Ted Lau的個人專頁

放假同屋企人行去海傍搵嘢食，見Donki隔離條巷好多食店，見呢間Fish n Chick比較光鮮同埋多人就入去食。雖然我一家人多納集嘢，但三大兩細都仍然坐得舒服。午餐價錢合理，揀咗四個set lunch：煎鯛魚配雜菜、炸比目魚配薯條、半隻香草烤雞、與及卡邦尼意粉。另加白酒汁煮蜆。比目魚肉質鮮嫩多汁，皮薄香脆可口，蘸上估計加咗酸瓜碎的沙律醬，我覺得好夾味好好味。而我老婆話呢種就係去外國旅行時啲炸魚既味道。咁即係咩味道？總之大家意會啦。而小朋友就最鍾意食薯條。煎鯛魚賣相立體好看，魚皮煎脆咗好香，肉味濃，配洋蔥三色椒等雜菜味道也很配合，而且隻碟有花心思裝飾過，真係色香味俱全。呢個味道我識形容啦，就係去高級西餐廳食煎魚main course 時有啲賣相的味道。烤雞就皮香肉滑，唔會榎歰歰（鞋烚烚）咬落有雞汁夾少少雞油流出，唔會好重香草味，可以食出雞香。而雞皮都烤出大部份油唔滯口，所以我也忍不住連皮都食埋。問職員啲雞好食係咩地方的雞？得知係清遠雞，唔怪之得。而卡邦尼意粉就無需形容，都係有蛋黃、忌廉、洋蔥、煙肉、芝士。但食落我覺得不錯唔油膩唔滯口，我老婆就好鍾意，佢話成餐最鐘意個意粉，有酒店食卡邦尼的味道。咁即係點？大家自行理解吧。另外我就最鍾意白酒汁煮蜆，蜆肉新鮮嫩滑香甜，有少少辣特別惹味。試飲蜆汁雖然有少少鹹，但因為辣辣地仲有濃香蜆味，所以我都飲咗好多匙羹蜆汁。飲品方面，海鹽檸檬梳打酸酸鹹鹹幾得意爽口、鮮榨檸檬熱飲就夠晒健康、熱薑味檸檬蜜糖茶就香口惹味、鮮榨橙汁我個仔話好飲（我諗佢甜甜哋乜都話好飲吧，haha）。而餐廳環境舒適，鄰近海濱長廊同Donki Donki方便散步行街，旁邊便是商場洗手間又十分寛敞乾淨。整體感覺舒適愜意，實享受休閒假日的用餐好地方。…查看更多

食個鹹蛋肉餅快餐加杯凍奶茶，基本嘢應該無得輸啦。點知中伏。個餐一到，碟餸。。。兒童餐碟上，碟的內圈圈唔到舊直徑7-8厘米的肉，而舊肉斷開兩部份唔完整的，肉餅厚度一厘米以內，肉上只有四分一粒鹹蛋黃，鹹蛋白。。。可能入咗肉掛。盡晒力連肉碎都撈埋，都食唔到半碗飯。卡位對面的情侶望住碟肉餅都陪我呆一呆，繼而有少少傻笑又唔好意思笑出黎。我知，我笨實咗。但縱不想掉假，都要夾晒啲肉碎以食埋那口飯。但我無用，食得半碗，剩下一半碗飯真係梗唔落…查看更多

和太太周末諗住食好啲，叫半隻海南雞(約$109)，一個蕃茄牛腩煲(約$70)同豬頸肉炒飯。想不到上菜時，海南雞半隻得例牌5件雞胸肉1隻雞翼，而蕃茄牛腩煲得幾粒牛腩碎粒(少過一碗牛腩麵)。咁我諗可能好好食，就試蕃茄牛腩，一試就知茄膏汁加芡開水。咁就叫侍應講蕃茄煲無蕃茄，半隻雞變例牌幾件雞，係咪攪錯咗，佢話係咁無錯。我於是直接找老闆，佢就同我講唔好意思，廚房姐姐新黎。唔緊要，肯改番俾我就算。換過碟之後，我見到店方從原本6件雞加咗多一半肉，看上去係半隻雞。食落發覺加番幾件肉，包括雞肶肉。這6件雞肶肉同出面食任何一間海南雞差唔多。但其餘的雞肉就係有一半咬到有渣的雞胸，有雪味同埋係隔夜唔新鮮的。從未食過咁難食！而再煮的蕃茄牛腩有改進，加咗兩粒車厘茄！成餐兩餸一飯無飲嘢，盛惠305！…查看更多

感覺蘇豪有人喜歡大排檔大件夾抵食、有人喜歡去半島歎廚藝吃環境。食在蘇豪，就是要吃那份BOBO族的格調和特色菜式的味之感動。以往去蘇豪尋味，經過「紅雙喜」定必給大宅門般的紅底金字醒目牌匾所吸引，但隨即給「無理由黎蘇豪食中國菜」的諗法而錯過大門。今次走進紅雙喜，發覺原來此店中西合壁，菜式美味之餘，令我感到一份貼心。小店富有中國特色，紅土牆、紅燈籠、囍蠟燭、紅布匾、紅揮春、木桌椅、串對聯、囍剪紙、囍屏風、繡花布、對鞭炮…，似喜慶、似新年、似嫁娶。小小地方，負責人不惜在牆隅設置層架，以洞房花燭夜為題佈置，除囍蓮、紅底印花鋁熱水壺、嫁囍茶杯套裝、紅囍燭、紅囍結外，仲加送紅雙喜火柴、囍淡奶罐等裝置，甚具特色。架下備有多款棋牌遊戲，給三五知己消磨。紅雙喜廁格寛敞，有懷舊街道相片、囍火柴盒等佈置；門鎖以深褐色金絲帶扣著打開；廁格潔白、無臭無香 (沒有史偉莎香精味)，光潔乾爽。我敢肯定，負責人應該係一個女性。餐桌上置公雞碟，沒有傳統青花大碗的「阻定」，是長方形小巧膠碟，不礙位，餐紙淨啡色，不喧賓奪主，有一種無印的感覺。餐前佐酒小食為點心籠合桃，點心籠精緻小巧，內置四粒合桃，讓人客在等候之餘落手落腳有勢藝。好。空有格調而食物一般，蘇豪比比皆是。令我不得不寫食後感的原因，是此店食物的素質。夏日炎炎，開完合桃飲番杯龍眼冰先。龍眼冰超過十粒龍眼肉，龍眼淡淡香甜，與坊間的台式甜水截然不同，飲得健康。餐湯為節瓜螺頭老火湯，無加味精，足料鮮甜，螺頭肉鮮嫩有咬口，啱晒成日無住家湯飲的我。前菜為萵筍海哲頭，萵筍鮮嫩海哲爽脆，陣陣麻油香，再蘸介末真惹味。此介末是高級貨，介香撲鼻。主菜煎羊架煎得恰到好處，表皮香脆、色澤粉紅、羊肉鮮嫩無羶味、肉汁豐富，蘸上薄荷葉醬及介末醬。超越高級扒房數百元的，物有所值！甜品心太軟，朱古力蛋糕並不太甜，配以雲呢嗱雪糕的甜香，不錯。但如果能焗耐啲，蛋糕外皮脆些就更有口感。見微知著，在食物的味道、營養、環境的舒適上下工夫，為錢是做不到的，相信小店老闆對經營餐廳和食客笑容有一份情意結。後記：飯後拖著老婆的手，踏上石板街大小不一的石頭，走過都爹利街的昏黃煤氣燈，雪廠街偌大的GUCCI廣告及中銀匯豐的霓虹光映入眼簾。感覺蘇豪。…查看更多

和Cova分開不覺一年，相約友好重臨，來一次味覺滿足。獨愛銅鑼灣利園分店那份舒適、寬敞的感覺：豪華的布置、侍應殷勤的服務與及親切的笑容。最最最重要的，還要那美味的食物。每一道菜都是味覺享受！最先侍應捧上一盤芝士條、咸餅乾及麵包方塊讓我選擇，我要了芝士條及麵包方塊。那條芝士條香味十足，醒胃。呷一口水，開始我的自助餐啦 ~第一碟 ‧爽口新鮮的三文魚，配搭一粒醃製咸果仁，一口咬下那種點點咸香，將三文魚的新鮮濃香昇華。‧巴馬火腿片、配搭厚切哈蜜瓜：鹹香與甜蜜混合起來又好好味喎 / 另一火腿片夾火箭沙律菜，那獨特菜香都唔錯 ~‧龍蝦沙律：千島沙律汁將龍蝦肉香、生菜片的爽口、芒果粒的香甜混合一起，我笑了，邊吃邊流露滿足的笑容。第二碟 ‧蒜蓉青口：乾爽無油的炸蒜粒舖滿在青口上，yummy‧雜錦沙律菜，配以油醋沙律汁，香。‧牛油雜菌：口中充滿牛油香味和菇味‧魚子醬雞蛋：半隻烚蛋白上釀蛋黃沙律醬，上有魚子醬。一口咬下滿滿的，濃濃的香蕩漾著…第三碟 ‧羊架肉配芥辣汁(期間見一個小妹妹捧著手中的啫喱，未走到餐桌已經忍不住伸脷舔弄那啫喱，卡娃e)第四碟 ‧白酒魚肉配青口蜆肉：用匙羮搯一羮白酒魚汁連魚肉一齊吃下肚，魚汁有濃濃的魚香和酒香，魚肉也爽滑，yummy第五碟 已經好飽，終於要食Cova最出名的甜品，係我最愛吃的。先食一些小甜餅，單買要13-15元一個！泡芙入口如棉花鬆軟，咬下層層斷開爽口，配合吉士的香滑，真係好味到唔識形容呀！也有些麥維他餅底的，也有濃香朱古力忌廉的，也有滿滿生果的。第六碟 跟著食cake。朱古力醬蛋糕、Mango Cream Dome、Tiramisu、香蕉批…，我最愛的係燕麥餅和蕉糖布甸。一口燕麥餅咬下，滿滿的麥香與忌廉充滿口中，久久不散；有別一般蕉糖布甸的鬆散，似啫喱的實在，蕉糖亦很香濃。最後喝一杯香濃的cappuccino為今日的享受畫上完美句號。值得一提的，是這裡有個叫Tomy Chau的經理，教識我很多餐桌禮儀，只要你問，他便知無不言、言無不盡。很helpful的。他還帶我參觀餐廳的貴賓房哩。現不多說，有興趣的話去找一些tablemanner的網頁看看吧。利園Cova小資料Sunday brunch：HKD258，另收加一。1200 ~ 1430hrsTel: 29073399http://www.cova.com.hk/…查看更多