大食小姐的個人專頁

淺水灣露台餐廳歷史悠久，建築風格優雅古典，置身其中享受英式下午茶，可以感受昔日舊香港情懷。今日行到攰，即興來個貴族下午茶，沒有預先訂枱，但好好彩有一張吉枱，所以注定我哋食到這個下午茶。香港人真係捨得週末消費，餐廳坐無虛席，為免白行一趟，最好預早一兩星期訂枱。傳統英式下午茶會有很舒服的椅子和低矮的桌子。三層英式下午茶架配搭田園風格茶具，盡顯維多利亞時期的氣派。頂層是鹹點，每件都做得好精美，食材配搭新穎。我最鍾意橙色果件蟹肉沙律番茄麵包卷，食到條條蟹肉絲，清新又鮮味。中層是鹹甜交會，黑松露炒蛋撻味道芳香。Maccarone有朱古力味及香橙味，餅皮酥脆，甜度有至。低層是甜品，焦糖朱古力脆脆加入了爆炸糖，在口內不停跳動，非常有趣。雜莓奶凍外型超靚，相當幼滑。宇治抹茶皮榛子餡泡芙，酥脆甘香。最後食自家製英式鬆餅，富有香濃牛油味，鬆餅外脆內軟，可加上幼滑忌廉及鮮香果醬。…查看更多

淺水灣The Pulse商場臨海而建，地下開設一列西餐廳，環境清幽，打造外國渡假風。Classified採用半開放式設計，從無遮無擋嘅門口可以望到沙灘，令人心曠神怡，放慢生活節奏，享受寧靜一刻。餐廳門口嘅鞦韆座位，長期有客人等位，因為有得食有得打卡影相，實在好滿足！炸雞胸肉、煙肉芝士三文冶配薯條 $128饀料豐富，份量足夠，雞肉及煙肉無肉汁之餘仲好乾好柴，唯一可取是即炸香脆可口嘅薯條。Classified breakfast $118煙肉同樣好乾好實，最好的是冬菇及juicy炒蛋。咖啡☕️一杯是Cappuccino，一杯是Latte，Regular size份量剛好，醇香奶滑，非常滿意。…查看更多

MG Cafe位於觀塘海濱長廊對面，裝潢華麗，走歐陸懷舊路線，樓底高所以份外有氣派。地方寛敞舒適，乾淨雅潔，又有風景睇。1) Egg Benedict $1182) Breakfast Fantasy $1383) Latte $384) Dirty $42上菜好快，擺盤好靚，有花心思，讓人賞心悅目。Breakfast Fantasy配料豐富，有黑松露炒蛋、bacon、香腸、烤菠蘿、烤冬菇、parma ham、多士、茄汁豆、沙律菜🥗。最驚喜係有蕃石榴子同烤菠蘿，好有新鮮感。Egg Benedict配料有水煮嫩蛋、Parma ham、蘆筍、多士、沙律菜🥗。兩款早餐食材都係新鮮貴價。咖啡味道平衡，入口順滑，能喝得出咖啡豆的甘濃。…查看更多

兩口子食生日飯想搵間特別啲嘅中菜館，呢間人氣館子地方雖小，但裝修優雅簡潔有氣派。我哋預早訂咗兩隻5両大閘蟹，蟹肉結實鮮甜，蟹膏濃郁 Creamy😋，跟埋杯薑茶，有助溫熱驅寒。話梅凍豬手，豬手皮彈牙、筋軟滑、肉嫩口，濃郁話梅甜酸味，開胃小食。話梅花彫鮑魚上枱時充滿仙氣，因為盛盤下放了乾冰，店員灌入清水之後，鮑魚就好似置自雲霧中，客人未食先興奮🤪。石鍋馬拉盞炒芥蘭，芥蘭香甜鮮嫩，但略嫌炒得太淋，沒有了口感！茶香燻雞半隻，份量算大，雞皮脆薄，但肉質略嫌唔夠滑，可以話係鞋，茶味亦唔濃。招牌菜之一冰鎮咕嚕肉，大大碟冰埋藏著炸過嘅咕嚕肉，以冷熱交融效果令外皮更酥脆。但可惜炸皮太厚，面層糖漿太甜，食了兩件巳經感覺很膩。豬肉無肉味，肥瘦不勻稱，有點失望😞！半打壽包亦需要預訂，特色在於放棄傳統蓮蓉作餡料而改用紫薯蓉。紫薯蓉香滑唔太甜，健康有益。…查看更多

入樂園玩到肚餓玩到攰，大街餐廳係我哋嘅心水食店😋。餐廳有落地玻璃，可以見到美國小鎮大街熙來攘往嘅情景，非常熱鬧。加上，這間餐廳有訂位服務，我哋可以先玩住機動遊戲或行街，店員會透過SMS通知我哋幾點有位👍👍。點咗兩份套餐：1）烤春雞及豬肋骨$208，雞肉嫩滑多汁，豬肋骨肉質香軟，配埋燒汁好惹味。2）小鎮特式三文治配薯條$178，Bagel三文治包唔夠鬆軟，新鮮餡料就有雞肉、生菜、番茄、芝士、火腿。😆奇妙處處通會員買兩份餐仲送一份兒童餐😆仲有兩份前菜，炸洋蔥圈、炸蝦、釀雞翼，全部都香脆可口。兩杯特色飲品(各加$28）就與圖片差別好大，味道亦唔見有特色，有點Hea。樂園內餐廳選擇不多，這間食品質量算是可以接受吧！…查看更多

今日入去迪士尼暢玩之前，我哋選擇去酒店餐廳食個午餐先。.點咗兩個主食：鮮蘆筍番茄醬炒長通粉芝士脆片（$178），大蝦帶子龍蝦汁意粉配水欖芝士脆片（$218）。食物賣相真係可以增加食慾，兩個主菜端上來嘅時候都已經令人垂涎欲滴。.意粉配上大大隻鮮蝦同帶子已經好有誠意，食落仲要鮮甜美味，彈牙爽口。意粉軟硬度適中，加上濃郁鮮香嘅龍蝦汁，簡直係齒頰留香。長通粉雖然只係好單調咁配上鮮蘆筍，但係番茄醬同樣濃郁惹味，長通粉就略為硬咗少少。飲品叫咗兩杯榛子咖啡（各$60），香醇咖啡同甜香榛子混合一起，口感綿滑無窮，一試傾心。食完一頓超滿意嘅午餐，再入去樂園玩就更開心。…查看更多

今日做嘢做到三點先有時間食飯，飯氣已經過哂啦！咁就去飲杯咖啡食個包，食多件蛋糕開心吓！呢個時間咖啡店嘅顧客唔多，我可以一邊食嘢一邊碌手機，輕鬆吓😍，hea吓😍。太晏飲咖啡我怕今晚瞓唔到覺，所以叫咗杯Decaffeinated Americano（低因美式咖啡）同Bagel。烘熱咗嘅Bagel可以塗牛油或果醬，煙韌有口感，好好味。蛋糕就點咗新口味嘅熱情果撻🍰，味道清香，酸酸甜甜，令胃口都回來了！…查看更多

食完隔離舖嘅雲吞麵，出嚟即刻買返杯解渴飲品。今日想飲得健康啲，所以叫咗杯紅茶豆漿（$23），我仲加$10換個手提杯袋，為環保出分力😝。原來紅茶加豆漿味道係好香滑，有淡淡紅茶味又有黃豆純香味，豆漿黏口有口感，加上冰量同甜度適中（我冇作出特別要求），好合本人口味。.其實豆漿是男女老少咸宜的飲品，味道好、營養豐富，孩子成長要喝豆漿、男女想瘦身要喝豆漿，女性美顏要喝豆漿、中年人防三高要喝豆漿，熟齡人防骨鬆也要喝豆漿。…查看更多

行過見到呢間餐廳嘅早餐Menu，雖然款式唔多，但每款都各有特色。有慢煮雞🤩、炭燒咖啡🤩，只收$38，即刻吸引咗我入去試吓！先試下佢嘅慢煮雞肉，果然肉質鬆軟嫩滑，雞肉燒嘅時候仲灑上黑胡椒粒，絕對唔係一件白烚嘅雞肉。蕃茄湯🍅鮮味但偏酸，不過絕對可以接受，因為太甜太濃就係用茄膏加糖啦！仲有新鮮蕃茄粒同洋蔥粒，感覺似新鮮熬煮。螺絲粉嘅煙韌度剛好，有口感！炭燒咖啡係蒸餾咖啡☕️，送上枱已嗅到陣陣香味，飲落口就微微苦澀，但無酸味，是大眾化口味嘅咖啡。餐廳環境都唔錯，裝修簡約潔淨，坐位舒適。不過點餐程序就與餐廳目標客群路線有點不符。我個人認為好一點嘅消費體驗係客人無需行返去入口落單。…查看更多

每次嚟到大圍都唔知食乜嘢好，唔想食茶餐廳又唔想食雲吞麵，行行吓竟然俾我發現呢間西餐廳。餐廳環境寧靜，裝修簡約，有卡位。嚟到嘅時候已經係下午茶時間，所以客人多數食佢嘅Afternoon Tea Set。而我就叫咗個白菌洋蔥甜圓椒奄列+一杯回魂Cappuccino （$98）。呢份奄列嘅配菜有沙律菜、法包、薯餅、茄汁豆。我略嫌個奄列炒得太熟，蛋身唔夠滑溜。一切開件奄列，白菌同洋蔥就湧晒出嚟，仲有好多汁。老實講，件奄列淡而無味，連蛋味都無。反而配菜嘅薯餅好香脆，沙律菜份量又多又新鮮甜美，咖啡香濃幼滑，微微甘甜。喺環境寧靜嘅餐廳慢慢食個餐，嘆杯咖啡，都係假日一大享受。…查看更多

我同朋友仔一向都鍾意💪支持小店，希望可以食到佢自創嘅特色食品。今日就試吓呢間嘅黑松露雞扒意粉同豚肉漢堡包🍔，lunch set包一客沙律或薯條，仲有飲品，都只係$68/set，無須加一。食物嘅賣相算唔錯，但老實講味道就麻麻哋，好似意粉就太林同埋味道好淡，雞肉好「鞋」，可以話係好無誠意。漢堡包厚度十足，材料有蕃茄、芝士、生菜，蕃茄有成1cm厚，豚肉好滑，但味道都係冇驚喜。漢堡包皮仲要比啲蕃茄汁浸到濕晒，很唔好食。Cappuccino個拉花就夠惹笑啦！根本唔識做拉花，咖啡味道亦唔香唔濃。.唯一值得一讚嘅係呢度嘅員工，服務好有耐性好有禮貌。…查看更多

二人限聚令解封即刻要約2⃣️位知己食個晚飯。今日揀咗食台灣菜，呢度環境優美，座位舒適，我哋可以傾計傾耐啲。呢間餐廳都好智能化㗎，佢哋唔單止用手機點餐，仲有AI送餐車。我哋點咗5⃣️個餸啊！因為呢度啲餸每碟嘅份量都唔係好大。.我不是鴨肉（獅頭鵝）例牌$98，肉質靭咗少少，份量又太少⋯⋯古早味三杯鮮雞$82，味道無驚喜，雞件又細又瘦⋯⋯石鍋三蝦泡台梗飯$82，豬肉碎多過蝦，好重味精⋯⋯花彫藥膳醉雞捲$62反而令人回味，有藥材味，酒嘅苦澀味亦唔太重，恰到好處。胡椒蔥肉包$38嘅味道亦不錯，麵包皮算薄，豬肉唔肥又有肉汁。每人嗌咗杯米水，我呢杯係紅棗杞子桂圓米水，依家時興嘅養生茶，值得一試。整體嚟講，呢間餐廳都係食環境。…查看更多

沙田市中心食肆好難搵位，所以今日去咗石門京瑞廣場睇吓有咩好食。最終揀咗呢間餐廳，因為望入餐廳地方好闊落，整齊又潔淨，很不錯。點咗個下午茶餐煙三文魚凱撒沙律（$48）同玫瑰Latte(另加$20）。凱撒沙律啲蔬菜好新鮮，有四片煙三文魚，係標準嘅味道，下午茶嚟講份量都算可以。呢杯玫瑰Latte真係值得一讚，除咗拉花做得好靚，飲落去有咖啡香又有玫瑰香，份量仲比出邊大好多。咖啡師仲好有心意喺咖啡上面灑上玫瑰花乾，真係唔捨得飲。…查看更多

見到近排有網誌介紹呢間餐廳嘅下午茶☕️，價錢好平呀$268 for Two，網上book位仲有75折。環境相當寛敞、好乾淨，座位之間有合適距離，最好係三五知幾一齊傾吓計👭👫！佢仲有戶外嘅座位，方便吸煙或鍾意同陽光☀️玩遊戲嘅客人。Tea Set層架唔洗10分鐘就送過嚟，當然又係相機📷食先。第一層係甜點，第二及第三層係鹹點，我哋由最低食起。.食物嘅顏色配搭得好靚，但款式及味道就稍為遜色，應該都係外邊買回來，冇一件係廚房新鮮做☹️😞。算啦‼️貪佢平平地環境又靚，一試無妨，再試投降😛😛。唯獨佢杯嘢飲Bufferfly Pea係值得一讚，顏色繽紛，味道清新，仲好切合今次下午茶嘅主題Taste of Blue。…查看更多

見佢入面冇乜人，快快脆脆食個午餐。叫咗個午市套餐：蔥油開揚拌麵🍲+小籠包($63另加一)第一次食蔥油拌麵，原來賣相唔係咁靚😞，配菜只係得蝦乾同乾蔥。上海麵嘅質地較淋及黏身，口感唔係咁好，而且味道好淡☹️，全個麵只有大大隻嘅蝦乾🦐係最惹味。上海菜必食嘅小籠包係即叫即蒸，味道不錯👍。皮薄但唔易穿，豬肉唔肥，但湯汁略少。整體來講，上海婆婆嘅食物質素比以往下降左不少。 以前排隊爭住食，依家唔使等位入去食。…查看更多