草根foodie的個人專頁

今次係小弟第二次去食呢間，第一次係試佢嘅普通拉麵，但係今次決定試吓熱沾麵。小弟到嘅時間係大概晚上八點，等咗15分鐘就有位。今次小弟喺張紙度剔咗要所有嘅配料，麵硬度普通，初初都好驚碗麵會煮到有啲淋，因為小弟鍾意食比較硬嘅拉麵，上菜嘅時候，見到啲拉麵煮得唔錯，幾彈牙。而且沾麵嘅湯比較濃，令到啲湯比較容易掛上去麵嘅本身。湯嘅味道比較鹹，所以如果就咁當普通拉麵湯底咁飲，就會覺得鹹咗少少，但係如果撈埋面一齊食，就剛剛好。總括而言，喺呢個價位嘅拉麵算係唔錯，環境亦都乾淨，唯一覺得坐得有啲比較迫。不過如果你早啲去攞位，一個人都有機會可以坐到四人枱，咁樣就可以坐得舒服啲。…查看更多

小弟第一次寫食評，請各位高抬貴手多多指教。之前喺地鐵站成日睇到莆田廣告，已經有啲想去試吓，去到荃灣廣場莆田嘅時候，見到入邊嘅座位都算闊落，乾淨，等咗大概20分鐘就有位。一入到去就叫咗三樣餸，分別係蒜蓉蒸海蟶，興化炒米粉，金銀上湯時蔬。第一道係蒜蓉蒸海蟶，蒜蓉味極香，面頭有啲蔥花同埋芫荽，滾油淋喺面頭，令到香氣極之突出。首先清潔方面，蟶子清理得好乾淨，冇沙，每一隻蟶子都好飽滿，不愧為佢嘅招牌菜，蟶子加上豉油嘅味道配搭非常之好，整體嚟講，呢個價錢CP值極高。第二道係興化炒米粉，米粉炒得極之乾身，呢道主食唔係重味道，不過調味剛剛好，唔錯唔錯。最後一道係金銀上湯時蔬，識食嘅一定第一啖試吓佢個湯，一飲落去，鹹蛋黃味非常之濃郁，送飯一流，加埋啲菜同埋皮蛋一齊食真係一流。總括嚟講，環境舒服，坐得尚算闊落，食物質素不錯。下次嚟到一定會試鐵板鹽焗蟶子。諗起都有啲肚餓🤤…查看更多