ronald_god的個人專頁

多年前曾經惠顧，和牛之高質和食物種類之繁多都令我留下很深印象。多年後因緣際會即把握機會再次幫襯，可惜因為有期望，結果十分失望。首先係我喺openrice訂咗位，但我早咗幾分鐘到，門口阿姐堅持唔肯俾我入，除非我肯取消咗個booking，言下之意即係想屈我缺席。對於呢個無理要求，我唔肯就範，堅持唔罰企要即時入座，但我會保留向openrice申訴嘅權利，所以最終都俾我早咗入，但已平白折騰咗幾分鐘。入座後咩都無講，劈低個QR code，我嘟入去先發現已被點餐，已點了澳洲和牛放題。我問佢哋點解自把自為無問過我，同埋問澳牛餐同日牛餐有咩分別。佢話無menu，叫我哋自己出返去門口睇，跟住又話無人會點日牛，所以唔會問，但轉頭又話要喺大眾點評先點到日牛，全程不盡不失，亂噏一通。其實我今餐請客，令到場面十分尷尬，無問過人想食咩就被自把自為點晒餐。食物質素方面，簡直係兩個極端，以前印象真係好好食，牛味令人再三回味；依家啲牛相反係好難食，無紋無味，質地亦極之鞋，簡單講，出面嗰啲燒肉連鎖店比佢哋好食不知幾多倍。難怪以前起碼人均四五百起跳，依家居然只係勉強夠三百，原來係將貨就價！…查看更多

一早㩒咗外賣，準時到達自取。入到舖，企喺門口五分鐘，完全冇人理，全部人只顧自己低頭做自己嘢，如果我抬走部收銀機，應該都唔會有人理。我就諗住自己搵自己袋外賣拎走就算，但一拎起就發覺唔對路，明明㩒咗兩碗麵一碗粥一飯一腸粉，但就數到只得四盒嘢。我特登喝醒個櫃面，問佢係咪已經齊晒，佢諗都唔駛諗，睇都唔駛睇，就即刻答話齊。我話唔啱數問佢點解釋，佢先至肯拎返袋外賣入去，跟住就好爽快咁擺返盒蝦腸落去。仲未完，返到屋企仔細睇，原來又唔俾鼓油，逼食齋腸，而且只有一對筷子三隻羹，梗係覺得係一個人食兩碗麵一盒腸囉。仲未只，腸粉每條只有一隻蝦置中，而且仲係涷晒，質素拙劣！唔好同我講生意忙手腳亂，為何從來只會有俾少無俾多，想博人唔check唔追就據為己有自己慢慢嘆，一俾人發現至即刻攞返出嚟，擺明搵笨想呃錢囉！…查看更多

只係簡單外賣自取一個小小麵餐，都可以搞到全錯，不知所謂！明明揀咗要煎熟雙蛋，就變咗最憎嘅炒蛋，明明揀咗要奶油脆豬，但又俾咗牛油多士。既然你哋中意俾咩就俾咩，咁不如唔好俾人揀仲好啦，等人好有心機慢慢揀完，最後又完全唔係嗰回事。而且以一個咁普通嘅公仔麵餐，居然咁膽收人五十幾蚊，性價比就更加低無可低！啲炒蛋炒到碎濕濕，完全夾唔起，望落成劈嘔吐物咁，見到都已經唔開胃；而炸豬排亦根本唔係炸豬排，只係一塊煎豬排，根本就違反商品說明條例；而呢個所謂麵餐根本就唔包嘢飲，連熱飲都要加錢，根本就搵笨！…查看更多

餐廳裝修後，所有嘢都變差，價錢85%就係食裝修。之前算抵食嘅下午茶已經取消咗，3、4點食都照計午餐價，閒閒哋都成百蚊落樓。但奇怪嘅係份量仍舊似足下午茶，價貴量小👎🏻點咗碗牛肉麵，前所未見過咁差，係完全夾唔起，成碗都係麵碎，唔用匙羹根本食唔到；牛肉多數係柴嘅質素，大舊難趙；加配咗杯涷珍珠奶茶，但蓋係熱飲蓋，根本無窿插飲管，要特登開咗個蓋先用到飲管啜珍珠。成個餐無一可取，但以工業區嚟講價錢屬超貴，一定唔會有下次！…查看更多

服務：落單阿叔好晦氣，好唔耐煩，反而姐姐態度正路啲環境：人少，但依然留住汗食，因為孤寒唔捨得開冷氣食物：6點鐘食晚飯，已經嗌咩無咩；點咗牛柳，6、7成熟依然又乾又鞋，好難頂…查看更多

買午市定食外賣自取，在店外睇清楚餐牌才入內購買，店外餐牌清楚寫明係跟飲品，涷飲再加錢等等，但店員在我購買後再提問下才說，外賣的冷熱飲品皆須加$5，惟此前由頭到尾都看不見字面上或口頭上的說明，店員還推說係公司規定等廢話，根本就係伏。本人由細到大從來未聽過在一家餐廳叫外賣午餐，飲品是要另加5蚊的，簡直大開眼界。此評與顏色無關，只係有嗰句講嗰句。…查看更多

夾餅醬料完全沒有擋隔，任由食客與自己超近距離邊食邊狂噴口水十數分鐘，即使等了很久也無奈退單，但店員完全沒有歉意，對退單要求也晦氣回應，感覺十分不滿。與此店顏色完全無關。…查看更多

食物質素不錯，但服務態度極差。連小小朋友一家三口光顧，全場只有高櫈，只好選全場唯一有椅背、較安全的餐桌枱位坐。不一會，有4人在店外欲光顧想坐餐桌枱，侍應即衝過來叫我們去坐bar枱，我反問她小小朋友要如何坐bar枱，她就拋下一句「你話唔想咪得囉⋯」又轉個頭，又有二人客進店，侍應又當即將之前另一位侍應擺低的食具全推過來，險些連碗麵也推倒，急著把枱拉開5cm作獨立雙人枱，完全不知禮貌為何物⋯ 當然隨後的落錯單(無故拉麵變成難食的韮菜麵）、漏單(跟餐小食唔追都唔補入單）也只是例牌的家常便飯⋯食物幾好都無用，服務九流…查看更多