墨魚燒賣的個人專頁

今晚見唔係太肚餓, 諗住食少少嘢就算, 於是去咗附近買個海膽三文魚籽手卷當晚餐, 盛惠$74.外賣拎到返嚟食都只係相隔5分鐘左右, 但係塊紫菜係已經完全腍晒, 我已經有少少失望... 估唔到食食吓竟然食到頭髮, 真係超級嘔心囉! 搞到我舊手卷食到一半都無再繼續食, 大半舊手卷白白掉了落垃圾筒, 嘥晒啲嘢😡. 真係有無搞錯呀, 你身為做壽司手卷刺身呢類理應格外講求衛生嘅店舖, 衛生情況竟然可以咁差, 真係嚇人, 我以後都唔會再幫襯囉. …查看更多

今日約咗個凡人朋友去食lunch. 我地11點半去到, 想要牛仔骨, 話賣晒. 想要cheese cake, 又話賣晒🙄. 如果大家平日想黎食生酮餐, 過咗12點應該可以唔駛黎🙁.無乜得揀嘅情況下, 叫咗個生酮墨西哥香辣雞扒, 一個生酮伯爵茶鬆餅, 一杯cream latte(問咗店員, 佢話係落whipping cream, 無加糖).雞扒個款同味道真係普通過普通, 我喺屋企自己整可能仲好食過佢, 仲要賣成$120🙄. 個鬆餅就正正常常, 都好有伯爵茶味. 同個fd喺餐廳坐咗2個鐘吹水, 最大鑊嘅係, 明明吹水吹到興高采烈, 但坐坐吓我竟然覺得眼瞓😳!? 平時我好少會覺得眼瞓, 令我有啲疑問呢個係咪正宗生酮餐😣. 總括而言, 呢間餐廳性價比低, 唔會再去.…查看更多

身為奄尖港女嘅我, 好少對人對事讚不絕口, 不過今晚呢間餐廳真係令我非常喜出望外.首先呢間餐廳係用某個app訂, 多個時段都有50% off, 不過最後我地無用到呢個優惠, 叫咗個dinner for two, $494+10%, 有龍蝦湯, 沙律吧, 一個扒類, 一個飯麵類同飲品.首先沙律吧質素不俗, 不停食我至愛嘅薯仔沙律, 仲有我至愛之一嘅哈蜜瓜.個牛扒唔靭, 五成熟剛剛好, 薯條剛炸起, 好好味.最最好味係杯熱朱古力(雖然要加十蚊), 加咗層cream, 味道層次豐厚, 勁好飲.侍應又nice又有禮貌.人唔算多, 空間感夠, 坐得舒服.今餐我比100分.…查看更多

頭先7點入去, 被安排坐最近門口張枱, 冷氣機就喺頭頂, 啲冷氣風兜口兜面吹落黎, 勁凍勁大風, 啲頭髮比佢吹到飛吓飛吓, 大風到成個頭吹到亂晒, 問侍應有無其他座位, 佢淨係話無, 完全無意識話幫忙較一較個冷氣風, 我同朋友即刻起身走人, 從此blacklist! 最憎啲冷氣勁大勁凍仲要吹正你但又唔會搞搞佢嘅餐廳!…查看更多

父親節, 去港島區散步之前, 先做個孝順女.帶兩老去香宮飲茶, 但食物同服務卻令人極之失望.一坐低佢只係比咗個叫餸嘅menu, 無比點心menu, 問咗個侍應, 都唔知佢係替工定新手, 竟然hea我話點心係埋叫餸menu裏面, 結果我要問咗兩次先拎到個點心menu 😒.啲點心, 好一般, 最嬲係個雪山叉燒包, 唔熱嘅.甜品叫咗個焗布甸, 等咗半個鐘, 侍應話焗完出黎效果唔好要再焗, 問我地仲等唔等. 😠 漏咗單咋吓咶?! 堂堂5星級酒店米芝蓮餐廳啲廚咁渣架咩？！份量同火喉唔係應該已經掌握好晒啦咩！？咁容易焗衰咗?! 😡一肚氣, 服務同食物與價錢不乎正比, 唔會再黎幫襯!…查看更多

家人生日話想食呢間 早幾日用Yoho Mall個app訂座, 點知話是日不設訂座好啦打電話去試吓啦 都係話無得訂枱好啦今日早啲收工, 7點去到餐廳, 見到裏面明明大把位, 諗住入去啦, 點知個侍應話已經截咗單7點鐘已經截咗單? 咩料呀？！比佢玩死, 你一早喺電話講話今晚唔做生意算把啦！浪費我啲時間走黎走去以後都唔會幫襯呀！…查看更多

我喺日本生活過大半年, 香港既拉麵, 實在係令人好失望… 甚至乎香港既一風堂, 其實我都覺得不外如是囉… 至於近期好出名既豚王, 咪玩啦, 我唔會排個幾鐘去食一碗拉麵囉… 雖然我唔係咩食家, 但好食同唔好食, 我都仲講得出, 好多人話香港同日本既水質唔同, 所以就算一樣既材料一樣既師傅, 都未必煮得出一樣既味道喎… 不過最近有一間新開既拉麵店, 係我喺香港現時為止食過最好食既, 佢喺元朗教育路, 名字叫”焰”. 點好食法? 我覺得湯底夠濃(我去兩次都係叫黑白焰), D叉燒夠軟夠滑, 我係可以成個湯底飲晒架囉~~ 同埋佢呢期新舖開張, 會送汽水同溏心蛋. 另外果度既咖喱飯仲係免費加飯架~~ 不過佢衰就衰在收太早, 好似十點就關門架啦. …查看更多

元朗近打冷同正記大排檔對面開佐間新既日本餐廳, 間舖好細, 唔留意真係唔多覺. 星期日同流沙包去佐食飯, 原來佢專門食日式串燒同埋日式火鍋. 我地叫佐個海鮮火鍋, 有好多配料呀: 素菜類: 冬菇, 蟹柳, 粉絲, 菜, 獅子狗丸, 粟米, 金菇, 紅蘿蔔肉類: 肥牛, 豚肉海鮮類: 中蝦, 扇貝, 帶子, 鯇魚片 湯底係豬骨湯大家估下呢個set要幾多錢?? 只係$142咋... 係咪好抵呢? 如果係出面食同一樣既野, 起碼都要三舊水啦... 串燒係即叫即整, 熱辣辣~ 同埋老細招呼好週到呀, 又細心, 服務又好, 抵讚!! 我極力推介呀~!!…查看更多

上個星期病佐幾日, 好番少少即刻同流沙包去食餐好既. 我揀佐去世貿既とん吉, 我地叫佐個二人餐, 有五片魚生, 炸帶子兩粒, 豬扒一件, 豬柳兩件, 炸蝦兩件, 同埋白飯+菜絲任食. 食之前可以自己磨芝麻, 雖然真係勁熱氣, 但好食, 尤其是隻炸蝦, 勁好味.不過呢D咁熱氣既野, 真係間唔中食一次就夠. (同埋價錢都唔平呀~) 同埋星期五晚去, 無得訂枱, 流沙包由六點半開始等位, 等到我做完facial再過去都未有位, 差唔多等佐成粒鐘先有位. …查看更多

某日同事係lunchtime買佐盒曲奇餅返黎, 好好味呀, 真係好鬆化. 其實之前睇雜誌都有印象介紹過呢隻曲奇餅, 但我都係睇完就算, 無記係心度, 估唔到真係幾好食噃~~ 等我得閒都去買黎食吓先~不過係我心目中, 我遇過最好食既曲奇餅, 係N年前曾經開係南豐中心既一間舖頭仔, 我記得佢係用扁長方形既透明膠盒裝住D曲奇餅架. 果陣我一有機會出荃灣都會去買一盒黎食, 真係好好味架~ 但可惜我已經唔記得果間舖頭叫咩名, 亦唔知間舖到底有無搬佐去第二度繼續營業... 如果而家比我遇番就好啦~…查看更多

歌德餐廳, 係我仲係學生時代果陣覺得係一間好好食既餐廳. 人大佐, 錢多佐, 試既野又多佐, 覺得歌德餐廳都係普普通通啫, 所以我已經N年無去過. 某晚同流沙包係旺角都唔知食乜好, 經過條街有人落力宣傳, 於是就去佐歌德餐廳勒. 環境都唔錯, 係暗佐少少. 我地叫佐個日式雞肉手卷薄餅, 意外地勁好食, 熱辣辣, D醬汁夠入味, 唯一唔好係食到成手油. 另外D薯條係新鮮熱辣炸起架, 好好味!! 另外我地仲order佐個晚餐雜扒, 都OK啦~ 估唔到呢餐飯令我對歌德餐廳有所改觀喎~ …查看更多

前排同流沙包睇完007之後去佐又一棧食飯, 記得以前係CityU讀書果陣, 都間唔中會去又一棧食飯, 都隔佐好多年無去過. 前排申請佐AE白金卡之後, 先知原來又一棧都係美心集團既(用AE白金卡係美心中菜集團食飯有半價優惠, 但只限晚市及散叫). 我地果晚叫佐酸辣湯, 窩貼, 蟹粉煨面, 無錫骨, 同埋一個菌菇類既餸. 我覺得D野幾好食呀, 尤其是個蟹粉面, 正! 我地又有卡位坐, 環境舒服, 唔錯唔錯~ 不過呢度D冷氣超勁呀, 變態, 好感受到D冷風由頭頂吹落黎, 好討厭!! …查看更多

前排去佐食意粉屋既芝士火鍋. 我地order佐非海鮮果個set. 兩個人share黎食都夠飽既, 因為我同流沙包都唔係好大食. 味道方面, 我係半島酒店既Chesa食過果度既芝士火鍋, 無論味道同價錢當然就無得咁比較啦. 意粉屋既芝士火鍋... 味道好淡囉, 無咩芝士味囉, 個芝士火鍋相對地較稀囉. 不過百零蚊既價錢, 試下都無妨既. …查看更多

早排突然想食泰國野, 係網度search到呢間泰菜buffet, 每位百零蚊, 就有多款菜式可以任叫任食. 我地第一輪叫佐八樣野, 樣樣野都好好食, 質素高味道好. 我以為佢會因為任食既關係而將貨就價, 但呢度無咁做喎. 例如個冬陰公裏面, 竟然有兩, 三隻大蝦; 個柚子沙律勁多柚子; 個泰式金邊粉係勁好食, 同埋裏面竟然有多隻大蝦係度, D蝦仲要幾彈牙, 唔係雪到霉晒果D蝦毛喎. 係出面D餐廳比錢單叫個金邊粉, 最低限度都六, 七十蚊啦, 都無呢度既咁大碟咁多蝦咁足料咁好食~ 所以明知如果食晒成個金邊粉, 就無空間再食其他野, 但為表呢間餐廳對食物既誠意, 我決定成個金邊粉食晒佢. 結果我地第二輪落單淨係要佐兩款甜品, 然後就埋單走人, 已經飽到食唔落. 下次有機會一定要再黎~ 我仲有好多菜式未試. 同埋呢度既服務好好喎, D waiter好主動咁斟水, 成餐飯斟佐好多次, 態度又好~~ 抵讚!! 最後一提, 即使係個甜品都好好食呀, 尤其是個"椰汁芋頭糕".…查看更多

元朗一向勁多日本菜餐廳, 早前又開多佐一間, 於是有日同流沙包去試佐. 入到去發覺原來佢係食拉面既, 款式唔算多, 另外都有D定食. 我地叫佐一碗招牌拉面, 同埋一個串燒拼盤, 同一碟前菜. 碟前菜係wasabi菠菜, 味道都幾特別. waitress話佢地既叉燒唔係出面買現成, 而係自己去街市買豬肉返黎自己整成叉燒. 我覺得都整得幾好食, 唔靭, 醃得都幾入味. 不過個串燒拼盤就麻麻地, D肉好靭呀, 同埋我覺得醃得唔夠入味, 有D淡. 值得一讚既係服務態度唔錯, 個waitress同廚房我估計就係餐廳老闆, 所以好慇勤同好有禮貌. 不過我擔心佢地咁少食物種類, 又無邊款特別好味特別出色, 唔知佢地會捱到幾耐...…查看更多