wai04的個人專頁

師傅仔平時都成日食，不過多數都係叫外賣，好少堂食。師傅仔外賣好好，一個餐都送，炒野快就半個鐘，慢都唔駛一個鐘送到，真係好方便！地方幾大，望落去都光猛企理，晏晝點幾鐘都有位，店員落單快，炒野又起得快，份量足料！XO醬豬扒炒公仔麵，鑊氣十足！雖然味道比較濃，但都絕對值得推介，耐唔時食一餐都唔算過份～雖然價錢係偏貴，可能因為唔係餐，加杯凍飲堂食要58$，下次可以試下午餐d set。街坊真係要set低個電話，唔想煮又唔想落街，叫師傅仔都真係唔錯。…查看更多

晏晝同老婆落屋企附近搵食，好耐無食過意樂，就行去食下。點幾鐘餐廳入面都唔算太多人，大約七成滿。叫左個挪威煙三文魚海鮮pizza同埋白汁吞拿魚肉醬焗長通粉，一杯熱檸茶同一杯菠蘿乳酸特飲。Pizza望落去好似好正，成塊都佈滿芝士，對於我呢個鍾意食芝士ge人黎講，見到都流哂口水。不過，食落原來就無乜芝士味，個落差真係幾大，少少失望～不過整體味道係可以接受。呢個焗意粉都幾得意，原來係一半肉醬，一半白汁。食落都幾好味，白汁夠味，肉醬又唔會太咸，唔錯。整體黎講都唔錯，可以一試～…查看更多

同老婆落樓下搵食，行過俾張「素食」餐牌吸左睛，望下望下覺得可以一試，就開門入去。坐低睇下餐牌，叫左個 菠蘿豚肉漢堡配薯條 同埋 黑醋汁煙鴨胸意粉，另外加左個洋蔥圈（跟餐叫半價）漢堡個味好夾，菠蘿感覺清新，豚肉同個汁味道唔算重，感覺好balance ，唔錯！鴨胸味道唔會太濃，而且煙燻味唔會太重，幾好食。兩杯飲品相對上失色，因為味道好似道地果種合成柑桔檸檬味。洋蔥圈炸得香口，又唔會炸到好燶好乾，值得推介。整體而言，性價比幾高，每人都係60$度，可以一試。…查看更多

同老婆係屋企附近搵食，今日就搵到呢間東悅冰室，門面都算幾靚，但估唔到入面其實幾細，得挛七張枱。我叫左個雞扒公仔麵，老實雞扒係煎得好香好好味～外脆之餘，d肉又唔會煎到乾哂，都仲幾有肉汁。整體感覺唔錯！係會想再食～不過份量就比較細碗。老婆叫左個常餐，沙嗲牛麵d沙嗲牛就少得可憐～包、煎蛋同腸仔就中規中矩。整體黎講，食物方面，係絕對合格。不過衛生情況好似一般。後門無閂，係用餐位置可以望到後巷，都好影響食欲。…查看更多

小弟牛一，老婆好好咁book左殿大喜屋同我慶祝～仲好醒目咁book左5:30-7:30，因為7:30前埋單有折。其實都好，食放題肯定飽到嘔，食到太夜未消化就訓實變肥仔肥妹，所以早食都有好處～一如一般大喜屋的情況，係餐廳樓下條街無度排長龍等入座。其實都係造勢的一種方法。一坐低即刻劃一轉刺身。味道鮮甜，感覺新鮮～真係高於一般放題的水平。仲有大量唔同種類的熟食，如炒薄片和牛、榴蓮炸蛋（必食推介！）、芝麻雞翼、一口牛柳粒、焗元貝等等等等。水準都係唔錯。另外仲有咁上下時間先開始供應的海膽手卷。生果櫃亦有車厘子（遺憾見到時已被一掃而空），雪糕有movenpick 同Haagen dazs 啦。不過缺點始終都係張櫃太細，放唔哂d食物～不過食物質素而言係值得推介。…查看更多

朋友生日，一大班人同佢去花月庭食自助餐慶生～花月庭自助餐有兩個時段，亦可以俾貴少少食全時段（好似係七點食到十一點咁上下），用埋openrice coupon ，平均一個人都係五百幾蚊，價錢都合理，食多幾隻蠔都係番度～基本上我就成程都無乜點食熟野，不停去排生蠔～呢度一個人每次可拎兩隻，一個師傅開，一個負責沖水，流程都算快～人龍都係十個八個咁上下～排完仲可以去埋隔離拎刺身。主角生蠔雖然細細隻，不過都幾肥美，同埋都鮮美，就算唔落調美齋啪都好味。大約應該食左兩打至兩打半左右，都算回到本～熟食種類就少d，拎食物的位置都比較少，我諗佢主打都係食蠔。btw，服務算係有水準，清理枱面污糟碟的效率好高，讚👍🏼…查看更多

返工經過雪山冰室，成日經過見到TBB有人係度拍野，見佢裝修完咪入去試下，不過就有d失望。晏晝都幾多人，一個人食搭枱是常識吧～睇完餐牌其實都唔知食乜好，於是求其叫左個特餐：檳城叻沙摻摻。賣相就都可以，望落去好似幾惹味。但食落就好似無乜味咁，d湯還湯，麵同粉還粉咁... 然後隻蝦係無挑腸... 細節決定成敗！個櫻花蝦炒蛋陣味唔係好夾，食落怪怪地...咁樣收我五條野，真心唔抵...可能係呢個餐唔好食，下次有機會試下其他～…查看更多

晚飯一支公，去左長發冰室。七點幾全部枱都full，要搭枱。因為開左年幾，環境都乾淨新淨。叫左個晚餐J，美國豬扒漢堡扒，揀左黑椒汁。隨餐跟碗例湯同熱飲，凍飲加三蚊。例湯幾足料，唔會好多油係上面，好似係蓮藕煲豬肉紅蘿蔔。塊豬扒超大塊，煎得幾香，味道唔錯。漢堡扒正正常常無特別。碟邊跟幾條菜，算係平衡番，唔會淨係得肉。個黑淑汁味道好濃，好喊，建議如果唔鍾意重口味，可以試下其他汁，或者叫佢少汁。整體份量都大份，男人食都夠。…查看更多

一碗肉燥 係長沙灣開左一段日子，但無乜機會入去試，今晚終於同太太黎試下。望落鋪仔細細原來入面都幾多枱，七點幾晚市唔駛等位，正。自己劃飛，一人一張好似唔太環保。主要係揀麵定飯，同埋咩餸。飯就揀左個撈起，即係可以揀三款餸。揀左黑糖豬軟骨、台灣腸同埋雞翼，加埋本身有的肉燥同埋半隻蛋，都幾豐富。豬軟骨味道普通，夠淋；雞翼做唔到有兩隻中翼，不過味道無乜特別；台灣腸有一條，一般台灣腸味道；蛋無特別；肉燥揀左辣味，基於本人唔算好食得辣，所以覺得有少少辣，不過可以接受，送飯一流。三餸黎講幾抵食。另外叫左個回魂黑醋豬軟骨撈麵。整體評價同個撈起三餸飯相約。個餐包杯蜂蜜紅茶，加左$6轉左其中一杯做泡沫珍珠奶茶。蜂蜜紅茶幾好飲，杯珍奶就普普通通不過不失。最特別係呢度凍飲熱飲同價，係香港好少有。整體黎講都值得推介，五十蚊包飲品味道唔錯。行過可以一試。…查看更多

晚餐去「漁樂」食，星期日晚7點幾都算多人，差唔多滿。兩個人坐卡位，都算舒適。叫左三樣野：泰香金不換牛肉炒金邊粉、泰式燒野菌茄子 同 青咖哩雞泰國香米白飯。燒野菌茄子，燒過的芝士鋪係野菌茄子上面，賣相相當唔錯。不過食落就真係爭少少，芝士味滲唔到入d菇同茄子度，茄子燒得唔夠，中間仲有好多水同好硬，無燒茄子果種香淋。青咖哩雞飯，青咖哩味道好淡，完全唔覺自己食緊咖哩。雞都算多，但有d鞋。牛肉炒金邊粉，望落去炒得好靚，好有鑊氣。但食落就無乜味，唔知自己食緊乜咁...整體黎講，呢間野味道比較淡口，如喜歡重口味的，最好就唔好試。…查看更多

去元朗飲茶，搵到呢間喜尚嘉喜，地點都算方便，係千色附近。酒樓地方都算寬敞，唔會背脊貼背脊咁坐。點心大都正正常常，唔會話好出色，又唔會話好難食，真係四個字可以形容——不過不失。蝦餃d蝦都大隻；蝦腸都係大大隻蝦，不過有d翠玉瓜係入面，口感都幾奇怪。鳳爪排骨飯望落去好大煲，但原來個煲好淺，分左出黎都係兩碗飯度。流心奶皇包真係好似溶岩漿咁漏出黎，算係幾驚喜。整體黎講，成餐茶都一般般，勝在服務態度幾好，加番少少分。…查看更多

朋友介紹尖東半島中心的日式放題店，一於試試佢。食日式放題，其實不嬲都去開「大乜屋」，貪佢食開又出名，質素有保證。之但係出名反被出名誤，宜家book位又難，隨時要早幾星期book，然後坐位又迫，叫野食又要等；諗住叫多少少等佢慢慢出，點知佢一野出哂，張枱細到根本擺唔落野食～於是咪周圍八下有無另類放題店，朋友就介紹左呢間「日悅」。首先個場都算幾大，而且又唔算多人，可能因為係平日。兩個人佢都直接俾張四人枱你，對於我呢件大件頭人氏，真係要俾個like佢。食品黎黎去去都係果d，魚生都算正路，賣相同味道都OK，種類都夠食。熟食方面，和牛真係必食；另外如果食榴蓮人士真係必點個炸榴蓮。飲品種類都多，另外雪糕就有哈根大師 同埋movenpick，算係有得揀。整體係滿意，食厭左「大乜屋」可以一試。…查看更多

晚飯不想在家煮，於是兩口子便到附近的茶記用膳，試試這間望落去都乾淨企理的巴打冰室。地方都算大，而具座位唔會太迫。可能平日晚市的關係，客人唔算多唔駛等位。叫了一個特餐D，白汁芝士豬扒撈公仔麵（配煙肉火腿炒蛋及迷你豬仔包）同埋 牛柳粒配肉醬意粉。火腿炒蛋、奶油豬都無正正常常無特別（睇番相同餐牌，先發覺無左煙肉）撈公仔麵就比較大鑊... 首先公仔麵比較濕同淋，唔夠爽；另外個汁相當一般，唔夠芝士味，亦都撈唔到入公仔麵同豬扒入面，比較失色。反而個牛柳粒肉醬意粉比較出色，牛柳粒剛剛好，香口惹味又夠淋身之餘，一D都唔韌，好評！肉醬意粉正常水位。整體黎講都滿意，可以再encore個牛柳粒意，同俾多次機會試下其他野食。…查看更多

老婆生日，左搵又搵搵到朗豪坊的丸十壽司。呢間野係標榜係用精米，有興趣可以試下。當日係星期四，晚上都開始多人，睇佢鋪仔細細原來內有乾坤，入去轉左仲有排「室外」座位，配合朗豪坊的天幕，氣氛相當唔錯，適合情侶同鍾意無咁壓迫的朋友。叫左四樣野：雜錦壽司盛合、親子卷盛合、溫泉玉子伴燒牛肉飯、炸軟殻蟹壽司漢堡。壽司 同 卷物 水準高，都新鮮。燒牛肉飯極惹味，牛肉燒徥好香，d飯真係比平時食開的珍珠米更有口感，強烈推介。炸軟殻蟹壽司漢堡其實唔知點食，最後都係分開咁一層一層食。軟殻蟹唔太咸，味道香甜。總結，都值得推介鍾意食日本野的朋友。…查看更多

路經尖沙咀，去左「元朗冰室」。星期日晚市八點幾，唔太多人係度食，加上鋪頭好大間，大把位坐。呢間最出名係馳名厚豬扒，真係好厚好大塊，大塊過你塊面。豬扒外脆內軟，口感一流，仲要好多汁，勁正～不過司華力腸得半條，感覺有點小家。另外叫左一個炸雞髀蒜茸多士辛辣麵，炸髀香而不油，不比厚豬扒差。蒜茸多士不過不失，辛辣麵正常水位。二人晚餐一舊水落到樓仲要食到你又飽又滿足，係尖沙咀真係邊度搵？誠意推介尖活咀「元朗冰室」，平價之選。PS 啱哂毒L一個人食～…查看更多