baby tortoise的個人專頁

觀塘好多西餐廳，但好似GAVI咁chill咁舒服就好少有。今晚同朋友兩個人嚟呢度食晚飯，餐廳環境寬敞，樓底又高，配合輕鬆的音樂，氣氛實在不錯。前菜點了牛油果三文魚他他配香脆多士，牛油果同三文魚幾時都係好好嘅配搭，加上黑魚子更加係錦上添花，放上細細塊嘅香脆多士，兩口就輕鬆征服一件😋。主菜蜜糖鹹香豬手絕對是有驚喜，朋友都好喜歡。蜜糖嘅甜味同豬手嘅鹹香平衡得很好，皮脆肉嫩而不油膩。不用點醬汁已經好夠味，作為配菜嘅薯蓉亦好香滑。龍蝦汁蟹肉扁意粉都很有水準，豐富的蟹肉之外，有用分子料理手法製成的泡沫，層次立即提升，感覺就像fine dining😌！飲品方面，柚子檸檬蝶豆花梳打清新開胃，值得推介。朋友點的椰青咖啡，竟然加上金箔作點綴，味道之外，視覺得好加分🤩。…查看更多

朋友好鍾意食海鮮，聽聞呢間海鮮都係入口貨，所以揀咗邊食邊蒸，方便慢慢傾偈。侍應推介咗一個海鮮餐，我哋即管試吓。嚟到之後，侍應會將每一件海鮮按住海鮮需要蒸嘅最佳時間，逐件逐件幫你蒸，然後再夾落你個碟度。感覺好似全程有一個侍應隨時招呼你，服務好好。。但係呢啲蒸海鮮，最重要係下便有冇粥底。呢個海鮮餐下面放嘅係一個唔黐底砂鍋，咁我就好安心等待最後嗰啖粥😙😋個餐包括虎蝦、鮑魚、聖子、生蠔、帶子、響螺、仲有龍蝦、石頭蟹，及另一種膏蟹…單係食海鮮都非常豐富。味道方面，所有海鮮真係非常優秀，唔使點豉油都好夠味。龍蝦蒸完仲係脹卜卜，同烹調時間嘅控制好有關係。食完粥之後，侍應仲好細心咁送上雪耳糖水，令到用餐體驗非常完整。以食海鮮嚟講，呢間真係服務算唔錯，比較方便食客。…查看更多

很久沒有去台灣，今晚特意和朋友到海濱的這家餐廳，緬懷台式料理的味道😋。先點了一個特選燒肉拼盤，拼盤有五花腩肉、黑毛豬、厚切牛舌及牛小排。另外分別加了$10，由白飯升級做滷肉飯，及追加了一碗松茸雞湯，都幾抵食！我最喜歡黑毛豬燒完之後脆脆的口感。松茸雞湯真材實料，湯頭先甜，配上滷肉飯，感覺很豐富。另外和朋友點了台式牛筋牛肚麵，餐廳頗貼心，麵和湯底都可以選擇，我們選了陽春麵配最簡單的牛肉湯。湯底濃郁，牛筋及牛肚的份量頗多，牛筋炆得軟腍，牛肚亦很入味。再來就是台式街頭小吃蚵仔煎。蚵仔飽滿，而且份量頗多，蚵仔煎吃來QQ的，加上甜辣醬更添風味。…查看更多

之前去英國旅行，第一次食黎巴嫩菜🇱🇧，印象難忘。今次特意同朋友去中環呢間黎巴嫩餐廳試一試。餐廳的裝修充滿中東風情，昏暗的燈光加上中東的音樂，仿如去旅行一樣，打卡一流！Hummus Beetroot朋友跟我都很喜歡吃鷹嘴豆蓉，這個鷹嘴豆蓉加了芝麻醬、紅菜頭同檸檬橄欖油。紅菜頭的顏色很吸引，鷹嘴豆蓉帶一點清新的酸味，配上新鮮的麵包，味道不錯。Batata Harra這個炸馬鈴薯粒與平日西餐的做法不同，馬鈴薯加上孜然、芫荽及大蒜，簡單又美味。Shrimp Matffie這道菜賣相跟西班牙蒜片蝦🍤有點相似，煎蝦仁配上橄欖油跟芫荽，灑上檸檬汁，清新又開胃。Farrouj Meshwi主菜選了傳統的黎巴嫩烤雞，用上西班牙自由放牧春雞，雞味濃郁而不失嫩滑，烤得剛好，配上焦糖洋蔥的醬汁，頗有特色。飲品方面，我點了Karkade Delight，石榴汁加上玫瑰🌹，跟中東菜很配搭。朋友點的Hibiscus Tea同樣充滿果香，茶壺🫖亦十分精緻，加分！最後點了甜品Roz Bil Laban 作結，creamy又充滿奶香的布丁，吃完十分滿足，值得推介👍🏻…查看更多

細個食點心多數會去茶樓，依家坊間就多咗好多點心專門店。呢類點心專門店，有點像茶餐廳，強調效率，環境較狹窄，亦不太重視茶的質素，少了過往上茶樓一盅兩件的閒適。今晚同朋友去了位於將軍澳海濱的DHYC （得閒飲茶）Dimsum。餐廳標榜傳承點心工藝，內裡裝修簡約，座位寬敞，重點係有海景！一進去便知道與坊間的點心專門店不同。與朋友先點了一壺人蔘烏龍，餐廳用上雙層玻璃的茶壺及杯，不燙手亦有保溫效能👍🏻 茶葉喝得出有質素，喝後喉底甘甜，三泡四泡後仍有茶味。點心方面，重點推介鵪鶉蛋松露燒賣，每粒燒賣內藏流心鵪鶉蛋，有驚喜之餘，亦凸顯點心師傅的工藝。韭菜金錢蟹盒，將大量蟹肉🦀放進韭菜盒，外皮炸得香脆，有鮮味又創新。牛肉球用上100%的新鮮牛肉🐃，有彈性之餘亦有濃厚的牛肉味。XO醬炒腸粉熱辣辣，面頭灑上蔥花芝麻蛋絲，增添賣相，色香味具全。蒜蓉粉絲蒸鮮魷十分惹味，鮮魷新鮮有鮮味，粉絲吸滿蒜蓉醬的味道，不容錯過。非一般的環境，非一般的質素，下次來再試試這裡的炒粉麵😋…查看更多

同朋友都好鍾意食生煎包，今日行經女人街見到呢間新開嘅劉興記生煎包專門店就入去試吓。生煎包最重要就係要有新鮮熱辣嘅湯汁。同朋友叫了招牌生煎包同蟹黃生煎包，上餐時店員貼心提醒要小心爆汁。先咬一口，嚐一啖湯汁，招牌生煎包湯汁味鮮，再吃一口，湯汁仍不停湧出來，每一啖都嚐到新鮮熱辣嘅湯汁，絕對不負爆汁之名。加上煎得脆脆嘅包底，果然係招牌之作。蟹黃生煎包更是有驚喜，加入蟹黃嘅餡料同湯汁更添鮮味，吃一隻絕對不夠，必食推介！同朋友另外點了排骨蔥油拌麵，排骨新鮮炸起，炸得酥脆，香蔥特別切成幼絲，拌着麵吃，感覺融和，滋味十足。麻醬手撕雞絲粉皮份量十足，有大量切得幼細的青瓜絲，配上QQ的粉皮，夏天吃感覺清新。…查看更多

放工約左朋友食飯，揀左帶佢去觀塘一間好多人鍾意嘅靚靚裝修西餐廳。餐廳裡裡外外都有唔少打卡位，而且食物味道相當唔錯，所以都有穩定嘅捧場客。前菜我哋點咗香酥魷魚泰式柚子沙律🥗。香酥魷魚非常鮮味！配合柚子同番石榴子酸酸甜甜，加埋少少辣嘅source，口感清新惹味，好開胃，欣賞。朋友鍾意食海鮮，於是點左白酒牛油忌廉汁煮澳洲新鮮藍青口，醬汁味道都幾香濃。不過更好味嘅係主菜，因為我鍾意食pasta，所以我哋點咗原隻赤海蝦刺身香濃蝦汁意大利麵，上枱已經覺得好吸引，食落果然好鍾意，因為意粉真係有好香濃嘅蝦汁，而且上面嘅蝦非常大隻，絕對係刺身級別。呢個我絕對可以encore食多碟！最後點都一定要試吓呢度最出名嘅疏乎厘班戟。法式焦糖custard 疏乎厘班戟味道並不太甜，但custard 做得好香，每人一件食完都唔覺得罪疚😛😌難怪成為餐廳嘅名物之一。值得一提係餐廳嘅飲品都唔錯，我哋要咗宇治抹茶鮮奶同埋陳皮洛神花茶。抹茶鮮奶有好香嘅抹茶味，又係唔係太甜，啱晒我。至於陳皮洛神花茶，陳皮味好重，應該係靚陳皮，都幾消滯開胃😊埋單兩個人食飽飽大概六百多元，以餐廳嘅食物同環境質素而言，性價比都唔錯👍🏻下次會繼續光顧🌻…查看更多

喺尖沙咀搵食，好多時都會約朋友去厚福街，貪嗰度多選擇。今晚放工約咗朋友去呢間樓上酒吧餐廳，估唔到有戶外座位，環境同氣氛都好chill，值得推介！食物方面，同朋友首先點了特選海鮮沙律（$128）🥗。沙律可選配柚子檸檬汁或黑醋欖油。我們選了柚子檸檬汁，吃來感覺清新。海鮮有帶子同大蝦，沙律還有合桃同松子仁，味道豐富又有層次😋。我們另外點了木魚昆布鑽石大蜆扁意粉（$128），扁意粉配木魚昆布汁，充滿西日fusion的味道。鑽石大蜆每隻都新鮮味甜，性價比頗高。吃慣一般西式意粉的話，絕對值得一試！主食點了慢煮美國安格斯肉眼（$328），五成熟的肉眼軟腍之餘，亦充滿肉味，味道不俗。肉眼於上菜時已分成一件件，方便跟朋友分享，chill住一邊食一邊飲🍷😌。總的來說，餐廳無論環境、氣氛同食物都不錯，以後喺尖沙咀約朋友食飯又多一個好地方👍🏻。…查看更多

將軍澳海濱有不少美食，今日揀左呢間靚靚餐廳同朋友傾偈。我鍾意佢嘅佈置有氣氛，感覺好relax。食物方面，先點左大蝦柚子沙律。大蝦好大隻，柚子味道清新，醬汁酸酸辣辣都幾好味😋食完開胃菜，就試咗佢嘅炭燒豬頸肉。我覺得佢嘅豬頸肉燒得都好香脆，而且切得好薄，口感特別好。跟餐嘅酸梅醬亦都好特別，唔係普通嘅酸梅醬，同豬頸肉特別夾，推介！馬拉盞通菜，份量足夠，味道惹味。心血來潮點咗一份炸蝦餅，一碟四件，幾個朋友分享啱啱好。由於朋友鍾意食羊，再點了一客咖喱羊肉配酥油薄餅。這的羊肉咖喱比平常的咖喱更濃味，酥油薄餅的做法就偏向鬆軟和脆口最後，無飯不歡的我點了一個菠蘿炒飯😃除咗擺盤靚，份量都幾大碟！值得一提的是，餐廳有好多不同類型飲品，下次有機會再來品嚐。…查看更多

諾士佛台係尖沙咀酒吧嘅集中地，今晚放工同朋友試咗呢間樓上嘅Bar。咁啱呢晚有包場活動，現場氣氛都幾好，仲有唔同遊戲枱可以讓食客比拼一番。雖然係酒吧，但呢度都有唔少食物選擇，有串燒、沙律、小食、意粉、pizza同主食。同朋友先點了水牛城雞翼配藍芝士醬（$88），水牛城雞翼本身味道惹味，配上藍芝士醬獨特的香味，估唔到都又幾夾！香辣鮮茄汁虎蝦意粉（$138）有兩隻大大隻嘅虎蝦，賣相討好。意粉醬汁非常香辣，嗜辣嘅朋友不妨一試。主食點了慢煮紅酒牛面頰肉配薯蓉（$188），牛面頰肉份量頗多，因為慢煮的關係，牛面頰肉份外軟滑，紅酒汁味道亦不錯，都幾抵食！…查看更多

同朋友路經旺角，試咗呢間泰國菜，點知味道超乎預期🤩🤩喺飲食業艱難嘅狀況下，好想寫一寫，讓大家支持有心嘅食肆🥹🙌🏻🙌🏻我哋揀咗幾道菜，全部都勁好味，而且價錢唔貴😋😙🫶🏻首先想推介佢嘅小食拼盤，裏面有炸蝦餅、炸魚餅、同埋有少少似炸札肉嘅東東。只係$80但係超好味🙌🏻😍而且睇相都知道全部都好脆口，魚肉裏面亦都有好多餡料，非常用心。之後絕對需要推薦佢嘅燒雞🫶🏻🫶🏻🫶🏻我哋叫咗半隻，第一啖食落去已經發覺皮脆肉滑，有好香嘅黃雞油！朋友話因為呢啲黃油，隻雞先可以咁鮮嫩，最難得係個塊皮都燒得好香脆，完全停唔到口。最令人感動嘅係價錢，半隻燒得咁好嘅雞，只係賣$85 🙈泰式炒椰菜苗同埋芒果沙冰。芒果沙冰嘅味道唔係人造味道，都幾好飲。椰菜苗份量頗多。泰式醬雖然有少少辣，但就令到碟菜炒得好香。另外我哋仲食咗一個香葉肉碎煎蛋飯，香葉豬肉辣辣地，而且裏面配有切得好細嘅豆角，送飯一流😚😋總之呢餐整體非常滿意，價廉物美，以後會多多相約朋友嚟幫襯，希望佢哋越做越好🩷👏🏻👏🏻👏🏻…查看更多

為左同好姊妹相聚，特意挑選了尖沙咀一間意大利餐廳，除了貪氣氛一流，仲因為方便，無諗過食物同飲品🍸一樣高質，好似去左外國嘅靚餐廳酒吧😃首先講講佢嘅裝潢，用上好多木材元素，營造出一份優閑，但有啲歷史嘅感覺。我們先點了兩杯Cocktails: Smoky Mill & Pinwheel。我自己嗰杯Smoky Mill上枱好特別，用玻璃罩罩住香煙，飲落去係煙燻mix 蘋果香口味，好特別😍 朋友話佢個杯係唔同嘅生果味加白蘭地紅酒，味道幾好，絕對可以再嚟happy hour。前菜我們點了Mixed Mediterranean Dips。上枱好大份，熱辣辣的中東包配共有三款不同味道的醬：二款類似鷹嘴豆泥，另一款較辣更濃味，份量好多，唔想浪費所以再追加麵包😋主菜我地要左蟹肉墨汁扁意粉同烤雞串。兩者好好食😚😋😋😋蟹肉墨汁扁意粉嘅墨汁唔係撈落去，而係喺扁意粉裏面，所以唔會食到牙齒變黑色。廚師放咗大量蟹肉，令到整個湯汁都充滿濃郁嘅海鮮味，我同朋友都覺得好好味，絕對係我食過最好味嘅海鮮蟹肉意粉之一。烤雞串則燒得好嫩滑，食完一件又一件！伴碟薯條用上靚薯仔，炸得極鬆化，連我平時怕熱氣都食到停唔到口。最後我地再甜左一件名為chocolate temptation cake 做甜品，朱古力味的確特濃，但又唔會太甜太漏👍🏻可能因為氣氛太好，我地不知不覺坐左三個幾鐘，店員無趕不特止，仲定時為我們加水。由食物、氣氛到服務，整體感覺都好滿意，期待下次再嚟幫襯😇👍🏻👍🏻…查看更多

呢排好多香港人北上去深圳搵食，我今晚同朋友反其道而行，去佐敦食咗呢間來自深圳嘅二八火鍋。呢度晚市主打$228任飲任食火鍋。同朋友先點了鴛鴦湯底，分別選了皮蛋芫荽同沙嗲。皮蛋芫荽用料充足，沙嗲湯底更係有驚喜！除咗沙嗲嘅香同甜，仲有濃郁嘅花生香，我覺得比九龍城某老字號火鍋店嘅沙嗲湯底更啱我口味。牛肉有本地手切吊龍肉、安格斯牛小排同安格斯封門柳可以揀。我最怕任食火鍋啲肉切到又薄又冇肉味，呢度嘅牛肉除咗油脂分佈均勻，食落亦很有肉味，特別推介手切吊龍肉，肉質非常嫩滑。豬肉從來唔係火鍋嘅主角，但呢度嘅鹿兒島黑豚肉及橡果黑毛豬肉亦很有質素，肉味濃郁，亦無豬騷味。手打生牛丸係另一推介，想不到牛丸的牛味濃得停留在口腔之中，絕對是高質之選！鮮蝦雲吞咬開，啖啖鮮蝦肉，猶勝一般粉麵舖嘅出品。呢度仲有多種小食可選，例如吉列墨魚餅，新鮮炸起，絕不欺場。簡單嚟講，$228呢個價錢，有咁高質嘅食物同任飲啤酒、汽水同自家製飲品，性價比真係超高，喜愛火鍋嘅朋友不容錯過。…查看更多

朋友生日，好難得搵到呢間餐由裝修到餐牌都充滿繽紛感覺嘅餐廳，所以專程去筲箕灣慶祝，發現選擇非常正確。餐廳採用一個旋轉木馬為中心嘅設計，到處都洋溢住歡愉嘅氣氛。按事前要求，侍應特意為我哋安排咗一張一早已經掛咗Happy birthday佈置嘅枱😍🥰淨係呢一點已經令朋友好開心，加晒分。食物方面，首先係飲品。我哋分別點咗火龍果同菠蘿嘅特色飲品（pineapple hat and dragon hat)，無諗過上枱勁靚！飲品上枱時旁邊附設同色系嘅菠蘿🍍裝飾，而且師傅特登厚切咗一塊生果用超靚flamingo牙籤得住俾客人食感覺好清新健康！除咗靚，杯飲品亦是用料十足，除咗火龍果同菠蘿味道突出，裏面亦都分別有一啲圓珠配料，$48 杯真係抵到爛😍😍😍😍Pineapple Hat Dragon Hat 前菜我哋揀咗「田螺煙肉洋蔥芝士焗大啡菇」（$98）呢個菜式用鐵板上碟，無論田螺同啡菇都係非常Juicy，非常香口，整體味道好夾！推薦大家試試。 主菜我哋揀左餐廳主打嘅Dirty Steak 牛扒（$398）佢哋用咗美國牛罕有珍貴嘅部位，再慢煮12小時。一上枱，已經見到牛扒嘅色澤好靚，再試第一啖，我同朋友都不約而同讚好好味，因為牛扒充滿牛肉味之餘，而且肉質極為嫩滑😍 就算唔加旁邊嘅芥末醬都冇問題，完全夠晒味！慢煮果然令味道零舍唔同！佢嘅伴碟薯條亦都非常鬆化，我覺得呢個菜式整體水準達到90分以上，冇諗過可以喺呢間打卡西餐廳都食到咁高質嘅食物，絕對物超所值，唔怪得係餐廳嘅signature推薦食物🫶🏻😙雖然食完已經半飽，不過生日慶祝點少得甜品蛋糕。好難得餐廳配合客人需要，一早安排咗佢出名嘅疏乎厘奄列作為蛋糕，仲要旁邊寫上好靚嘅Happy birthday，再配上令人驚喜嘅旋轉木馬裝飾呈獻🙀😻🥳靚到連我自己都覺得好驚喜😆疏乎厘奄列味道一流，旁邊附設嘅忌廉好香滑，配上好新鮮嘅士多啤梨🍓！令我生日嘅朋友有個非常愉快嘅晚上同難忘嘅體驗🥳🥳🥳餐廳整體性價比好高，而且服務細心，下次會再嚟幫襯😊🥰🎡…查看更多

曾經食過唔同嘅任食放題，但係都係鍾意返嚟御滿屋，原因係佢嘅性價比真係非常之高，而且服務好好，所以不斷回頭。佢嘅特色係刺身款式多，而且賣相吸引，食材亦好新鮮。單係蝦刺身，已經有甜蝦、赤蝦、泰式生蝦，除咗基本嘅三文魚、赤貝，佢仲有好大粒嘅原隻帶子。所以經常見到每枱客人都叫左大大盤刺身，師傅都係好俾心機砌到好靚。當中，我特別推薦佢嘅帶子刺身，好鮮味。刺身愛好者可說單吃刺身都已經回本。🍣 頗欣賞餐廳嘅壽司細細件，可以食好多款都得。特別推介我鍾意食嘅炙燒左口魚邊壽司，油香四溢，不斷encore。餐廳呢期仲有榴槤，可以揀燒或者唔燒，同時佢又有貓山王榴槤炸波波，好啱我呢啲榴槤愛好者。🥘熱食方面亦有唔少選擇。我特別推介佢嘅瑤柱海皇粥，裏面有齊蝦、帶子甚至瑤柱等配料，亦加咗粟米粒，令到粥底好甜。餐廳嘅炸物亦很出色，炸生蠔、天婦羅，都好有質素。🥄餐廳每位客人會送一客Haagen Dazs雪糕，又提供大量飲品選擇，而且食物上枱速度極快、收碟亦好有效率，因此兩小時都唔會食得太趕，絕對啱一家大細。兩個人埋單都係600幾蚊，以香港食碗麵都要成百蚊嚟講，性價比真心高，非常推薦。…查看更多