tracykk718的個人專頁

最近留意番韓國的餐廳，朋友介紹話呢間福岡漢堡扒好食，主打石燒和牛漢堡扒， 選用100%澳洲和牛，俾埋爐具客人自己煎漢堡，好食得黎又好玩。除咗一系列嘅漢堡扒外，亦有意粉和牛丼選擇。第一次聽到以爲係來自日本福岡，但朋友話其實韓國餐廳。店外面已經係寫韓文。我地三個朋友六點幾黎到度都有位，人唔算多，不過7點半走個陣已經8成滿啦。想食就早D黎蘿位啦。呢度嘅漢堡扒用澳洲和牛，價錢唔會好貴，最有特色就是個漢堡扒成個肉波波咁，有三款size可以自己配搭，好得意咖。雞蛋就可以搭配芝士、菠蘿、蒜片咁。我地叫左一份二人餐，菠蘿煙肉和牛漢堡同芝士蛋蒜和牛漢堡，另外再加一份芝士蛋和牛漢堡扒。 今次話明石燒，就自己落手落腳去煮啦，自行調節牛肉生熟程度去煎，但是一開始都難控制火候咖，好容易變曬碳咁。。。塊熱石其實都幾熱咖，最好黎到之後等一等先，之後盡量將波波肉切成一塊塊薄片咁黎煎，輕輕將佢煎一煎，三秒就好反一反啦，跟著不停咁樣重複煎，其實都幾好玩，自己控制火候啦。到識得控制火候已經燒曬啦。石塊唔夠熱可以麻煩店員換過一塊，慢慢燒。煙肉有驚喜，好香好好未。D牛肉好滑，唔鞋口，食到停唔到口啊！ 我地幾個朋友食曬個肉球都已經好飽啦，再加兩杯飲品啦，蜂蜜柚子茶加西遊梳打。 個人強烈建議一定要配番一杯凍飲，好清新，冰夠曬多，但實在太熱氣啦，有杯凍飲先解到喝。…查看更多

朋友話好想食雞喎，所以帶佢嚟試吓呢個新加坡過江龍嘅天天雞飯。我哋都算早過嚟，可以唔使等位，一入嚟就有得坐低。我哋揀咗一個二人餐咁就乜都可以試吓啦。首先係螺片湯，可以見到個湯清清地，有兩塊螺片，仲有兩舊瘦肉，呢排啱啱凍返，用嚟暖下胃啱啱好。呢一個南姜熱帶水果沙律，配搭非常新奇，竟然用咗無花果，番石榴同埋士多啤梨，呢啲平時唔會好見攞嚟做沙律嘅生果，生完仲加咗啲類似梅子粉，可以吊到生果嘅甜味出嚟，非常之推介，新奇又好味！跟住呢個蔬菜煲，煮到非常之入味，上面係白色西蘭花，同埋醬汁配合仲有啲白飯魚仔。食落口有好多種唔同嘅口感，用嚟送飯一流呀。另外，仲有呢個黃金金沙骨，其實佢係雞軟骨拎咗去炸，面頭加咗好多鹹蛋黃醬，好邪惡啊，不過炸衣唔會過厚，咬落去又有雞軟骨嘅口感，又係送飯冇得頂。終於嚟到重頭戲，就係海南雞！我哋叫咗半隻海南雞再配一個油飯。呢個油飯非常之足料，成碗仲大過我隻手掌，非常之有油香。至於啲海南雞勁誘惑，肉又滑，放入口會自己跌落去個喉嚨度㗎 ！ ！我差啲唔記得咗啲飲嘢飲添，我哋叫咗個綜合水果茶，不得了啦，有成1公升，飲極都未飲晒，入邊仲有好多水果，真材實料㗎，飲落去酸酸地，正！另外我哋仲試咗佢個新系列，叫咗一個姜桃鴨屎綠檸檬茶，好有好香嘅茶味，用嚟解渴就啱晒啦。最後食甜品，就係好出名嘅豆腐花。呢個豆腐花真係世一，非常之香，非常之重嘅豆香味，食落口又夠晒滑喎，唔會太甜味道一流，正呀。…查看更多

好耐冇約人食飯啦，盡情食個飯。我哋揀咗一間日式海鮮燒嘅餐廳嚟試吓。一入到去呢度裝修風格，成個格調都非常之日式，冇得去日本旅行過嚟扮吓自己去咗日本。我哋兩個人叫咗個刺身，麻將蕃茄豆腐沙律，焱丸號壽司，醬汁焗原隻魷魚燒，蕎麥麵，當然唔少得甲羅燒同鮑魚燒。個沙律啲蕃茄非常之鮮甜，鮮甜嘅蕃茄加埋嫩滑嘅豆腐用黎做開胃小菜真係正。醬汁魷魚燒，師傅好貼心將啲魷魚切成魷魚酥，加上醬汁同埋最重要有金菇鋪喺底，索晒啲汁，配合埋啲魷魚一齊食又彈牙又好味。刺身都好新鮮，厚度適中，食落去唔會有雪藏味，完全可以食到條魚本身嘅鮮味。另外壽司出乎我意料，好有驚喜可以見到師傅好大方，軍艦上面嘅餡多到寫晒出嚟，海膽鮮甜。蕎麥麵麵身唔會太淋，夠彈牙，本身味道都已經夠，唔使點醬汁都已經夠晒味啦。最後嚟到主角甲羅燒同埋鮑魚燒。呢兩樣食物會有店員過嚟專人幫手燒，幫我哋調好味而且煮完仲會細心切好方便我哋食，呢樣要大讚。甲羅燒可以食到重重嘅蟹膏，我就鍾意食黑松露味，因為除咗蟹肉之外仲可以食到黑松露嘅香味。至於個鮑魚燒，仲可以見到啲鮑魚喺度郁㗎，夠晒新鮮食落口都好彈牙。…查看更多

都市人生活壓力咁大，梗係要買最輕鬆一下，釋放一下壓力，於是同朋友嚟咗呢一間串燒舖頭，試吓佢個清酒任飲。呢度一共有24種清酒，唔同嘅酒有唔同嘅香味同埋味道，選擇非常之多，用一個價錢可以試到咁多唔同嘅走真係零舍開心。呢度有唔同款式嘅串燒選擇，餐牌上面都分門別類咁樣比客人選擇，有肉類，海鮮，蔬菜。咁我哋就乜都叫啲啦。蒜蓉焗蠔買四送一，大量嘅蒜蓉可以辟走晒蠔嘅腥味，蠔亦都唔會多沙，唔會偏乾。頂級牛小排都係我最我的最愛之一，見到其實佢唔會好孤寒又真係成排嘅牛小排粒，燒得非常之香口惹味，偏向濃味，咬落去都有肉汁，配埋酒真係啱啱好。燒金菇牛肉卷啲牛肉卷得好實淨，金菇吸晒啲牛肉嘅肉汁同埋牛肉嘅鮮味，中方牛肉片加咗啲口感，令人忍唔住食完一條一條。鹽燒三文魚都係另一個岀色嘅嘢食，首先面頭嘅魚皮燒得非常香脆，加埋三文魚嘅油香味，一流！鹽燒風味加埋純米大任樣嘅酒香同埋甜味，呢個配搭真係一流。另一樣推介係玉子肉鬆燒，首先玉子燒非常嫩滑，再加上煉奶同埋大量嘅肉鬆，令到味道同口感都多啲層次感。牛油燒粟米又係串燒必嗌之一，一條粟米分左一半，燒到好有牛油香味，粟米又好甜喎，真係以為自己食緊粟一燒！呢度仲有羊架食咖，調味好足，用黎配酒就一流喇！…查看更多

放工約咗朋友食飯，見到呢間餐廳喺門口嘅裝飾好靚，所以決定同朋友入嚟試吓。呢度放咗一張長凳，仲有啲燈柱真係好有感覺。我哋叫咗一個香煎鵝肝加橙香多士配芒果甜酸醬，燒芝士龍蝦，peanutbutter banana chocolate smoothie。首先，好快就上咗個鵝肝，可以見到擺盤十分精美，芒果甜酸醬喺底，中間就放左香橙多士，上面放咗半隻手掌咁大嘅香煎鵝肝，淨係睇都係視覺嘅享受。見到鵝肝兩面都煎得啱啱好，拎上嚟就已經聞到嗰一浸脂肪，油香味，放入口即刻融哂，配埋中間脆脆嘅香橙多士，口感非常豐富。鵝肝嘅油香味，配埋香橙多士同埋芒果嘅酸甜味，用黎做開胃前菜真係一流。細細舊一啖放入口，唔會漏，啱啱好。至於主菜燒芝士波士頓龍蝦，一拎上嚟真係好衝擊，首先份量一啲都唔細，有成隻波士頓龍蝦開咗兩邊，面頭仲放晒熱辣辣啱啱融嘅芝士，加仲有兩塊半塊English muffin加上egg benedicts，望落去真係視覺同重量嘅衝擊。平時睇，見到可能比較傳統嘅raclette都係即刻用一把燒熱左嘅刀，用熱力去切開芝士，等佢可以即刻融，流落去食物上面，做到流心溶岩嘅效果。可惜一點呢度見唔到呢一個步驟，上到嚟嘅時候，熱到溶晒嘅流心芝士已經放咗喺龍蝦上邊，不過唔緊要，見到咁邪惡，見到一樣咁驚嘆，會嘩一聲！龍蝦味道清淡，可以食到食材本身嘅味道，加上燒芝士濃郁嘅奶香味，就係龍蝦食材嘅最好調味料啦。另外至於個smoothie，亦都非常之足料，一飲入口已經聞到滿滿嘅花生醬味，花生醬同香蕉混合一齊比較黏口，唔會好稀，俾人放咗太多水嘅感覺，甜甜嘅smoothie配埋比較濃味嘅嘢食，呢個配搭正呀！…查看更多

最近港島區多咗個打卡新熱點，就係重新開放嘅中環街市，所以就同朋友喺附近醫飽個肚先，先至再去呢個新場打個卡。行過見到呢度牆身嘅壁畫好吸引，於是我哋就坐低食下野。我叫咗一個everything eggs benny，Lavender latte，同埋Brownie and rose。多士有兩塊，外皮夠硬，原本配埋意大利風乾火腿會有少少太鹹，不過面頭放咗菠菜同埋兩隻脹卜卜嘅水波蛋，再加埋滿滿嘅荷蘭醬，一督開隻蛋就做到流心嘅效果，荷蘭醬嘅甜味加埋蛋漿嘅香味，即刻中和晒火腿嘅鹹味，超級正呀，即刻拎電話出嚟打卡。上面仲有用牛油果捲成嘅牛油果花，就算下午茶時間黎食，都唔驚唔飽啦。Lavender latte 好快就上咗嚟，隔離有啲薰衣草花粒做裝飾，完全唔會影響咖啡嘅香味，除咗有咖啡香，仲有好香嘅奶味添！另外嗰個甜品都好靚呀，見到就開心啦！ 個Brownie有非常之重嘅朱古力味，見到外皮焗到好像已經表面有晒裂痕，督入去食落口都有好濃郁嘅朱古力味，加埋隔離雲呢拿雪糕球，更加係賞心悅目。雪糕球都好有心思咁，整成嘅玫瑰花狀，每1塊花瓣都係雪糕，除此之外仲加上玫瑰花碎，見到即刻少女心爆棚，唔影返十張八張相對唔住自己呀。😜…查看更多

朋友之前黎食過，佢極力推薦，於是黎試下。我地叫左黑松露牛肝菌蘑菇濃湯，黑松露粗薯條，鮮藍蟹肉及露荀燴意大利飯，香草焗原條法國海爐魚，white sangria，偽鴛鴦。好快就送左餐包上黎，好特別有兩款麵包。有一款係條狀嘅麵包比較硬同趣，另一款就係一片片嘅麵包，比較鬆軟，不過兩款麵包點佢個特製醬汁，鹹鹹地又酸酸地，用來做開胃前菜就一流啦。個黑松露牛肝菌蘑菇濃湯味道調校得好好，完全冇菌類嗰一種嘅草青味，反而有好濃厚嘅黑松露味，真係好驚喜。繼續黑松露嘢食，黑松露薯條嘅薯條係偏粗嘅薯條，熱辣辣啱啱拎上嚟，面頭仲撒左一啲黑松露碎，連埋沙律醬，令人食到停唔到口。至於呢度嘅主菜真係令我哋好有驚喜，首先個蟹肉蘆筍燴意大利飯，意大利飯煮得稔稔地，但係又唔會淋到好似食粥咁，食落去都有口感，正。蘆筍好新鮮，咬落去好脆口，蟹肉亦都非常大量，正。至於條鱸魚，真係好大條，一打開會有驚喜，魚肉唔會太腥，食落去有陣清新refreshing 味道。…查看更多

同媽咪喺附近行街，行完走過來附近商場呢度搵嘢食。媽咪話冇得去旅行，都想感受下異國風情，所以就揀咗呢間韓式炸雞。唔駛等好耐好快就有位。見到呢度裝飾有心思，牆上面掛左唔少廚具同美食相做裝飾，睇到都想食。我地叫左一杯mango yoghurt smoothie，芒果粒同埋乳酪打得非常之細滑，飲落好有淡淡芒果嘅香甜味，唔會太多冰沙粒，呢個夏天咁熱，用嚟消暑解渴配嘢食就一流啦。芒果粒同埋乳酪打得非常之細滑，飲落好有口感。芝士雞蛋捲用嚟打卡一流，首先成條雞蛋捲好厚，切開可以有成六 七舊 ，除咗入面有滿滿嘅芝士可以拉絲，面頭都有超級多沙律醬同埋飛魚子，有軟滑同粒粒嘅兩種口感，正。黎呢度冇理由唔食雞，我哋叫咗雙拼炸雞，香蒜脆雞，同埋韓式甜豉油脆雞。香蒜脆雞嘅蒜蓉味好香，炸皮外層都厚，有唔少肉汁同埋都幾嫩滑㗎。呢度仲好貼心，有個兜兜同手套提供，等我地食得乾淨😋…查看更多

尖沙咀蒲太郎重岀江湖。之前試過旺角嘅分店，而家既然喺我哋頭尖沙咀都開咗分店，就一定要嚟多多幫襯呢間黃色食店。呢度叫得居酒屋，當然係充滿着居酒屋嘅擺設，一入嚟佢哋仲會擊鼓歡迎我哋！前菜當然係日本嘅漬物，呢個係漬蕃茄，酸酸地幾開胃。我哋叫咗一個壽喜燒，日本黑豚肉，燒冰火菠蘿，燒番薯仔，燒雞皮，燒日本紅豆年糕，雜錦天婦羅，明太子醬免治雞肉棒，廣島蠔，巨峰提子梳打，蜜桃乳酸梳打。叫咗嘢食之後，好快就放咗個野菜豆腐鍋上黎，跟住再有專人幫手整壽喜燒！呢度嘅A4黃牛油脂分布非常平均，啱啱燒起嘅牛肉加埋蛋汁，放入口真係一流，燒好嘅牛肉放入口即溶，完全感受到點解大家對和牛嘅喜愛。如果唔係驚食唔晒我一定會再encore。推介推介。店員哥哥幫我哋燒咗兩塊做示範之後仲好有心機咁教我哋自己點樣燒，等我哋可以自己體驗一下，呢個服務真係非常之好。到咁上下就落湯打邊爐啦，我哋呢個野菜豆腐鍋材料都唔少，兩個人食其實真係會食唔晒呀。將日本黑豚肉放埋落去唔會有肉羶味，正。至於其他小食都唔輸蝕，我特別鍾意燒番薯仔，日本甜薯嘅出邊仲落咗少少鹽，食落去特別吊味，正呀。順便一提，呢度仲有芫荽鍋，我呢個芫荽怪當然要嗌，如果你都係芫荽怪就快啲試下😚😚😚食完呢個餐之後真係飽到上心口，呢度無論主食定係小食質素都好高，真係要返嚟食過返尋味，一食再食啊，幫襯黃店！…查看更多

去朋友屋企玩，所以就係附近買外賣。朋友話想食kebab，所以就黎試下。我地叫左兩個餐，一個雞肉kebab同一個招牌炸魚漢堡。呢度套餐可以有薯條同埋嘢飲。等緊嘅同時仲可以睇住外藉師傅整嘢食，夠哂正宗。拎完嘢食可以自助加辣椒粉或者黑椒粉。未打開，沿途想已經聞到好香喇。返到屋企打開，可以見到薯條同其他地方唔一樣，唔係撒鹽，而係撒辣椒粉。不過好神奇地，一啲都唔辣咖，反而好香，有啲似麥記shake shake 薯條嘅感覺，正。🥰至於個經典招牌炸魚漢堡，都係有驚喜。包皮唔啱，面頭好多芝麻粒，炸魚係啱啱新send俾我望住佢紮起嘅，入邊都有好多餡㗎，有椰菜同沙律醬，夠晒夾。至於我朋友嗌嘅Kebab，都非常正。呢一個招牌雞肉烤餅，入邊夠晒足料，除咗有預先調味同埋煎好嘅雞肉塊，入邊都有大量嘅椰菜絲仲有辣椒同埋印式辣醬，鍾意食辣嘅朋友一定唔可以錯過，加埋出邊包住嘅嗰一塊煙煙韌韌嘅烤餅，就算辣都辣得好吸引。…查看更多

溫馨提示:🔵🔵🔷🔷🔹🔷🔷🔵🔵我哋叫咗兩個set dinner，一個three courses 另一個two courses。叫咗一個龍蝦湯留心牛角包🥐，招牌流心布拉塔芝士沙律🥗，蟹肉留心蛋龍蝦汁燴飯🍚，馬莎曼咖喱和牛面頰🐮。牛角包面頭配有芝士碎，而芝士沙律就配咗番茄同埋青瓜。個龍蝦汁燴飯就有蟹肉絲碎，飛魚子粒，同埋龍蝦汁，面頭仲有一粒流心蛋。馬莎曼咖哩偏印度式，有椰奶，配牛頰塊。甜品就叫咗一個真空慢煮法式焦糖燉蛋布甸。除咗焦糖燉蛋布甸，入邊仲有菠蘿絲同菠蘿蓉。溫馨提示:🔵🔵🔷🔷🔹🔷🔷🔵🔵…查看更多

我地叫左蕃茄粟米湯，五香鮮牛肉，五寶手打拼盤，生菜，紫菜，金菇，紅薯粉，竹蔗茅根。我哋嗌左嘢食冇幾耐，就已經有湯底送到，跟住仲有各樣嘢食送到添，手腳非常之快。演唱會有基本款式，更加令我驚訝嘅係竟然有芝麻醬同埋蝦乾粒，仲有大量芫荽，真係我的最愛。可以見到湯底用料十足，有成七，八舊粟米，薯仔塊，大量蕃茄，所以湯底非常濃味。五寶拼盤所有丸都係新鮮整好而成嘅，絕對唔係醃製陳年丸。最令我驚喜嘅係牛肉丸，同埋蝦丸。牛肉丸入邊有唔同大細嘅牛肉，所以食落去會唔同嘅口感，好有驚喜。蝦丸俾我嘅感覺就好似蝦滑， 淥一淥拎返上嚟，一啲都唔韌！唔少得打邊爐必嗌嘅金菇，真係蕃茄湯底嘅絕配，吸晒啲蕃茄湯底，冇得頂。生菜夠新鮮，唔會有啲老嘅菜葉，已經搣好晒一片片，加埋索晒啲蕃茄湯底，好味又係健康之選。我哋亦都叫咗新鮮牛肉片，健康啲，輕輕淥一淥就拎返上嚟，食落去都有好香嘅牛味，唔會韌，亦都唔會有羶味。出乎我意料，呢度竟然有紅薯粉嗌，呢度嘅紅薯粉係偏幼嘅，所以好快就熟，而且擺落去打邊爐，加埋蕃茄湯底好容易入味，去到最後食返一個薯粉真係好滿足呀。竹蔗茅根都可以見到好足料，有蘿蔔，粟米，竹蔗，同埋茅根，清甜又降火，打邊爐飲用就最岩啦。…查看更多

嘻嘻 接人係銅鑼灣放工，於是揀左呢間黃色西餐廳黎食。餐湯係白蘿蔔湯，用蘿蔔蓉整成，淨係落咗少少鹽，冇加其他調味料，白蘿蔔嘅鮮味好重。薄脆非常香脆，就算擺耐左，掛住影相都仲好脆，最有驚喜係佢嗰醬，係自家調配嘅秘製醬汁，有少少蜜糖芥末味又有少少麥當勞嘅甜酸醬同沙律醬味，非常特別，用嚟配呢個薄脆非常之夾。黃到金雞翼，外皮好香脆，入邊好Juicy，一咬落去爆汁，調味啱啱好，唔會太過鹹。鮮茄汁煙肉意大利燴飯，茄汁用左新鮮蕃茄，再加上用料充足，有好多蘑菇同煙肉，越食越開胃。燴飯粒唔會太淋，粒粒分明，又有口感。至於個薯餅肉醬漢堡，真係一個好新奇嘅配搭，估唔到配起上嚟會咁岩咁夾，唔止食得，仲好睇得，可以見到包皮面頭印着左一個橫睇掂睇都見到香港加油嘅字樣。薯餅夠香，肉醬有肉粒嘅口感同埋鮮茄嘅酸味，加埋面頭嗰隻流心煎蛋，切開嘅時候蛋汁沾滿晒包肉碎同埋薯餅，好邪惡吖。至於甜品就係原味芝士蛋糕，可以食得出糕體非常綿密，餅底唔會太厚，加埋蜜糖做點綴，甜甜地，非常適合用來做飯後甜品。我地仲叫左個疏乎厘鬆餅，拎上嚟嘅時候超香！！！好鬆軟！！！有好香蛋味而且好香軟，加埋咖啡味雪糕真係不得了，等待係值得嘅！推薦吖，同路人要多多幫襯！…查看更多

上環西營盤一帶一向都有好多有特色嘅餐廳，我同朋友一直都想試，趁今日得閒就黎試吓呢一間餐廳。餐廳門口放咗一棵櫻花樹，非常吸睛，入到黎呢度都有唔少裝飾品。我哋兩個人叫咗兩個套餐：意式巴馬火腿意大利麵配橙汁，黑松露伴元貝意大利飯配咖啡，焗烤海鮮拼盤。首先巴馬火腿意大利麵，Parma ham唔會太鹹，唔會片得太薄，肥瘦均稱，意大利粉非常彈牙，唔會太淋。面頭仲加咗啲松露碎，令到個意粉香氣十足。至於黑松露元貝意大利飯真係好有驚喜，意大利飯唔會太漏，黑松露片亦都非常之香，同個飯融合，至於果粒元貝真係唔係想像中咁細粒，有手掌咁大隻，加埋焗芝士，即時香口好多！整呢個海鮮拼盤真係一個海鮮什錦盤，有兩隻手掌咁大嘅虎蝦，仲有一舊芝士焗超級大啡菇，有螺，頭先嗰粒手掌咁大嘅元貝，仲有一隻大龍蝦。好邪惡啊，全部都落咗芝士可以做到拉絲效果，所以非常香口，龍蝦唔會梅，食呢個真係一次過滿足晒對海鮮嘅慾望！…查看更多

趁着母親節，當然要同媽咪一家大細黎品嚐美食。我哋叫咗粉絲蝦煲配飯，馬拉盞炒通菜，泰式雞乾炒河，椰汁糯米飯，椰青，泰式奶茶。呢度叫完嘢食之後好快就送到。馬拉盞炒通菜可以見到通菜非常爽口，就算落咗馬拉盞，唔食辣嘅我一樣食得好滋味，全因夠晒鑊氣，唔會落咗太多油，鍾意健康嘅媽咪都食到讚不絕口。至於個乾炒河，河粉好靚，本身好香滑，又煙韌，唔會好易斷，再加上大量嘅雞塊，唔會乾爭爭仲有啲蘿蔔，芥蘭同埋蝦乾做點綴，夠晒鑊氣同香口。另一個粉絲蝦煲又係我哋食到停唔到口嘅美食，粉絲鋪喺底完全吸收晒上面嘅精華，上面就有超大隻嘅蝦，又有啲蝦乾炒到好香嘅蒜片同埋少少辣，仲有啲胡椒粒令到成碟餸非常之香口，用嚟送飯真係一流。終於到最期待嘅甜品，就係芒果糯米飯，芒果非常之甜而且大個，有成個手掌咁大，糯米飯就非常綿密，兩粒都係用咗白色糯米，加埋鹹椰汁，真係一個完美嘅泰式美食嘅終結。嘢飲我哋就叫咗椰青，非常解暑，食完啲重口味嘅嘢食用椰青飲一啖，清清涼涼又解渴真係絕配。至於個泰式奶茶，係正宗嘅泰國手標茶，咁熱嘅天氣飲番杯冰涼又甜嘅泰式奶茶就真係無敵啦！呢度服務非常之好，每一位員工都好關心同親切咁幫我哋，感受到佢哋對客人嘅熱誠同埋熱情，裝修又好靚，非常之有泰式風情，想來返一轉偽泰國旅行，黎呢度就啱晒啦！非常之推介！…查看更多