paul109713的个人专页

終於食到佢哋嘅限定蠔拉麵，湯底有濃厚鮮蠔味，唔會過份咸，坊間好多蠔湯底都比較偏咸，麵條正常水準，兩隻蠔肥大肉厚蠔味十足，價錢＄158應該都算係合理，當然亦唔算平，喺肺炎疫情後好多食材都一直加價，所以好多小店嘅利潤已經係好微好微。喺度想贊一下當日和拉麵位女店員，我入到店坐底後，女店員好有禮貌同耐性咁介紹佢哋嘅餐牌上嘅食物，首先係介紹幾款拉麵嘅湯底大概係用咩食材去煲，跟住再介紹餐牌上面嘅套餐有啲咩選擇同收費，仲有牆上面寫住嘅特色小食，聽得出店員唔係hea住介紹，我都明白如果繁忙時間佢亦未必會講得咁詳盡，但今時今日仲肯咁有心介紹嘅店員我眼見真係唔多，繁忙時間無介紹唔奇，喺唔忙嘅時間好多店員就更加hea住做懶懶行，一間餐廳除左食物水準重要外，服務都好緊要，大家再唔努力做好啲好快就會比啲外勞搶埋飯碗。支持香港用心小店…查看更多

一間感覺越做越好嘅cafe，位於灣仔謝斐道鵝頸橋附近嘅Wooo，呢間cafe由新開張一直都有嚟食，感覺佢哋食物出品越做越好，食得出大廚有用心去做同變，初初開嘅時候食物質素算係一般正常水準，但近期再去見佢哋間中都會有新出品，意粉，麵包蛋糕各樣都有，好似新出嘅龍蝦汁海鮮意粉，龍蝦汁味道濃郁，配上鬆脆嘅蝦同其他海鮮係做得唔錯，而蛋糕我個人幾鐘意食佢哋嘅自家製巴斯克焦香芝士蛋糕，蛋糕口感creamy，芝士味濃又唔會太甜，作為飯後甜品相當唔錯，其實佢哋其他出品都幾有水準，好似比利時朱古力香蕉pancake，有個唔係好記得叫咩黑啤牛肋條有兩塊窩夫跟嘅，塊窩夫做得好香好鬆化，仲有班戟漢堡又係值得介紹。講完食物亦要讚下佢哋樓面同事，佢哋每位同事都好有禮貌好好笑容，比到客人一份放鬆同舒服感覺。另外cafe亦可以帶小動物入內，雖然自己無養，但有時見到其他客人帶啲狗仔嚟玩又令到cafe多一份活力。…查看更多

嚟頭啖湯未食過椰子雞煲唔好話嚟過頭啖湯真材實料無味精椰子雞煲，唔似坊間一般火鍋店加椰青水死甜，雞煲上枱後店員話滾起可以先飲湯(就係正所謂頭啖湯)，湯頭入口椰子味特出加上雞嘅鮮甜，呢碗頭啖湯真係不得了，雞肉亦好嫩滑鮮味，當晚點左幾樣海鮮每款都好新鮮，因為我係預早電話訂位，當日下午店家會whatsapp話你知當日海鮮價格，啱就可以先落單然後店家去街市相熟海鮮檔買，所以海鮮一定新鮮，當晚隻龍蝦由店員幫忙煮，煮嘅時間把握得相當好，蝦肉爽脆彈牙味道鮮甜，另花甲王同鱔片亦係相當好。小店位置喺天后同炮台山中間，位置雖然麻麻，但絕對值得支持，食物質素同價錢十分合理，要食好嘢不妨行多兩步，當下香港小店要靠大家一齊去支持。…查看更多

拉麵店原身係由一間cafe轉型，喜歡煮食嘅店主jimmy不斷研製湯頭，亦經常有搵客人試湯比意見，佢哋嘅醬油湯同蕃茄湯係我至愛，醬油香醇唔會死咸，麵條店家選用蕎麥麵條，入口爽滑，而叉燒亦做得唔錯肥瘦適中，出餐前會輕輕燒一燒令叉燒更香，另鴨肉亦做得好好味，肉質滑嫩多汁，另外蕃茄湯亦係我最愛，真材實料用大量蕃茄煲，蕃茄味鮮甜湯頭濃密帶少少杰身，蕃茄湯我喜加配廣島蠔，佢哋用嘅廣島蠔隻隻都肥嘟嘟脹卜卜，入口有爆膏感覺。…查看更多

bookmark左好耐終於有機會嚟試，蒙麵，招牌蕃茄湯底，係童年回憶嘅味道，落足蕃茄薯仔去煲，味道鮮甜蕃茄味濃郁，薯仔煲得好夠淋但又唔會溶晒，食車仔麵從來唔會飲晒啲湯，但呢碗蕃茄湯車仔麵例外，係可以完全清碗，老闆好細心，客人點辣味魷魚會分碗上，咁就唔會比啲辣味影響左個蕃茄湯味道，魷魚爽脆辣汁惹味，其他餸味道亦做得唔錯，可惜今日因產地質素問題試唔到佢哋另一招牌菜新鮮花甲，下次嚟要試埋佢哋嘅蜜汁叉燒串。…查看更多

港島人每次嚟屯門紅橋必到嘅甜品店每次到對面小店食完拉麵就想食番個飯後甜品，甜甜地就啱晒我，因為路程比較遠，所以都係放假先去，而為左食佢哋嘅甜品我要選擇放假盡量唔係星期一星期二，因為對面食拉麵小店逢星期一例休，而甜甜地就逢星期二例休。炎熱天氣最好就係食個清甜冰凍嘅甜品，個人推介食品👍芒果牛奶布甸椰王凍，楊枝甘露椰王凍，芒果盛宴，佢哋選用嘅芒果好鮮甜一啲都唔酸，配埋清爽嘅椰王味道相當夾。一間值得支持嘅甜品小店。…查看更多

無book位，過左lunch繁忙時間兩點上去唔駛排直入有位，個人一向對刀削麵麻麻，但見佢餐牌有個刀削麵配冬陰功又好似幾吸引，lunch set椰奶冬陰虎蝦刀削麵，味道做得唔錯，酸辣味適中，麵條爽滑掛汁，餐湯蕃茄湯都好好飲，另外點左杯latte，口感幼滑香濃，而樓面同事都好有禮貌服務好好，因為遲左訂醉盆菜，𠵱家要等佢哋開番Google form先有得再訂，但應該要等到6月，因為店員話之前訂單實在太多要清左啲單先。…查看更多

一間位於屯門紅橋良心小店慢煮封門柳，肉味濃郁，肉質唔會韌，老闆兼大廚jimmy用慢煮方法保持封門柳肉質軟腍，再用大火煎香表面，做成外脆內軟，配上自家烹調燒肉汁十分好味，餐前雞翼係老板送，當日餐係湯南瓜甘荀湯，鮮甜度十足，口感幼滑creamy。小店由兩夫妻打理，先生負責廚房部分，太太就負責招呼客人，兩位都好好客，好喜歡同客人傾計交流，就算一個人嚟享受美食都唔會悶，雖然小店地點對港島人嘅我比較遠，但絕對值得再嚟支持。小店逢星期二定休…查看更多

自從屯馬線開通後令好多人真的好興奮亦令九龍城一帶cafe紅起上嚟，一間book mark已久嘅九龍城cafe南角，開業初期實在太多人去打卡所以一直未去，cafe前身係一間叫「怡順榮」五金店，後來由兩位喺九龍城長大嘅店主租下店舖再改裝而成今日嘅cafe，店內裝修亦盡量保持當日五金店歷史痕跡，店名南角亦係因小店位於南角道而命名。最近有日朝早到九龍城買牛肉就順道去望一望，可能係平日加午飯前店內唔多人，因為唔肚餓所以只點左一杯熱朱古力Hot Chocolate，朱古力味濃厚唔會太甜，但當日吸引我嘅唔係飲品唔係店內裝修，而係店員嘅服務態度，好親切感覺好舒服，完全感受到店員份貼心係出於自然，當下飲食業就係需要呢份熱誠。…查看更多

💛招牌牛柳牛丸河💛油麻地人氣越南牛肉河，湯底唔算好濃，但肉味好出，配埋跟湯九層塔同葱真係好好飲，佢哋仲有跟幾片油炸鬼，可以浸湯食，又係好好食，喜歡可以加少少青檸汁同辣椒一齊飲仲惹味，河粉比坊間一般好食好多，越南直接返貨，爽滑有咬口唔會浸耐左就淋晒，牛肉選用較好嘅牛柳部分，經師傅處理後完全無根位，肉質嫩滑有咬口，肉味濃郁，自家制牛丸，爽口彈牙有肉味，溫馨提示：小店每日大約4點半左右落場，夜晚6點3開門。…查看更多

一份開心又滿足晚餐第一次喺重慶大厦入面餐廳食飯，係驚喜，食物水準同服務都相當好，老板娘Selina熱誠招呼，會為第一次嚟餐廳嘅客人介紹食物，小店喺重慶大厦一樓，上樓梯轉過彎好容易就搵到，餐廳打對面分間舖，每邊10個位左右，坐位算闊落坐得舒服，食物方面，訂枱時已預訂左非洲雞煲同地中海海鮮濃湯，海鮮湯必需預訂，因為係老板娘每日去街市買新鮮海鮮煮，今日海鮮湯材料有巨型北寄貝，花甲，螺，蝦，青口同魷魚，北寄貝肥厚脹卜卜，肉質爽嫩，蝦肉新鮮爽口有蝦味，其他材料都好新鮮好味，今晚主角非洲雞煲，我哋揀左中辣，但中辣其實都唔係好辣，如果好鐘意食辣嘅可以試大辣，雞煲醬料係喺非洲選用多種香料煮成再直送到香港後再加入Selina自家調制配方製作而成，醬汁香辣惹味越食越想食，老板娘仲介紹我哋點一份蒜香薄餅點汁醬一齊食，雞煲雞肉好嫩滑鬆軟，汁醬夠入味，薄餅煎得好香，口感軟熟帶少少煙韌，配合蒜香葱香同醬汁真係好好食，最後，我哋食完一份薄餅後再追加一份點汁醬食，另外豆腐沙律亦唔錯，自家制沙律汁，豆腐底有椰菜，芒果同石榴肉，撈埋食又幾好食。小店會不定時搞各區團購，大家可以留意佢哋ig或fb支持一下，當下香港小店，一定要靠大家撐住。…查看更多

上環歌賦街早幾日又一間座銀集團旗下拉麵店@nextshikaku.hk 試業，主打牡蠣拉麵，拉麵分白湯或同清湯兩款選擇，另外仲有牡蠣沾麵。作為拉麵同蠔愛好者加上座銀品牌有保證，今日夜晚六點半到店，店舖裝修跟品牌其他拉麵店一樣用開放式廚房同Bar枱設計，座位空間算闊落坐得舒服，今晚我點牡蠣白湯(蠔，豚，雞)，座銀本身嘅豚雞湯喺香港已經差不多可以講話無得輸，將湯頭再加入蠔肉打成牡蠣白湯，但今朝我試蠔味又唔算好特出，比預期有落差，豚骨嘅濃厚同雞嘅鮮甜就好鮮明，不過聽店員講個湯仲係調較階段，每碗拉麵都有一隻蠔，今日蠔嘅產地係岩手縣，蠔肉唔算好大隻，但都飽滿有蠔味，來貨產地會因應日本當地供應而有所不同，麵條係太麵，麵質爽滑有咬口，吸湯效果不錯，而呢碗拉麵售價係＄154加一服務費＄174，合唔合理就見仁見智。…查看更多

鯛魚春爛漫拉麵限定27,28,29/4三天晚市，每晚五碗發覺自己真係好鐘意排隊食嘢，今日兩點鐘由將軍澳出發，差不多四點到屯門，首先搵左間拉麵店喺邊，搵到後因為時間尚早(拉麵店每日三點至六點落場)，啱啱喺拉麵店對面有一間良心taste cafe 見佢餐牌食物都唔錯就入去食少少嘢等排隊，小店老闆兼大廚好友善好好傾，食物出品亦唔錯，係一間值得支持良心小店。喺cafe坐到五點就埋單行番過對面拉麵店排隊，今次仲唔排第一，排左一陣已經有人跟住排，未到五點半已經超過五個人，好在預早嚟排隊，到六點拉麵店準時開店，因為小店坐位有限，限聚令下令小店最多只可以坐四位客人，頭一轉四位客人包括我自己都係叫限定鯛魚拉麵。拉麵嚟到賣相正常，湯嘅顏色幾吸引，佢哋本身個豚骨湯做得幾厚身，今次呢個限定拉麵湯係加埋鯛魚落去煲，效果相當好，湯頭鮮甜濃厚，魚味特出，入口creamy，配埋紫洋蔥入口更覺清甜，配料鯛魚肉鮮甜，肉質滑嫩，叉燒肉正常水準，可惜限定拉麵無我最喜歡嘅玉子。香港經營小店艱難，能夠做到有水準嘅小店更加艱難，疫情下食物來貨價不斷增加，各種因素影響下，大家能夠食得幾多得幾多，用心小店應該多多支持。…查看更多

紅磡人氣海南雞早幾日正式進駐港島上環，作為香港人要食靚雞終於唔駛一早走過九龍排隊，上環店堂食11:30開始，外賣大約11:45開始。當日11:15到店，門口分兩條隊排，一條堂食一條外賣，可能時間尚早，排堂食唔太多人大約十幾人，排外賣約二三十人左右，到11:30開門第一轉已經可以入店，本來想堂食試下佢哋個幾有名氣嘅喇沙，不過當日天氣有少少熱所以都係食番海南雞飯，海南雞同紅磡店水準一樣，做得夠滑夠嫩，而且雞嘅份量亦唔少，油飯做得頗為出色，飯粒分明夠香唔會有肥膩感，加埋飯面少少炸蒜幾惹味，跟海南雞飯送嘅椰子雞湯，好好飲好清甜，六十幾蚊有咁樣水準同份量喺同區算係相當合理，下次先再嚟試喇沙。…查看更多

上星期難得有簽證入元朗國，當然要四圍支持一下小店，呢間 @ramen_komachi 位置比較偏僻，喺一條小村入面，小店附近全部係小村屋圍住幾有日本feel，絕對值得遠道而來一試。小店湯頭主打豚骨魚介，我揀左醬油拉麵，小町湯頭屬濃湯底，豚骨魚介兩個味好出好厚，入口好有質感，醬油味濃郁，喜歡濃湯應該會啱口味，麵條係我喜歡嘅曲身麵，爽口彈牙帶小麥香味，掛湯力高，叉燒用左豬腩位置，油脂甘香唔會有肥膩感，不過玉子比較失色熟左少少，味道就ok嘅，小店除左拉麵仲有其他小食可選擇，下次大家到元朗國不妨嚟支持一下小店。…查看更多