pro3112's Profile

幫襯咗佢幾次先至寫呢個食評，佢嘅海南雞高質而且CP值高，但我今次想講吓佢嘅牛肉麵，藥膳雞湯湯底飲得出有料到，雞湯同藥膳味取得平衡，唔會太嗆喉但又唔係淡口，仲有蟲草花同紅棗，成碗麵望埋去有些台灣牛肉麵嘅影子但食落就知佢有佢嘅特色。超級讚佢嘅牛肉，厚身得嚟又腍又鬆化，比好多所謂台灣牛肉麵嘅牛肉做得更出色。 下午茶只係$45 仲有杯嘢飲。 每次去都發覺佢越嚟越多客，如果佢繼續堅持落去必成名氣店。佢嘅海南雞其實都係好嘢，不過我懶今次寫住咁多先。😅…Read More

唔鬼記得睇咗邊個飲食節目，所以今日去試吓，叫咗跋絲咕嚕肉，帶子賽螃蟹，黃金軟殼蟹，同埋鮑魚雞煲。咕嚕肉要$230+ 一啲都冇特別，層粉漿仲硬硬哋，一啲都唔跋絲，咁嘅質素咁嘅場最多只值$120碟帶子賽螃蟹先至奇怪，根本唔知係乜，介乎炒鮮奶同炒麵粉團溝蛋白之間，不倫不類，唔滑唔鮮唔輕身，蛋白味都欠奉，所謂嘅帶子少到搵唔到，不過俾你搵到又點佢都冇味。碟軟殼蟹粉漿又口又油，啲蟹處理又差竟然冇去腮，粗製濫造到極點。全晚稍為正常嘅就係鮑魚雞煲，我話正常但唔代表佢口味。總結成餐飯係浪費時間金錢。…Read More

久唔久去土瓜灣食嘢，但係去親都係北帝街嗰頭，今次走上天光道呢間小店竟然十分有驚喜，係返單之選。今晚第一次幫襯喺set dinner Menu入邊點咗三個餐老婆同阿女都係點「龍蝦汁蟹肉意大利飯配龍蝦尾」，我叫咗個「燒美國肉眼扒」。 個餐前菜我哋都揀左炸吉列蠔，湯係洋蔥湯。個吉列蠔炸得啱啱好又唔會油淋淋，洋蔥湯佢反傳統唔係清湯嗰隻，但我唔介意因為味道夠濃就收貨。個意大利飯一拎上枱就龍蝦汁香味撲鼻，啖飯有咬口，龍蝦味同蟹肉味互相比拼，件龍蝦尾亦都啖啖肉，龍蝦肉預其中嘅彈牙，雖然我略嫌佢鹹咗少少，但係總結嚟講成碟飯係好高分嘅，呢個餐兩隻吉列蠔一個湯一個飯再加一杯咖啡收$218我覺得係超值。另外嗰餐主菜係肉眼扒，件扒雖然唔係厚切，但係有碳香味呢個係小弟最鍾意嘅，我叫五成熟佢亦都控制得好好，份量唔细又有肉味又夠腍又juicy. 另外要讚佢嘅就係嘅配菜亦都唔係求求其其放兩件翠玉瓜俾你，又有蕃茄又有南瓜又有蘆筍，擺盤亦都唔錯，成個餐$298。 本來小弟一直覺得喺外邊食件扒如果低過$300都唔慌好食，但係今次真係有驚喜。臨尾一杯即磨咖啡都唔錯，都幾苦但我都可以接受。唯一係佢嘅餐牌有啲格格不入，因為佢個餐牌做得好似茶餐廳咁甚至比茶餐廳更差，感覺都幾搞笑。…Read More

呢間舖開咗冇幾耐就已經有幾十個食評個個都讚，雖然都預咗大部份係Foodie嘅手筆，但係都係忍唔住今晚去咗幫襯，諗住至多都係伏一次啫有幾大件事。兩個人叫咗三樣餸，蠔仔粥，椒鹽九肚魚同埋小炒王。椒鹽九肚魚嘩其實都唔使講嘢大家望吓幅相，係我食剩嘅，佢炸得唔夠鬆化，粉漿又冇味，魚又薄又冇肉，至慘就成碟都炸得好油！之後第二碟小炒王，望埋去有啲奇怪，因為佢用咗好多炸芋頭條而唔係用韭菜花，其實如果佢好食嘅都冇所謂，但係啲芋頭又唔鬆脆，又實又硬，夾咗兩粒腰果不得了點解會咁腍㗎？ 忍唔住同個侍應講個侍應態度好好咁話同我炒過一碟，10分鐘之後佢嚟咗一碟新嘅，其實我覺得係等於頭先嗰碟再喺面上邊加啲新嘅腰果，嘩嘩嘩不得了嗰啲新嘅腰果有突破因為佢仲諗過之前嗰啲，而舊嗰啲腰果仍然喺入邊，沒有最腍只有更腍。對住一碟勁腍腰果搭硬芋頭嘅小炒王我都唔知點樣食落去，其實煮得唔好食已經係一個問題，但你仲要耍我又話炒個碟咁先令人氣憤！ 個廚房如果有心做嘅，自己試吓碟腰果就知道唔可以拎出嚟俾客人食啦，咁嘅態度做食肆就冇得救啦！全晚唯一可以入口嘅就係個蠔仔粥，豪仔飽滿又夠多，但係其實佢嘅味道又唔係正宗潮州式嘅蠔仔粥嚟，算啦都唔好怪責碗粥啦，如果冇佢，我今晚就空住個肚走人。…Read More

終於來一試愛文生，估唔到，真係估唔到可以咁難食。兩個人叫咗椒鹽九肚魚，咕嚕肉，同埋小炒王，小弟認為呢三樣係大排檔嘅指標性食物，雖然幾乎所有大排檔都有呢三樣小菜，但係咁就可以最容易比較。椒鹽九肚魚拎上嚟竟然唔熱，啲魚又少肉亦都炸到乾晒，入面完全食唔到九肚魚應有嘅嫩滑，因為根本就乾晒，成碟就好似食緊一碟炸粉漿，入面冇底味，外面亦都冇味。咕嚕肉，外觀OK，但係粉漿超厚而且又硬又韌，舊肉超乾又冇底味，好似雪咗好耐而且再返炸，今次真係大開眼界竟然有大排檔做到咁差嘅咕嚕肉，老實講兩餸飯嘅咕嚕肉好食過佢多多聲。小炒王，成晚三碟之中稍為正常嘅一碟，偏鹹但，冇鑊氣，碟嘢仲偏濕添。深水埗區嘅小菜館，例如萬發，容記，增輝，小菜王，佢哋各有特色、好壞。但今次呢間真係差到一個點，連呢三樣嘢都整得唔好，你都唔使旨意我會再嚟食，唔好同我講話我唔識點餸。點解仲有咁多人去幫襯？真係令人唏噓！…Read More

唔想成日都去九龍城食泰國嘢所以今日去呢間試吓，環境同招呼都算係ok 嘅，但一間食肆始終要整好啲食物先至緊要。首先嚟個金柚鮮蝦沙律，味道一般，幾舊柚子肉同三隻細過一蚊嘅蝦，又冇其他蔬菜水果香葉或配料，收八十幾我覺得唔扺。點咗燒雞，同燒豬肋骨，兩樣都偏甜，我覺得隻雞其實係焗嘅，所以唔會有燒烤味，但係佢啲外皮又唔香，還好雞肉仍juicy 有味。個豬肋骨佢話佢係炭烤但小弟一啲都唔覺！叫咗一個蝦醬肉碎炒飯，同一個原個菠蘿雞肉炒飯, 兩個炒飯都炒得好濕，其實唔可以講得上係一個炒字，蝦醬肉碎真係搵唔到肉碎，我懷疑可能係納米肉碎。菠蘿炒飯，啲菠蘿係新鮮又香嘅，但係個飯本身好差，啲飯又濕又淋，啲雞肉又冇味又乾，其他配料如肉鬆、臘腸、提子又少！呢個菠蘿炒飯係我廿年來遇上嘅最差嘅一個菠蘿炒飯。呢間嘢整體上所有餸菜都有一種偷工減料嘅感覺。整體上唔會反感，但係一定唔會再去。…Read More

喺附近住咗十幾年到今晚先第一次幫襯佢，本來想食羊腩煲，但擔心中伏一瀨嘢就跌幾舊水都係試吓佢哋啲小菜先。兩大一細點咗三個小菜，麵醬雞煲，茄子斑腩，生炒骨，每款$68-70，跟白飯同中湯。（個湯係青紅蘿蔔煲豬骨，唔覺有味精味，掂，例湯嚟講已經係交足功課。）頭嗰兩樣餸都係中上水準，肯定肯定比果啲連鎖店例如道腥，綿仙好食，大加落大塊殼就更加唔使講。今晚亮點係碟生炒骨，大大碟成坐山咁高端上枱，大家自己睇相，大大舊而且係肉厚，咬落去軟熟有肉汁，而家坊間好多都係骨肉比例係3:1 而我呢碟係1:2。 粉薄而脆而又仲係黐住舊肉，有啲食肆做到成粒脹卜卜，層脆漿炸到有啲離肉我個人覺得有啲離題唔正宗。味道方面甜酸適中，個汁唔會太稠，菠蘿同三色椒又夠多。諗起有啲舖搞花神將啲生炒骨放落啲冰度，又話收你兩舊水……另外，呢間鋪啲招呼好親切，伙記同事頭婆又有禮貌，初頭行入去有啲麻甩嘅感覺，估佢唔到又幾斯文，問佢要三杯水仲問我要熱定暖添。短期內一定會再去，試佢嘅羊腩煲！I love 小店。…Read More

住喺附近久唔久會食佢，做乜鬼今日去食完全唔係果回事！淥麵手腳慢，出嚟嘅麵淋晒但又有一執未開，湯淡到一個點，有啲似豉油加水。牛腩又淡哂好彩都仲夠大夠淋。豬腸豬紅又係淡，我要食淡口嘢就唔嚟食車仔麵啦大佬！點解佢搞成咁？其實黃大仙，新蒲崗係車仔麵集中地，佢咁樣點賣得$42碗？都唔明佢哋究竟有冇自己食番碗自己檢討吓。相都費事影，真係嘥咗個lunch 見到有人話佢轉咗手唔通係真嘅？往事只能回味，食麵不堪回頭。以後又少一間選擇。…Read More

呢間小店開咗咁耐我今日先行入去，原來係好嘢嚟失敬失敬！今日閒日又係疫情所以加埋我先得兩個客，鋪仔細細但感覺乾淨企理，點咗碗雲吞麵加熱奶茶（$34），碗麵端上面前比人觀感唔錯，麵立立令未食就覺得佢爽口，有少許韭黃而唔係蔥已經要加分，雲吞放喺底亦應該係咁，有傳統專業feel; 外觀唯一美中不足係佢加咗一條唐生菜，其實加一菜尤其係生菜，菜嘅青味會影響湯嘅味道，聞上去都有影響，不放也罷。飲啖湯先，有微微大地魚味但唔夠濃，有冇放蝦殼煲呢小弟就食唔出，見佢舖外有人喺度燒大地魚但可惜佢可能佢熬湯唔夠時間，論湯底佢係不及麥子輩嘅老字號但果啲成五十蚊碗喎！到麵啦，爽，彈牙唔立口，隱約有啲豬油味，正。到雲吞，呢個係重點，扎實飽滿，蝦爽，鮮，豬肉香，唔會太重調味，size 啱啱好，咬落去唔會散晒跌啲餡出嚟，（坊間太多果啲懶大粒，落重麻油嚟遮雪味，仲一咬就散嘅雲吞），皮薄，如果拖埋條金魚尾就更優美啦，雲吞底部唔會疊埋一層厚實嘅皮，LIKE! 單論雲吞佢已經好高分。成件事呢碗雲吞麵係值得再返單。下次會外賣返屋企打邊爐。期待試埋佢嘅水餃。…Read More

行完山到咗西貢，想食車仔麵自然就諗起松記因為佢個朶夠響，未嚟過不如就搏吓，一直對車仔面有要求，亦都有心理準備因為見好多負評，但身邊有個老友食過話ok 所以就增強信心。（而家就知真係要帶眼識人枉我仲啱啱請佢食甜品）。排緊隊見到個餐牌覺得幾貴，車仔餸豬大腸$22，雞翼$14兩隻，冬菇$12，面底$13， 真係想問有冇跟一杯house wine.點咗碗三餸面豬红冬菇雞翼$47。熱騰騰一碗面端上，湯好濃但淨係顏色夠濃而係冇味，好似將啲滷水溝淡其實只比鹽水稍好，一碗湯麵嘅湯唔得其實已經係死罪！豬紅一夾就散亦都冇底未，冬菇好普通，雞翼係正常嘅滷水雞翼但唔值$14蚊。成件事唯一可取嘅就係碗麵夠熱同埋地方夠乾淨。小弟近30年都未食過咁差嘅車仔面！牛頭角文記，銅鑼灣永年，新蒲崗回味，地道；黃大仙濃記，味源，友記；柴灣財記…都好，唉點解我會入咗去呢間呢。雖然講嚟講去都係幾十蚊，但性價比太低，人生苦短何必浪費一餐嘅時間喺呢度。費事影相，再睇吓其他負評深有同感，望吓啲好評更覺世事無奇不有。…Read More

睇檸檬地圖搵到佢，真慚愧住喺附近都唔知，一個人走來試吓，一踏入門口就好有親切感...海報，擺設，音樂都啱哂feel. 點左個龍蝦汁海鮮意粉同一杯Long Black。個汁夠味唔太稠，海鮮唔係乜珍貴靚嘢但唔駛80一個餐我完全收貨，正所謂有蝦有蜆你仲想點！意粉質地啱啱好，上面沈執溫室豆苗喺面靚靚仔仔。杯Long Black 仲有驚喜，輕焙咖啡有果味花香，帶微酸但唔係澀，成件事一個＂和＂字。一邊品嘗一個簡單而美味嘅午餐，一邊欣賞周圍嘅擺設同海報…信念，堅持，憤怒，失望，加油，乜鬼感覺都湧晒埋嚟！ 好想坐耐啲可惜有下場。下次必會再嚟，寫寫而家已經想再去。…Read More

呢餐真係食到一肚氣。訂咗四位6点。限時兩粒鐘即8点要埋單。8時埋單$308/位，其他時段$348.5点55分去到但佢未开哂門，都算，照推门入座。任食花蟹，黃奄仔或綠奄仔。所謂綠奄其实係次等貨，味道與黄膏差好遠，什么食水草大而變綠膏，係真係假不必深究，反正小弟食襯稍為高質嘅奄仔必定係黄膏，只曾经试过在街市買过D平價蟹先出现綠膏。(註:綠係指深色鴨屎綠，苦多过甘甜)。講番个餐，海鮮係九款選五，不是任食。新鮮，正常。唯青口有一隻壞咗，算喇。蟹任点但每次不可超过人頭数。点了4只奄仔，有3只係綠膏。4只蟹都有膏但好少好削。感失望！再点4只花蟹，端上来的竟然係藍蟹。位侍应A小姐竟然同我講"来货係呢D，冇辦法"，第二位侍应B卻同我講呢D就係花蟹！老實講如果我吾係一位蟹痴周時行吓街市，隨時俾佢大返轉頭。到我再揾第三位侍应C(成間鋪都吾知边个高级D)，佢先承認果D係藍蟹！大家可知藍蟹隨時比花蟹平一倍，跟本係兩回事，無可能可以做代替品，仲则则膊吾多覺！第一位的侍应小姐自被我揭穿之後就开始态度恶劣，由小姐顿变孖四。劣！果位侍应C怕搞大件事就答应俾八折。我亦ok 接受。继续点奄仔，之後兩輪都係得四分一机会係黃膏，果D始终都係奄仔我無話可説！只嘆一句''中伏"。整个过程其实好急，但预咗知道食到8点，约在7点25分佢哋已叫我last order。我亦照做，之後冇再加單。但......之後就出事喇。过了8点後佢冇叫我埋單，我坐到8点半叫埋單時佢竟收我每位$348而不是$308！ 佢话我已过了8点所以係348. 我成世人未見过自助餐如此屈机。佢既然識用8点呢个時限叫我截單，点解都最後又唔叫我埋單？一間正路的放题餐厅事必會提你last order 兼夾夠鐘叫你埋單的，佢咁做擺明設氹俾人踩！我慶爆但始终真係8点後先埋單，佢收我每位348但亦兑现打八折的承诺。我终于"骨''一声吞咗度火埋單走人。P.S. 另外试咗如牛，豬都有D韌。粉果同牛丸吾駛食。青菜ok.最後兜粥係唯一亮点。 …Read More

11年為佢寫了一篇食評，當時三餸一面好似係22蚊，今時今日34蚊了。評心而論佢係退步咗但唔算多，只係個湯同腩汁淡咗，貴价D嘅豬扒亦已無聲無息地消失咗，柚皮亦吾多覺眼。但牛筋腩和其它餸如大肠，豬红，冬菇保持到水準。此店可惜先天有兩大缺点，一是坐位太少太窄，每次要趕住食完走人。二是负责淥麵个大嬏永远都咁臭串，趕客首選。慶幸佢隔离果間柚寄越来越吾爭氣，否则个条大嬸肯定幫佢趕走一半人龍。…Read More

终於來到呢度食返餐，入正題。一行十二人點左出哂名嘅白肺湯，鹽焗雞，咕鲁肉，蝦多士，仲有炒生魚卷，梅菜扣肉，陳皮肉餅等好期待個白肺湯沒令人失望，杏味幾濃有D唔似傳統中湯，不過無所謂好味就得，感覺此行冇“白費”到。鹽焗雞不愧係要預訂招牌菜，香滑有雞味，有咸香有色水。但有D奇怪好似食到有煙薰味，有少少得龍太爺雞的影子。問題來啦，事關要讚嘅已经食完。蝦多士是味度是ok的但塊面包稍油，冇特別，(雖然好似用了海中蝦)個陳皮牛肉餅好差，係好差。好似將幾粒嗰D水皮茶樓D山竹牛肉壓扁佢就咁上碟，淋patpat又無果皮味，咁樣點敢收人成舊水呢？！咕鲁肉甜酸比例幾啱，個人認為整体味度內外都啖口左，個汁厚D仲好。.......突然懷念北角嗰間士多啤梨骨......生魚卷唔得，魚唔鮮亦太乾太老，唔駛食！比起太子鳳城差兩皮。東施效顰梅菜扣肉不過不失，切得太薄咬口唔夠，可能要就住D怕肥人仕，小弟对此碟扣肉要求特別苛刻，因為係…....150蚊碟。讚吓個荷葉飯，足料，料亦鮮.生炒糯米飯好味足料，但又係有D怪，放左好多炒蛋碎有如楊州炒飯，D糯米冇哂黏性顯然係過水太多，令到成件事失去糯米飯的神髓，何必要搞成咁呢？仲叫左齋煲同菜，個齋保味度可以但D粉絲一pat嘢，如果粉絲靚功夫好就唔會係咁臨尾甜品，蛋白杏仁茶好味。但個核桃糊差到冇朋友。整體來講呢間食物參差，喺傳統口味中尋出路但好似有D力不從心，是否分唔同師傅負責不得而知.  咁嘅價位咁嘅裝修能有一班客路，我估與”同學會”情意結不無關係一試無妨，再試慎防有時要款多又要質數高，正如又要好味又話要健康，談何容易呢！…Read More

今日第四次食这里的乾炒牛河了。实在太好了。 為了一碟牛河就跑回家寫这个食評还是值得的，食咗４次４次都一樣咁有水準，唔讚吓佢都唔得。３２蚊碟伙记一端上來就鑊氣樸鼻，好似將成隻鑊由廚房拎出來放喺你面前，Ｄ河粉在碟上彈彈吓，证明粉本身夠烟靭又唔碎濕濕，當然亦因為炒得好先至唔會一｀ｐａｔ＇嘢咁，凈係呢點己经好多餐廳酒楼做唔到，（試過一間颇有名的唔打仗的“ｘｘ馆”的牛河，就是一ｐａｔ碎河粉了。）牛河味道較得啱啱好，唔太甜又唔覺得有重味精。色水唔會太黑，有光澤又唔太多油。（其實就算油多了一点小弟都唔會太介意，好似食和牛，鵝肝咁都預咗啦．）牛肉夠多夠淋但又唔係拿到死淋冇哂肉質嗰隻，冇留下梳打粉Ｄ苦味，夠香仲炒到有少少燶㖭，好嘢。証明个厨真係好掂，各方面都兼顧到，對自己同食物都有要求，芽菜的份量又適中，三十零蚊我唔介意冇韮黄。亦唔需要加蛋絲上面整色整水．一碟近乎完美，色香味俱全的干牛河就俾我十分钟食哂，好滿足。在香港地干牛河通街都係，試問能碰到值得回味嘅又有幾間呢？（记憶中銅鑼湾的何ｘ记都幾得，但Ｎ年无去了，得閒要再去比較吓．）呢間店平凡中顯不平凡，呢到Ｄ其他炒嘢都水準高，相信就是出自同一个師父，钦敬钦敬！老實講就算佢價錢加Ｄｏｕｂｌｅ我都會幫襯不過最好唔好加啦…Read More