經Chill E.A.T. 訂枱，同屋企人喺奇妙世界迪士尼內享用咗一餐非常豐富又美味嘅午餐！前菜嘅木魚花金沙豆腐，外皮香脆可口，豆腐卻嫩滑非常！As 呢一餐飯嘅第一道菜，留下一個非常深刻嘅記憶點。之後上嘅係傳統及現代crossover 嘅點心系列。荔蓉天鵝酥香口酥脆，但唔算太油，都係巧手之作！之後有兩道熱菜，乾鍋醬花菜黑毛豬肋肉同一道得獎素菜 - 雞頭米金湯胡瓜藏珍菌。呢個一濃一淡嘅配搭各有風味。前者頗重麻味帶微辣，係非常惹味嘅一道菜式，但最驚喜係豬肋肉本身，非常較稔，老人家牙力無咁好之下都食得津津有味。後者素菜嘅金湯指嘅係南瓜湯，好清甜。加埋鮮甜嘅胡瓜同菇菌，喺一道比較重味嘅菜式之後端一道較清新味道嘅菜式，算係恰到好處。去到主食同甜品部份。主食有開心果和牛炒紅米飯，味道同份量都啱啱好。喺開心果甜品當道嘅年頭，起用開心果嚟做主食嘅配料係幾特別嘅選擇。作為承先熱菜同啟後甜品嘅主食，佢都毫不遜色。而以遠年陳皮十勝紅豆沙湯圓作為呢餐嘅finale，就算唔太好紅豆沙嘅人都會想食多一碗，因為碗紅豆沙係好綿好滑但唔係死甜，同埋陳皮係聞落去都好香！而入面嘅兩粒湯圓仔都好好食。最後員工嘅服務都加分，佢哋都係友善而健談。仲要好多謝佢哋送咗一杯佢哋剛推出嘅seasonal drink 薄荷仙子，解膩嚟講不錯呢！係值得推薦嘅一餐😌…查看更多
