LeungChiSang的個人專頁

終於試到西九龍中心八樓美食廣場中，由一對退休夫婦主理「笑口祖」嘅出品。點咗全場最平$26嘅海鮮蟹籽炒飯及同價嘅原味趣味豆腐，即合共$52埋單。海鮮炒飯睇落份量唔多，但因為個外賣盒夠深，飯又壓得實，其實份量足夠有餘。炒飯用料有蝦粒、蟹籽同蟹柳。同樣睇落唔多料，但啲蝦粒好似食極都有咁樣，加埋少少菜心及老闆娘贈送嘅一小粒芝麻卷，絕對對得起$26個價有餘。炒飯係走清淡路線嘅，重口味嘅人未必啱，但對我嚟講已經夠味。值得一提個粒仔自製芝麻卷芝麻味好突出，下次可以單獨買番屋企。至於個豆腐相當水嫩，但外表好香口，完全做到外酥內嫩效果，正喎。即使跟餐個杯免費嘅水，顏色睇落似清水，但飲落應該加咗少少蜜糖，可見店主係有心做嘢嘅👍。…查看更多

之前經過新蒲崗呢間只賣叉燒一款主菜嘅餐廳已感到有啲計，呢次就幫襯試吓脢腩雙拼叉燒飯套餐。話晒係主打招牌貨，呢個脢腩雙拼叉燒飯賣相真係唔錯。佢哋用上西班牙豬肉嘅叉燒全部有燶邊。脢頭叉燒偏瘦嘅，但啲肉一啲都唔柴，OK有餘。至於腩叉就真係冇得輸，入口鬆化，完全加晒分。加埋一個太陽蛋同菜心，整體嚟講個叉燒飯係幾惦。不過呢個叉燒飯飯量太少，麻甩佬未必食得飽。跟餐嘅無糖冷泡桂花烏龍幾好飲，色淡但味足。全餐收$72，唔算平，但屬一分錢一分貨嘅可接受範圍。…查看更多

講到打邊爐食火鍋，九龍城老字號「方榮記」可以話係蔡瀾先生生前愛店，佢喺書中同電視節目都講過好多次。方榮記最出名係佢哋個沙嗲湯底同手切靚牛肉，晩市嚟食都幾貴（但一分錢一分貨）。這次罕有喺中午經過門口，發現佢哋喺11:30至14:00會供應$38午市特價粉麵飯，仲免收加一，見選項中居然有沙嗲牛肉飯。立即入去，見店內都有八、九成客滿。問店員沙嗲牛肉飯轉河粉得唔得，佢話得喎，即變沙嗲濕炒牛河，都係收$38。上枱份量還可以，都食得飽嘅，重點喺佢哋個沙嗲汁好正斗，花生味好香濃，又唔會死鹹。當然牛肉質素冇得同晚市手切嗰啲靚嘢比，但呢個價位同計埋店舖本身名氣，仍覺得抵食。其實方榮記嘅沙嗲牛肉大光麵都係名物，收$70，我未食過，但估計牛肉質素會高過特價粉麵飯一啲。…查看更多

依然係全香港最抵食嘅拉麵！講嘅就係青衣我舊居附近嘅「木屋ラーメン」（木屋拉麵）。佢哋由街市舊舖搬咗嚟而家嘅新位置後，我都係第一次嚟。新舖位地方大咗舒服咗，廚房大咗師傅煮麵都方便啲，甩麵都可大動作去做。我坐吧台位，見到基本嘅叉燒拉麵都係賣$55，依然係平絕香港（有平啲但屬於質素差），見menu仲多咗一款鴨胸拉麵，心思思，最終要咗叉燒拉麵，追加$10鴨胸，即係$65埋單。賣相以呢個價位嚟講依然靚仔。佢地係用魚介醬油湯底，個湯依然清澈，飲得舒服，我最終亦飲晒。我覺得搬舖後佢哋湯底魚介成份有加重咗，變得海洋氣息更重，啱我現時偏向煮干拉麵類型嘅口味。木屋用嘅幼身麵雖然冇乜麥香味，但好配合呢個湯底。而且佢哋嘅慢煮叉燒、鴨胸同溏心蛋水準依然好好，整體來講仍然係好食兼超抵食嘅拉麵。所以我每次番嚟呢區打波前，但忍唔住去木屋食番碗拉麵先去球場。…查看更多

早前偶然喺大角咀搵到間只有幾個座位嘅清酒吧La Maison Du Sake（酒屋），入過去𥄫吓並問過價錢。不過嗰日有啲事最終冇幫襯。呢次再經過門口，見有兩小時嘅清酒放題都係收二百幾蚊，決定一試。入到去老闆居然仲認得我，印象分已先聲奪人。雖然放題可選十幾款嘅清酒中，我只認識榮光富士同七賢，店入面亦冇咩好似「十四代」或「新政」旗下嘅貴價名酒，但one man band嘅老闆㨂嘅地酒大部份都好啱我口味。佢揀嘅酒造不論地域同品種都幾多元化，感受到老闆揀酒嘅功力，而且佢又幾talk得，同客人互動得唔錯，整體氣氛令人可放心開飲。店入面會提供一啲唔太複雜嘅下酒菜，我食咗兩串串燒，味道不過不失。連同老闆請客嘅枝豆，加一後最終$322埋單，唔算抵到爛，但價錢絕對合理。畢竟我都飲咗十幾杯，加埋肯定飲咗佢超過一支酒。最終我飲到有七、八分醉（酒醉永遠要保持三分醒），感覺真係唔錯，將來應該會再幫襯。…查看更多

喺九龍城廣場新開food court搵到呢間唔錯嘅漢堡包專門店。小店menu選項唔多，牛豬雞三款漢堡包之中，我㨂咗牛嘅兄弟孖芝堡。未開鋪之前，我見到兩名店員不停咁搓牛肉球。其實呢度做嘅喺將搓圓咗嘅肉球再壓平嘅mash cheese burger，唔係sell爆汁嗰種。不過牛肉餅、芝士同炒得焦糖化嘅洋蔥，與質素幾高嘅麵包完美融合，相當唔錯。值得一提嘅有塊長長嘅生菜就幾乎放起包外面，好似被人遺棄咗咁，有啲怪。不過有塊菜清吓味蕾，都係好事嚟嘅。跟餐配薯條同加錢由汽水轉咗杯Cappuccino，埋單合共$82，性價比算高囉。咖啡冇乜特別，至於有人話呢度嘅薯條超級好食，我覺得有少少overrated。薯條有類似shake shake薯條嘅調味，但我稍嫌質感過硬，但總算強過麥記嘅薯條。…查看更多

睇YT見名廚Ricky講呢間主打豬雜嘅潮式麵店，日前去開太子就試吓咩料。去嘅係下午九唔搭八時段，都有約六成坐滿，而且都係有番咁上下年紀嘅客仔，估計都唔係咩打咭店。其實我本身對豬雜麻麻地，只食某啲部位，但就好鍾意飲胡椒豬肚湯，所以叫胡椒湯底，配豬肚、板根、蠔仔同潮汕人好喜歡嘅珍珠菜。個湯底真係唔錯，胡椒嘅刺激感好爽，但飲起嚟好順喉舒服。有冇味精？至少我飲完啲湯後都冇需要飲水。至於啲豬肚、板根同蠔仔都算新鮮嘅，冇異味，整體嚟講做得幾好。叫多個用湯浸嘅苦瓜。湯底有少少唔同，偏濃味，而苦瓜苦味適中，好啱食。兩樣嘢$76埋單。見隔離枱叫嘅隆江豬腳飯睇落幾靚仔，不過自己唔太餓，唯有下次再試。…查看更多

「一字記之曰心」。嚟到西九龍中心六樓嘅「煙燻肉餅料理」，睇到店主煮嘢時嘅細節位，自然令我想起周星馳喺電影「食神」嘅經典對白。早就喺社交平台睇過片，嚟到自然想試佢哋嘅煙燻肉餅系列，最後揀咗香菇魚肚蒸肉餅，跟白飯、老火湯同油菜，成個套餐收$65。先嚟一碗老火湯，呢日係紅蘿蔔粟米豬骨湯。一飲即覺有料到，湯色唔深但好夠味，飲完一啲都冇口渴，仲有唔少湯渣（我喺鍾意食湯渣嘅人），啱晒我口胃。只計呢個湯，已先聲奪人。之後嚟油菜（今日係菜心），由於係open kitchen，好清楚睇到老闆收到order後，逐個客人細份咁即叫即焯，仲將原本幾條菜栽剩最嫩嘅部份比客你食，所以份量雖少，但從製作細節位可睇到老闆有心去煮嘢食。終於到主角肉餅。老闆亦係按order先去蒸，所以肉餅蒸出嚟剛好。肉餅蒸好後，疑似老闆娘嘅員工就喺食客面前進行廿多三十秒嘅煙燻工序，呢個過程非常吸睛。講番個肉餅，幾十秒嘅煙燻，功用自然流於食物表面，煙燻味肯定唔會滲入肉餅。我問吓老闆，佢好老實承認只係想客人感受「煙燻」呢個舉動，咁樣都OK，當睇表演就好。我想講嘅係佢哋嘅肉餅本身非常好食，軟硬度、口感同肉汁都呈現得極高分，加埋分開煮好入味嘅香菇同魚肚，整體嚟講可以話我近年食過最好味嘅肉餅。所以，呢個煙燻行為喺咪多餘就自行判斷，反正我肯定會再幫襯。…查看更多

行去地鐵站時見到呢間前米芝連三星名廚「廚魔」Alvin Leung（佢嘅旗艦餐廳Bo Innovation現為米芝連二星）做老闆嘅茶記，好奇心驅使下食番個下午茶餐。要咗個鹹牛肉芝士蛋治同凍檸茶。個蛋牛治勝在夠厚身，蛋算滑，芝士亦夠，味道算中上，只係杯檸茶檸檬唔夠淡咗啲。店入面呢個時段冇乜客，裝修幾型仔，尖沙咀呢個格局只係收$35（唔駛加一），普通茶記都未必得，算係抵食嘅。當然，廚房入面嗰個100%唔係廚魔本人，相信呢間餐廳佢都係掛名為主，但可以留意啲細節位，好似佢哋摺住件三文治個位置有計算過，好方便食用。當然你想試到廚魔米芝連級數嘅食物同服務，就應該去Bo Innovation。至於呢間真係一間茶記咋，唔好諗住蔗渣價錢有燒鵝味道。…查看更多

早就想試油麻地呢間由真北海道人同港人太太主理嘅「麵山口商店」。幾年前兩夫婦曾喺大角咀開外賣小店，當時我好鍾意佢哋嘅腐皮壽司，但最終小店結業收場。睇吓佢哋東山再起轉型做拉麵會點。點咗個鯖節豬骨白湯拉麵同辣帆立貝口味嘅「貓飯」。拉麵係豬骨同魚介湯底混合，濃得嚟算順喉，不過飲到最後幾啖可能會偏鹹咗少少，所以學日本人食到最後撈白飯應該會match。配搭呢個湯底嘅喺似油麵嘅偏幼身麵，兩樣嘢都夾嘅。配料仲有叉燒、味玉同筍乾。至於鯖節係用嚟刨木魚碎嘅「鰹節」嘅親戚，外表幾靚仔，食落帶點微酸味，可以平衡一吓碗麵嘅油膩度。不過，鯖節係咪令碗麵變化好大我又唔覺。整體嚟講碗拉麵都有心機做嘅，味道亦有中上水平。反而「貓飯」就係MVP。睇過《深夜食堂》嘅應該知「貓飯」喺咩嚟。呢度除了基本材料木魚碎同白飯外，仲加咗辣帆立貝干、蛋、紫菜、葱、魚介粉等，撈亂後辣辣地幾惹味，啱食。兩樣嘢埋單$145，算香港正常拉麵店價錢囉。下次嚟我應該會試吓辣味噌拉麵，睇吓老闆做唔做到北海道家鄉嘅感覺。…查看更多

喺日本我試過排隊兩粒鐘食碗拉麵，但香港嘅話我就唔願意等多過半粒鐘。不過凡事總有例外，早前為咗食傳聞中嘅新界第一拉麵，我破戒啦。嗰日喺閒日黃昏，目的地係偏離屯門市中心，位置唔起眼嘅「道」。六點晚市開始，提前15分鐘嚟到極有日本傳統拉麵秘店feel嘅門口攞飛。我應該排第13人左右，剛好排唔到第一輪客，結果要六點半先入到場，即係等咗45分鐘。雖然呢間店嘅雞白湯拉麵好出名，但我點咗自己最愛嘅鹽雞清湯拉麵（$98）。拉麵賣相靚仔，個雞湯底又鮮又清，飲得舒服，睇資料店家話個湯用本地雞熬製18個鐘，所以真係好有雞味。麵用咗偏幼身嘅麵，同個湯好夾。配料就有雞叉燒、味玉、紫菜同兩種葱，簡簡單單反而突顯咗湯底本身魅力。值得一提嘅呢度嘅雞叉燒用咗九州華味鳥慢煮製作，相當嫩滑，有驚喜。小食要咗兩件唐揚炸雞（$28），超級好味，肉夠滑又juicy。見open kitchen內有一人專門負責炸雞，更用上好專業嘅廚用溫度計，經常去觀察雞肉嘅溫度，難怪做到外酥內嫩嘅效果。好耐冇喺香港食過可以拍得住日本嘅拉麵囉，呢間鋪冇令我失望。值得一提嘅店家堅持人齊先可以攞飛，所以唔好諗住搵人提前嚟排隊。…查看更多

偶然喺旺角一個寧靜角落，發現呢間日系珈琲店Bone Studio（骨子裡）。難得小店感覺似鬧市中嘅寧靜綠洲，未食嘢已加分。我order咗杯dirty。呢間店有淺焙台灣豆及深焙日本豆兩個選擇，我㨂咗前者，杯咖啡口感輕盈易入喉，唔錯。食多個北海道紅豆吐司，賣相一流，細細件但好好食。紅豆蓉好多，而且呈完整顆粒狀。整體嚟講唔會死甜，加埋牛油同蜜糖，配合軟硬適中嘅吐司，用嚟配咖啡好match（不過選深焙日本豆嘅黑咖啡可能會更夾呢款吐司），令我想起去名古屋旅行時朝早最愛食嘅紅豆多士。兩樣嘢埋單$96，唔平，但算係正常cafe價。而且呢度感覺比較chill，冇旺角鬥市嗰邊咁擠擁，應該都會再幫襯。…查看更多

傍晚沿荷里活道行去上環，見到呢間主打外賣嘅漢堡包店（都可容納三至四個人左右堂食）外表幾型仔，就食個fish burger試吓。問煮餐同收錢一腳踢嘅店員係咩魚，佢話係鯛魚，不過係淡水嘅，所以可能會有啲泥味。淡水鯛魚即係台灣鯛個類。睇番英文menu寫住tilapia我更明白，即係我哋香港叫嘅羅非魚。羅非魚雖然係淡水魚，但少骨肉滑，炒魚片係唔錯嘅做法，但用嚟炸我就未試過。個魚堡即叫即整，食落味道唔錯。塊炸魚有加入啤酒調較個脆漿，所以口感幾酥脆。魚肉好大件，泥味就冇，肉質當然冇海魚（例如鱈魚）咁緊緻，不過係可以接受嘅程度。呢度嘅他他醬調得好好，配料仲有醃青瓜同車打芝士，賣$78整體嚟講個魚堡都算交足貨。另外，我加多$28變set，有埋幼身薯條，另加$8將汽水轉成自家製lemonade，即係總共$114埋單。值得一提個lemonade好refreshing，有用新鮮檸檬，而且酸度剛好，抵讚。…查看更多

世界排名第二、亞洲排名第一酒吧呢兩個朵太勁，作為一名愛小酌一吓嘅香港人，總要試過先有資格批評，所以我嚟幫襯Bar Leone。避開星期五、六、日夜晚呢啲隨時要等兩、三粒鐘嘅日子，特登閒日（周二至周四，周一休息）開門前嚟到，唔駛等咁耐。下午五點開門，我四點九開始排隊，我前面大概有十個人左右。到五點條龍已變成有廿幾三十人。單拖一人提前嚟，總算做到第一輪客兼坐到吧台位，呢點好重要，因為吧枱位先可以同bartender盡情交流兼睇到佢嘅調酒功架。Bar Leone係一間意大利cocktail bar，所以第一杯我揀意式經典雞尾酒嘅Negroni，試吓基本功。呢度有兩種口味選擇，我揀咗草本味較重嘅Fig Leaf Negroni。杯酒好有層次感，嗰舊大厚冰有助慢慢釋出雞尾酒嘅草本味，而塊柳橙就帶畫龍點精作用。叫份Smoked Olives 🫒 下酒。啲橄欖煙燻味好重，有啲似食煙肉嘅feel。本質係鹹嘅，所以淨食未必啱，但配帶甜味嘅雞尾酒就係perfect match。第二杯打大佬，叫了鎮店之寶Olive Oil Sour。微甜微酸易入喉，酒中加入靚靚初榨橄欖油，令整體變得更複雜，用番酒鬼術語杯酒好rounded（圓潤），令人飲得非常舒服，有驚喜。最後一杯要咗Caffe Paradiso。同樣有咖啡同whisky（Nikka）做base，似輕盈版Irish Coffee，但加咗海鹽嗰層泡真係神來之筆。聽bartender建議，要同一時間飲晒兩層，果然更好味。價錢方面當然唔平，埋單同去中價酒店食自助餐差唔多。我算飲得多囉，見同坐吧枱位嘅客人都係一杯起，兩杯止。不過以呢間店嘅名氣同出品水平，平均百幾蚊杯雞尾酒都可以接受。而且呢度bartender解釋杯cocktail好清楚，加上酒吧氣氛好chill，至少唔使任何dress code，抵加分。…查看更多

之前經過深水埗新開呢間「緊張」，覺得裝修幾型，原來係主打馬拉咖喱麵嘅餐廳，呢次就專登過嚟試吓。呢度嘅咖哩麵有四款湯麵同一款乾撈選擇。湯麵個湯底一樣，麵都係油麵加米粉嘅摻摻，只係因配菜唔同有四個價錢。我㨂咗第二平，即係$88嘅咖喱雞。個湯底飲起嚟幾舒服，濃度適中辣度算有後勁，整體嚟講幾啱我口味。至於配料除咗煮得軟熟嘅咖喱雞肶外，仲有白魚蛋、流心蛋、豆卜、豆角、肥仔芽菜同我好like、相當吸汁嘅怡保炸腐竹。其實個湯底有啲似我喺新加坡食嘅咖喱麵，反而同我喺怡保街頭，食湯上面有一層紅油嘅咖喱麵品種唔同。搵一位貌似老闆嘅店員問吓，佢話佢哋個門派冇落咖喱油，所以唔會紅色一片，仲同我講我食嘅係預設辣度，對上可選擇更辣同超辣兩級。飲品方面，我點咗杯「淨混桔」，即係有醃桔仔同酸梅嘅桔仔水，唔太甜，酸酸哋幾開胃。另外叫多件班蘭葉巴斯克蛋糕。色水唔錯，只計件巴斯克蛋糕喺好食嘅，但班蘭葉味就唔太突出囉。埋單連加一合共$186，其實唔平，但食物質素係唔錯嘅。講番店名，原來老闆老家來自吉隆坡華人聚居地之一嘅增江區，馬拉話叫Jinjang，同普通話「緊張」個音差唔多，而咖喱麵正係當地嘅特色美食。…查看更多