bonniechow613的個人專頁

今次去咗呢間 Sepoy Mess 嘅印度英式餐廳，環境好靚，裝修有種現代感亦帶點印度士兵風格，好有特色。首先介紹吓佢哋嘅 Mojito，味道清新好好飲，而且整得好靚。跟住就係 Arancini Tikka Chaat (飯球薯餅雜燴)，酸酸甜甜嘅味道好適合當作開胃菜，再加埋佢地嘅香料同鷹咀豆咖喱，整個配搭好有層次，口感一流。然後一份 Soft-shell Crab Roll (軟殼蟹卷)，蟹肉鮮甜，配菜夾得恰到好處，每一啖都好豐富。主菜揀咗 Chicken Tikka Masala (印度烤雞咖喱)，濃郁嘅咖哩汁同雞肉配埋一旁嘅 Saffron rice (番紅花飯)，粒粒分明，香氣撲鼻，混埋一齊食完全係一拍即合，差點想再添多碗飯！😋甜品係 Sticky Toffee Pudding (拖肥糖布甸)，真係甜到入心，食完好滿足。整體而言，呢間餐廳嘅食物確實有驚喜，而且環境唔錯，值得再來！…查看更多

呢間玄米茶廳真係要讚吓，每樣菜式都好有驚喜，而且款式選擇多，地方整潔，坐位寬敞舒適。首先必點嘅係 “三拼叉燒油雞燻蹄”，叉燒肥瘦均勻，甜香入味；油雞皮滑肉嫩，雞汁十足；燻蹄鹹香適中，入口彈牙，膠質滿滿，三種風味各有千秋。“XO醬海蝦球滑蛋飯” 超有誠意，蝦球新鮮而且大隻彈牙，滑蛋香嫩幼滑，XO醬香味濃郁帶少少辣，撈飯一流，每一啖都好滿足。“牛三寶幼麵” 嘅湯底香味濃郁，牛筋、牛腩、牛肚炆得軟淋入味，幼麵吸飽湯汁，口感十足，超正！甜品方面，“西多士” 外脆內軟，淋上糖漿和牛油甜度剛好，亦唔覺得膩。再配返一杯冰凍嘅 “紅豆冰”，紅豆綿密，甜度適中，清涼解膩，簡直係完美搭配。整體無論味道、份量和價錢都令人滿意，下次絕對要再嚟試埋其他嘢！…查看更多

講到尖沙咀嘅韓國菜，呢間真係幾正，環境佈置得好有特色，燈光調較得幾特別，感覺好Relax。首先個「弘大烤腸」好有韓國街頭feel，烤得外脆內嫩，佢啲醬汁加埋洋蔥一齊炒真係好惹味，香到飛起。「卜卜脆炒豬脆骨拼拳頭飯」好有特色，豬脆骨真係名符其實嘅卜卜脆，醬汁濃厚，拌埋拳頭飯一齊食味道更加出色。仲有「海鮮煎餅」，每件餅都有隻新鮮嘅香煎蠔，而且煎餅煎得好香口，點少少醬汁食就更加正。「懷舊烤五花肉」肥瘦均勻，烤得好香，加埋甜辣醬包生菜食，解膩又惹味。服務方面，員工好有禮貌，廚房亦好有效率，落單後食物好快就陸續上枱。整體嚟講，無論環境、出品或服務質素都好滿意，如果想同朋友聚餐或情侶約會而又鍾意食韓國菜嘅朋友，真心可以嚟呢度食吓 Chill 吓 ～…查看更多

呢間餐廳環境幾靚好有氣氛，感覺好WARM，座位舒適。首先我地叫咗個薯仔沙律，沙律菜食落好清新，薯仔煮得啱啱好，咬落煙煙韌韌好有口感，配埋沙律醬即刻開胃哂。跟住上咗慢煮牛肩胛肉同香烤慢煮伊比利豬鞍，兩款肉都煮得好嫩口！牛肩胛肉好入味，咬落肉質鮮嫩，牛味香濃；豬鞍外皮微脆，肉質嫩滑有彈性，兩款主菜都好有水準，鍾意食肉嘅朋友一定要試。仲有個黑松露忌廉雜菌意粉，黑松露味勁濃，醬汁 Creamy，雜菌食落好香，佢仲附埋餐酒建議，不過今次另外叫咗杯Cocktail，所以冇再叫餐酒，下次試吓配返杯應該都幾正。之後叫咗個榛子朱古力焦糖香蕉梳乎厘班戟，梳乎厘輕盈到好似雲咁軟滑，朱古力Cream同焦糖香蕉夾埋楓糖漿好有層次，甜品控必點！飲品 School Driver 好啱食完好多肉後飲，馬上解晒D油膩感，不過易醉嘅朋友要小心，因飲落甜甜地，但度數都唔低；仲有杯熱鮮奶綠茶拉花好靚又香滑，綠茶味香濃，超好飲。整體嚟講，不論環境氣氛同食物質素都冇得彈，呢間值得再嚟。…查看更多

呢間「MORE YOGURT」真係好有驚喜，忍唔住要介紹一吓！第一杯係「巴旦木牛油果乳酪奶昔」，口感滑到不得了，牛油果嘅creamy同乳酪嘅酸味夾到絕，牛油果味好濃郁，仲有一片片牛油果鋪面，超有口感，甜度啱啱好，完全唔會覺得漏，再夾雜住陣陣巴旦木嘅香氣，每一啖都充滿粒粒果仁，口感豐富，絕對落足料。第二杯係「金菠蘿乳酪奶昔」，菠蘿味好出，仲飲到啲菠蘿肉添，同乳酪混埋一齊，味道清新得嚟又唔會太甜，啱晒而家咁悶熱嘅天氣飲。而且佢哋嘅奶昔用料好足，啖啖都食到食材本身嘅味道，真係真材實料，而且「零膽固醇、零反式脂肪酸」，感覺好健康！總括嚟講，呢兩杯奶昔有一定水準，下次經過再試埋其他口味先！…查看更多

呢間車仔麪嘅味道真係經典到不得了，值得每個人試一試，一入到去已經聞到陣陣香味，啲配料款式超多，睇到眼花撩亂，樣樣都好吸引，而且湯底濃得嚟仲有少少甜味，應該係啲蘿蔔嘅精華溶咗落去，啲蘿蔔清甜無渣，煮到淋淋哋，入哂味，正到痺。所以食材都超級入味，索晒啲湯汁，真係正到不得了，而且個油麵又夠彈牙，同啲餸夾到絕。最正係佢地自家製嘅醬汁，每種加少少落個湯度，成碗麵即刻昇華，尤其一定要試吓佢地嘅魔鬼辣醬，真係超辣，而且勁惹味，食到鼻尖冒汗都唔想停口，真係好滿足！呢間車仔麵唔需要靚裝修，唔洗貴價食材，但就有種住家feel，價錢又合理，而且食過返尋味，如果行過附近真係要嚟試吓，包你食完都會想「來多碗」！…查看更多

今次同朋友去咗朗豪坊呢間The Coffee Academics，環境幾chill，適合同朋友傾偈。首先叫咗個帶子大蝦喇沙意粉，個汁幾濃郁，意粉煮得啱啱好，彈牙有咬口，蝦同帶子都好新鮮，好鮮甜。另外個太陽蛋和牛漢堡真係超正，塊和牛juicy得嚟又唔會太油，肉質嫩滑，仲有陣牛油香，個太陽蛋一切開，蛋黃緩緩流出，撈埋啲醬，每一啖都口感豐富，塊包都烘得夠鬆軟，旁邊嘅沙律菜仲可以平衡吓油膩感，簡直滿分。飲品方面，叫咗杯西柚羅勒梳打水，清新解膩，西柚嘅酸甜同羅勒嘅香氣好夾，好解膩。香濃朱古力味道十分濃郁，朱古力味好醇厚，好絲滑，對朱古力情有獨鍾嘅朋友一定會鍾意。總體嚟講，呢度出品好有質素，環境同服務都唔錯，順帶一提，呢度有超多款咖啡，如果鍾意特色咖啡同埋fusion菜，呢度係唔錯嘅選擇！…查看更多

今次去咗D2 Place嘅GOLFZON試吓佢地嘅食物，呢度嘅環境幾舒服，座位好寬敞，適合同朋友聚會，特別係一齊練完Golf之後，坐低Chill吓食吓，真係一種享受，而且服務員哥哥招呼好好，熱情有禮貌，笑容可掬。我地叫咗幾款菜式，首先係煙三文魚黑松露意大利麵，黑松露香味濃郁，又唔會蓋過煙三文魚嘅鮮味，意粉煮得啱啱好，彈牙得嚟又掛滿汁。跟住個伊比利亞黑毛豬仔脾，燒到外層香脆，入面肉質嫩滑，肉味好香，而且食落完全唔會覺得乾；仲有餐湯，雖然係跟餐，但好足料，湯底濃郁，一啲都唔馬虎；薯條外脆內軟，每條都食到新鮮薯仔嘅口感，睇得出好用心制作；再配搭埋新鮮嘅沙律菜，解膩之餘好清新。仲有凱撒沙律，香濃芝士粉配上新鮮嘅沙律菜同香脆煙肉，口感非常好，十分開胃。整體而言，呢個地方無論係食物質素、服務態度定係環境，都令人滿意！…查看更多

呢間「鮮丼家」雖然細細間唔太起眼，但整個格局充滿日本地道小店風格，好有日本Feel，食物質素亦相對高，幾有驚喜！首先叫咗個海鮮丼飯，入面種類非常多，有新鮮嘅海膽、鮮甜嘅帶子同甜蝦、肥美嘅三文魚同油甘魚，仲要全部厚切，相當有口感，食落啖啖都好滿足！再叫咗個三文魚帶子熟蝦丼，份量十足嘅三文魚油脂甘香、帶子爽甜、加上大大隻鮮味嘅熟蝦面頭舖上燒到微香嘅芝士片，真係誠意十足，每樣都燒得香噴噴，再點上少少豉油Wasabi同飯一齊食，簡直令人慾罷不能！仲有佢地嘅牛油果蟹棒沙律就更足料，啖啖豐富嘅牛油果同鮮甜嘅蟹棒，加上新鮮嘅沙律菜，有種清新解膩嘅感覺，而且份量十足！另外四色刺身亦係好新鮮，件件厚切，肥美鮮甜，絕對對得起個價錢，食完好滿足。整體來講，服務態度好，食材新鮮，樣樣都好足料，兩個人食到捧住個肚，性價比極高，下次一定會再Encore！…查看更多

今晚同朋友去咗呢間 西塔老太太 試吓佢個二人餐，估唔到又幾有驚喜，個套餐勁多嘢食，兩個人食到超飽。必讚係佢嘅肉類，樣樣都醃得好夠味且好好味。首先「特色肥牛」真係名不虛傳，油脂分布靚，肥瘦均勻，入口又嫩又香，好正。「香饗鳳梨牛肋條」好有創意，牛肋條本身好有嚼勁，鳳梨嘅甜味同佢幾夾，加上兩者一齊烤，多咗份果香，解膩又開胃。「三筋肉」厚切夠嚼勁，肉味濃郁，越嚼越香。「秘制豬頸肉」好有嚼頭，咬落去好有彈性，啱哂鍾意有咬口嘅人。「雞腿肉」非常嫩滑，點埋佢地自家嘅秘制醬汁，更加惹味，餸飯一流！除咗肉，個「烤杏鮑菇」都唔錯，鮮香爽嫩。「海帶湯」清清地好鮮甜，飲完好舒服。甜品「喜沛多多」就更有特色，賣相好吸引，靚到有啲唔捨得食，甜甜地且咬落好軟糯，口感豐富。服務員好Nice，上菜速度快，座位寬濶，性價比高，整體好滿意，推介大家去試吓！…查看更多

今次再去Day One Cafe食飯，真係忍唔住要讚多次，呢間主打低碳水、生酮嘅餐廳，絕對值得Encore再Encore！今次揀咗個 Dinner Set，首先個煙三文魚牛油果沙律清新可口，兩者味道非常之夾，加埋新鮮嘅沙律菜簡直係完美搭配。接住係雞肉串燒，肉質嫩滑，燒得好香，配上特製醬汁非常惹味。再嚟一個焗牛油蒜蓉包，外脆內軟，香味四溢！而招牌蒜香橄欖油煙鴨胸翠玉瓜麵就更有驚喜，煙鴨胸嘅香味配搭翠玉瓜做麵底嘅清爽口感，加上用蒜香橄欖油調味，不單止美味仲好健康！香煎澳洲草飼肉眼牛扒配薯蓉亦好出色，肉質鮮嫩，外面微焦，裡面粉嫩，配埋綿密嘅薯蓉口感更佳。甜品係朱古力醬牛角包窩夫配雪糕，香脆窩夫配上香濃朱古力雪糕，仲有朱古力醬同草莓醬點綴，超美味嘅冰火交融，簡直令人回味冇窮。最後就由賣相極靚嘅泡沫朱古力做結尾，不但香滑濃郁，且甜度適中；仲有牛油果沙冰則帶來清新感覺，果味濃厚且香滑綿密，兩杯飲品都超水準！成個Set食完好滿足，味道同埋生酮低碳概念做得非常好，擺盤夠靚，睇得出每樣都好用心製作，服務態度十分好，環境亦好舒適，以時尚簡潔為主，崇尚健康又有要求嘅朋友，就一定唔可以錯過呢間咁有水準嘅餐廳！…查看更多

呢間位於新蒲崗嘅 Plato Cafe ＆ Bistro 一啲都唔隔涉，喺啟德站行過嚟好方便，幾分鐘就到，經天橋過，落雨都唔會濕身，而且環境舒適，裝修歐陸式設計，座位亦十分寬敞。我地點咗個精選二人套餐，首先，田園沙律好清新，菜好新鮮，醬汁開胃。法式蟹肉龍蝦湯香味濃郁，蟹肉同龍蝦嘅鮮味完全融合，味道好出。風乾火腿伴哈密瓜沙律好清新，口感層次分明，用Ham包住哈密瓜嚟食，味道好夾。北海道帶子松露野菌意大利粉亦相當出色，個汁調得好香濃，帶子煎得香口，松露味夠突出，意粉煮得啱啱好有咬口。德國脆皮咸豬手更係呢一餐嘅亮點，個皮一咬”咔嚓”聲，真係超酥脆，而且肉質好入味，抵讚！甜品方面，牛角窩夫伴雪糕好有特色，窩夫外脆內軟，夾雪糕冰火交融，簡直完美組合；自家製麻糬提拉米蘇亦好有創意，口感煙韌，甜度適中，令人回味無窮。飲品方面，熱榛子朱古力好濃滑，朱古力味好香，唔會太甜。柚子檸檬梳打好清爽，兩者味道好夾，解膩一流。總體來說，無論食物質素、味道、擺盤、環境同服務都令人滿意，值得推介！…查看更多

呢間金鳳喺啟德站附近，位於九龍城晴朗商場入面，呢間店舖比其他分店大，坐位舒適，食物質素亦好有水準。首先叫咗個帶子牛柳餐，五成熟配黑椒汁，仲加咗蒜茸，個牛柳好嫩，切開仲係粉紅色，肉質嫩滑，咬落去仲有少少血水，好juicy，帶子煎得啱啱好，唔會過韌，成個餐好滿足。另外就係貴族牛扒套餐，肉質一樣嫩滑美味，鐵板上嗰陣「咋咋」聲，份量十足，牛扒外層煎到微焦，入面嫩得嚟有肉汁，黑椒汁夠晒濃郁，好好味，而且兩個餐都有餐湯同餐包，羅宋湯夠晒多料，飲落好暖胃，而餐包加上牛油就帶著兒時回憶，感覺更美味。飲品叫咗咸檸檬雪碧，咸檸檬味夠晒出，解膩一流；仲有杯黑牛，可樂加上朱古力雪糕兩者味道平衡得好好，超正！服務方面，員工個個都好友善，反應又快，抵讚！總括來說，無論環境、服務和食物質素都令人滿意，而且價錢合理。如果你係牛魔王，又鍾意傳統港式扒房風味，金鳳絕對係個好選擇！…查看更多

呢間串燒食過之後真係令我刮目相看，雖然佢鋪頭細細，裝修亦唔算華麗，但卻充滿了年青氣息，各式各樣嘅字牌好得意，環境亦算整潔。串燒選擇亦多到令人眼花撩亂，而且一入到去，濃厚嘅燒烤香味已經令人垂涎欲滴！ 首先，必食嘅燒白鱔，外皮燒得好香脆，入口彈牙，肉質嫩滑，蜜糖甜度啱啱好，唔會太膩。我最鐘意就係佢地嘅燒雞子，口感肥美，有燒得恰到好處的焦香，咬落去爆汁四溢，口感極佳，仲要一啲都唔腥，食完即刻要encore！ 仲有鹽燒雞中翼，外脆內嫩，配埋佢地嘅特製味粉，味道更加升級！而佢地嘅雞泡魚干、燒五花肉、鹽燒厚切牛舌心同燒雞心等等…… 同樣出色，總而言之，每款串燒都燒得恰到好處，簡直美味得無法抵擋！最後，不得不讚嘅就係佢地嗰樽精釀百香果味啤酒，果味香濃，真係好飲到不得了，即刻忍唔住要叫多樽！總括來講，無論係味道、選擇或是性價比，呢間絕對係串燒首選，如果你係串燒迷，就一定要來試試，保證你會愛上呢種味道！…查看更多

今次去咗呢間河內越式料理真係幾有驚喜！ 首先呢碗「河內特色綜合河粉」，湯底清甜濃郁帶有牛骨香，河粉夠滑，配料份量十足，有生牛肉、牛腩片、扎肉、雞絲、香葉卷，配埋新鮮香草，每啖超豐富好滋味！跟住係「香茅牛肉三文台」，香茅味好出，牛肉醃得入味，夾埋啲配菜一齊食勁惹味。另外「濱海伴香茅牛肉」就超正，牛肉煎得香口，配料豐富，夾埋生菜同檬粉一齊食，清爽開胃，加上醬汁酸酸甜甜味道清新好醒胃。 飲品方面，「牛油果沙冰」夠晒濃郁，飲落去好Creamy，綿密滑溜，牛油果味好濃，甜而不膩；而「蜜糖柑桔冰」就清甜解渴，甜甜地帶少少柑桔酸，味道清香且夠晒解膩。 總結：環境整潔，坐得舒服，食得好滿足！如果想食正宗越南菜，呢間絕對值得試，尤其個河粉同香茅牛肉，真心推介，下次會再encore～…查看更多