Ms Dull的個人專頁

一個人嘅晚餐，索性去買外賣，經過這小店見到係台式便當，今晚套餐有蜜味雞翼，就試一試。套餐$59，有雞翼、蔥油拌麵 & 紙包飲品。 味道中規中矩，唔會太濃烈或太鹹，比較失望係只得兩隻細細嘅雞翼，呢個份量令我覺得$59好貴啊！第一次幫襯。但未必有下次。…查看更多

素喜館係樓上舖，我之前完全冇聽過，只係有次喺FB見到朋友post嘅相片，睇落好清新好精緻咁樣，所以嚟試一試。點知一試之下就愛上了，前後嚟過3次，差不多係「每月一食」。點解係每月一食呢？因為佢哋每個月都會轉dinner menu，所以要每個月去幫襯，暫時呢幾次都有黑松露芝士炸薯球(可能係佢哋嘅signature dish? 雖則係炸，但唔油膩架噃)，其他都會轉款，次次去都有驚喜！佢哋揀嘅食材好多都係superfood，感覺健康有益，煮出嚟仲好colorful，睇下D相就知！好鍾意佢哋嘅粟米花椰葉腰果耳朵粉，希望喺之後嘅menu可以再食到。呢度係有誠意嘅小店，值得支持啊！…查看更多

聽聞西貢嘅小城大廚老闆嚟咗銅鑼灣開餐廳，今日就同朋友嚟食個 late lunch試試看。我哋兩點零鐘上到嚟，當時得番三檯客，侍者帶我哋坐窗邊卡位，都算光猛舒服。餐廳其實冇特別靚嘅裝修，如果想追求特色或者情調，呢度其實欠奉㗎！裝修平平實實咁，無甚驚喜。午餐menu都幾多選擇，我揀咗鴨胸冷麵，而朋友就食豬扒。午餐包餐湯/沙律、主菜同埋飲品。今日餐湯係磨菇湯，由於要戒口唔食得磨菇，所以我同朋友都食沙律。Green salad都幾大碟，蔬菜新鮮，車厘茄鮮甜。 鴨胸冷麵味道都幾清新，天時暑熱好啱食，不過麻醬就似乎重手咗，落得多得滯！ 朋友話豬扒煮得幾tender唔靭，味道唔錯。朋友仲大讚佢嘅薯條，話好似食緊薯仔咁，好好味喎！ 咖啡好香好滑，可惜偏苦，唔太啱我嘅口味。綜合嚟講，呢個價錢食個 lunch，其實都算合理。可惜我哋食到尾聲時，餐廳開始清潔，彌漫著消毒嘅味道，而家我每次諗起呢間餐廳，就自然會諗起嗰陣味😑。…查看更多

與中學同學及老師四個人聚舊，想同老師食好西，最後揀咗嚟呢度食私房菜。呢度本身有唔同價錢嘅standard menu，我哋睇中每位$380嘅餐，不過由於朋友要戒口，其中有一道菜唔啱食，同餐廳WhatsApp溝通時，佢哋都有建議其他餸菜代替，但之後我哋又有啲意見，佢哋都不厭其煩地處理，服務態度好好👍🏻👍🏻！來到餐廳時發現我哋獲安排有間房，亦都係餐廳唯一嘅廂房，實在冇諗過我哋四個人都可以有房，真係好驚喜，直情喜出望外呢😁！負責人話呢間房係先到先得㗎！我哋嘅Standard Four menu如下：1) 素三文魚香芒柚子沙律2) 五香豆腐拼糖心蛋3) 廚師精選老火湯4) 麒麟龍躉 5) 黑糖陳醋肉排6) 蟲草花杞子浸菜苗7) 荷香風味藜麥飯8) 廚師精選甜品基本上每道菜都好好味，柚子沙律啲柚子多到滿瀉咁濟，老火靚湯好明顯冇味精，仲要冇放肉去煲都咁甜，厲害！至於甜品，廚師就整咗麵包布甸，味道適中唔會太甜，老師由頭讚到落尾，老師開心我哋當然更開心啦😄！呢度晚餐似乎靜啲，希望多啲人嚟支持啦，佢實在係誠意小店呢❤！…查看更多

今日嚟到附近做嘢，差唔多十二點有啲餓，就喺附近逛下揾個地方食lunch。由於好少嚟大角咀，唔知道原來這裡有咁多嘢食，有啲餐廳裝修得幾靚，實在係花多眼亂唔知食乜好😅！終於行行吓經過呢度，見到個menu幾吸引，裝修又幾特別，於是就入去試吓。Menu有喇沙、肉骨茶、乾撈麵...等，原本入嚟諗住食柔佛喇沙，以前喺馬來西亞食過，好想好想回味一下，可惜因為醬料未齊，暫時未有提供，可惜呀😣！最後有選擇困難症嘅我揀咗佢哋嘅招牌老鼠粉，另加一杯檸檬薏米水。餐廳嘅枱凳令人有大排檔嘅感覺，真係有啲似去咗馬來西亞食嘢咁！招牌老鼠粉份量唔算大，有幾片豬腩肉加肉碎，微辣。豉油唔算鹹，整體味道唔錯，最方便係用匙羹筆吓筆吓就食曬，懶人恩物😆！檸檬薏米水冇冰的，飲落唔會凍冰冰，但又有清涼感覺 👍🏻👍🏻！其實佢個menu有啲搞笑，Nasi Lemak譯做「辣死你嗎」，Roti Canai叫做「我知你啦薄餅」，幾過癮！…查看更多

Lunch time喺皇后大道東嗰邊散步，順便睇吓有乜吸引嘅外賣可以買返公司食，行吓行吓轉入大王東街，見到有間小店個menu似乎幾OK就試吓。Lunch box有吉列炸雞、蕃茄醬意粉、蔬菜同埋一個麵包。當時等外賣嘅人唔多，我係第三個，但係都等咗接近15分鐘才ready，我前面嗰兩位都等到有啲不耐煩，效率實在有改善空間。味道嚟講吉列炸雞唔錯，麵包拎到返公司都仲係暖嘅，只係意粉冇乜番茄醬淡淡的，唔多啱鍾意濃味嘅朋友。…查看更多

天后有唔少甜品店、糖水舖，淨係清風街都有４間，競爭都咪話唔激烈！喺眾多糖水舖當中，呢間主打芋圓嘅係我近期最愛，食完就當自己去咗台灣！😅今晚同朋友喺銅鑼灣食完飯，特登過嚟幫襯。我哋轉下口味唔食仙草八寶，叫咗一碗蘆薈椰纖果仙草 & 一客糖不甩芋圓一齊share。糖不甩芋圓唔係好甜，芋圓煙煙韌韌，用嚟整糖不甩又幾夾；蘆薈椰纖果仙草味道好清新，啱晒大熱天時食又唔會飽滯， 我哋share一碗覺得唔夠喉，之後追加多一碗，真係好好味！😋今晚嚟到一個客人都冇，唔知係咪因為鋪頭位置唔夠當眼呢？…查看更多

今晚約咗朋友食飯，我想食炸豬排又剛巧在附近，所以揀咗呢度。我哋6點半嚟到，唔駛等位，仲可以坐卡座，舒舒服服！落單及上菜過程都算快，食物質素幾好，千層炸豬扒好肥美，第一次嚟嘅朋友都話抵食；只不過server好多時候企埋一邊傾計又或者撳電話，想搵個人加茶都要好耐先搵到，斟完茶又柄埋一邊繼續傾繼續玩電話，唔通傾緊世界盃？…查看更多

與一大班朋友食Lunch，大家對於去邊度食也有不同意見，最後決定來到三希樓，既可食點心，又有得食片皮鵝，一次過滿足兩個願望，正！點心當然少不了蝦餃、燒賣、流沙奶皇包，也有近期流行嘅紅米腸粉，紅米腸粉顏色特別，但味道冇乜特別驚喜，OK啦！另外叫咗酸菜魚，魚片幾滑，不過酸菜味道唔係人人喜歡，我食得酸就覺得唔錯囉！片皮鵝落單時已講明制作需時一個鐘，我哋食住點心傾下計，邊食邊等咁樣，片皮鵝終於送到喇！職員幫我哋片好一大碟鵝皮鵝肉，另外有兩籠薄餅，一大碟青瓜，一大碟葱，見到都食指大動！我哋9個人食呢個份量非常足夠，大家不斷食好似愈食愈有咁樣，非常滿足！…查看更多

朋友告知有間新開嘅台灣車仔麵店，一於今晚約埋去試吓！去到大約 18:15 左右，可能時間尚早，店內只得兩位客人，我哋坐低就一人拎一張落單紙慢慢揀。其實註明由台灣直送嘅食物唔算好多，不過朋友見到新竹米粉同豬腳仔已經雙眼發光，當晒自己去咗台灣咁喇！落單首先要揀食邊種麵，要乜嘢湯底同埋醬料，然後再揀餸。我剔咗台式寬粉條、美人湯(清湯)、麻辣醬(小辣)、香菇貢丸、A菜 & 千層冰豆腐，仲有一杯杞子菊花圓玉露。落單時先知今日冇A菜，要改食唐生菜，老實講有啲失望，誰知呢個只係失望嘅開始咋...！朋友話魚蛋細粒得嚟唔彈牙，我嘅貢丸就粉粉哋唔爽口，冰豆腐都唔多好食；不過湯底有我近期至愛嘅桃膠，而寬粉條又唔係咁容易食到，杯杞子菊花圓玉露又幾好飲，尚可板回一啲分數啦！…查看更多

原本想去新開嘅冰室食晏，可惜要等位，當時落緊雨實在唔想擔住傘排隊，於是決定向前行多幾步，幫襯同樣係新開、來自多倫多嘅Pho Metro。餐廳設計明淨簡潔，我哋獲安排坐最入靠牆嘅二人枱，舒舒服服。望下個menu，都係一般嘅生牛肉河粉或者香茅肉類嘅撈檬或湯河。天氣咁熱，我首選撈檬，想食春卷撈檬，可惜春卷係小食要分開叫，最後叫咗香茅牛肉撈檬；朋友就揀咗香茅豬肉湯河。香茅牛肉厚身，醃到甜甜哋，加埋酸酸哋嘅魚露，非常唔錯。鍾意佢個魚露，唔會一路食一路聞到濃烈酸味。朋友都好滿意佢嘅香茅豬肉湯河，覺得個湯係牛肉湯，好好飲， 唯一可批評嘅係豬肉燒得有Ｄ燶，尤其係坑紋位置，純粹係朋友個人口味唔多鍾意咁樣。飲品方面，我叫咗杯鹹柑桔龍眼蜜，朋友就要越南咖啡。前者味道唔錯，唔會好甜，以為龍眼蜜會有幾粒圓肉，但原來係冇嘅；朋友嘅越南咖啡喺佢食完碗河粉後終於滴完，可惜朋友落煉奶時重手咗，令到咖啡好甜，最後飲咗兩啖只好放棄，嘥咗！(職員當時仲問要唔要加多啲煉奶，真係有人會飲咁甜的嗎？)…查看更多

其實已經越來越少嚟跑馬地食飯，一來泊車難搵位，二來冇乜新餐廳，唯一吸引我嘅就係呢度嘅上海排骨菜飯。新昌明在跑馬地算係中流砥柱嘅實力派，當其他餐廳飯店都冷冷清清嘅時候，新昌明裡面總係熱鬧啲，始終呢度價錢大衆化，而食物質素又唔會令人失望。今晚與朋友嚟到，我食我至愛嘅排骨菜飯，朋友就食豬手飯(加錢轉菜飯)。朋友話豬手飯個南乳汁係靈魂，豬手亦啖啖肉；我嘅排骨菜飯一貫美味，排骨味道甜甜哋又烟un，唔似一啲餐廳煮到油油膩膩，係我一百分之選！我哋嘅晚餐包埋飲品，又有電視睇，每人$62，絕對係相宜美味嘅一餐。…查看更多

星期五晚飯後想食甜品，剛巧在Fashion Walk附近，諗住去Lady M碰吓運氣，但見到要等位，就索性買回家睇住電視慢慢嘆！我哋買咗法式香蕉千層酥($68) & 海鹽焦糖千層蛋糕($75)。味道嚟講，香蕉千層酥真係得，嗰層酥皮好香，加上我至愛嘅海綿蛋糕同香蕉，食完都仲回味緊；至於另一件海鹽焦糖味，唔算太甜，其實幾好味，但真係有太多層焦糖，我唔係焦糖fans，食半件已覺有點膩，好在係2個人share!平均要成七十蚊件蛋糕真係幾貴，偶一為之OK囉！…查看更多

間唔中都會來這裏食飯，menu裏面有好多選擇，價錢亦唔貴；今晚兩個人叫咗叉燒、高湯菜心同埋雪菜眉豆豆腐。第一次食呢度嘅叉燒，雖則肥咗啲，但味道唔錯，送飯一流；雪菜眉豆豆腐差不多每次都會叫，豆腐真係好滑。反而比較少叫呢度嘅點心，我見有幾檯都食緊小籠包&蘿蔔糕，或者下次試吓。呢度平日晚上冇咁多人，不過星期五六日就一定要等位，幸好佢上菜時間算快，限時90分鐘交檯冇乜難度。如果兩個人，我其實幾鍾意坐向窗嗰邊嘅高檯，雖然要推出推入，但望住風景食飯又背住其他人，感覺有多啲私隱度，唔錯！…查看更多

晚飯後去鵝頸橋附近嘅12蚊店買嘢，之後沿路行去跑馬地方向，穿過等巴士嘅人潮見到呢間甜品店，門口張貼咗桃膠嘅宣傳，近排成為桃膠控嘅我，二話不說就行入去喇！坐低立即叫碗桃膠($45)，朋友就食杏仁豆腐花($29)， 不過落單後才發現原來佢有特價$15嘅糖水，朋友大呼好平，早知一人隊一碗，埋單都係三十蚊咋！Anyway, 等咗冇耐兩碗糖水就送到，杏仁豆腐花冇影相，朋友話味道OK；我碗桃膠味道唔太甜，啱我口味，可惜我較喜歡食到索索聲嘅雪耳，但呢度嘅好軟身，只能夠話OK。 …查看更多