Angus Lo的個人專頁

今日一家人過咗荃灣，就係過嚟幫襯依間泰式餐廳，因為之前望到佢哋有啲泰式刨冰同甜品好吸引，又有主菜可以食，所以帶埋老婆同個女過嚟試吓佢哋個裝修比較新派，都坐得好舒服，不過略嫌冷氣不是太足夠，另外大部份侍應亦都十分年青有禮。嘢食方面，整體都幾好，個人好鍾意佢嘅辣椒糕炒蜆同菠蘿炒飯，辣椒糕炒蜆好惹味，啲汁好Creamy，最衰冇嗌吐司。個炒飯連我個女都食咗大半，因為佢炒得好乾身，亦都有好多材料。不過甜品就冇啟德嗰間咁好食。期待下次再過嚟試吓佢其他唔同嘅菜式。…查看更多

早排去灣仔做嘢，又係例牌search下嗰邊有咩好味。咁啱想食車仔麵，就搵到依間車仔麵家。去到嘅時候已經過咗lunch time，所以我排第一個就買到。開頭叫咗麵筋、紅腸同牛腩，但之後啲人排隊個個都有叫酸齋，我又忍唔住加咗個酸齋可能要趕住食完就走，所以個面筋同酸齋都未浸林。不過個酸齋味道好好。最主要個湯底加埋個辣醬好好味，食完又唔會好口渴，好耐未試過食車仔麵會飲埋個湯。如果講個湯底，我覺得佢仲好過銅鑼灣新記，期待下次再過嚟幫襯…查看更多

今晚終於可以去試吓呢間上海菜館，之前見食評都讚食物質素不錯，只係有個別侍應服務比較差，但係今晚去到見啲侍應招呼都唔錯。整體食物質素都幾好，只係水煮魚略嫌比較鹹而魚皮同炒飯個辣度都啱啱好，特別係個炒飯。已經好少喺餐廳食到一個比較似樣嘅炒飯。因為今晚係同太太同囡囡一齊嚟，所以試唔到佢嘅片皮鴨，我見好多枱都有嗌，佢個價錢都叫公道，希望好快可以再嚟試到個片皮鴨，同埋我見有啲小炒都炒得幾好。下次試完再出食評。…查看更多

知道元朗有間食巨型炸脾嘅小店係雞地附近，終於可以去試下。佢地由舊舖搬左去新舖後，更大更寬敞。主打雞脾飯，當然要試左先，其實我見到有其他人叫羊肉飯都好吸引🙈🙈雞脾飯可以配豉油汁或黑椒汁，喜歡濃味嘅我當然係揀黑椒汁。一上到枱，果然好大隻脾，同我塊面差唔多😂😂黑椒汁似學生飯嘅味道，食落好濃郁，甜甜地，好有回憶。咬落去皮脆肉嫩，雞皮炸得脆卜卜，食落好似薯片。肉質又唔會嚡口，仲好Juicy。本身雞脾已經醃過，不過加埋孜然粉會更惹味。哩間係食過咁多炸脾，個人最滿意嘅一間，下次要試羊肉飯。…查看更多

諗緊夜晚同老婆帶隻小魔怪食咩好，老婆提議之前係網上見到元朗有間新開泰式船河。之前係西環嗰邊食過一間，覺得個湯底好正，所以都想試埋哩間。比一般船麵大碗，老闆話迎合番香港市場，一碗就夠飽。如果正完泰國船麵，我應該要食十幾碗😂😂湯底唔算太重藥材味，牛味比較突出。牛腩亦炆得十分入味，牛丸又夠彈牙，配上粗河粉，吸湯一流，口感亦比一般河粉更爽滑。每碗船麵亦有炸豬皮，炸得非常香口酥脆。豬肉船麵湯底亦係牛骨湯底，不過係配料轉左係豬肉加豬肉丸。相對我較喜歡牛肉船麵。經老闆介紹，加點了牛扒沙律，泰北口味，比傳統泰式沙律還要辣。不過辣很十分過癮，香辣味慢慢係口腔裡滲出黎。牛肉係安格斯牛，十分嫩滑，會越食越上癮。還會再幫襯嘅小店，亦喜歡老闆們熱情的招呼。…查看更多

平時食油渣麵多數去大角咀同深水埗，今次知道有一間豬油渣粉仔開左係元朗，仲要好近我😍😍佢地本身係錦田開店，宜家搬黎元朗，岩晒！佢地嘅豬油渣係每日新鮮自己炸嘅，同食開嘅豬油渣有少少分別，就係佢地係好香脆嘅，有d似食一粒粒嘅脆薯粒咁。而粉仔亦係自家搓粉，口感好有𡁻勁。畫龍點睛之作係自家炒辣油同菜甫，辣香滿溢，辣勁會慢慢滲出黎，唔係死辣。越食會越上癮。另外亦都試左碗仔翅，不過同坊間食到嘅分別不大，略嫌不夠濃稠。下次會繼續幫襯佢地嘅粉仔，支持街坊小店💪🏻💪🏻…查看更多

帶完隻小魔怪去放電後，番左元朗食個拉麵補充體力。我叫左黑豚拉麵，上枱見到d豚肉嘅時候，我已經暗叫不妙，點解好似咁乾身嘅。食落真係嚡口，好柴同好乾。我唔知係咪本身係咁定我唔好彩，湯底係九洲拉麵嘅濃豬骨湯，口感比較厚身，唔會太咸，幾好。老婆要左豚骨mix拉麵，叉燒都係麻麻地，燒得唔夠香。男爵薯餅係一塊牛肉薯餅加一塊紫薯薯餅，應該係叫貨番黎，炸得都香脆。不過都係無咩特別，只不過老婆鐘意食薯餅。聲稱係福岡評分No.1拉麵店，完全比唔到咁嘅感覺我，特別係叉燒。唔會再黎食。…查看更多

今晚要同老婆慶祝拍拖三週年紀念，老婆極愛食生蠔。想主打食蠔加海鮮，所以無搵酒店自助餐，結果我決定試下Season Plus。因為我知道佢地主打$9隻生蠔，睇過食評又唔係太差，其他海鮮都唔太貴，最緊要係老婆食多幾隻生蠔，銀包都唔太肉赤。😂😂$198嘅海鮮拼盤有龍蝦，翡翠螺，青口，海蝦。。。其實仲有鮑魚，不過開頭忘記左比我地😂😂海鮮都夠新鮮，特別係鮑魚，有用汁煮過，好入味。龍蝦都幾多膏，不過肉質比較實。$9一隻精選生蠔，店員話今晚係南非蠔。海水味同蠔味都唔算濃，比較淡味一點。不過蠔肉都尚算大隻，有口感，比有d平價蠔作招徠嘅餐廳有良心好多，我地最後食左18隻。😂😂哩個比較失望，睇相以為係大舊d，點知比一般加拿大海膽細件。海膽味好香，食落都重海膽味。不過個口感好奇怪，好似係海膽味嘅麵包。牛味幾濃郁，加左少許黑椒調味已經足夠。其實咁嘅價錢食到咁多海鮮已經好超值，可以再Encore。…查看更多

早幾日去左深水埗食早餐，因為知道有間厚切豬潤麵。之前豬潤麵只食過維記，不過本人覺得麻麻，因為我覺得佢d豬潤比較乾身，好似細個屋企人煲完豬潤水，拎番起d豬潤咁。點左個豬潤蛋爽丁，上到枱，豬潤真心係厚切嘅。食落仲好嫩滑，無渣。口感好豐厚滿足，不過，我嫌湯低比想像中無咁鮮甜。佢應該係用番丁麵嘅湯粉。反而維記應該係連豬潤一齊煲左個湯底，所以會鮮甜d。不過如果比我揀，我會選擇食哩間。起碼豬潤先係重點，同埋下次我會識叫多蔥。後記: 好似食神話齋，不如溝埋維記湯底，漢發豬潤做豬潤麵牙！笨！…查看更多

今日同老婆帶小魔怪出旺角買野，順便去Pause It食個late lunch，之前搭車經過都想食，今次終於可以去試下了。舖豆裝飾走簡約風，連餐牌都係簡單設計。門口隔離有一排吧枱位，可以打開玻璃窗，不過望街景其實麻麻因為我唔鐘意食扁意粉，所以問可以轉普通意粉嘛。一位疑似老闆嘅男士話可以轉的。個蕃茄汁幾好，酸甜適中，配上煙鴨胸絲有幾分口感。有點似我最鐘意食嘅拿破侖意粉，我加左d黑椒粒，多左一份微辛感。老婆叫左煙雞胸肉三文治，本人對煙雞胸肉無好感，因為之前食嗰d都係鞋鞋地。不過，此店嘅雞胸肉一d都唔鞋，再配埋個好似係Cesar Sauce嘅醬，竟然令我愛上食哩個三文治。配菜薯條不過不失，新鮮炸起，口感都幾好。個汁其實係泰式雞醬，我諗如果有自家製醬汁會有特式d。雞翼比較細隻，可能$58要比6隻，不過我寧願大隻d，你比少一兩隻我。蝶豆花青檸梳打，我諗蝶豆花係俾色水杯飲品，因為飲落係青檸梳打味。反而西柚檸檬梳打飲落味道清新d，酸甜度適中。比起好多店舖，佢兩杯飲品已經交到貨。期待下次再試下其他食物，佢地餐牌唔算多款式，可能係小店關係。如果佢地會定時轉下餐牌，我相信會更有驚喜。P.S. 結賬時，之前位疑似老闆嘅男士問下我地食物岩唔岩食。我欣賞佢哩點細節位，感覺關心客人，亦著重食物質素。…查看更多

今日去左灣仔食個靚早餐，去左Ninety’s，佢地平時夜晚好爆，所以揀早餐時間試佢手勢。老闆認為無野係完美100分，所以叫Ninety’s，提醒自己永遠有進步嘅空間。叫左個Avocado on Toast，吐司上面係牛油果蓉，再上層係水波蛋。成個擺盤好吸引，要黎影相打咭一流。味道方面，因為牛油果同水波蛋都係偏濃味同飽濟。我覺得如果個sauce可以有d酸味，可以中和下個飽濟感覺。食左一件已經飽飽地，可能午餐食會好d，整體味道還可以。希望有機會再試其他野食。另外點左杯Iced Black，不過唔記得影相，下次有機會再點評下，因為我見Hot Coffee個杯係靚d。…查看更多

何文田廣場大番新後，新開左好多餐廳。今日見到其中一間都多人幫襯，所以決定試一試。我知道佢係一個飲食集團旗下嘅一個品牌，所以個裝修都唔錯。不過不失，如果芝士可以再溶d就好。麵身夠爽，不過略為咸左少少。之後加左檸檬汁，好dd，不過味道係唔夾的🤣🤣個牛扒竟然做得唔錯，雖然我都唔識分係唔係安格斯，同埋都比梳打粉乸過，不過都仲有d牛味。建議點鹽同黑椒，因為個磨菇汁，個人認為唔係好夾塊扒。跟扒上嘅薯條出奇地好食，味道岩岩好，有薯味，又夠脆，似係即刻炸出黎。最後叫左兩杯特飲，因為第二杯可獲半價優惠。下面係芒果果凍，好似以前許留山嘅咩咩爽咁，口感好Q，加埋忌廉，我覺得幾好飲👍🏻👍🏻整體黎講食物質素合格多d，加埋咁嘅價錢，就覺得可以再食。希望下次試下其他菜式。…查看更多

之前上網見此餐廳做緊生蠔餐，一個餐有齊生蠔12隻，餐湯，主菜，甜品，仲包一杯白酒，都只係$298。於是訂左枱今晚試下。竟然有熱辣辣嘅提子鬆餅做餐包，我平時不太喜歡食鬆餅。但係哩度嘅鬆餅夠晒新鮮，質感好軟熟。跟餐嘅沙律，無咩特別。餐湯係南瓜湯，但係我老婆以為係龍蝦湯，意思係偏咸。最期待嘅生蠔，原本個餐價錢已經估到應該唔會太大隻，不過黎到竟然比想像中仲要細隻。好在都夠新鮮同有少少礦物味。主菜我地揀左肉眼扒，要medium，又係無咩特別，肉味唔夠，要靠個汁另外加左個Main Dish，我地揀左烤肉拼盤，有豬牛雞同香腸。佢寫住係安格斯牛扒，但係個size細到我以爲係牛脷，仲要無牛味同嚡口。豬扒竟然又硬又乾，好左雞扒都入得口，不過整體衰過去茶餐廳食雜扒餐。最後嘅甜品係草莓蛋糕，完全無特別，為整而整，不如唔好送。整體黎講，此餐廳都算比較知名度高，亦係連鎖經營。可能此品牌餐廳主打海鮮，亦唔等於可以其他食物求其。如果要做平價餐而將貨就價，我情願佢正常價錢，比d心去做好食物質素好過。…查看更多

之前老婆大人上網見到元朗有間小店食大大隻小籠包，於是我地又去做搵食飯團。其實食唔出紫薯味，好在味道不是太甜。一見到個賣相就知係麻辣版嘅粉果，但最奇怪的事發生了，叫麻辣餃居然唔辣，仲甜甜地。不過我又唔可以話難食，可能我比較喜歡吃甜野。唔係蒸到淋晒嘅鳳爪，有點咬口。蒸得都算嫩滑，如果有豆鼓一齊蒸會更好。唔係整到d肉梅晒，食落頗彈牙。大件夾抵食嘅籠仔蒸飯，足足有五碗仔嘅份量。用雞絲嘅好處係一定夠嫩滑，淋埋豉油更加香。最後要介紹下個吮吮包。無錯！真係要用筒吮嘅。湯汁好濃，吮晒d湯汁再食個包。雖然無晒湯汁，不過肉餡味道多濃，建議點醋食中和油膩感。其實以點心店黎講，價錢算合埋，食物質素合格。推介係個吮吮包！…查看更多

傳聞荃灣有間小站做煲仔飯好出色，襯還有點涼意，當然要拜會一下。七點半左右去到，已經開始要攞飛等位。還好只係等兩張，大約等了廿分鐘左右就有位了。侍應醒目地見有位前已經幫我地落定單，因為餐牌寫明煲仔飯要等廿分鐘。佢地個餐牌還配合店名，成本武林秘笈咁。坐低後，我點了雙腸排骨飯。老婆大人就點了滑雞田雞飯。另外，原來此店還有串燒，我們二話不說，點了燒白鱔。此道菜不是在正餐牌裡，而是張貼在牆上的是日推介上。燒得皮脆肉滑，食落好香的炭燒味，肉質亦很滑嫩，不過油份不太夠。還有泰式雞醬另上，我建議可以不點醬。餸嘅份量都頗多，臘腸味一般，反而膶腸夠香，食落有餘韻。排骨亦嫩滑，仲有香脆嘅飯焦。我落左豬油同甜鼓油，提升了不少香味 。老婆大人點的田雞滑雞飯，滑雞夠嫩滑，可惜無咩雞味，同埋個飯唔係好入到田雞同雞嘅味道。小弟認為食物質素不錯，可惜價錢有點貴，因為仲有加一服務費。最後，待應服務週到，因當晚帶了bb去，他們安排了比較闊的卡位給我們。…查看更多