為食duck duck B的個人專頁

上個禮拜，終於輪到為食豆豆放假！即係又係時候帶豆媽出動搵野食~~今次就唔去太遠LA，落觀塘搵野食啦~為食一族都應該知道觀塘係其中一個多野食，但首要係識窿路~而為食豆豆其中一日喺網上見到介紹"拿督"呢間餐廳~本來都冇咩興趣，因為認為網上嘅推介都係收$$做宣傳~可信性唔高！但見佢介紹嘅野食，又開正豆媽嗰瓣~就帶佢試下La~~橫掂又有巴士直到，夠哂方便吖~~話明有巴士直到，基本上我地喺巴士總站落車之後，已經可以見到~唔難搵~~入到去，要上一層樓梯先到，但上到去好快就會見到~雖然有幾間餐龐，唯獨"拿督"最熱鬧，可能係我地比較晏到嘅關係啦~我地到嘅時候已經差唔多兩點，食飯時間又過哂，靜都係正常嘅~但只有"拿督"依然熱鬧，唔知仲以為得佢一間食肆呀~~😅😅一坐低，order姐姐就拎左呢張menu俾我地填，有D點心紙Feel~我地見到之後，都冇點諗，已經填好想食嘅野嘅份量~話哂係做左功課先黎GA嘛~點可以黎到先諗呀~~重要嘅係：時間唔早喇！人地收三點架~~於是就咋咋淋填好，俾番姐姐啦~~為食豆自問今次同豆媽係超級超級克制自己LA~Follow為食豆耐嘅朋友仔都應該知道，每次見到個Menu, 都會好似失控咁叫到成枱野，係不斷嗌呀嗌，落呀落！叫得幾過癮呀~~今次點解好似咁正常？唔係對佢冇信心，只係當日夜晚有另一個飯局，晏就呢餐唯有強制性控制自己啫~兩個人，叫左4樣野，兩杯飲品。。。會唔會正常左少少呢。。。不過唔緊要啦~為食豆不斷安慰自己，如果好食嘅，下個禮拜再黎掃餐勁嘅！叫完等左一陣。。。先黎白咖啡同拉茶飲下先~白咖啡呢啲咁刺激嘅飲品梗係留俾豆媽啦~佢飲左兩啖覺得唔同平時飲開嘅咖啡Woo。。。梗係啦！平時你飲開嘅係普通嘅咖啡，今次係新加坡嘅白咖啡~味道梗係有少少唔同啦~~佢覺得比起飲開嘅咖啡，啡味冇咁重，口感幾純，有陣陣榛子味，但又唔會太甜。而我杯拉茶都唔錯，飲完第一啖，會有種想一飲而盡嘅感覺。當中感覺茶同糖嘅比例啱啱好，唔會邊樣偏多或偏少，甜度比香港奶茶甜~(但呢個正常吖，話明拉茶，係用煉奶GA嘛)黎完飲品，等左一陣，終於上第一個麵LA~~呢個星加坡黑鼓油乾撈麵，聽聞係其中一樣招牌菜~~奈何豆媽對粗麵麻麻，我就叫佢食河粉囉~(佢鍾意食河粉嘛)當佢一見到碟撈河，佢第一句就話：呢碟係干炒牛河黎架？！我聽到反應有啲。。。(好多烏鴉飛過)喂！阿哥呀~個樣有少少似啫，都唔洗咁直接架~你當嗰啲雞腳同豬腳透明嘅咩？定係太耐冇食干炒牛河，直接當佢地係牛肉先？！佢見我嘅反應係冇反應，唯有選擇靜靜雞先起筷。。。(其實佢嘅直接都係佢其中一樣可愛黎嘅)佢食左兩啖，叫我試下。。。唉~河粉對豆豆黎講，反而係比較抗拒。。。(其實係因為有少少兒童時嘅陰影影響)🙈🙈🙈但係你叫到，我食兩條咁多啦~~(好俾面GA喇大佬)我食落，味道又幾得喎~當然唔係講個河粉啦~係講緊個汁呀！甜甜地，味道又幾香。。。係喇！係有少少瑞士雞翼汁嗰個味呀！真係幾正。。。個味。之後食左隻雞腳。。。哇！呢隻雞腳吖，入哂味喎！正呀！而豆媽食左嚿豬手之後就又黎料：隻豬手真係幾正，夠味又夠肥，但係得一嚿少左啲囉。。。(我唯有再次。。。YA~YA~YA~)一路食住頭盤一路等住我嘅主菜 - 「豬頸肉叻沙 “摻摻”」話說當我諗緊喺油麵同米粉二選一嘅時候，我就俾"摻摻"吸引左。。。可能係因為唔知咩黎，所以對佢特別好奇。。。一問之下，原來摻摻就係"油麵 + 米粉"！YES! 唔洗揀！可以滿足哂我兩樣都想食嘅野！黎到一見到本來有少少失望，望落好似得嗰幾塊豬頸肉，以為係敷衍Feel之際。。。本能反應即刻向下摷。。。(其實為食豆知道咁做係唔多禮貌嘅做法)愈搵愈多，見到多幾舊啦~至少知道唔係伏先~食第一啖。。。OK LA~唔太辣~~(雖然本人比較鍾意重口味)但食多幾啖。。。黎料LA~~正呀！開始愈食愈辣，真係辣得好過癮呀！個叻沙汁辣得黎又正，又唔會搶哂D椰汁味~唔覺唔覺又會飲D唔覺唔覺又會再飲D。。。呀。。。！真係飲到停唔到。。。拎住匙羹嘅左手嗰刻都刻一D都唔聽洗呀。。。話說豆豆本人食野本身真係幾慢，由細到大都會俾身邊人話食野「滋油淡定」，我都已經習慣。。。但係今次，連自己都覺得典解好似食左咁耐都仲未食哂，仲有咁多嘅？！呢刻先留意到呢碗"摻摻"嘅份量都有幾多。。。不過冇問題吖~對住自己鍾意食嘅野，多多都食得哂！食到一半，另一款小食終於黎喇~~呢個"怡保雞雜"，咪睇佢好似細細兜呀~份量都唔惹少架~~平時為食豆豆食牛雜就食得多，但係雞雜就真係比較少，所以今次要試下先！呢個雞雜有雞心，雞膶，雞腎~可能唔會有太多人鍾意食內臟，覺得唔太健康，核突。。。但我就屬於唔抗拒，甚至係鍾意食嘅人~~所以又點可以唔嗌呢？果然，一D都冇令為食豆失望，正呀！喺食緊呢兜嘅時候，為食豆已經有個想法~就係。。。不如嗌多兜吖~~廿蚊之嘛~抵到爛啦！又或者會有人覺得廿蚊食D根本唔算值錢嘅內臟係唔值得囉。。。咁每個人口味唔同，又冇問題嘅~~唔經唔覺，又食完一碟~~基於夜晚有飯局，唯有以呢碟冇得頂嘅雞雜作為為食豆呢餐嘅尾聲。。。其實真係有D唔夠喉囉。。。不過唔緊要啦~~反正一定有下次，下次再黎再食多D！呢度收3點3，但當我地走之前，繼續都仲有客比我地遲黎，睇住佢地砰砰聲坐低又砰砰聲叫野，就知佢地幾急啦~~睇到已經差唔多3點都仲咁多客，我地都真係不得不佩服呀！…查看更多

早幾日同媽媽行街街，行到咁上下，又到左醫肚TIME~觀塘又算細，搵野食唔算難，但係想搵到間啱心水嘅原來都唔係咁易~嗰日母親大人心血來潮想食潮州野~真係有D頭痛，我自問打邊爐就會有D經驗啫，潮州野真係好少喺度食~唯有搵OPENRICE幫幫手LA~見到食評5錯，睇相都OK LA~於是又係試新野嘅時間鳥~~~去到門口，都幾熱鬧，我地攞左張飛都等左幾個字~冇計LA~食飯時間嘛~等左3個字左右啦~已經可以坐低算係咁啦~~一坐低，其實都已經諗好食咩~橫掂第一次黎食，唔睇MENU 喇~就以網上睇到嘅相為準啦~咁就出事LA~兩個人嗌到成枱野。。。如果你食野係以視覺為上嘅話，呢碟蠔餅就唔建議你嗌喇~因為佢個賣相真係麻麻~我地就旨在醫肚，除左手機，就梗係好食行先啦~~首先，佢好香跪，但食落都幾厚粉~油就梗架喇~但係佢啲料就真係幾足，入面嘅蔥多就唔再講，佢落啲蠔仔都幾多，啖啖有~唔錯!話明係潮州菜，食蠔仔粥係常識吧?!佢有兩款揀，一款係我地呢個「碗SIZE」，一款係「例牌」。我地嗌之前，都有問過侍應姐姐，兩個人係「碗SIZE」，會唔會都食唔哂?侍應姐姐就話每人大概兩至三碗啫，冇問題架!咦!都唔係好多啫~咁又點可以錯過呢~黎到之後，都覺得好正常吖~侍應姐姐都冇呃我地呀~呢個蠔仔粥都唔錯! 都係嗰句啦，啲料真係幾足下~~蠔仔，肉碎，白飯，芫茜。。。至於味道呢，我地都覺得佢個胡椒重手左，搶左啲蠔仔同其他材料嘅味~但好在個粥就煮得夠綿，攞番啲分~至於呢碟撈麵。。。點講好呢?如果價錢黎講，絕對唔值!佢呢個份量只係FOR一人~如果係一個男人食，直情係到喉唔到肺添呀!而如果係以味道黎睇，又係另一個說法~佢整得算乾爽，個麵好陣牙。而且佢用適量嘅XO醬吊味，唔會過多，辣辣地好惹味。我都話出事啦! 明明得兩個人，仲要冇男人~都唔知點解會嗌咁多野食~但黎得打冷，鹵水鵝又好難唔嗌黎試下嘅。。。而鹵水鵝就真係我地食左成餐飯最滿意嘅一個菜喇~我真心覺得佢係色香味俱全~佢肥瘦適中，望落好油，食落又唔會覺得好油膩~反而會食唔停，愈食愈停唔到!鹵得好香好入味，正呀!兩母女食4樣野食，每碟份量都有番咁上下，好彩食得哂，唔洗打包。話哂打包外賣同堂食個感覺始終都會有唔同，本人自己就覺得堂食永遠都俾外賣好食少少。。。純粹個人意見啦~呢餐飯食左3佰幾，接近4佰又未到，價錢上算係咁啦~只係下次如果再幫襯的話，一定要CALL齊人~人多啲又可以嗌多啲，嗌多啲又可以試多啲~試多啲又唔會食到個肚頂得咁辛苦~…查看更多

身為打工仔，要番5日工已經嗌救命~但如果番足6日嘅朋友，咪仲慘~~好彩嘅係。。。小編屬於夾喺中間，番5日半~仲要係長短週~都OK啦~話明長短週，最好梗係搵個禮拜6嘅短週出動搵野食啦~雖則放假，但唔瞓番夠本又點對得住自己呀。。。如是者，昏迷到晏就先再出動~放假又點可以留喺自己嘅地頭呢?所以一早做定功課，帶媽媽尋寶~唔係~~開餐至啱~~話說呢度山長水又遠，好多人都唔明我點解要咁遠黎到上環食一餐咁大把~其實對我黎講，食咩唔係最重要~食咩又有咩所謂吖~~最緊要係同邊個人係啫~我就梗係搵番對我最重要，我又最重視嘅屋企人去食野啦~~(以上純屬個人意見。)媽媽本身又鍾意食懷舊野，今次就帶佢黎試新野~~去到上環站，睇左地圖一陣先研究到點行。。。都行左一段時間先見到，好彩都搵得到~~呢間咖啡室標明早收，我地去到 + 搵到嘅時候都已經差唔多3點~諗住嗱嗱聲即刻入去坐低開餐啦~點知入到去，都要等一陣。。。好彩都唔洗等好耐，等左10分鐘左右，因為真係都好爆~而且啲枱基本上都一定要搭黎搭去，有得咁快坐低已經好好喇~坐低之後，例牌望下個餐牌~~(其實明明一早做哂功課諗定嗌咩，但都係要睇下先安樂~)到嗌得嘅時候，由於真係太熱鬧，落單姐姐都顧唔到咁多人，好彩都好快嗌左野食~等左一陣，終於黎喇！先黎個奶茶紅豆冰~飲落唔會好甜，而且紅豆好多，又有咬口~奶茶個甜味啱我，唔會好甜~呢度嘅鍋仔公司麵咁出名，點可以唔試下呀~有人話過佢個份量好大，啱兩個人SHARE~咁就啱哂喇~二人份量，我地兩個一人一半~落單嘅時候，姐姐同我地講，叉燒冇哂，轉鴨胸俾我地~我地冇咩所謂，都OK啦~另外，其實本來佢係煎蛋，但由於我比較鍾情炒蛋。。。結果都好唔好意思問個落單姐姐可唔可以轉炒蛋。。。姐姐都好直接同我講，我可以幫你寫，但廚房做唔做，係佢地決定。。。我都唔敢再講任何野，剩係識不停唔該佢。。。(因為都唔知講咩好喇~~)點知一見到，真係好滾動呀!!師父真係炒左俾我~仲耍係咁靚仔~~但咪睇好似剩得炒蛋咁喎~所謂寶物尋歸底。。。我地一移開過靚炒蛋之後，見到其他料，就真心覺得好彩係兩個人分黎食~如果唔係一定食唔哂!首先，炒蛋真心好食~唔會厚身就預左，但佢唔鞋口，好滑~賣相得，食落一樣正!而佢俾嘅鮮肉份量就幾多，食到底嗰時都仲有。。。午餐肉，啖啖肉~但就覺得呢隻午餐肉咸左少少~~腸仔就冇咩特別~肉丁就幾好食~個辣味夠，又夠香~而個鴨胸就UN左少少~都OK嘅~整體呢鍋麵真係幾正!個湯底又好味，個麵唔會好淋~最緊要，真係夠哂大碗!完全係兩個人份量~食完都飽左一半~~但一場黎到，點可以只係嗌一樣野吖~~梗係要食佢另一個招牌菜 - 香蔥碎牛炒蛋厚多士啦~~我第一次睇到個名時，就已經好恨食喇~黎到唔嗌就真係對唔住自己啦~本來要搭枱，張枱都己經細上加細，好彩我地差唔多食完嗰鍋麵先上呢份厚多士~~如果講賣相，就真係麻麻喇~但見到咁多蔥，都已經覺得會好好味先囉~加上唔好睇我影成咁，實物嘅蔥花蛋牛都幾厚~好足料~~我同媽媽切開一半，一人一邊。唔洗爭~咬落去。。。嘩!!個蔥嘅香味不斷喺口腔入面攻出黎唔再講啦~個蛋香好濃好正，而且唔乾身，好濕潤~加埋啲牛肉~冇得頂呀!!食埋個蔥花蛋牛多士，我都差唔多夠皮喇。。。誓估唔到。。。媽媽竟然話想試下佢個菠蘿油?!真係估你唔到呀~既然佢想食，咪嗌個俾佢囉~難得佢咁開胃~~黎到見到時，都覺得個樣還可以啦~本來都諗住個樣麻麻，食落應該都得啦。。。但真係有少少失望，佢唔夠熱，而且食落個皮唔夠脆。。。呢個包扣左少少分~食埋個菠蘿包之後，真係夠哂皮喇~~成餐整體黎講真係好味~杯奶茶紅豆冰已經夠哂正~加埋個鍋麵同埋厚多士，真係冇得彈呀!!只係最後個菠蘿包好少少失望啫。。。下次如果再黎，一定要翻兜呢幾樣野呀~~…查看更多

難得假期，同閨密入西貢HEA下~~平時假日先可以入去行下，但都會勁多人~~就算HIGH個TEA，都有一定難度~~今次終於可以慢慢黎，行下，睇下，休息下~行到咁上下，個肚又開始響~睇左幾間，都係簡單啲算啦~因為個腦真係唔想諗野~~喺門口見佢放左餐牌，睇左一陣，大家都覺得可以TRY TRY~於是入去試新野~(其實黎黎去去嗌黎嗌去都係食嗰啲架啦~~)一入到去，環境都算大，但係佢啲位擺得都幾迫~我地卡位嘅角落，我個FD坐入去時都差啲撞到隔離枱。。。(利申 : 我閨密係個食極都唔肥嘅港女~)睇到餐牌，其實都係冇咩特別~我又唔想食常餐，結局嗌左個下午茶~~我個FD就獨沽一味~沙嗲牛麵配個奄列~佢話個丁煮得幾好，唔會煮到好淋，食落煙煙韌韌~有咬口~啲牛肉又唔會好韌，個湯又夠濃味~(佢仲要連湯飲埋。。。)奄列就不過不失啦~冇咩特別~~而我叫嘅下午茶係喇沙海鮮湯米粉~原因至在貪佢重口味~睇相應該係幾辣，啱我~~黎到之後，又覺得佢幾足料喎~有啲餐廳係"相片只供參考"嘛~呢個又幾好喎~同張相都有9成似。(除左相入面擺得靚仔啲之外)首先，佢個辣味夠，唔會得個色~另外，啲餸都入哂味，唔會好淡~而且除左青口佢得一嚿之外，其他餸好似魷魚，斑塊，蟹柳，豆卜。。。連蝦佢都有兩嚿以上，絕對足料呀!呢個米粉本身都好大碗，下午茶黎講又好似多左啲。。。如果用黎LUNCH就啱啱好喇~~我呢個檸茶又係正~點解?! 好簡單啫~啲茶唔澀囉~易入口，又有成4塊檸檬浸住(唔識影相嘅後果。。。)埋單幾數，兩個港女食到個肚攬住走，先81蚊，算係咁啦~雖則只係下午茶，但飽到夜晚嗰餐都可以慳番囉~…查看更多

小編本身住喺將軍澳，但係都比較少特登去呢度開餐。因為對於小編黎講，由蝸居行過黎，都要行15-20分鐘先到。。。呢度唔算易搵，雖然都算近地鐵站，但由寶琳站行過去都要少少時間，何妨我住嗰度，都唔係連接住地鐵站添。。。但呢間野真係開左好多年，算係老字號。而且佢啲水準咁多年都KEEP得好。呢日一早起身，唔想又食火腿通，沙嗲牛，肉丁麵呀呢啲ABC餐。。。於是抆埋兩位老人家行多兩步過黎飲杯熱豆漿，食番幾舊油炸鬼~~裡面環境算係幾大，唔會太迫。但係可能都係一朝早，食客唔算多，而食嘅都以街坊居多。佢剩係早餐都好多選擇，小編每次黎到都要少少時間諗一諗。。。(利申 : 小編係有嚴重嘅選擇困難症)每次黎到，都一定會唔小心叫多左"少少"小食，結果。。。咪眼闊肚窄囉~~但因為真係好好食，次次都忍唔住嗌多左"少少"。。。研究完一輪，終於嗌到喇~~落單方法都好簡單，你叫咩，佢幫你劃咩。埋單時攞住呢張單俾錢就得架喇~~通常都唔洗等好耐，就算係繁忙時段，啲野都算黎得快。每次都必點嘅油炸鬼。次次都同一個感覺，就係又熱又脆口，永冇失手~正呀!!呢個油豆腐麵，係媽媽嘅其中一個至愛。佢最鍾意個湯夠清，唔會濃，而且食完都唔會口乾。呢個雞扒麵就係我老爸嘅唯一選擇，主要係佢鍾意食雞扒。。。而我就麻麻喇~~因為我覺得雞扒整得比較咸，同埋"孩口"，我就會扣少少分喇~~但係呢度好細心，你唔洗同佢講分開上，佢都會自動幫你將個麵同雞扒分開~~洗事浸淋哂嘛~而我今次就揀左雲吞麵。佢只有3粒雲吞，但係粒粒都好大粒，好足料，唔會得個皮~~如果我冇估錯，佢啲雲吞應該係自己包，因為真係好足料呀~而且由於小編比較鍾意食炒蛋，特登叫師父轉炒蛋~~正呀!!雖則賣相麻麻，誠意搭夠啦~~而每個餐都會有杯豆漿送，我就鍾意飲熱多過凍喇~~每啖豆漿都用匙羹慢慢"不"上黎，再放入口。嗰種感覺呀~比起飲凍豆漿嗰時，好快咁一次過灌落喉嚨度，完全係另一個層次呀~~不過各人有各人喜好啦~~以上純屬個人小小意見。。。話左次次都會叫多左，今次又點會例外呢?今次就叫左個煎豆腐食，又係即叫即煎，包唔會"淋"。又夠哂熱辣辣，又好味~點會令人唔叫多啲吖。。。…查看更多

是日媽媽正日生日，梗係要帶佢去食佢最鍾意嘅上海菜啦~本來諗住BOOK定位，唔洗煩。。。點知電話入面個姐姐話4位冇得BOOK，只可以WALK IN。。。唯有早啲黎攞定枱啦，但由於未齊人，我又唔敢攞住。而且因為有限時(好似係90分鐘)，一坐低就開始計，唯有等齊人先啦。本來我都幾擔心，因為係星期日，而且差唔多7點，人都未到齊，驚住再唔攞左先就要有排等。。。喺門口坐左半個鐘，都係決定攞左位先，順便夾啱時間就叫定野食，等齊人就即刻食得~RECEPTION個姐姐見我坐左咁耐先攞枱，都好細心同我講。。。「入面其實爆左，就算有，時間都會睇得比較準，唔可以坐過鐘，但坐出面比較好，如果冇咩客都可以坐耐啲。」聽到實在太感動喇！於是即刻決定先坐低，再諗下叫咩食先~~一坐低，另一個姐姐放低個MENU同張ORDER紙，原來都幾簡單，就好似酒樓劃點心咁，想食咩，就寫數量落去，有少少唔同嘅係佢有個MENU，裡面嘅相可以參考下。而屋企人出現嘅時間永遠都係啱啱好嘅。。。佢地呢頭坐低，嗰頭啲餸就到。。。先上麻醬油麥菜。油麥菜本身冇咩味，但又唔會覺得好寡，淡而無味咁。反而有好新鮮，好清新嘅感覺。如果點埋隨碟上嘅麻醬，味道就更加正喇~呢個麻醬有啲似羅馬生菜點嗰隻醬，都係好香麻醬味。所以如果鍾意清清地就可以唔點，如果想食濃味啲嘅，不妨點多啲麻醬食，味道真係唔錯~繼續前菜系列 : 李白醉雞。適逢媽媽牛一，點都要食啲佢最 嘅野啦，雞都唔例外，有得揀，梗係要雞脾啦~(特別要雞脾要另加$10)橫掂都嗌，$10冇咩所謂啦，最緊要媽媽開心~話明醉雞，當然有酒啦。雖然唔知係用咩酒，但個酒味好香好重，雞就好滑，但略嫌味道俾酒蓋過。。。呢碟蔥花皮蛋豆腐，旨在本人鍾意食，又清又健康~大家都唔會反對。。。豆腐真係滑到不得了，又夠薄。正!皮蛋切粒，大家都覺得切得比較細粒，冇咩口感。。。主角登場喇!!呢度最出名嘅八色小籠包，嗌黎食係常識啦~~顧名思義，係有8種唔同味道嘅小籠包。我地4個人，每人兩種口味。我自己就食左人蔘同麻辣。先講人蔘小籠包 : 人蔘個味好重，一入口咬開，人蔘汁不斷流出黎，而且蔘味已經開始攻出黎，味道都幾重，睇得出都幾足料。至於麻辣味嘅小籠包，本人都係第一次食辣嘅小籠包，所以都幾期待個辣嘅口感。一入口，個辣又冇我想像中咁勁，可能有少少俾人蔘味影響左啦，但都FEEL到基本嘅辣。第一次食咁另類口味嘅小籠包，感覺唔錯吖~但係點可以只係食一籠八色架~梗係唔夠喉啦!於是叫多籠蟹粉小籠包，佢有分6粒同10粒，本來我都想叫10粒架。。。食到盡嘛~但係由於仲叫左好多其他野食，唯有食少啲啦。。。 可能之前食左啲咁特別嘅小籠包，食蟹粉小籠包嘅時候就覺得好似普通左少少。。。(但係明明都好出名囉~)呢個小籠包同樣好多汁，不斷BID出黎。。。個餡仲好足料添~叫左個芙蓉賽螃蟹。呢個餸唔易煮，而且好難煮得好食，但係難得黎呢度食，都試下啦~~整體口感唔錯嘅，成個餸個份量都算大嘅。但味道就唔多夠，而且蟹肉嘅份量都偏少。呢個雪菜咸肉炒年糕就唔同喇，味道好得呀!雪菜加上咸肉，好似會咸上加咸，搞到啲年糕超咸，但又唔會喎~年糕本身冇味嘅，但係炒嘅時候，雪菜嘅味道滲左入去，連埋咸肉一齊食，啱啱好呀!年糕口感又夠煙韌，咸肉又唔會好老~正呀!畫下畫下。。。我都唔知自己叫左咁多。。。呢個蟹粉豆腐。。。係呀。。。又係蟹粉同豆腐。。。佢就冇咩特別，似食緊普通嘅麻婆豆腐，但係冇辣味嘅~勝在份量都係幾大~~叫左7, 8 個餸。。。大家都飽哂。。。但又冇理由唔食甜品架~~於是用左女人嘅第二個胃去食。。。(明明只有我同媽媽兩個女性)結果，又係有啲不受控制咁叫左兩款甜品。。。冇計，女人叫野，不嬲都只會多唔會少。。。叫左個媽媽鍾意食嘅桂花酒釀丸子俾佢獨家享用~佢就話唔會太甜，酒味好香濃，但又唔會過份勁，好香好有口感。好味喎~媽媽就食酒釀丸子，我就梗係要再嗌少少甜品食啦~我未食過高力豆沙，就嗌高力豆沙啦~因為唔知係咩黎，完全想像唔到會係咩味道，唯有靜心等佢黎啦~~第一眼見到，都有啲嚇親。。。成個棒球咁嘅?!媽媽就叫我試一啖先。。。一咬入去，又幾好食喎~佢個蛋白外層唔會好硬，都幾鬆軟。入面就有好濃嘅香蕉同紅豆餡，兩樣咁甜嘅食物加埋一齊，連埋個強白一齊食，中和番個味道，唔會太甜~我地就一人一個~正呀!本來仲想嗌多一個。。。真係一個甜品咋，但已經俾人喝停。。。埋單嘅時候，先諗起今晚係同阿哥夾份埋，仲驚住會好貴，以為都要成千蚊。。。張單黎到~吓?!唔洗4位數字，只係9百幾。。。有冇搞錯呀?!真心諗有冇搞錯呀。。。但張單又啱喎~野食齊哂，連埋加一都係9百幾咋~當堂覺得抵到喊啦!!如果唔係真係飽到咁，真係好想好想再嗌多一個。。。兩個甜品呀~~唔緊要啦，咁平，留番下次再黎"大"食過~~BTW，RECEPTION位姐姐真係冇呃我呀。。。我地坐左起碼兩個幾鐘，但由於出面都唔爆，所以都冇俾吹~正呀~~…查看更多

為左慶祝母親節，今年搞搞新意思，同媽媽食意大利菜。因為成家人都冇試過，又唔想去中環咁貴嘅地方食。。。上網見到沙田有得食，一於黎試下。。。順便可以去科學園行下。。。呢度唔算難搵，一落車都叫有足夠嘅指示牌同地圖教你點行。由於係星期日，我地都驚多人，所以一早BOOK定枱，以防萬一。黎到之後，餐廳算大，但唔爆，叫做一般般啦。。。網上見到佢價錢個RANGE係$100-200，諗住貴極有限啦，點知一見到MENU，先知中左伏! 絕對係惡夢嘅開始!!只係睇PASTA，每款都已經過$200，佢仲好意思話係$100-200?! 有冇搞錯呀! 真係太過份囉!但已經坐低左，都要嗌架啦。。。叫左四樣野，冇幾耐就上左呢兜硬到不得了嘅麵包，雖然明白呢類型嘅包正常係比較脆口同硬身，但我地唔覺囉，完全唔脆之餘，仲硬到應該可以攞黎打人~頭盤叫左個凱撒沙律，都差唔少成百蚊，見到呢$$，仲敢諗其他款咩?!黎到，佢個沙律醬多左啲，比較油身，而且麵包粒已經淋哂，唔脆。 叫左個PIZZA, 呢個口感還可以嘅，好濃而且好多芝士，另外好脆口。每人都食到兩件。白酒煮蜆意大利扁麵，佢個白酒味重到不得了!我地除左感到好濃嘅白酒味之外，根本食唔出仲有咩味囉!!雖則用白酒煮會好香，但唔洗用咁多嘛~~而佢個份量真係少得驚人，我地4個人，一人一少撮己經冇哂。。。份量少之餘，佢落嘅洋蔥又多，啖啖都有洋蔥夾雜，我仲以為食緊洋蔥麵囉~~意大利飯，同樣問題，一人一小碟已經食哂~飯幾有咬口，但由於太多芝士，只係感覺到好溜，冇咩味可言。。。 結果埋單不出所料，4位數字，接近2千。。。但連我同媽媽兩個女性都係唔飽囉!何況另外兩位男仕。。。真係搵笨到不得了~~…查看更多

是日補祝朋友生日，由於都只係出於即興，兩個傻婆又諗唔到食咩好。。。決定近近地搵野食。行到APM，平時都係食呢啲，今次就試下搵隔離個商場---亞太中心搵野食，聽聞好似好多食肆，一於搵新野食。。。喺LIFT口企左好耐，見到每層都有唔同嘅餐廳，於是大家都有個決定，喺1X樓開始掃，邊層餐廳唔洗等，就食嗰間。。。掃左幾間，黎到8樓，見門口冇人等，於是決定出LIFT睇下，真係冇其他人等緊喎~於是，即刻問個姐姐，兩個有冇位，佢問番我地有冇BOOKING，我地話冇，諗住可能冇機啦。。。點知佢話: 有位。限時好似係90分鐘。就帶左我地入去。。。唔知係咪平日關係，入到去，完全唔爆。。。仲以為已經FULL左。雖然叫有位，但佢啲位比較迫，每張枱相隔距離都唔算好遠。。。時間關係，叫左食野先~飲品就要自己去雪櫃攞。。。但係冇啤酒飲!! 問左啲WAITER先知，佢地未申請酒牌，所以我都係飲茶啦~叫左香芋紫心丸，好味呀!!又唔會太細粒，SIZE適中，又夠熱，外脆內軟，好味呀!!叫左幾轉添呀!另外嘅芝麻雞翼就不過不失啦~幾脆又夠熱。食放題，點可以唔食刺身呀?!佢MENU上嘅選擇都算幾多，但我地又冇嗌哂，只係每樣都寫左6-10片啫~~諗唔到佢又黎得幾足喎~真係差唔多都有番咁上下數量。。。(其實都唔知叫左幾多樣，只係望落，每種份量都好多咁)食落又好鮮甜喎!!唔會覺得梅嘅感覺。刺身都至少叫左3大轉呀!!呢碟蝦就覺得麻麻，味道怪怪地。食過一轉就拜拜LU~~上面嘅豆腐就正得多喇。好滑呀~呢碟燒菠蘿真係冇得頂呀!佢應該係我叫刺身以外叫得最多轉嘅食物LU~ (至少食左3轉，仲要次次都6-8嚿。痴左線!) 因為真係太好食喇~又甜喎~~食到咁上下，原來佢有雪糕送添架。仲要係一人一杯，雖然每枱只限係1轉，但都正吖~佢仲有幾隻味可以揀。GOOD~~呢晚實在食左太多太多野食，相都影唔切呀~包括我嘅至愛---羊架。。。我地兩個傻婆仲要坐到過哂鐘，但係都冇人理，只係埋左張單，就坐到過哂鐘LA~~到我地終於肯走嘅時候，見到現場至少有一半嘅位係吉嘅~難怪冇俾人吹~~下次唔想俾人趕，我諗我知應該去邊LU~~…查看更多

平時覆診完都會黎呢度買包包食，因為真係幾好食。。。今日見到新產品芝士撻同朱古力撻，鍾情朱古力嘅我，點會錯過吖~~見到個個都脹卜卜，而且SIZE都幾大，雖然都要$18一件。。。都決定一次過食哂兩隻味，一次過滿足哂我嘅願望!先講朱古力，一咬落去，裡面嘅朱古力就不斷湧出黎，差啲食唔切。。。真係好流心呀!!味道好香濃，有少少苦澀嘅味道，我會估係用黑朱古力做餡。正呀!唔算係啱啱出爐嘅熱，算係暖嘅溫度，啱哂我。食完朱古力撻，梗係要試埋個芝士撻啦~芝士撻咬落去冇朱古力撻咁，有濃濃嘅芝士汁留出黎，但係佢個芝士味真係好濃好香呀!一咬落去，芝士嘅香味不斷湧出黎，令人食唔停口呀!兩隻撻夾埋要$36.00，好似貴左啲，但係佢個味道絕對值得再幫襯呀!…查看更多

是日搭叮叮玩懷舊，知道有間餐廳唔錯，於是黎食過下午茶先~~入到去叫左個雞翼撈丁，純粹試食瑞士雞翼。 啲雞翼好淋好入味呀! 本身己經索哂啲汁，正到痺! 佢另外俾個汁又夠多，都唔洗倒哂落個麵度。 撈完之後，個麵已經變哂黑色咁滯。。。上哂色~ 個汁真係好正!個麵好濃好入味呀!! …查看更多

是日屬於短週嘅星期六，係時候又出黎搵野食喇。今次專程帶媽媽入黎荃灣食野，成日聽朋友講荃灣好多又平又好食嘅野。嘉樂聽好多人介紹過，所以都幾期待。但係又好似話要排好耐。。。本來都預左有排排，但我地又幾好彩，條龍唔算長，喺門口等左大約15分鐘就入得。入到黎，基本上大家都要搭枱。都冇所謂啦。呢度主打超厚蛋牛治，又點可以錯過呢?本來想叫鮮牛蛋治，但侍應姐姐已經即刻話冇哂鮮牛肉，得鹹牛肉。。。有少少失望啦。不過都試下啦!同埋可能真係太多人叫，嗌嘅時候佢仲話要等10分鐘，睇得出真係幾受歡迎。另外仲叫左個豉油王雞翼，好入味呀! 佢有隻類似甜酸醬可以點，但我地都覺得原汁原味仲好食!等左一陣，黎到喇。。。果然名不虛傳!!見到都幾驚喜。。。雖然一早知道佢係超厚，但都覺得好得意呀!蛋香好濃，牛肉又足，加上烘過嘅麵包，更加係特別好食! 鍾意食蛋嘅我食到停唔到呀!!食完野梗係要飲番杯野啦。。。叫左呢度嘅另一招牌野 - 阿華田奶昔。飲左第一啖，我發覺與其叫佢奶昔，不如叫佢沙冰。感覺仲貼切!又夠凍，冰粒又起哂沙，透心涼呀! 真係消暑最佳飲品呀!!媽媽就叫左杯滾水蛋，我望落覺得幾好飲，但問番媽媽意見，佢就覺得淡味左啲，比較水。。。整體都幾好，最LUCKY係唔洗排太耐。野食又幾正。雖然遠啲，真係值得再黎!…查看更多

繼續澳門遊。。。 本來飲完個早 + 午茶之後，都飽飽地，但行到咁上下，又想食個tea填下個肚。。。 而早喺出發前，喺網上搵過呢間舖。。。好似好多野食，又好似冇咩食，但見好多人都讚呢度啲豆腐勁正，又滑。。。價錢又平民，啱哂我地~但我自己就覺得呢度都唔易搵。。。一直喺大街小巷左穿右插。。。兜左勁耐，問埋人先搵到。。。 但都幾出名，喺內街隨便問個街坊，佢聽到就好詳細咁教我地應該點行。。。先唔洗再亂兜。 入到去，舖頭唔算大，一眼望哂，但一啲都唔迫。佢應該有餐牌，不過我張枱咁啱冇。唔緊要，仲有個巨型嘅餐牌掛喺牆，方便食客睇。(真係超巨型呀!!) 坐低第一件事，唔諗喇，嗌個淨豆腐試下先~~(其實都想食個麵，但都擔心會穫利回吐。。。唯有留番下次啦) 黎到嘅時候，對眼己經俾佢迷住左。。。驟眼望已經覺得好滑，好吸引。。。 一食入口，滑到差啲直入喉嚨，實在太滑喇! 完全唔識形容。。。只可以講真係滑到冇朋友呀!! 除左豆腐，全餐餸都係呢度嘅招牌菜，搵得咁辛苦，梗係要試埋呢個招牌菜啦。 呢個全餐餸有分大，中，細三款。我地志在試新野，見中同細個價錢差唔多爭一倍，但個分別在於冇雞翼同埋份量應該少啲，但唔緊要啦，又唔係好肚餓，就嗌個細嘅試下啦~黎到見到，話係細size，但佢又真係幾足料，份量又多，感覺己經有啲似大雜燴。。。 (實在唔敢諗大嘅全餐餸會係點樣。。。) 豆腐唔洗講，滑到不得了。魚球即係鯪魚球，雖則得一嚿，但都幾大嚿，幾有口感，好食。鴨紅=豬紅，一般味道，都好食嘅。豬皮索左啲湯，正呀!魚旦就比較細粒，但都有3, 4 粒，而且唔會好淋。至於雞腸就好爽口，好正呀!但係魷魚就略嫌唔夠味，唔會好淋但味道比較淡。菜就好似寶物尋歸底咁，食哂啲餸先見到佢。。。都好，索哂啲味。 食完兩個招牌菜，而呢度最出名嘅係豆腐，咁冇理由唔食埋個豆腐花啩?! 結果都係抵唔住誘惑，食埋個甜品。 我自己就覺得食豆腐花幾時都係熱辣辣係最好味，點知原來佢豆腐花都有分大細。。。(真係照顧周到)經過全餐餸之後，決定都係要碗細嘅兩個人分安全啲。。。一如所料，即使係細，個份量都有番咁上下。 但係個口感一樣咁正，而今次真係滑到直落喉嚨，就好似食藥咁，滑到不得了。正呀! 食完豆腐花之後，終於捨得走喇。。。 如果個胃再大啲，隨時可以一次過試哂所有野呀。。。 而家唯有等下次再黎啦~~一定好快再黎食過~! BTW, 老闆娘同啲夥計都好nice呀，一邊食野一邊同佢地傾唔少計。臨走問路時佢地仲好熱心咁教我地兩個路痴點行。。。 …查看更多

難得放假，訓到差唔多食晏先出街搵野食係常識啦。。。keke~~澳門有幾間都出名嘅舊式茶樓，今次就選擇黎到大龍鳳茶樓試下佢啲點心。 入面都幾大，仲有個茶座。。。但可能係平日，唔算太熱鬧，都只係得平時飲開啲茶客。 得一張點心紙，但應該都夠我地兩個人食喇~~ 香煎蝦米腸，好耐冇食過喇。食落好香口，好正。但如果佢啲蝦米同蔥多番少少仲香仲好食。。。 呢個雞油馬拉糕睇落好似平平無奇，普通size，但當睇到佢個籠。。。真係唔識講野。。。 呢個籠嘅高度喺香港黎講，已經係有兩籠馬拉糕喺度，但呢度。。。真係估佢唔到呀! 呢碟花生炆雞腳，冇咩特別，唔太夠味。純粹過下口癮。。。香港嘅鮮蝦燒賣食得多，黎到澳門，試下佢呢個"干蒸魚蓉燒賣"。 賣相一般，但比香港嘅鮮蝦燒賣大隻。食落去，口感唔錯，好彈牙，將成舊魚肉打成魚蓉，好味! 呢個鮮竹滑雞扎都係冇咩特別，同香港嘅雞扎差唔多size, 入面嘅料都大同小異。。。但都幾好食。呢籠百花釀瓜莆都唔錯，放入口時俾我想像更熱，但如果個汁再濃啲應該會仲好食。整體黎講，呢間茶樓好懷舊feel, 野食同價錢都幾平民化，連埋茶錢$150唔洗，算ok啦。 …查看更多

黎澳門玩，梗係要試下啲道地野啦~ 上網搵到呢間喜蓮，好似好吸引，決定列入行程當中。。。 入到去，都算幾多人，但我估計都係本地人比較多，因為見好多人都係食碟頭飯。。。正常旅行應該唔會咁遠黎食碟頭飯啩。。。 天氣咁熱，梗係叫杯凍飲降下溫啦。 呢度啲紅豆冰都幾出名，決定試下。 果然唔錯，又夠凍，啲紅豆又起哂沙，又唔會好甜，就連個杯都好冰呀!飲落去真係透心涼呀!! 豬扒飽喺澳門黎講，都係代表作之一。而呢度嘅豬扒飽又幾出名，又點可以錯過呢?! 嗌嘅時候，落單姐姐仲會好細心問你洗唔洗一開二，有得開就梗係最好啦~ 等左一陣，好快黎到，見到個size, 我同個fd都嚇一嚇，因為都真係幾大份。。。 但都唔理喇，食左先算。 咬落去第一啖。。。好juicy呀!! 個飽又脆，豬扒啲汁又不斷bid出黎，正呀! 本來以為一個豬扒飽夠哂，點知都係叫多個鹹牛肉夾餅。。。喺香港食鹹牛肉蛋治就食得多，今次喺澳門，就試下個鹹牛肉夾餅先~~ 一攞上手熱辣辣到不得了，但因為聞到太香喇，於是即刻食落去。 嘩! 不得了!! 鹹牛肉嘅香味，口感同肉汁都冇得彈呀!當中嘅牛肉夾雜住洋蔥同芝士，真係冇得頂呀!! 食完兩個咁飽肚嘅野之後，結果都係好任性咁，嗌多個炸咖喱吞拿魚角。。。 落單姐姐俾我地都嚇一嚇。。。話明咖喱，都預左會有少少辣，但佢辣嘅程度竟然超乎我地想像。 佢嘅辣黎得比較慢，第一啖唔覺佢點辣，但一啖一啖食落去，咖喱嘅香同辣亦不斷湧出黎，正呀! 佢外表好脆，好香口，內裡嘅咖喱好濃郁，吞拿魚又好足料，成個吞拿魚角都漲卜卜，好得意呀。 食完三款咁飽肚嘅野之後，真係夠皮喇。。。 但呢間野真係值得再黎~! …查看更多

落雨嘅日子真係零舍麻煩。。。第一次黎食，都預左要等一陣，只係冇諗過要擔住把遮呆等。。。等緊嘅時候，一眼睇哂裡面，唔算大，大家都要搭枱。但都算快，等左15分鐘左右，就入得。。。都幾多野揀，而且可能係喺深水埗，價錢都係比較平民價。呢度最出名係蛋牛治，黎到梗係要試下啦~~見到好多人坐低都係即刻嗌蛋牛治烘底。。。(搞到好似得一款野食咁)但本人比較麻煩，蛋牛治仲要烘底走油，好彩落單姐姐都好似習慣左咁。。。等左一陣，終於有得食，熱辣辣，第一時間拎上手嘅我，都要即刻放番低，過左一陣，先敢再拎黎食。第一啖咬落去，真係覺得超好食!脆卜卜嘅麵包，加上熱辣辣嘅蛋+牛肉，每一啖都有啲汁慢慢流出黎，真係超正呀!一件蛋牛治邊夠喉，聽聞呢度嘅豬潤麵都幾正，一於食埋佢~見到個湯，感覺好清淡。。。果然，食落覺得好似係將啲豬潤同啲麵分開左煮，然後再放上面，成個麵都冇索到豬潤嘅味道，好似只係食緊一碗冇味精嘅大光麵。而且豬潤煮得唔夠淋，叫做緊緊熟，唔起沙。個湯底熬得唔夠，一啲豬潤味都冇，就好似清湯一樣。。。 另外，我仲叫左杯滾水蛋，聽人講飲滾水蛋最好落少少糖，咁樣味道唔會咁淡，但我又冇呢個習慣，但我飲呢杯又幾正喎! 又夠熱，又夠味。正!!媽媽就另外叫左杯熱咖啡，但佢就覺得咖啡麻麻，飲落好澀，結果佢飲左幾啖就冇飲lu~…查看更多