BSB的個人專頁

親親大自然 - 吃喝第二波，經已由榕樹灣行到去罟古灣啦﹗經過一大段艱辛的行山路段，自不然要食番餐好食的，更何況原來罟古灣只有海鮮飯店﹗唔知係因為平日的關係，還是我地去到已經係下午三點多的時候，整條街的飯店都好清靜。而我地事前又無做好準備，於是我地唯有揀一間有多少少食客的飯店開餐。雖則話呢間飯店比較多人，亦只不過是坐了一張八人枱及兩張兩人枱。但亦可能是因為飯店少人的關係，由我地在門口看餐牌直到埋單為止，服務員都十分殷勤咁為我地服務，就連老闆都親自介紹呢﹗:)我地揀咗一個二人套餐，本身套餐應該是跟白灼蝦的，但係朋友對蝦敏感，服務員話可以轉換其他菜式，咁結果我地揀咗糖醋魚柳，另外，套餐本身包括椒鹽鮮魷、粉絲蒸扇貝、蒜茸生菜及野外炒飯。成個套餐，算是好豐富啦，不過只是 $200。椒鹽鮮魷：味道ok不過比較多油，碟底有好多油漏咗出黎。糖醋魚柳：本身魚的味道比較淡，不過魚質都仲係好嫩滑，而且糖醋醬的味道好好，食落好開胃。:)粉絲蒸扇貝：扇貝本身上枱的時候，係未有豉油的，豉油是放係枱上面李錦記果支，相比係平時去酒樓食果種經調配過的豉油，呢度就差了少少啦，但佢的肉質都算爽口，不過不失啦。而且睇落隻扇貝唔算大隻，但有六隻，每人分三隻，都好抵吖。蒜茸生菜：蒜茸味十足，啱晒我呢個超愛蒜茸迷的朋友﹗野外炒飯：炒飯份量十足，不過原來呢個是一個素菜黎既，因為無乜餡料，只有粟米粒、青豆、生菜絲、蛋絲… 至於味道，亦唔算有大驚喜。總括黎講，食物味道一般，服務就好好。而且環境一流，對住個海，感覺好寧靜，食飯的胃口都大咗，唔係邊食到咁多碟，仲碟碟清呢﹗哈哈哈 …查看更多

朋友今年生日，要求來個親親大自然活動慶祝，所以就趁大家假期去南丫島逛個圈啦。可能因為係平日的關係，所以人比較少。我們在榕樹灣落船既原故，所以第一站既吃喝活動是：馳名山水豆腐花﹗係 openrice 見到勁多好評，無理由唔去試下既﹗我地好好彩，去到的時候，剛剛有一大班行山的人食飽離開，所以我地完全唔需要等位。本來是想食碗凍的豆腐花的，但係婆婆話當日的豆腐花真是太凍，唔適合我地食，建議我地食熱的，咁我地唯有轉駄要了兩碗熱的。$8 一碗豆腐花，對於係野外覓食來計，算是平的了，而且份量十足呢﹗公公裝滿一整碗的，絕無欺場﹗吃下第一口，果然夠滑，而且還好有豆味﹗唔似市區某些舖頭般，豆腐花是用粉開出來的。亞婆的豆腐花最犀利之處，不得不提的就是，當日我地一人一碗豆腐花，唔止吸引我地去幫襯，還吸引了兩隻大黃蜂在我地身邊、豆腐花旁飛來飛去。嚇得我地都唔敢慢慢享受﹗雖然要與昆蟲共享美食，假若有日再去南丫島的話，我地亦會一樣舊地重臨，幫襯幫襯的﹗…查看更多

前幾日見到呢間餅店新開張，門外又有位座，咁啱今日放半天假，於是就一個人係到Hea喇。見到有好多款餅同麵包，店員比左件蘋果酥我試，試食裝都幾有份量，外層真係好鬆脆，入面d吉士同蘋果估唔到會咁match，但因為剛剛吃完飯，我只有一個quota，所以只係叫左我至愛的紅豆綠茶蛋白卷同埋杯Latte。紅豆綠茶蛋白卷($29)：蛋糕底很軟滑，仲好香綠茶味，食得出是用靚綠茶粉造的，中間D粒粒紅豆都幾有咬口，而外層D Cream面上灑有綠茶粉，連D Cream都有綠茶味，好味道。Latte ($32)：比想像中好，咖啡味都幾濃，唔會比d奶蓋過，見到佢地用lavazza的咖啡豆，聽就聽過，但今次都係第一次試，都幾好。原來舖內都有張bar枱，坐落唔算舒服，但環境夠晒闊落，坐入面睇住d店員做野都幾得意。…查看更多

跟友人一段時間無相聚，趁今日大家放工都得閒，就相約出尖沙咀食飯傾下偈咁啦。因為友人好鍾意食德國咸豬手既原故，所以就揀咗呢間德國菜餐廳試下。當時大約係下午兩點半，並不多客人，所以唔使等位。在侍應帶領之下，我一入坐，就望到對面有一個超大既坐地酒桶。可惜我地兩個都不太會飲酒，所以唔敢試。但我見在場好多外國人都有叫一杯呢。係 openrice 見到呢度比較出色既係豬手同埋德國腸，當然就要試呢兩樣啦。而當日的 set lunch 得兩款，鱸魚同埋雞扒，唔合心水，所以叫番主餐牌食物。落好 order 之後，侍應會拿一個蕂籃過黎，入面放咗大約八款麵包，我地每人揀咗兩款。可能我地去既時候已經算晏，所以覺得麵包唔暖，塗牛油上去都唔覺融，而個小法包，仲好硬添。不過麵包唔係我地最在意的焦點，所以都無所謂啦。:(大約由落 order 計，等咗十五至二十分鐘左右啦，我地期待既德國燒豬手同埋波伐利亞式煮牛仔腸終於出場。德國燒豬手：份量好足，一隻豬手，大約已經幫我地分咗六份至七份。豬手就皮脆肉嫩，好好味﹗:) 而伴菜既酸菜，就唔太合我口味，但係友人又好喜歡喎。另外一款配菜就係煮薯仔，係完全無調味過的煮薯仔，一般啦。:(波伐利亞式煮牛仔腸：首先，香腸只分了兩大類，豬肉腸同牛肉腸，咁我地已經 order 咗豬手，腸就揀牛啦。食落口，腸本身既味道唔算突出，係易入口既味道，不過食唔出有牛肉味。反而個醬就似牛肉醬，我地絕對有懷疑過係咪牛肉腸同豬肉腸既分喇，只係在於個醬呢。而個蝴蝶包呢，好硬的﹗:( 用刀切都好有困難，食咗一小塊，唔係話好好味，所以放棄繼續切啦。食完主菜，我地就算有幾飽都要 order 一客甜品先捨得走，友人揀咗件薄荷檸檬芝士餅。薄荷味好清涼，而檸檬醬又唔太酸，整個甜品幾好味﹗:)總括黎講，食物 ok ，環境舒適，如果想同朋友聚舊傾下偈，都會再黎多次，但係會試個 high tea，$98/person +10%。因為今次見其他食客既 high tea set 好似好靚咁，應該會再搵時間過黎食。而今次埋單，扣咗 openrice 既75折 coupon 後，一共 $280.50。 …查看更多

今日難得阿媽放假，又係兩母女去行街街既好時候﹗本來諗住帶阿媽去食 pizza 做下午茶的，點知未行到果間pizza餐廳，就被呢間新開既越式餐廳吸引。間餐廳無論門面還是內部裝修都好靚﹗:)它唔似一般有情調既西餐廳咁暗，相反，它好光潔明亮，一眼望過去白加藍既色調好舒服。企在門口的知客姐姐見我地好似好有興趣入去食咁，就主動介紹下有咩下午茶餐，仲送咗兩張贈券俾我地用。我地當然二話不說就走咗入去啦…因為餐廳未滿座，所以我地就算只係得兩個人，都仍然可以安排到坐卡位，卡位的 size 好寬闊，即使係四個人坐應該都好鬆動。而食物方面，下午茶餐的選擇唔算多，只有一款小食 (都是贈送的越式蝦仁豬肉卷)、一款湯粉、一款凍撈、一款甜品同埋最後就係我地揀咗既越式炒金邊粉。越式炒金邊粉($45)：份量適中，有兩隻蝦同埋一些雜菜料，味道亦適中，唔太咸，最重要係唔多油﹗就算食晒成碟粉之後，個碟都無油係底的﹗:)越式蝦仁豬肉卷(Free)：每人有兩件，卷內的生菜令到食落好爽口，味道清淡，貫徹越菜風味。餐飲 - 咖啡：其實跟餐的飲品選擇只有奶茶或者咖啡，因為我飲奶茶個胃會唔舒服，所以就揀咗咖啡。我並唔係一個飲咖啡的專家，但係覺得佢應該唔係沖咖啡粉既味道，而且奶同糖都係分開上，可以隨個人口味自己加。而糖方面就只有白糖同埋代糖，無咖啡黃糖。整體黎講，環境好好，雖然它係屯門最多人既商場入面，不過由於它開係橫巷內，所以商場外的嘈雜環境都影響不到它，絕對係一個同朋友悠閒傾計既好地方﹗…查看更多

話說當晚要去超市買米掃貨，順便出街食飯。上次幫襯小菜 ok ，今次想試下個火鍋任飲任食，全包價成人$98，長者/小童 $48，限食 2.5小時。我地 7:30pm 入座，第一件事梗係醒目叫湯底先啦，叫咗個皮蛋芫茜湯底。然後再點咗十三、四碟火鍋料，至於飲品就自助式，自己出去雪櫃拿汔水或者自己去斟菊花蜜/洛神花茶/綠茶。我地去到放飲品的地方，見 d 花蜜/花茶無晒，唯有拿住汔水飲先啦，諗住一陣佢會添新的時候先去斟。返到埋位，等到 7:45pm 都未有湯底到，我地開始搵侍應問，跟住又話 check 單要等下，結果等到 8:00pm 先返黎同我地講，漏咗單喎，你地要咩湯底，重新幫我地落過，我地開始有少少火氣喇，要佢將我地入座時間改番，話晒要計時食架嘛，點知佢話入咗電腦無得改﹗離晒譜，入座就識入電腦，湯底就唔識入電腦﹗唔肯改時間﹗由佢，等到 8:15 pm 終於有湯底到，跟住大約有四碟火鍋料到咗，然後我地又等…等…等…終於都再無火鍋料到﹗我地又去追個侍應問 d 食物，佢照例又話要 check 單啦，返黎又照黎話無入電腦喎﹗我叫佢搵番我地手寫張單出黎對，無理由有部份入咗電腦，有部份無既﹗佢居然話咁多單無可能搵番架啦，叫過會快 d ﹗好…我又拿拿臨點番自己想要既，跟手交俾佢﹗等咗一大輪，又未到﹗今次搵個經理問，居然好意思話電腦無資料﹗然後又叫我點過﹗結果要由經理親自拿食物上枱先有得食﹗至於個飲品，從頭到尾都只係得汔水，花茶/花蜜跟本都未試過添加﹗而個侍應，就由我地追完第一次食物之後就失蹤，我地坐係房入面，無人 service，連個鍋無水都係自己加﹗當然埋單都係自己去櫃面俾錢啦﹗係櫃面同個經理投訴，佢又啞咗咁，聲都唔聲﹗間酒樓 d 服務質素差成咁，無可能會繼續幫襯呢間酒樓囉﹗…查看更多

今日第一日落銅鑼灣出 job，我個 senior head 居然帶我出去蛇王喎，下午四點幾走去食個 tea 。Tea Set Menu 唔多，得一款，普通炒蛋多士都要成 $33，所以寧願俾貴少少試個特餐 $39。 雞批浮台： 即係一個雞批，用青豆茸湯浸住。呢個唔合我口味，亦都唔合我阿頭既口味，大家食咗第一啖都望一望對方。個青豆茸湯 d 味好怪，飲落係有 d 一粒粒既感覺，但係唔係青豆粒，似開薯蓉粉咁既粒粒，味道我地又唔覺得似青豆味。好在個雞批都好味，可以補番。雞批個外層鬆脆，饀料十足。 香蕉班戟：呢個我覺得幾好食，阿頭就話太甜喎。當中包括兩件普通 pancake ，再加 d 用香蕉煮既糖漿，加幾片香蕉片，仲有少少合桃，蕉味十足。其實本來無叫蛋撻既，話說係我阿頭一坐落就叫咗個特餐，而我就未決定到，所以佢落單先，跟住到我都決定要一個特餐時，個侍應原來聽錯咗我要一個「蛋撻」，結果蛋撻送到先發現。阿頭話一個小小蛋撻照要啦，咁就順便試埋個蛋撻喇。而個蛋撻呢，我覺得 $5 唔抵，因為個蛋撻係放涼晒既，而且又無蛋味，只係隨便係街見到一 d 細細既麵飽舖，用 $2.5 都買到果種。雖然食物一般，不過環境夠特別，跟足以前懷舊茶餐廳 feel ，仲用埋以前既方糖，好得意。食一、兩次就無妨，不過食茶餐廳既下午茶黎計，價錢好似貴咗 d ，或者下次試食飯啦。…查看更多

話說今日繼續在銅鑼灣出 job，三個同事做完嘢話想一齊食埋飯先走，見到呢間舖門口好多花籃，新開張，就走入去試下喇。 鴛鴦雲吞水餃 ($32)： 雲吞同水餃各 3 隻，只夠每人各分 1 粒，都幾貴。不過食落雲吞同水餃既料都好多，大大隻蝦。味道幾好，d 蝦肉都好爽口，而水餃入面就有木耳絲同埋筍絲，仲好大隻咁。:) 咖喱蝦球飯 ($45)： 相比起淨雲吞水餃，我覺得呢個飯抵好多﹗ 不過最重要係，我覺得個咖喱超好食﹗:) 平時我唔鍾意食飯，今日都食咗兩碗呀﹗咖喱算小至中辣，有椰奶味，至於料呢，蝦球略嫌細隻，不過勝在夠多，大約都有十隻既，係連尾殼既蝦，最好味既料一定係薯仔﹗:) 薯仔好似用焗薯果 d 咁，食落粉粉地，好好味，我強行搶咗兩舊食﹗呵呵呵… 瑤柱白粥 ($15)： 碗粥好綿，係好廣東式既粥， 瑤柱都算多啦。 麻辣海蜇 ($40)： 海蜇都夠粗夠彈牙，不過無咩味，係食到芝麻同埋有少少辣咁，所以我地決定自己加佢個秘製醬油，好在個醬油唔係豉油咁咸味 jei。 紅豆冰 ($18)： 杯紅豆冰，幾好味，紅豆多過奶，好似抵 d 。嘻嘻… 而 d 紅豆唔似大家樂 果 d 咁硬既，又唔會煮到淋晒，食唔出係豆咁。同埋佢跟支粗飲管俾我地，唔使怕 d 紅豆塞住係支飲管度，成日啜唔到。總括黎講，食物好好味，係張枱細咗少少，我地三個人都放滿咗一張枱既食物。至於餐廳環境就比較暗，好似去咗食西餐廳咁，但係裝修得都幾靚。下次再去開銅鑼灣，都會再去食其他，個店員推介我地食燉奶，不過我地食得都幾飽，無再叫，或者下次可以試下既。結果埋單盛惠 $168 ，免加一。…查看更多

阿媽話未食過 Burger King ，適逢今晚得我地兩母女食飯，就去一趟屯門市中心啦。今期加推燒烤豬柳堡餐都送雪糕新地，上次食過小華堡唔啱我口味，所以今次試豬柳堡餐，阿媽又跟我要一模一樣。晚上八點十五分，店內就坐滿人，店外的位都仲有既，揀好位，我就去排隊買野食。大約排咗五至六個人啦，都唔使等好耐，三四分鐘左右就到我啦，不過點咗食物俾咗錢，等拿食物就比較耐喇，而且無論負責落單或者執餐的職員都好似好新手咁，兩個餐，俾得一支飲管，茄汁唔記得俾，雪糕匙又唔記得俾…到我拿餐返埋位既時候，忽然間店內又空出咗好多位喇喎，所以我地又搬番入去坐四人座。 雪糕新地：本來想試下個杏桃味既，但係店員話剩番朱古力同埋雲呢拿味，咁我上次試過朱古力唔啱我口味，所以今次要雲呢拿算啦，果然好味得多﹗:) 阿媽今次試過朱古力味之後，都話鐘意食麥記既朱古力味多 d ，同埋佢覺得偏甜咗。 豬柳堡： 其實我地一邊食雪糕一邊都覺得餐廳的冷氣好凍，可能係呢個原因，所以到我地食包既時候，個包已經係凍咗既，薯條亦係一邊食一邊覺得佢凍咗。雖然唔係熱辣辣咁食，我都覺得呢個包好好味﹗:) 本身個包好軟，然後入面有兩款醬，沙律醬係塗在生菜上面，然後中間夾咗一層唔知係咪薯圈既嘢，仲要係脆口的，到件豬柳既下面又塗咗燒烤醬，豬柳本身亦唔靭唔鞋。雖然好似夾咗好多嘢咁，但係食落又覺得夾味架喎﹗ 汽水： 今次我都繼續揀忌廉，味道終於正常返，上次淡咗 d 。可能今次部汽水機較過啦。總結黎講，憑呢個豬柳堡，我知我會繼續幫襯落去既﹗…查看更多

又一個炎熱晚上，一家四口決定出去解決晚餐問題。上星期去過大戶人家，今次去虹橋酒樓。本來阿爸話想食火鍋，不過知客話九點後每位平十五蚊，我地四個人，一共可以平六十，抵好多，問我地等唔等，我地當時去到係八點四十五分，但係阿爸話唔等，改食宵夜小菜。宵夜小菜每碟廿蚊，我地以為個價錢平咗，自然個份量相對會少d啦，所以就叫咗六碟。 木桶雞半隻($30)：係蒸雞黎既，煮耐咗，好靭同埋無味﹗:( 門膳煲($30)： 成煲有五至六片門膳既，其他全部係紅、青椒同埋洋葱，味道都唔錯。 海哲拼薰腣($20)： 比想像中大碟，幾抵食﹗:) 荔芋扣肉煲($20)： 一共有五份荔芋扣肉，墊底的全部是生菜，味道夠，芋頭唔算硬，以廿蚊既價錢，算好好啦﹗ 帶子小炒皇($20)： 一開始見廿蚊，都諗會俾到 d 咩帶子我地食呢？原來係俾小貝柱我地，都有好多粒既，應該超過十粒。西芹夠爽口，芝麻腰果就一般啦，煮淋咗既。 潮州脆豆腐($20)： 呢味麻麻地，豆腐唔脆，好似放耐咗咁，而且係無味既，我點菜既時候以為係椒鹽味，可能我自己少食潮州野唔知啦。最後埋單一共 209 蚊，包括茶位($8/位)，一碗白飯($8)，三支藍冰啤酒($10)同埋加一服務費。…查看更多

時間大約晚上八點半，周圍餐廳都好多人等位，見到呢間美心無咩人，唔使等位，就隨便走入去食個晚餐啦。餐牌上基本上有三大類食物，迷仔冬瓜盅系列、重量級鐵板餐系列、燒味飯類。我見到鐵板餐跟的餐飲係台式特飲，所以就叫咗一個鐵板餐，雖然話係重量級，但係又唔覺真係好大的份量喎，男仔可能都未必夠飽添喎。鐵板餐包括： 雞扒一件：都真係皮脆肉嫩既，而且個餐跟晒兩款醬- 洋葱/黑椒，不錯﹗:) 腸仔一條： 啖啖肉，腸皮唔算脆，不過都唔 un。 薯條一杯： 寬身薯條，夠薯仔味﹗:) 西蘭花兩條，番茄仔兩粒：略嫌生咗 d ，比較硬，而且整體黎講蔬菜的比例少咗 d 咁。 甜品一客： 無講明係咩甜品，不過我覺得係芝士布甸，都唔錯，唔會好甜。 餐飲一杯： 荔枝椰果綠茶，呢杯特飲反而甜咗 d，其實當晚只剩荔枝味同熱情果味兩款選擇，飲品的份量就相當足夠喇﹗現場所見，大部份的人都係選擇食迷仔冬瓜盅系列，可能下次要試下先得。…查看更多

天氣熱，懶得在屋企開火煮食，打算出街食一餐舒舒服服的。有一段時間無幫襯呢間酒家，見到話 8:45pm 後有宵夜優惠小菜，就入去試下啦。 馬拉盞炒通菜： 通菜本身無味，一定要連汁食，好似炒菜同煮汁是分開黎做咁。 菠蘿生炒骨： d 生炒骨，骨又大，粉又厚，味道又一般，唉… 椒鹽九肚魚： 呢味就係全晚最好味的，九肚魚仲好嫩滑，粉亦唔算厚。:) 鮮菌扒健康豆腐： 呢味素菜，味道普通啦，不過豆腐唔係我地平時食開的黃豆豆腐，而是玉子豆腐，每件玉子豆腐都加咗葱一齊煮的。 芝士金菇雞片：嘩…呢碟呢，未開始夾已經見到出晒水/油，唔使講，當然食剩最多係呢碟啦﹗可能我地夜去啦，成間酒家都係得大約十枱客左右，我地幫襯咁少錢都送生菓同糖水。碟西瓜就幾好食，都幾鮮甜。不過碗糖水真係好「糖」水…甜到不得了，亦唔見起沙。我相信暫時都唔會再幫襯呢間酒家住啦，食物味道麻麻，可能去另一間酒家或者茶餐廳既機會高d。…查看更多

週日又到屯門市中心閒逛，行到有少少口渴，呢排屯門開咗好多間台式飲品店，今次輪到試呢間，呢間可以話係較早開張的一間，不過之前一直都好多人幫襯，經常排長龍，一路都無試過，今日見到人少少，就揀佢啦。排隊落 order 只係等咗一個人就到我喇，點咗兩杯珍珠"烤"奶茶，個店員話有大珍珠同細珍珠，咁就每樣一杯啦。其實大珍珠同細珍珠的份量都係一樣既，都係佢一湯勺份量。奶茶呢…可能我地點的是烤奶茶，所以好似有 少少「燶」味，同埋好似甜咗 d。我地後來拿咗張傳單，見到都可以選擇甜度，可惜個店員無提醒我。:( 上次去幫襯貢茶，個店員就問得比較詳細，又會問甜度，又會問要唔要冰咁。總括黎講，十蚊一杯珍珠奶茶係中價選擇，唔算貴，不過附近咁多間類似的店舖，我相信再選擇呢間店的機會比較細，同等價錢，我都係會選擇幫襯貢茶。…查看更多

今日一早收到朋友 call 問得唔得閒放工後一齊行屯門市中心。嘩﹗難得有朋友肯係屯門出沒，幾唔得閒都應承啦。問題又係 shopping 前唔好食貴嘢…哈哈哈。 所以記得廣告提過 Burger King 出咗 $25.5 全民價小華堡餐，仲有雪糕新地送，好啱我地去食。時間係下午兩點半左右，而且可能我地得兩個人既關係，比較易搵位，唔使等位，佢地收錢的 counter 又多，好似有四至五個都開齊，所以連叫嘢食都唔使等。:)大家一人一個小華堡餐：- 薯條熱辣辣唔錯﹗:) 不過都係同 M 記一樣的幼身薯條。 汽水揀咗忌廉，好似甜咗少少。 小華堡：朋友話好似 M 記既至尊漢堡，佢覺得幾好食，不過我就唔鍾意食洋葱的，個飽好多洋葱，仲要係好大味果種，所以我唔多鍾意。食完個飽絕對要食番兩粒香口膠補飛。 雪糕新地有四種口味揀：雲呢拿、朱古力、士多啤梨同埋杏桃 - 我揀咗朱古力味，朋友揀杏桃味。雪糕既味道有少少似富豪雪糕，朱古力糖漿同 M 記唔同，個人偏好食 M 記，而朋友就話佢個杏桃味都幾好食。至於餐廳環境，始終都係快餐店，係迫夾 d 既，反正大家快來快去，可以接受吖。總括來講，呢餐都算唔錯的，$25.5 抵食份量又夠，我地兩個都食得好飽﹗不過下次我唔會貪有雪糕抵食 d ，我會揀其他飽的餐試，好似仲有兩款餐都係 做 $25.5 優惠價無雪糕送。…查看更多

友人忽然來電，話好耐無出黎食嘢傾計，咁就決定大家放工後一齊去又一城搵間餐廳慢慢嘆啦。友人又話上網見呢間餐廳好評多，所以見門口排緊十幾廿人都照排。結果等咗差唔多半個鐘，終於有位啦。話說排隊的時候，個 receiption 姐姐已經每人派定一張 brunch menu 俾大家揀定食咩餐。所以我地一坐低唔使再慢慢諗就可以落 order。當日的 set menu 湯係雜菜湯，沙律係磨菇沙律， special iced tea 就係 raspberry iced tea。我地兩個都揀要湯，味道夠濃，仲有多少辣添，幾開胃。至於個長法包呢…係冷既，亦即係話我塗咗牛油落去，佢都唔會溶囉。不過佢既外層都脆，入面既包質亦算軟。如果可以焗番熱少少先拿出黎，我相信會更好。餐飲係跟湯一齊上的，杯 raspberry iced tea，味道偏淡，唔講就飲唔出係咩味既。應該係買 d 濃縮果汁開水調出黎既。友人的鱸魚糙米飯先到，偷咗一匙食，魚係無味的，而且得咁細塊，不過肉質嫩滑。飯的汁就好好味，本來我唔揀飯的原因就係因為佢全部飯餐都係跟糙米飯，我怕全部都係乾淨淨唔好食。結果個汁反而幾好味。:)跟住到我個番茄大蝦天使麵，得一隻大蝦，跟三隻小蝦。又係得咁少餸，不過無論大蝦同細蝦都好爽口，應該係新鮮的關係卦。而個番茄汁又酸酸地，好開胃，而且夠晒汁﹗:)食物就幾好，不過服務呢，就好似有 d 趕客既感覺啦。可能都係人多啦，我地一路食，一路都 keep 住有十幾廿人係門口等位。至於點解有趕客 feel 呢…就例如，湯到，跟住下一個侍應即時送上餐飲。我地湯都未飲完，碟主菜又跟住上到啦，簡直可以媲美快餐店。友人的飯食咗一半，想係手袋拿張紙巾，侍應即時行過來問係咪唔要啦，使唔使咁急呀。然後我地將杯 tea 飲完，佢又即時過黎收杯，問我地仲有咩需要。話晒都俾 $110 食餐晏，都係想係一個環境 ok，可以坐耐少少的地方，傾下偈咁架嘛。…查看更多