晚餐時段同屋企人嚟到打邊爐，三個人叫咗兩個火鍋加一個豬頸肉套餐。本身覺得呢間嘢幾好食，所以連續兩日嚟幫襯，點知今日買單嘅時候一肚氣！短髮女侍應（貌似高級啲，因為制服不一樣），點餐時態度大大聲聲，表現得懶熱情，問佢火鍋套餐加$8青檸梳打可唔可以轉芒果梳打，佢口口聲聲答我可以，我先轉過去！豬頸肉套餐又話可以免費加熱飲，於是屋企人叫咗杯熱美祿。一個冇留神佢哋打張單，芒果梳打+$30，熱美祿+$9，然後無啦啦又有條外賣$1。買單嘅時候係另一個收銀，我同佢講，啲價錢唔啱，佢話係啱嘅，我話係你短髮侍應講可以加$8轉芒果梳打我先轉。然之後短髮侍應被叫過來，話自己冇講過，仲話芒果梳打正價，跟住收銀侍應即刻撞一撞佢手踭話係「半價」，跟住我即刻話「嗱，你睇吓自己都亂講！」，跟住短髮侍應好大反應話「得得得！呢杯當我請你飲！」。咩態度，我使你請，你係誤導消費者喎！仲有套餐嗰加$9 ，同埋無啦啦外賣多出嚟$1，全部都亂嚟！大家記得睇清楚張單！原來認真對單，唔想俾人搵笨都要受氣俾人鬧！…查看更多
