Starjennie的個人專頁

呢間由細食到大，位置喺上水街市熟食中心，最鍾意食雞翼牛根米，雞翼同牛根都炆到好入味軟爛，配埋多蔥多腩汁加埋秘制辣椒油，非常好味，仲有佢地嘅豬手同雞腳都唔錯，但雞腳好似要假期先會供應，而佢地嘅秘制辣椒油，夠香又夠辣，我有時仲會買樽辣椒油返屋企，食麵落d辣椒油好正。👍🏻…查看更多

今日過嚟聯和墟陪阿囡食lunch，唔知食咩好，又唔想去茶餐廳同人搭枱，行行下見到呢間Cafe唔係好多人，諗住求其食個午飯就入去試下，打開 menu都幾啱我同阿囡口味，叫咗咖哩豬扒、牛油果雞肉多士、雲尼拿雪糕熱香餅同飲品，整體味道唔錯，服務態度都好好，唔錯。…查看更多

環境不錯，有室內有露天，同三五知己聚會非常好嘅選擇，服務態度好。食物方面，味道很好，海鮮類好新鮮，最鍾意佢地生蝦，蝦頭仲會炸埋，好香脆，另外木瓜沙律清甜酸辣好開胃，咖哩蒜蓉包同串燒亦非常好食。…查看更多

一坐低就有杯港式奶茶，奶滑香濃。早餐環境不錯地方大，座位闊落，不嘈雜。員工態度有禮，收碟速度快。至於早餐，種類唔算太多選擇，都係d基本嘢嘅粥粉麵飯、點心、水果、麵包同幾款火腿等等，熱食方面如果可以多少少選擇就最好。另外第二日試埋酒店行政走廊早餐，相對行政走廊嘅食物選擇會少一半，食物方面精緻少少，如果想食粉麵粥嗰d要叫職員落order。而行政走廊環境會比咖啡廳高級d同少人d。但係員工服務質素就好參差，當時因為見好耐無人嚟收碟，我就行出去諗住攞嘢飲同埋順便搵個職員幫我落order，咁啱見到有兩個女員工企咗喺到講嘢，我就禮貌地請佢地幫忙落order，點知其中一個女員工面口好唔耐煩兼語氣好差咁叫我返埋位，佢轉頭會過嚟幫我落單，而另一個員工就即時同我講唔好意思，問我想要咩，但態度差嗰位員工就打斷佢，或者我打斷咗佢地傾計啦！所以人地先咁嬲嬲豬，咁呢刻我唯有默默地走開囉！…查看更多

之前可以掃code落單，尋日就要人手落單，店舖人手唔多，午餐時段亦都滿座，但係員工都好快手，落單都好快，上菜都快，唔洗等好耐，而且員工咁繁忙都保持禮貌。食物方面唔錯，湯類如忌廉湯，周打魚湯夠濃味，另外小朋友必點煮蜆、雞翼、麥卡夏麵包同埋意粉，好食，我就鐘意焗田螺，次次都會點，有無人同我一樣鐘意田螺配白飯，真係好香噴噴，另外加少少錢汽水、咖啡或茶任飲，大人小朋友都勁滿足，價錢亦都實惠。另外茄汁同芝士粉要加錢。…查看更多