Szetoyanyan的個人專頁

平時唔太鍾意飲好甜嘅奶昔，但今次見到 Shake Shack 出咗期間限定嘅杜拜朱古力開心果奶昔，忍唔住試咗🥤 杜拜朱古力開心果奶昔：超正，成杯奶昔外圍用咗朱古力漿做咗個掛壁，可以自己慢慢整碎啲朱古力，再撈埋入面飲，入面有開心果碎同香脆酥皮碎，口感豐富，有層次，咬落去啲開心果帶少少油香，仲有酥皮醉脆卜卜，最驚喜係鹹甜平衡得好好，完全唔會膩，飲哂成杯都唔覺heavy🍟 蒜香芝士薯條：香濃但想要多啲醬， 薯條上面有巴馬臣芝士粉、蔥花同蛋黃醬，蛋黃醬味道幾濃，配芝士粉幾夾。不過唯一小小唔足係 醬汁唔夠多，撈唔哂成堆薯條，有啲落到底部就得返乾身條薯，建議之後可以加返多少少醬就完美啦。薯條份量就正常啦，炸得香脆唔油膩，咬落都幾有口感。📍總結：奶昔真係推薦，創意夠、口感又正，唔會太甜，飲落好舒服。…查看更多

之前成日經過都見成日有人排隊，今次終於有位，就同朋友試下晚市堂食，點知一次就夠晒數。🪑 環境：坐得辛苦，當晚滿座，一入去就覺得張枱擺得好密，基本上同左右枱冇距離，坐低之後袋都唔知擺邊，食嘢仲要小心翼翼，拎筷子、夾烏冬都怕彈到人，真係好迫好唔舒服。當時仲要拎住一袋兩袋，成個用餐過程都坐得唔自在，唔會再考慮堂食。🍜 食物：賣相ok但唔值 我叫咗五目煮烏冬（味噌湯底），朋友叫咗安格斯牛肉煮烏冬。湯底濃係濃，但鹹到要飲水送，唔係咁易入口。五目配料太少，有啲太孤清。烏冬係粗身嗰種，咬口ok，不過整體嚟講味道冇乜驚喜，仲要呢個價錢，真係唔抵。冇影相，因為太狼狽，當晚實在太迫，加上拎住嘢，又唔舒服，所以冇影相。📍總結：環境太迫，坐得唔舒服，味道又唔特別，配料又唔多，價錢仲偏貴，真係冇乜吸引力。純粹試過一次就算，唔會再返轉頭。…查看更多

之前食過山牛其他分店幾次，都覺得水準麻麻地，已經無乜諗住再幫襯。今日咁啱喺鯉魚門開會，商場入面搵唔到啱食嘅，見到山牛裝修幾靚、睇落企理乾淨，就抱住醫肚心態買個外賣，點知真係有驚喜！今次試咖哩燒肉丼(中盛)$50，外賣加$2，另外叫咗多飯。🍛 咖哩：超預期！ 原本以為會係嗰啲出面連鎖餐廳常見嘅袋裝咖哩，點知完全唔係！食落每啖都啖啖肉碎，仲帶住炭燒香味，非常濃厚，配呢個咖喱我可以食多兩碗飯，明顯係自家制，第一次喺燒肉店食到有咁有誠意嘅咖哩，意料之外，值得一讚！🥩 燒肉：濃郁炭燒香味，唔係死鹹果隻，肉質軟腍，表面微焦香，唔會韌，幾有口感。真係估唔到唔同分店水準可以差咁遠，鯉魚門呢間明顯係有用心。🍚 份量：呢間叫多飯真係明顯有俾多，之前喺其他分店叫多飯都同普通份量差唔多，問店員又hea我話已經畀多咗。💁🏻‍♂️ 服務：外賣速度快，店員有禮貌，包裝盒上面仲有貼製造日期，細節位做得幾貼心。下次會再試，見到佢哋新出咗兩餸飯，有興趣下次試下～希望保持水準！…查看更多