烏蠅俠's Profile

預先喺OPENRICE訂位，被安排坐响玻璃窗前的BAR位，尚算舒適，有陽光射入黎感覺唔錯。Lunch Time，無Lunch Set，a la carte咁叫。兩個女仔，各人點了一杯飲品，一個pizza，一個pasta，埋單 $488我點了凍Americano 減水量一半，侍應聽到時有點錯愕但也願意配合，咖啡味幾濃，Nutty，唔酸。朋友點了seasonal 特飲，oolong tea shake，詳細名唔記得，朋友話比佢想像中略甜。四色pizza，賣相一般，唔夠芝士，餅底偏脆口，我個人喜歡煙韌嘅批底，附上嘅蜜糖係非常普通嘅什牌貨。整體黎講說不上好食。冬陰公大蝦天使面，一向唔太愛天使面，但照試，果然，面質都係太軟了。但味道好好，清新，冬陰公味濃，蝦頭炸得好脆，我成隻連殼都食埋! 蝦肉比左朋友食，所以評唔到。限座90分鐘，夠鐘，侍應會叫我哋埋單先，但就無催我哋走。環境其實唔錯，但性價比唔高。…Read More

之前訂過呢間，經常爆滿，今次幫媽咪慶生，提早1個多月訂座，好誇張!  預訂時會問你要唔要訂片皮鴨，一隻定半隻，當時只得4人，所以只點了半隻。正日去到多了一人，即場改訂一隻，要多等~50分鐘，照等! 途中點了以下點心/小菜︰1. 叉燒包 - 包質正常，有一個包面有倒汗水，減分。餡料正常發揮，無乜特別2. 蝦餃 - 餃皮有口感，餡料正常3. 粉果 - 餡料好新鮮，花生仍脆口4. 燒賣 - 正常5. 叉燒 - 都係正常，我個人鐘意沙田圍間叉燒大皇多啲... 唔知係咪食開重口味 6. 順德魚餅 - 最唔好食嘅一道菜，似係自家手打，未夠彈牙，煎得唔夠香口，臘腸太大粒，硬牙，唔推介主角終於出場啦，廚師片了三分唔同部位嘅鴨皮同鴨肉，第一道係最肥美嘅，廚師話沾砂糖淨拍，唔使薄餅皮。但我就認為沾砂糖夾薄餅係最佳組合，因為鴨油+澱粉質係最夾架嘛，加埋砂糖就perfect match，就好似鮮油多必定加糖食嘅定律一樣!!第二道係帶少許肉少許肥膏嘅皮，而第三道係淨肉，講真片皮鴨嘅鴨始終無燒鴨咁醃過，淨肉係無咁好食嘅，所以我會兩款夾埋一齊包薄餅皮+海鮮醬食。最後係甜品，想點果兩樣都無，結果就求奇點：1）紅棗軟蛋糕配烏龍茶雪糕2）焗鳳梨山楂酥兩款都不過不失，但驚喜唔大…Read More

星期五晚，諗住即興去土瓜灣間地中海餐廳Lamees食飯，當然係FULL BOOKING，轉陣過了九龍城，呢一間係我之前經過，好想試下嘅印度咖哩。兩個人，點了一個前菜，兩個咖哩，兩個烤餅，一杯飲品，埋單$312，抵食！前菜係印度脆球餅 - 餡料似係一啲薯仔+煮淋左嘅豆豆，menu上寫個汁有羅望子，好期待，但食落無乜羅望子味，配合個脆球都還可以嘅，但唔推介。反而下次想試佢嘅咖哩角。印度香料羊肉咖哩 - 上菜時，果咖哩唔夠熱，有點失望，個汁就一般，的確係香料味重嘅咖哩，唔辣。蕃茄牛油咖哩 (配芝士) - 叫左個香料重嘅，就諗住要個帶酸的咖哩中和下，唔使咁膩。呢個咖哩等左好耐，侍應不時眼望望我哋，之後更主動走埋黎問我哋滿唔滿意食物，原來佢一直唔記得仲有一碟菜未上，只懂講英文嘅侍應仲好堅定咁「問」我係咪叫左masala chicken，我話唔係，佢先去再check單，之後離遠比左個「收到」嘅眼神我，再等左~10分鐘，終於上菜啦!  熱辣辣，特別好味，餡料其實係masala chicken，一粒芝士都無.... 我都無再要求了，因為其實蕃茄咖哩又真係好好味，雞肉都好食!另外，點了兩款烤餅︰ROTI 同 NAAN，兩款都好好食，ROTI面粉味好香，NAAN嘅質地煙韌，大愛!飲品係mango lassi，正常發揮，唔似粉開聽隔離枱的三位男仔講，佢個印度香飯係必食菜，下次再黎可以一試!…Read More

諗緊食咩好嘅時候，見到有人排隊，而朋友又未到，所以唔理咁多照排原來係成日見到嘅NINETY'S，之前都一直想試，呢日去食仲係試業中，但見裝修幾精緻，所以繼續排隊。佢有Day Menu提供，但我哋見佢果BRUNCH BOARD幾得意，所以就點了兩個，加一枝自家品牌啤酒，加一杯cold brewNinety's Coffee Bear (Choco) - 無乜氣，無乜泡，酒味唔濃，朱古力味都咖啡味都幾重，味道可以的，我就喜歡多點泡，順口啲。Cold Brew - 正常。但Cold Brew唔係唔會加冰嘅咩..........同朋友點了唔同組合，可以一一點評1. 波士頓龍蝦 +$78 - 半隻上，賣相唔錯，肉質彈牙，龍蝦味一般啦，但多膏。由於張枱比較細、坐位亦逼夾，食嘅時候有點兒麻煩。2. 酒味雞脾 (正名唔記得) - 唔掂，酒味好苦，唔香，肉質好似煲完湯嘅肉咁3. Char Siu +$48 - 半肥瘦，味道似係鬼佬味嘅BBQ Sauce，個人都係喜歡食港式Char Siu4. 黑松露炒蛋 - 一般，正常cafe炒嘅蛋都好難衰5. 辣味炒蛋 - 我鐘意，辣辣地，適合我呢類唔太鐘意食滑蛋嘅朋友6. 香腸 - 都係一般7. Kale + 士多啤莉醬 - 個醬好香，Kale都好新鮮，正!8. 椰子乳酪 - menu寫係非奶類食品，但感覺都好creamy，椰子味適重，唔會太膩口，正!9. 每個套餐仲包兩款小小的面包，sourdough 最好食埋單都要5XX，其實都幾貴，不過都係K11食肆價。每間分店嘅menu都有少少分別，下次可以再去試…Read More

下午3點左右到達唔使等位點了招牌雲吞面，$36，上菜好快，因為店內只提供3款料，鮮牛，鯪魚球同雲吞。有湯面或撈面揀。飲品只有紙包裝或罐裝的。响香港，專門做幾樣食物嘅食店係好難得嘅事。。。先講面底，係好爽口嘅，無鹼水味。再黎雲吞，每碗3大粒，雲吞皮褶合位好厚，亦好大陣鹼水味。餡料的蝦好爽口，但無乜蝦味，我喜歡有蝦子嘅雲吞，可惜呢間無。。。湯底好咸，我期望有大地魚嘅味，可惜呢間都比唔到我。。。店員定老闆娘好好人，因為我坐近門口果位，佢主動幫我熄左門口嘅風位，等我頭頂唔使吹襯。食完再行去上環方向，到永吉街附近見到一間叫麥奀記（忠記）的舊式雲吞面店，好有味道，下次去試下。…Read More

打完風 行完donki 8點半左右黎到 唔使等位知道餐廳可以自選排好似幾好玩 所以試下佢。餐酒最低消費都要98蚊一杯，所以跟友人決定嗌一枝。menu上的餐酒都可在出面店零售買的，所以我哋揀完牛排，就响counter 對面的小小cellar 揀下一枝take home 價198 dine in 價360的法國酒，唔使點breathe 都幾好喎。前菜點了pear and cheese tart。甜甜地，勁大陣芝士味，唔知係咪藍芝士定羊奶芝士，酥皮尚算酥脆，火箭菜新鮮，一流開胃菜。dry aged grain-fed sirloin，butcher counter 職員話凍櫃嘅dry aged 大概有30日，呢sirloin 有210g，配藍芝士牛油醬，大啡菇。牛味非想像中濃，配唔起佢呢隻藍芝士醬，但燒烤味是有的，鹽花點綴得好好。特別欣賞大啡菇，好juicy!另一塊點了dry aged grain-fed ribeye 250g，配甜椒醬和粗切薯條，牛味比塊西冷更濃，有一陣陣臘味味，但有筋，肉質比較硬。甜椒醬辣辣地，點薯條ok。但薯條本身則比較淋口。值得一題係餐廳供應的ketchup 係organic 的，味道的確係新鮮啲。…Read More

一行4人點了2個套餐加2道主菜1）巴馬火腿薯仔粉團。白汁底加蕃茄蓉，好新鮮嘅配搭，粉團有咬口，煎脆嘅巴馬火腿好香口，好味道！2）香煎魚柳配蔬菜面。魚柳唔記得係咪鱸魚，但佢煎得好香，亦好滑，一啲都唔鞋口。果蔬菜面係橙色嘅，友人和我都以為係胡蘿蔔整嘅面啦，點知一入口硬硬地嘅，原來係原片胡蘿蔔黎架，佢嘅形狀整到好似濶條面咁濶，真係比佢呃到，絕對適合生酮飲食嘅朋友！3）油封鴨（套餐）。鴨面尚算脆口，但肉質都係鞋鞋地，配嘅沙律有無花果，尚算新鮮。4）安格斯牛排（套餐）5成熟。上枱嘅時候都知不妙，因為塊牛排好薄，亦唔見焦燶嘅地方，一入口就覺一陣怪味，友人認為係因為一本身塊排唔靚，二啲脂肪未燒得夠透，當中嘅牛羶味未去得清。呢個餐無記錯應該近$400，呢個價錢應該唔只呢個級數。。。套餐還有湯／沙律，咖啡／茶，另可以半價加購甜品。甜品點了焦糖燉蛋同Tiramisu，味道還可以。當天係星期二，客人唔多，服務員態度唔錯唯積極性可加強，可主動啲幫我哋換碟同加水。好似7點定730前有happy hour 所以開了枝智利紅酒，ok!…Read More

黎過呢度飲茶3次，前兩次都唔使等位，點知呢個星期日1130到達時，超。級。多。人！酒樓有訂枱服務，但只接收前兩天嘅預訂，現場攞飛嘅都可以，接待人員聲稱會梅花間竹咁嗌入座。我哋等左45分鐘之後，開始有人枯燥，話接待員只嗌訂枱，兩位嘅飛一直無嗌過，仲同經理展開駡戰。。。剝花生嘅我哋4人足足等左1.5小時先入到坐一入座立即點4個椰皇先，好快買曬，果然不負眾望，蛋白好滑，夠熱，椰香足，唔太甜，燕窩唔理佢堅定流呀，份量都多。價錢都係$48，加埋一都平過出面啲甜品鋪丫。其餘要點名嘅點心／小食有1）差燒，味道好平均，有肉香，燒得夠燶邊2）蜆芥鯪魚球，大大粒，好好肉地，凍左都唔腥，但蜆芥就麻麻，唔夠酒香。3）櫻花薄餅值得一提係姐姐嘅服務同專業，有好笑容，無乜笑容嘅姐姐雖然忙，但忙完又總會真係記得你提過要咩調味料啦同埋會加水之類呀，有（合理）求必應，贊！奉勸大家唔好黎飲下午茶，因為佢收4點，坐得唔耐之餘，好多點心都會賣曬，特別係個椰皇，同埋真係會熄燈收茶具架！…Read More

去mr meatball 時經過這店，被門外裝潢吸引，所以呢一晚訂枱食晚飯試試。兩個人點了2杯啤酒，1個前菜，1個主菜1）前菜係小食併盤，有兩款德國腸，炸洋蔥圈，單骨Buffalo Wings，炸薯條同蕃薯條配松露醬。全部食物都熱騰騰，新鮮整嘅，最好食係炸蕃薯條，甜甜地唔肥膩。友人就話呢碟併盤太多機製嘢，試唔到佢廚藝。。。2）主菜係油封鴨，呢個就唔太正宗了，鴨面唔夠脆，鴨面又淋左啲傑傑地嘅肉汁，好咸。配襯嘅黑醋汁唔夠香，肉質有的鞋。原先諗住嗌甜品但太飽了，最終無叫到。題外話，見到門口有3位女士坐露天位，很有氣氛！…Read More

外賣例牌獅頭鵝一份（$74）加一份醉鵝肝（$12x），加兩小份酸菜白蘿蔔（$3@）諗緊買咩嘅時候，有位店員叔叔有在門外同我哋推介。本身想嗌鵝肝但又伯太膩食唔曬，問叔叔可以點處置，佢就話兩個人無可能食唔曬，有些熟客一個人黎買都食曬。之後佢都繼續講解返如果真係認為食唔完，就應該食幾多攞幾多件出黎，用酒汁淋返熱就食得。返到屋企仲未夠鐘食飯，所以放左兩盒嘢入雪櫃，大約2小時左右啦，就開始預備晚餐。舖頭原先話獅頭鵝不用翻熱，只需叮熱啲鵝汁倒落去，室溫食最好。但因為我雪過入雪櫃，所以我都係咁兒溫大滾水蒸左佢3／4分鐘，之後再倒返啲鵝汁上去，肉質依然好好，一點都唔韌，鵝味還可以，唔會太肥，連皮連肉食好香，另外鵝汁亦唔會死咸。一份例牌有4～5件全肉，再加10～12件左右嘅骨連肉，我自己認為合理。醉鵝肝，開頭以為食吾埋，就淨係拎左3片完整嘅出黎淋上酒汁，好好味喎，呢幾片無根，好滑，好甘香，個汁都好正，我哋特登整左啲蒟蒻面黎撈，超。級。正。 當然最終都整埋餘下幾塊黎食，部份有根，但愈食愈想食最後就講埋啲配菜，酸菜雖然係幾爽脆嘅但有陣唔知咩味，所以唔啱口味，白蘿蔔就好食好多。整體黎講我覺得呢間嘅滷水係好味嘅，經過會再買。…Read More

復活節的第4日假期，下午3點半左右到達商場，以為這個時間實唔使等位，點知門外已排了人龍。。。店外有兩條人龍，一條排Dine In 另一條則排Take Away。有一位帶位員，負責兩條隊的人流，每位人客他都要引領去量體溫和講解點餐安排，我諗佢都幾攰下等了接近40分鐘吧，終於有位了，被安排坐Counter枱前面的二人小桌，與鄰座相隔有點近。我倆點了兩份主食 + 兩杯咖啡 + 一個蛋tart1. Scrambled Crab Toast上菜時已聞到陣陣蟹肉味，用料亦相當豐富，我諗呢度有3隻蛋嘅蛋白，蛋白中有不少嘅蟹肉，面頭灑了幾塊炸乾蔥，吃下去很爽口。伴菜的還有一大半個牛油果，熟度剛剛好!   這個價錢絕對無渣流灘呀!  怪不得我哋附近幾枱都點了這個主食，值得推介。2. Egg Benedict這個egg benedict沒有用上傳統的Hollandaise sauce, 反而換上了自家製的綠色牛油果醬，我對這個不太喜愛，醬汁太過青草味，牛油果質感不明顯。個水波蛋做得錯嘅，但蛋黃唔夠香。我就唔推介啦。3. Flat White + Canned Coffee No 18Flat White 中規中距，咖啡味都幾香，好飲過Blooms。友人在cashier聽到前面客人可以選擇用何種豆製作Flat White，話唔知係咪會員先有這個服務??罐咖啡有驚喜喎，入口有陣莓味，好順口，好似話係有另外幾隻口味，分別用上不同的咖啡豆。4. 蛋Tart呢個好味道呀，不會太甜，但焦糖味夠。我哋食完一個唔夠喉，再嗌多一個食。提一提，餐廳的食水是自助的，有分有汽和無汽的。水機上提示，如果客人點了espresso就建議飲有汽的水，有點小窩心。用餐限時1.5小時，基本是夠食的。香港地，要搵間無限時而咖啡好飲、主食好食嘅cafe都應該幾難.....…Read More

前排响西貢舖食過一次，那次太夜，雞脾售罄，但最後點了什麼都唔記得了，因為係。好。難。食。。。解釋原因前，要講少少前因後果比大家聽。。。話說我哋前幾個號碼嘅三位食客好像等了很久，聽佢哋講等左有成45分鐘，同工作人員講話唔要了退錢。咁工作人員都十分唔好意思應要求退了錢。另一邊廂呢counter就有一個號碼叫左好耐都無人攞，我立下眼見到個工作人員好似攞左果份無人要嘅比另一個食客，我心諗：拿我寧願等耐少少你都唔好比果份擺到凍嘅嘢食比我。可惜好快就嗌我哋個號碼啦，即刻開黎食，唔熱嘅又唔新鮮。我估計我哋都係被派左果份無人要嘅嘢囉！炸物擺耐左會淋係常識吧，有無可能仲比其他客食呀雖然果下嬲左但“惜”食嘅我哋都打算比多次機會佢，前幾日就去左太子舖再買外賣，今次點了巨型咸蛋黃脾。返到沙田用了airfryer 200度叮了2分鐘，塊雞皮係好脆嘅，咸蛋黃醬都ok啦，推得幾滑嘅。食到入肉近骨嘅位置時開始發現肉質有點怪，望一望，頂! 粉紅色架！ 生雞肉我唔得囉，太嬲無影相比大家睇。仲有成7成嘅肉未食，無謂浪費，所以隊左入airfryer 160度再叮左成8分鐘，可惜太厚肉，都唔掂，最後切開曬佢再焗佢10分鐘。終於熟曬，但原先脆脆嘅雞皮都變了質，唔好食了。朋友仲替佢講好說話，話間舖啱啱開，可能油溫未夠熱blablabla...但我覺得打開門口做生意嘅，這個不是借口，更何況宜家係比一隻生嘅雞脾喎，唔單止係味道嘅問題，係食物衛生嘅問題，唔係仲有得求情呀嘛！店主要認真留意各分店員工嘅質素，食物衛生，烹調技巧，同埋食材嘅選取啦，唔好做壞個名啦 （雖然我唔會再食）！！！…Read More

星期二的10：30，餐廳得一位人客，很寧靜。選擇坐店內裏的一張枱，貪佢有椅背的椅子，但其實影相的話坐近門口位置的長木枱會精緻啲。早餐set 大部份都是toast 只是topping 不同，大約＄68～88，加＄18有long black，加＄28有latte。點了feta cheese and avocado toast 加一杯skim milk latte。先來latte，奶泡好綿密，開初的香氣和味道僅一般。放了一陣後，嚐到香濃花香味，聞落亦有少許麝香味，是驚喜一。再來toast，賣相好靚，料亦好多（畢竟要78蚊，心靈被安撫了）黑麥多士烤得好好，好香好脆，是驚喜二。topping 加左少少nuts，中和返啲芝士嘅膩口。牛油果亦熟得剛剛好。放久後，多士會淋左，係咪在多士上塗返層cream cheese 會好啲呢服務方面，那個時段全部都係外藉嘅侍應，會同你講thank you good bye咁。有機會黎呢邊，我會再去試lunch。…Read More

星期日約1330左右到達，滿座，但可留電話訂枱。四周圍行下，仲買左Andy's 古早雞蛋糕，終於可以試下。大約30分鐘就收到電話了。揀坐樓上，自己拎餐牌，揀完落樓下落單比錢。上菜速度快，我們倆點了：1 龍蝦麭配薯條 ＄118。龍蝦好爽口，有龍蝦味，略帶點檸檬汁香，清新。醬汁有兩隻，一個似係千島，混左落龍蝦度，另一個似蛋黃醬，淋左响面，兩個都好味，唔滯。個飽都好好味，甜甜地，外脆內軟，友人話似舊式冰室用嘅甜麭，好有回憶。薯條就好一般。呢個價錢我接受，但如果薯條用粗薯條會更開心！2 安格斯漢堡 ＄128。我自己麻麻地漢堡，淨係試左一啖肉，唔夠肉香。 友人都話麻麻地，唯一好處係嗌五成熟佢的確做到。漢堡都跟薯條。唔會再想食。3 Iced Mocha $50 4 Affogato $50 抵飲。聲稱係用日本牛乳雪糕，驚喜係用軟雪糕，好好味呀！…Read More

次次黎食必叫豬招牌豬骨濃湯金邊粉配龍眼水。湯底好香，呈淺啡色，有少少似肉骨茶嘅味道。配料試過豬頸肉（近排好似無左），泰式牛丸豬肉丸，都好好味，充滿住泰國風情。湯面會有幾粒辣豬皮，非常正，但近來好似愈來愈細粒同碎，如老闆娘睇到嘅話請留意一下。分量偏細，一般女士就夠，男士可能要食多少少小食。龍眼水係一枝枝嘅，好多乾龍眼肉，又唔太甜，黎襯一定嗌，食完咁濃味嘅湯，飲埋佢就perfect！…Read More