Matmc的個人專頁

嚟得天星食米線，點可以唔點佢嘅招牌原條黃立倉米線？ 佢有一啲叫做鯛魚片或者係一啲墨魚春捲選擇嘅，但原條魚咁上咁有型真心唔多見，當然食魚啦。米線本身個湯底我點麻酸辣好香濃但係一啲唔口渴，豬軟骨軟淋入味，炆到啱啱好，裏面仲有啫哩狀，好好味。重頭氣就係條魚 - 點咗之後大概都要等15分鐘，因為即叫即炸。 魚醃得入味，魚皮香脆，魚肉嫩滑鮮甜唔腥，有成條魚送碗米線真係大滿足！ 見有啲人係兩個人share一條魚，其實都幾開心，我就自己一個jap曬, 好好jap食得晒。 不過呢奉勸大家記得攞定包紙巾擺枱面，因為最食到最後，一定係要出到用手食先食得晒啲鬼鼠位嘅肉😆…查看更多

2個月內嚟過陳記兩次，頭一次食叉燒燒鴨飯（$52），另一次就燒鵝瀨（$58），兩次都出色。燒鴨：皮脆肉嫩多汁，媲美燒鵝，可謂「燒鴨價錢，燒鵝味道」叉燒：多汁軟腍，不錯飯底：失色左啲，飯煮得唔算靚，也唔夠熱。燒鵝：份量十足，唔會皮包骨！同燒鴨一樣皮脆肉嫩多汁，性價比很高。瀨粉：爽滑彈牙，湯底似福米的湯但暇不掩瑜！本人都是乜樂燒鵝瀨的支持者，無可否認佢個瀨粉同湯底真係一絕，好可惜佢嘅燒鵝有陣時皮包骨（據說話師傅斬到邊忽就邊忽到邊，睇運啦），而且份量比較少，每次食完都覺得唔係好飽。就咁睇相，呢度嘅燒鴨真係做到似燒鵝咁，味道也很相近。燒鵝是比燒鴨更肥美一點，那種皮的薄脆，配埋油香四溢但恰到好處的脂肪，同爆汁的鵝肉，完全光芒四射！5粒星！都唔好講性價比了，直情質素都比乜樂高。去開果欄，不妨試下呢間燒味，保證不失望👍…查看更多

放工想食啖靚粥，但是：富記光榮結業了。十大碗租約期滿無做了。妹記生滾粥不嬲唔做晚市。女人街同豉油街係有幾間粥店，但睇落好似麻麻......即使身在美食天堂旺角，要搵間好味的傳統粥店，原來都不易。唯一想到的是朗豪坊後街的佳豪粥店同粥世家。前者食過一兩次，我覺得還可，但唔知點解總係未能視佢作為飯堂。今日一於試試附近的粥世家。睇佢openrice食評數目寥寥可數，2正1負，仲要係成6年前的，真係咁無生意？耳邊響起直升機伏伏聲......但我信自己直覺，應該帽事嘅。入去見到都幾多人，絕對唔係冷冷清清拍曬烏蠅。一睇價錢，非常實惠，一個單拼粥先$23,炸兩$17, 好平！點了皮蛋艇仔粥加炸兩。 個粥一上，已覺得非常對路，食落夠綿，材料豐富有豬皮鱿魚免治豬肉花生同青蔥，樣樣配料都有自己的美味，豬皮爽而入味，魷魚鮮味，花生香脆，青蔥新鮮，食到落底依然無變水，也不口渴。一碗$23的粥有呢個質素，值得俾高分。炸兩的油條不是妹記的即叫即炸，但一樣香口，頭尾部份都香脆，而且都有一定熱度，加埋爽滑腸粉同幾色醬料，也相當不錯。再睇睇個菜牌，有特別的蔬菜入饌的粥品，例如沙葛粥同芫茜香芹粥，很有特色。各色送粥小菜如酸豆角、榨菜、蘿蔔乾同鹹酸菜也很少見。呢間貌不驚人的小店，有非一般的實力同特色，實在唔明點解開業咁耐都只有2、3個食評。不過無他，食親的都是街坊老百姓，唔好食就投訴啫，好食食飽咪俾錢走人，又唔會有人為佢嘅好食寫下一言半語讚揚一番。畢竟粥同腸粉，太過日常太過普通，好食是應份，唔IG-able的粥世家其實值得更多正評。…查看更多

明太子蟹肉炸油條（$108）： 有特色又好味，蟹肉醬的蟹肉份量慷慨，油條其實係自家製酸種麵包炸的，食落外脆內煙韌，十足唔甜版牛脷酥，夾埋食很讚！炸魷魚鬚（$98）：平時酒吧嘅價錢，但用料較講究，魷魚鬚是紐西蘭貨，加上自家調配的炸漿，炸得輕、薄、脆， 賠償是拉差蛋黃醬，很滋味！海味手工意大利粉（$198）：用咗瀨尿蝦乾蝦米瑤柱同埋新鮮優質八爪魚，意粉用蘭王蛋自己整。意粉有咬口，八爪魚鮮甜彈牙，用料是好的，但出嚟效果係個意粉同嗰啲配料唔係好埋冷。食呢種意粉，正常期望係creamy嘅醬汁或者炒得香口乾身，但好可惜呢個意粉做唔到，相對出色嘅前菜，呢個係比較失望。薑汁焦糖燉蛋（$90）：一畢開嘅時候，啲薑味已經撲鼻，燉蛋好滑，加埋夠薑，好好味！開咗支白酒（$488），有冰桶，又會幫我哋斟酒，算唔錯。呢度嘅酒呢係支裝賣，有紅白酒各兩款，冇杯裝賣。另外，自攜酒水開瓶費係100蚊。其實餐廳嘅環境幾舒服, 好啱把酒談心，唯一嘅可惜係佢哋晚上10：00就要閂門，係9：45就要清場嗰種。如果想坐耐啲，最好食午市。…查看更多

見人彈麗晶個自助晚餐又貴又難食，覺得不解，又講吓自己經驗。我去年11月中食過一次，以下是當時的食評：1. 拖羅 - 就是出去食兩切要$過百果種，好高質2. 魚子 - 正常，醬油味略重，豪氣任畢3. 三文魚- 無腩位，但都正常4. 海膽壽司- 海膽鮮甜，但舊壽司飯好硬 ，失分5. 麵包蟹半隻- 正常味道，多米6. 芝士燒龍蝦半隻- OK正常7. 豬腳薑- 入味芳香，豬手好稔好好味8. 蒸海班- 蒸得夠滑9. 花雕漫鴨肝- 超正！ 棄煎用浸，鴨肝嫩，花雕汁香，上面的南瓜蓉甜美，好特別好好味10. 片皮鴨- 配料豐富11. 炆鵝掌- 稔得嚟不會不成形，好好味12. 咖哩羊- 不錯，香料味稍重13. 巴斯克cheese cake - 好食到癲，中間個心好軟滑14. 朱古力慕斯蛋糕- 似香濃黑森林，有啲似車厘子的酸味，香濃但輕盈加埋麥提沙，好睇又好食，又係好食到癲之作15. 栗子蛋糕- 好輕盈，栗子好清甜，簡單但美味16. 檸檬戚風蛋糕- 好輕盈又充滿檸檬芳香17. Cream brulee- 雲呢拿味好香好圓潤，蛋好18. 榛子雪糕- 雪糕唔夠濃厚，但榛子香脆19. 水果杯- 一般20. 鮑魚灌湯餃- 每位送一客，湯頭不錯，但餃皮漿口，失色 21. 柑橘朱古力- 濃郁好食22. 蝴蝶酥-普通 25. 煙三文魚- 正常26. Parma ham- 夠咸香，色澤又靚27. 泡菜沙律- 幾特別28. 馬卡龍- 杏仁殼做得很鬆化，朱古力餡略為重手，開心果味好正29. 片皮鴨鴨肝pizza- 將片鴨的材料拎去焗pizza， 唔算好食今晚我又重臨麗晶自助晚餐，覺得水準依舊地高，以下幾個重點highlights：1. 食物款式同上次大致相同，只有些少調整2. 壽司飯很大進步！不再乾硬，接近年日本料理水平3. 刺身與甜品依然是主打 - 重頭戲日本刺身無得彈，高質！凍海鮮中以麵包蟹最出色，多羔鮮甜。腳蟹則較淡味。4. 芝士燒龍蝦- 食到一隻蝦尾是霉的，白汁唔香，芝士又燒得唔夠焦，很普通。第二隻直接點清蒸的，竟然鮮甜彈牙，加上賓士尼汁同吃，非常美味！須知道自助餐龍蝦十居其九不是擦膠咁韌，就是無味，即使打正旗號龍蝦主題嘅自助餐都無可避免。但呢度的龍蝦水準之高絕對是酒店自助餐中之冠！5. 中式熱盤水準尚可，以豬薑腳、鵝掌最出色，其他一般，片鴨比皮不夠香脆。中式炒海鮮驚見凍蟹腳入饌！6. 甜品出色！蛋糕雪糕都很美味又精緻，必食麥提莎朱古力蛋糕和carrot cake, 馬卡龍也是少見的出色。水果杯反而很一般，得菠蘿的甜美的，哈蜜瓜同西瓜完全唔甜，不如棄左呢兩款仲好。啲曲奇擺到疏晒風淋晒，掉左佢啦！總評：也許價錢實在不便宜，網上滿意度一般，大多彈佢又貴又難食，無下次之類。抵唔抵食見仁見智，但同難食絕對扯唔上關係，自問兩次都滿意，即使不是每樣都100分，整體對食物的滿意度也有85分，算個人心中自助餐的三甲。希望佢地keep到水準！…查看更多

見有名人推介，一直都想試。一心叫雲吞牛筋撈麵，點知今日咁啱無牛筋腩，好失望，取以代之改點魚片頭。雲吞係兒時味道- 有豬油香大地魚嘅香味，撈麵也出色。好奇怪，碗湯要問先至有。味道是好的，有大地魚焦香氣，吃得出是老師傅手筆，呢個大概都係佢有名人推介嘅原因。但個魚片頭，大概是叫貨的，十分普通，乏善可陳。由於食完都唔係太飽，就想叫多個多士小食。見西多士$30, 多口問句是不會下午茶餐，換嚟一句「我地唔係出面果啲，飲品另計的」，不過又話「你想飲嘢我可以畀你加十蚊要杯嘢飲」。佢嘅「唔係出面果啲」令我以為食品質素一定超然。就點了西多士加凍檸茶。飲啖檸茶，無茶香，好淡。聽到隔離枱大讚呢度奶茶出色。出色？我唔明。以果個茶底，杯奶茶可以好得幾多呢？西多士色水唔夠，炸得唔香。上枱時已經淋上煉奶。我問有冇糖漿，夥記就遞上咗一支唔知乜嘢牌子嘅糖漿- 竟然唔係金獅糖漿，我又係一個錯愕。我仲以為傳統茶檔一定會有基本嘅水準，西多炸得金黃，配金獅糖漿，是常識吧。睇返啲食評，人地果啲都金黃的，我果件好似無炸過咁，點解相差咁遠？好了，切開，是無餡的炸方包一件。吓？我問點解無花生醬，有個熟客話因為好多客都唔喜歡花生醬..... 我終於明白佢話「我哋同出面嗰啲唔同」係咩意思了， 呢度嘅標準同我諗嘅標準是兩個世界的。默默食左一半，就付帳離去。唔比較，唔投訴。香港飲食業已經好慘，費事食果$95就西客上身彈三彈四咁無血性啦。要怪就怪自己今日無食神啦。…查看更多

做冬中學同學聚餐，選了文聚。我同文聚的緣份源自數年前北角店，輾轉至今呢一間已經係我經歷過佢第三間舖。之前因為店舖座位所限，未有機會呼朋換友來幫襯，今次換了新店手，無論裝修同座位都比以前更適合聚會，就同同學去馬食文聚。做冬菜單（7位用）1. 蝦多士（12件）$120 - 用了海蝦，炸得香脆不膩。2. 鮮奶炒蝦球 $180 - 相對普通。3. 鎮江骨煲 $120 - 非常軟腍入味。4. 鹹魚煎肉餅 $120 - 充滿豬肉的甜香同咸魚的咸香，不會有坊間死咸的通病，一口一個的大小剛好。5. 胡椒豬肚雞煲 $230 - 很出色！豬肚沒有燥味，軟腍得嚟有一定咬口，雞依然嫩滑，胡椒湯頭熱辣辣十分惹味，連同仿翅彈牙， 令人飲不停口！6. 水晶雞（半）$120 - 文聚招牌菜式。而家好多人北上，食走地雞已經平靚正。但文聚水晶雞完勝內地走地雞，果種鮮、嫩同香濃，只此一家！7. 炸大腸 $120 - 外脆內嫩，完全沒有臭味，好吃！8. 翅湯娃娃菜 $80 - 盡收文聚秘方翅湯精華的一道菜！絕非街外雞湯浸菜可比！9. 蘿蔔牛腩煲 $120 - 水準一如以往地好，我第一次食文聚就是食呢個牛腩陳村粉。但原來晚餐是座住火上的，老闆娘話因為牛凍左就會韌，所以要熱住食。我最欣賞墊底的蘿蔔，吸晒味，好正。10. 雞絲花膠翅 （$108/位）- 我覺得北角時的出品更出色，但呢個價錢都無投訴。11. 紅棗雪耳糖水（送）-不太甜，滿滿的骨膠原，為今餐美食畫上完美句號。咁食法，7位用埋單才$1700, 大家都十分滿意。呢個價呢個水準，學朋友講，真係只有深圳才能匹敵🤣另外，呢度唔收開瓶費，但酒杯等都有提供。我地同老闆娘講會有汽酒，佢仲準備左冰桶👍…查看更多

位處筲箕灣地鐵站B1出口， 註定不會低調到哪裡🤣得到地利之便之餘，還要懂宣傳。小小的檔口前有個Mon, 連播小店同國泰X Rubby Seven的宣傳片。介紹雞蛋仔的單張旁，貼滿與紅星如發哥、謝霆鋒等的合照。見到呢個牌面，心內一沉，覺得還是名不於實的打卡店吧。一場嚟到，都叫了一底原味雞蛋仔試吓佢功力。因為人多，一底雞蛋仔等左20分鐘。我等。見到等的顧客都是街坊客，也有區外人。開始覺得小店應該有點實力吧。名氣太大而街坊客比例少的小店，多數「伏特加」。NP雞蛋仔的疑似化學味、MM雞蛋仔稔過毛巾... 所謂人氣店，真的怕了。終於到手！一陣蛋香撲鼻，食落口，不得了！外脆內軟，不太甜但有濃郁蛋香，好好食！之前的疑慮一掃而空，好食又識宣傳，啲客真係俾你賺晒啦！兩三下就KO成底雞蛋仔。有下次！格仔餅No.1 是天后臨記的話，雞蛋仔No.1就係呢個不低調的高手了。…查看更多

說起文聚，要由北角和富道講起。詳情可以睇返我之前的食評。今日要講文聚，是要同佢say goodbye. 文聚經歷3間舖、 屯門、北角到鯽魚涌。唔知佢屯門店幾耐歷史，我認識佢時係3年前的北角店，當時我已接近要搬屋，相逢恨晚，也爭取機會食左3次。之後我也回過北角，但文聚舊址已變成一間燒味舖。失望而回。一年後，得知文聚在鰂魚涌重開，而昨日終於有機會拜訪一次，但想不到昨日已是last day. 晚市已爆，唯有食午市。新店地步非常難搵，幾經艱辛，終於搵到🤣叫了馳名的煎蝦丸和雞絲翅。蝦丸爽甜彈牙，必然是海蝦打成。反而個翅真心失望，同以前北角時完全兩碼事。不過都明嘅，話晒最後一日，質素係好難好似平常日子咁，能夠趕上尾班車都是好的。問老闆幾時再開，佢話抖吓先，未決定，但可以留意FB🤣祝福老闆身體健康，早日重振旗鼓，生意興隆🙏…查看更多

亮麗外觀令心以為是妥妥的一間網紅打卡店，食物卻甚有驚喜！點了朱古力酥同吉士包（$38@）, 朱古力酥皮層層分明，外層酥脆無比，朱古力香濃。吉士包我戲稱為「高級版忌廉檳」，吉士餡蛋香濃又軟滑，非常出色！唔點杯啡有點對唔住好味的pastry, 但見食評都是麻麻地，正猶豫中，老公已叫了一杯cuppacino，水準竟比星記好，完全不是食評所講的淡如水。再下一城點了坊間少見沖得像樣的expresso mochiato, 細細杯的其實是在兩shots expresso加上奶蓋,難度頗高。呢度的水準卻喜出望外，熱、香、濃兼備，$34實在抵飲👍同個咖啡師傾左幾句，讚佢沖得好。佢話意大利餐廳很注重杯啡，所以沖得用心。佢仲送左個士多啤梨croissant 俾我地多謝我地嘅欣賞👍…查看更多

一打開熟食中心的大門，迎來的是一片喧鬧，濃重鑊氣的白煙撲面而來。有一刻都擔心，到底在呢個環境品嚐法國菜係咪堅得架？朋友比我早到，一早已安坐好，叫左杯莎當妮，邊飲邊等邊觀賞熟食中心人生百態。呢度做得歐陸菜，美酒固然少不了。店子小小，wine list卻很多樣化。由香檳至port wine都有供應，而且價錢實惠。但對於真正嘅酒鬼嚟講，最吸引嘅選擇莫過於呢度係免收開瓶費的。因此水，我特地帶左支白酒去開。即使唔收crockage, 餐廳的配套卻很專業，準備好冰桶、雪過嘅酒杯，老闆仲全程侍酒，間中同客人cheers, 非常互動過癮。我哋兩個人叫左以下菜式， 簡評如下：1. 龍蝦湯（$118）配送餐包龍蝦湯好大件頭，兩個女仔分都足夠。一上菜嗰陣時個樣好吸引，香氣撲鼻。有一隻龍蝦甜嘅肉擺喺中間，鮮甜彈牙！個湯飲得出真材實料👍餐包香軟但唔甜，有種獨特的煙韌口感配上牛油又剛剛好，like!2. 鵝肝凍撻配覆盆子（$138）好精緻，哦剛好滑溜配埋raspberry微酸，正。個撻比較腍同埋唔夠牛油香，呢度要扣少少分。3. 西班牙燒乳豬（$218）呢個好好食！豬皮香脆，底下肥膏甘香可口，加埋薯蓉，十分可口！4. 法式鴿子千層批（$268）呢個是最愛！有多重味道同口感，椰菜、巴馬火腿、雞肉慕絲、鵝肝同鮮嫩鴿胸，好豐富。伴碟薯蓉絕對可以成為主角, 佢軟滑中有點薯粒，好香松露同牛油香，好正。加上有點焦糖香的醬汁，成個菜式十分精彩！5. 拿破崙千層酥（$68）好香的酥皮，美味但不算十分獨特。6. 巴伐洛娃蛋白餅（$68）呢個是我甜品中的最愛！講複雜程度，賣呢個價已是無敵。蛋白餅香脆、蛋白霜同忌廉香軟，配上酸甜熱情果汁同多種鮮果，口感同視覺都非常豐富，大推！無加一，只收現金，當晚人均 $463。食物高質，食得開心又滿足👍👍👍兩人一枱撐枱腳得， 一大班人嚟開酒暢飲又得，非常之flexible.有下次！…查看更多

在上環Ibis staycation，順便在附近美食漫遊。一早聽聞過球哥，但網上評價不算一面倒的好，始終有點猶疑要唔要試。由於美食漫遊吃得太豐盛，晚上想食得清淡一點，於是就試試球哥。點咗一個西洋菜燉排骨湯，一打開感覺很足料，一飲覺得很清，是無味精果種家常味道。最正係排骨，都是軟骨部分帶點肥膏，燉到非常鬆軟，充滿肉香和油香，空口食都很滋味，點埋生抽更昇華，就咁一盅湯，有菜有肉都夠送飯，清淡中有滋味，很滿足！再叫多個籠仔飯，老公唔食蝦乾於是叫了梅菜肉餅籠仔飯。飯是炒飯底，好香，肉餅是家常味不算非常出色，但梅菜的鮮甜卻非常突出，整體不錯。球哥見我地兩個人點一個飯，親切問我地夠唔夠食，我笑笑話夠喇，而家好少食米飯，兩三啖都夠了。正要埋單，球哥又叫住我食埋糖水先走，就送上兩碗腐竹薏米雞蛋糖水。糖水唔太甜，很足料，暖暖的非常comforting. 為簡單美味的一餐畫上美好句號。…查看更多

每日經過種總係見到有一堆人排緊，我去過兩次，都因為起碼有十張枱擺喺我前面而放棄。終於，今次機會嚟喇！只需要等4•張•枱！好！我等！都等左成15分鐘，終於入座。入得去終於明白點解等待時間咁長，因為樣樣嘢都係即叫即整，一個煎餃子要等20分鐘！不過，唔等都等咗咁耐啦，照等~喺等嘅過程裏面極之無聊，就摷咗佢枱面嗰樽菜脯嚟食，一食，驚為天人。佢唔係得啲蒜蓉辣椒嗰種，係麻辣蝦米菜脯，麻辣中充滿蝦米的咸鮮，好似泰國魷魚片果種味道，好美味，就咁空口食都可以食唔少😍我點的是蕃茄薯仔魚湯配台灣麵，加配5隻煎餃，餡我選了特別的香葉豆角豬肉，期望滿滿的泰國風味~先上的是番茄麵，食左一啖，好讚! 番茄魚湯貨真價實，唔酸但富番茄香，湯飲得出沒味精，可以放心大啖飲，加有咬口的台灣麵，再加一啖菜脯，出奇地夾，令人食不停口。食食下，主角出場了。餃子煎得金黃，皮比較厚，煎得不夠香脆，有點韌，而且有一浸油味。一口咬下期望餡料會爆汁，點知是乾的。期望的泰式風味完全沒有，出奇地清淡，唯一要讚的是豆角幾crunchy,但整體而言，唔理想。唔知是煎餃問題，定係湯餃都係咁? 唔知，但今餐而言，餃子很失色，反而個麵有驚喜， 菜脯更是今餐的意外驚喜！甜記是以餃子做招牌，但其實番茄麵更出色，真是「被耽誤了」。…查看更多

開張大約2個月左右，我幫襯過4-5次，有外賣亦有堂食。最欣賞佢地小菜無味精，有家的感覺！在旺角可以話係一道清流。食過佢粟米斑塊，外賣拎到上屋企仲係脆的，啲汁味道啱啱好，好家庭式的味道，完全無雞粉味精！今次堂食食佢個海底椰燉湯同咖哩豬扒飯，豬扒炸得靚，香脆好味！ 咖哩又係真材實料，肯定無雞湯，因為有啲唔夠咸😂，加左少少鹽就好好多。個漁香茄子唔辣唔油膩，講真唔似漁香茄子，似肉鬆茄子多啲，但好家常小菜feel, 唔錯。茶記價錢家的味道，我覺得值得keep住幫襯！…查看更多

食過九龍灣德福的牛陣已覺不錯，今次試iSquare,分店下午茶時段。我地選左1小時嚴選牛肉（$128/位）。入座已近3點，店內客人不多，但都叫keep 住有客入。我地坐左在落地大玻璃位，感覺相當開揚，比德福分店舒服很多。都是肉類任點任食，蔬菜丸類汽水等自助。個放菜的雪櫃相當夠凍， 噴晒白霧，凍冰冰白濛濛一片唔會令人想在櫃前逗留，疫情下叫人更放心😂。菜有羽衣甘藍相當抵讚👍咖哩牛肉飯都很好，牛肉大大塊唔會偷工減料。嚴選牛肉即使是最平，但牛肉味夠，肥瘦分明，方便除去脂肪，比油花豐富的貴牛更得我歡心。我最想說的，是呢度員工的態度。話說我老公取了薯格，覺得冷了就同侍應反映。佢地又真係叫廚房即整，出左新鮮的埋嚟通何我地有得攞。最令我感動的是員工細心。我發現4桶雪糕有2桶已俾人畢到差唔多見底，就叫員工refill. 當時我已差唔多夠鐘，心想佢都係虛應我，所以我講完就去左洗手間，回到座位，我老公話你去左邊，個哥哥仔行過嚟兩次提你雪糕已refill. 我過到去，見到個哥仔已上左一桶全新，上面搞笑地有一球雪糕。我話：「你好勁呀，咁好心機刮埋剩左嘅刮到成球出嚟。」佢話：「係呀，新果桶在急凍櫃拎出嚟好硬架，你唔會畢到，所以在舊桶刮定多一球出嚟俾你。」我畢吓，果然硬過我條命😂 我唔覺意食舊嘅有咩問題，其實味道都係咁好。我覺得個哥哥工作認真，其實佢可以就咁換桶新嘅都得，但佢細心地額外花工夫盡量滿足客人需要，抵讚！…查看更多