仲有個青瓜粉皮，完全估唔到咁大碗，青瓜份量都好多，切得有好細，夏天食好開胃。…查看更多

喺中環，依一間中高檔次嘅茶樓一向定位唔錯，坐得舒服嘢食又精緻，枱同枱之間個距離都大，唔驚傾生意俾人聽到。叫咗幾個點心炒飯同埋小菜，嘢食如常精緻幾好食，價位亦都如常偏高。炸嘢少少過油，但係幾好食，配埋個沙律醬幾開胃吓。豆腐煲煮得幾入味幾嫩滑，加咗冬菇都夾都入味。炒飯就普普通通，賣相同味道都一般。另外有少少敗筆嘅位在於服務態度真係弱咗，感覺上樓面啲人係少咗，雖然食客好似都係少咗，但係揮極手啲職員都好似睇唔到，問多佢兩句就開始唔耐煩……查看更多

香港舊式茶樓已經越來越少，所以間唔中都去蓮香樓朝聖一下。感受仲可以推車仔拎點心吸印仔嘅過程。平日中午時段兩個人去好好彩唔使等位直入，不過大家預咗要搭枱同埋會坐得好迫。最後一張圓枱坐咗四個人，但其實當啲點心擺晒上去有少少迫。建議大家點心逐碟逐碟拎，唔使一次過太興奮拎太多，因為張枱真係唔夠位擺。點心選擇種類都好多，好多傳統舊式點心都有。尤其見到好多即叫即整嘅點心。食咗燒賣蝦腸，正常發揮。同埋體驗感十足，因為喺架車仔搵到一籠燒賣都唔容易，炸鮮奶略嫌唔夠熱，應該係炸好咗喺度推來推去等人拎。個鵪鶉蛋幾好食，建議大家可以一試。包點熱辣辣都幾香，同埋最緊要係軟綿綿。另外見到好多人排即叫即煎蘿蔔糕，睇過賣相唔錯，可惜條隊太長冇試到。…查看更多

身為麻糬控，見麥當勞又出咗新嘅麻糬批！梗係即刻要去試吓啦。同之前幾款新批一樣，都係同蘋果係一樣嘅外表同埋size，炸得亦好脆，咬落都好易碎，碎到成身都係。打開見到裏便黑白配嘅顏色，黑白分明都幾好睇，但係食落唔係太食到黑芝麻味，反而有啲似黑糖味偏甜，唔鍾意食太甜嘅朋友唔建議試。麻糬就正常發揮，份量都唔係太多，冇嗰種爆餡嘅感覺。主要係真係太甜，搞到成個批都唔係太好食。個人嚟講都係最鍾意紅豆麻糬批，可惜最近冇出。…查看更多

呢間隱世小店喺巷仔如果唔識路嘅都幾難搵，又特登轉入去仲要喺巷仔最尾。佢有分室內同室外，室內嘅有啲窄，但有冷氣。室外就大排檔摺枱風格，如果人唔多嘅都可以坐得舒服。叫咗沙嗲牛通粉，熱奶茶，配火腿蛋麵包。沙嗲牛有醃製過幾好味，配通粉係最大路嘅選擇，可惜冇乜附加配菜，食落有啲寡。火腿蛋麵包全部都普普通通，不過不失。麵包可以揀烘過偏硬身，搽埋牛油都幾香口。而茶餐廳嘅靈魂就係杯熱奶茶，佢亦有嘅水準，絲滑得來又有奶香又有茶香。…查看更多

老細請食飯，做細嘅成日都諗爆頭去邊度食好。依家中環嚟講係唔錯嘅選擇，價位唔算高，環境幾好坐，點心都精緻。推薦可以嗌個點心拼盤用嚟打卡好正，外型係雀籠形式上嘅，分兩層一層蝦餃粉果，一層係燒賣，配色打卡一流，味道又好食。然後按人頭叫咗蝦多士，可能因為佢價錢都唔平，所以期望有啲高，食落普普通通有啲失望，炸得係幾脆，不過冇乜味隻蝦，雖然大隻都炸到冇晒味同口感。另外叫咗啲包點同埋鳳爪牛肉球，正正常常。勝在喋喋點心都係新鮮熱辣，唔會好似有啲茶樓咁係凍住上。同埋佢點心選擇都幾豐富，大路嘅嘢同埋炸嘢或者炒粉麵飯都好多嘢揀。…查看更多

試咗佢哋嘅鴨肉河粉，真係有啲驚喜！一般講到越式河粉，大多數人都會諗到牛肉，但呢個以鴨肉為主菜嘅選擇，實在好少見。湯底清新，配上啲辣椒仔同青檸，味道好開胃。洋蔥同鴨肉嘅搭配，肥瘦適中，食落去口感一流。不過蝦頭膏炒通菜就有啲失望。蝦頭膏冇乜食得出，淨係食到鹹味，完全冇咩鮮味，令人覺得麻麻哋。通菜又有啲老，口感唔夠嫩滑，整體嚟講，呢道菜就唔算成功。:(凍鹹柑桔蜜係一個好嘅配搭，鹹鹹甜甜嘅味道，真係過癮。配搭，…查看更多

見而家興撈海鮮邊爐放題就去試一試旺角新開呢一間。感覺係幾新鮮嘅，同埋都乾淨。啲海鮮撈完比職員幫手清洗一下，然後就會俾返我哋拎返去位度自己煮。大頭蝦同普通草蝦都好生猛，蝦膏超多超正。蜆肉就一般同埋有啲腥個人建議唔好放太多。鮑魚都抵食爽口彈牙，自己調咗個靚嘅混醬，可以瘋狂食鮑魚。潮汕牛肉極力推薦，好似仲有隻叫日本A5牛都OK，其他熟食選擇都多，正常邊爐放題料諗到都有，連嘢飲都抌本，啤酒清酒雪糕Häagen-Dazs。除咗啲錢真係有少少美中不足，整體感覺都正同埋好玩，見到啲蝦彈吓彈吓咁。…查看更多

之前試過蜆肉面勁新鮮蜆肉勁多，一試難忘。今次encore是牛尾刀削麵，一樣係冇得頂。牛尾份量唔算多，感覺得六至七塊。但肥瘦超均勻，完全唔會好油膩得來，肥肉又好滑好好口感，仲好有牛肉味添。本身都唔係太識牛尾呢個部位，食完個面迅速愛上。刀削麵口感一如既往嘅彈牙，湯底都係以清新為主，而牛尾都上面嘅配送係雞蛋絲，食落一啲都唔頹，賣相同味道都一流。不過可能連鎖舖，個餐嘅份量越做越少，醃蘿蔔好似得嗰兩三嚿，好想食多碟……查看更多