eatingboss的個人專頁

近排成日叫外賣，有時想同女朋友食好啲唔好成日食茶記，就叫咗呢間餐廳。落單後唔算等好耐，行個圈睇下嘢好快有得攞。 叫咗吉列豬扒、豬柳、大蝦定食（二人前）$518外賣自取85折，即係只需 $440.3就有兩個餐。 飯盒入面已經有白飯、椰菜絲、漬物、西瓜粒同主菜。 另外有蜆肉麵豉湯，點大蝦嘅他他醬，點沙律嘅西柚汁同紫菜酸汁，點豬扒嘅芥末醬、芝麻同豬扒汁。 飯嘅份量好夠，軟熟唔會好硬，女朋友食唔曬。但係椰菜絲可以再多啲，配埋酸汁好快食曬。西瓜夠甜，食完主菜可以食少少解膩。 到主菜喇。吉列豬扒大大嚿成塊上，有少少肥肉令整塊豬扒唔會太乾身，不過如果叫我推薦，一定會叫你食豬柳。 二人前得兩嚿豬柳同兩隻大蝦。豬柳一咬落去就覺得好軟綿，淋得黎唔會好似落咗鬆肉粉咁。本身無醃過，所以主要靠豬扒汁或者芥末醬調味。至於大蝦 ，大大隻好鮮味，一人一隻唔夠喉。下次可以淨係叫豬柳同大蝦。…查看更多

之前同朋友嚟過中午食點心，見佢有下午茶餐即刻帶女朋友嚟試下。餐廳有海景，令人心曠神怡。疫情下有膠板隔住枱與枱之間。下午茶有好多嘢食，二人枱會放到好迫。可以試多幾樣點心，一人一嚿，啱曬多心嘅香港人。咸點比甜點出色，值得一試。包一杯花茶，當日無得揀，只有玫瑰花茶。花茶連埋一杯仔糖漿，不過不失。鹹點有好多蝦嘅成分，好彩佢都做得唔錯。金魚蝦餃，份量足，皮唔會太厚。雜菇手袋，一咬開個脆酥皮就有好香菇菌味，要趁熱食。唔跟menu，無咗蛋撻，變咗蛋散，但侍應無同我地講過。中間花花蝦春卷，不錯粉紅蝦餃，同金魚蝦餃同味。三角餃味道雜亂，麻麻地。綠色流沙奶黃蘋果，太甜。流心紫芋蘿蔔仔，好甜。中間燕窩馬豆糕，蛋撻果pat燕窩轉咗過黎，正常味。…查看更多

女朋友一向好想黎朝聖。呢排疫情好少人，唔使等位等咁耐。星期六下午四點去到坐滿曬人，侍應話只有排隊等位，無得留電話等位，好彩十分鐘後有位。一入到去好似茶樓咁嘈，但係茶香撲鼻又幾寫意。呢度有過千種茶俾你揀，無心水可以參考下本tea book。4點半走咗一半人先聽到餐廳原來播緊優美嘅音樂。唔使等好耐就沖好一壺茶，裏面無茶葉無茶包，唔會愈飲愈濃。叫咗2人份量嘅Jewel($488)Menu無寫咸點係咩嘢，侍應又無介紹，憑自己條脷 分辨佢係咩食物。Muffin有提子乾，濕度適中，配上軟綿綿既忌廉同twg獨有嘅清香茶啫喱，好享受。泰式辣蟹肉撻，足料惹味。肝醬麵包脆餅，面頭酸啫喱可多啲來平衡油膩感。炸藍芝士配士多啤梨醬，爆漿效果有驚喜。細漢堡牛肉偏乾，四款咸點中最差。茶卷蛋忌廉輕盈，唔會成口油。紅豆綠茶opera cake 好味但太甜。Macaron食入口一陣風，唔係chewy果款。雲呢拿茶加黑加侖子太甜，相對Number 12 tea & Tiramisu 就超好味。…查看更多

同女朋友中午去馬鞍山搵食。食完覺得呢間麻麻地，翻食機會唔大。叫咗兩個午市定食，包一罐罐裝飲品，薯仔沙律同小食。但係套餐拉麵唔同單點，會無雞蛋。薯仔沙律有啲點心麵響面，不過不失。特選小食要咗餃子，每人三隻，一口一隻，唔算太差。男盛拉麵($84)除咗傳統叉燒，仲有兩嚿炸雞。湯底未見驚喜，拉麵尚算彈牙。比想像中唔係咁豐富。黑蒜油熟成湯拉麵($76)蒜頭味濃，湯底比男性拉麵濃厚， 拉麵都算彈牙。食完會口渴。…查看更多

女朋友恨食呢間餐廳好耐，就等我帶佢去一次。發現原來呢間真係少女餐廳，適合一班閨蜜嚟食， 食物質素中上，但份量少，加上貴夾唔飽，男士止步。星期六下午茶大概有十款選擇，以為佢長期有high tea，原來唔係。Chicken and chips ($118)得三舊雞，肉質嫩滑非常juicy。旁邊有香脆薯片同蕃薯片。值得一讚係個韓式辣醬，應該調教過，減輕辣味增加甜味。Beef cigar ($88)裝響碗嘅兩條，外表平平無奇似炸春捲，入面原來係牛肉risotto，好惹味好新奇。Wild berry ($40)個壺好保溫，入面無茶包，酸酸地好開胃。Cappuccino ($40)啲泡浮曬出黎又真係幾靚，飲落都唔錯。…查看更多

放假同女朋友去食tea，見到呢間裝修好開揚通透，就入去試下。疫情下枱與枱之間好闊落，坐幾耐都得。Egg Romesco ($78)最底層嘅麵包好香麥味，個醬酸酸辣辣好開胃，配埋茄子同流心蛋好夾。雖然好味但價錢偏貴，相信部分錢係幫佢交租。Full English ($148)有雙蛋，煙肉，香腸，焗豆，雜菇，薯餅同多士。焗豆唔係普通罐頭豆。雜菇炒到超香菇味，值得一讚。Flat white ($33)不過不失。Hot chocolate ($38)好香濃，都有個簡單拉花。旁邊配咗兩粒棉花糖，粉紅色果粒好似藥水味。…查看更多

女朋友想食呢間好耐，見間餐廳喺佢屋企附近就快快趣趣食完就返歸。雜莓奶昔($63)好足料，咬到一粒粒莓。有好多碎冰但不失奶味。飲曬成杯會好滿足。另外一提，佢地嘅飲筒係用米做，唔小心會咬爛，不過店員會俾過另一枝你。焦糖杏仁碎比利士酒($69)Baileys味十足，仲有粒粒杏仁好有咬口。雜菇芝士三文治($70)香脆麵包配埋超多芝士已經好好味，連埋甜甜地嘅洋蔥同雜菇，唔會太咸，簡直係最佳享受。蛋沙律牛油果牛角包($68)牛角包超脆。牛油果同蛋沙律都好足料，加埋芝士同少少辣粉超夾。…查看更多

女朋友講咗好耐想食呢間，見咁耐無帶過佢去食好嘢就趁今日啦～Cheeseburger($85)漢堡包配料要咗all the way，即係咩都有。當中嘅炒洋蔥粒好香，女朋友話加咗塊芝士普普通通，其實有其他配料個包都已經好豐富。Bacon burger($85)兩塊牛肉好有肉汁同埋牛香。煙肉片煎到脆卜卜，令成個包分數提升不少，呢十蚊值得俾。同埋份量都唔細，千祈唔好同麥記個包仔比價錢。士多啤梨奶昔($55)唔會太甜，大大杯。入面有士多啤梨粒，好有驚喜 。加埋忌廉十分滿足。…查看更多

女朋友high tea癮起，叫我搵地方陪佢食。咁嘅時世真係好少人，星期六都只不過坐得6，7枱。呢間餐廳除咗同頭髮品牌合作有禮物包外，維港靚景都係selling point。而我覺得最正嘅係逢星期六有live music，唱盡首首英文金曲，可以暫時放下所有煩惱事。Tea set有scone，仲有5款咸點，5款甜點，飲品可以揀香檳一杯，咖啡或者有十幾款TWG茶俾你揀。女友揀咗silver moon tea，有淡淡雲利拿味，清清地唔會搶鏡。頂層嘅迷你scone同quiche lorraine(法式鹹批)要即刻食，因為熱辣辣嘅。Scone質感唔錯，兩款醬都唔錯。鹹批有芝士同蛋，夠鹹香。中間幾件平平無奇，係個鵝肝泡芙令人眼前一亮，因為落足料。甜品方面，酸味味嘅石榴泡沫椰汁杯要盡快食，如果唔係泡沫就會消失~啤梨mousse入面真係有粒粒果肉，而印象最深刻嘅係黑芝麻馬卡龍，真係好似飲咗啖芝麻糊!…查看更多

同同事去鑽石山食午飯，見餐廳唔太貴又好似幾好坐就去試下。午餐有得揀飯或粉，仲送埋嘢飲，呢個價錢算係咁。海南雞飯配雞湯($68)個湯超咸，油飯唔算太油啱啱好。海南雞已經去骨，啖啖肉都算滑。個醬汁鹹鹹辣辣幾惹味，另外一碟係辣椒同薑粒。整體分量都好夠飽。香茅豬扒清湯金邊粉($58)賣相麻麻地，件豬扒好似想走佬，又細塊唔夠餸。唔夠香茅味，個醬又唔好食。清湯金邊粉不過不失。海南雞飯好食好多。炸蝦餅($18/兩件)唔錯，夠熱夠彈牙。味道都係靠個酸辣醬。…查看更多

放假陪女朋友去食all day breakfast，見呢間餐廳有好多好評就帶佢去食。餐廳係半自助形式，搵好位，揀好嘢食就自己去收銀處點餐，然後攞號碼牌返自己枱等職員送餐。Monster($115)。包羅萬有，最驚喜係有幾粒甜青提，食完煙肉可以清清個口。另外值得一讚嘅係松露薯蓉，又滑又香。忌廉汁配牛油果 ($85)。一開始見唔到一塊塊嘅牛油果，pat汁又唔係綠色以為佢上錯嘢，原來食落有陣牛油果味同埋有紫洋蔥粒，好creamy。熱烤榛子朱古力(+$5)。女友大推!有好香嘅榛子味，同香甜嘅朱古力好夾。Flat White(+$0)。唔知係唔係啲咖啡豆靚啲，飲落好順滑而且有好香嘅after taste。…查看更多

同女朋友去屋企附近食晏，因為汰弱留強，商場淨返一間上海餐廳。餐廳午市套餐星期一至日都有，除咗傳統上海粉麵飯之外仲有麻辣米線揀，而家仲免茶介免加一添。嫩雞煨麵($48)。清清地，唔會太咸。個麵好夠份量，有菜有雞肉，不過不失，未見驚喜。濃茄牛肉麵($58)。唔係淨係得pat茄汁，真係有蕃茄粒，好似有啲蔬菜咁健康啲。牛肉大大塊又淋又無筋，湯底唔會太鹹，下次可以再叫。鮮肉小籠包(+$18/兩件)。雖然個皮唔算非常薄，內餡充滿肉汁，加返唔少分。餐飲熱豆漿($0)。算夠豆味，如果減少少甜就更好。…查看更多

一條友放工之後去九龍城搵飯食，突然之間想食魚生飯，發現九龍城唔多日本餐廳。呢間餐廳之前食過午飯覺得都ok，就試下食晚餐啦。餐廳唔算大，位於位之間有啲迫。精選魚生飯($168)有拖羅蓉，牡丹蝦同海膽。拖羅唔算太鮮味，做得蓉都唔會俾靚嘢你。牡丹蝦夠大隻夠鮮甜，海膽唔夠甜但好彩無苦味。仲有甜蛋幾粒，凍凍甜甜。飯分量都算正常，整體不過不失。雜錦天婦羅($78)除咗兩隻蝦之外，仲有茄子，番薯，南瓜，冬菇等。粉漿厚薄正常，不過天婦羅汁比較細碗，要再問店員攞。另外叫咗罐啤酒，可惜唔夠凍，要扣分。…查看更多

同同事去樂富食晏，見到唔使等位又好耐未食過就坐咗入去。餐廳唔多位，又有啲迫，只適合食個快飯。每個午餐都附送雪糕同餐茶。薑汁燒豚肉定食($69)前菜係幾粒雜豆，無咩味道，失敗。味噌湯連昆布都無塊，失敗 。啲飯比較乾身，唔夠軟熟，失敗。醬汁杰撻撻唔夠薑汁味，失敗。豬肉鞋口柴皮，失敗。記得好耐之前食過呢間餐廳都算係好味，宜家，唉壽喜牛肉定食($88)除咗肥牛洋蔥，仲有車厘茄，西蘭花，茄子同幾條格格不入嘅薯角。可能真係一分錢一分貨，牛肉肉質比豬肉嘅好，味道亦相對正常。牛肉定食送沖繩燒紫番薯霜淇淋。有得揀醬: 宇治金時，紅豆，黑芝麻或黑蜜黃豆粉。同事揀咗紅豆。 紅豆都算足料，雪糕夠軟滑，但紫薯無咩味。…查看更多

同女朋友平日晚餐去食韓燒。由入坐到走果一刻餐廳都未曾坐滿過，唔使等位真係好爽 。未叫嘢食已經上沙律同前菜。沙律上面有個紅蘿蔔笑哈哈，同四款前菜一樣，整體味道不過不失。附送生菜同辣椒蒜頭可以同啲肉夾住食，減低油膩感。仲有豉油，大醬同鹽俾你自己加。可能個火太細，食咗一個半鐘果條蛋先至熟，粟米芝士都要差唔多一個鐘先至溶曬。不過好處就係啲肉會無咁易燶。夢幻特級牛肋骨($288)充滿肉汁，肉質軟淋，值得推介。店員見我哋剪到雞手鴨腳主動幫我哋切開啲肉，好細心。韓牛貝身肉($220)超多脂肪，一咬落去牛脂爆曬出嚟，有點太過油膩。厚切上等鹽烤牛舌($128)好夠厚，牛脷爽身，一定唔係平價貨，但唔好燒太熟，會好韌。石頭鍋飯｛什錦｝($118)有齊牛豬雞肉，仲有雜菜，分量好多，起碼有五碗飯。石頭鍋夠熱，有好多飯焦，超好味。…查看更多