bless_my_food的個人專頁

一鼎開到將軍澳啦！想放肆食一波就約朋友去食個晚餐放題。揀咗90分鐘嘅澳洲200日穀飼牛套餐，食物選擇超級多，滷水小食、炸物、甜品，最重點係同時仲有幾款茶飲可以任飲呢！火鍋湯底可以每人揀一款，一人一鍋真係好方便，我揀咗麻痺鴨，香辣仲有鴨血係入面。朋友揀咗蕃客為主，番茄味都幾出呢。澳洲200日穀飼牛同丹麥梅花肉都好正。牛肉好大片又唔會好薄，食落好飽嘴，滿足到我想食肉嘅心。仲有啲串串可以點，豚肉蘆筍、芫荽和牛等，連埋蔬菜食平衡了。茶飲推芝士琥珀，奶蓋及茶香嘅組合，好邪惡又輕盈，矛盾啊！喜歡啤酒嘅朋友更爽呢，可以任飲神泡生啤。仲點咗啲炸物，好鍾意榴連炸波波、紫米魔方小麻糬。最後去唧埋雪糕食～超滿足嘅一晚，下次要嚟食埋澳洲M8個個套餐先。…查看更多

The Pantry係葵芳開咗新店，最近終於有機會與朋友嚟到一試。餐廳空間好大所以座位都唔會好逼，好適合同朋友聚會，傾計都唔怕侷促。先點咗一個海膽帶子意粉，帶子保持到爽彈，蟹肉海膽忌廉汁掛滿意粉，食落幾濃郁。Salami pizza好有驚喜，芝士同salami嘅咸香再有番茄嘅酸甜平衡返，亦都好欣賞佢嘅批底有嚼勁，愈嚼愈香。甜品點咗Pistachio American Pancake，開心果醬幾濃郁，美式班戟都做得好好，仲配以莓果點綴減膩。有別於佢地signature嘅梳乎厘班戟，依款係截然不同但卻頗有特色。飲品我揀咗Mint Chocolate Milkshake，薄朱味幾出，好似飲緊溶溶地嘅雪糕咁，不過就會較甜啲。…查看更多

最近同朋友探索銅鑼灣美食，發現亨利中心開咗間新餐廳，主打日本火鍋同各式新鮮料理。我哋就book枱放工去試吓，餐廳環境好光猛座位舒服，都好啱同朋友聚會傾計。見好多客人都有點佢地嘅鍋物，我地都點咗飛驒牛A4 肩胛肉嘅鮮濃鱲魚湯鍋。魚湯好濃郁且鮮味，配上牛肉都唔會違和，煮嘅蔬菜都附有魚鮮味，食落更甜。飛驒牛A4 肩胛肉油脂幾香，但又未至於入口即溶個種，肉質仲有少少咬口，口感都係我地喜歡嘅。主食可以揀烏冬/粥，烏冬會先煮過所以我地擺入鍋都好快就食得，仲吸曬魚湯嘅精華。串燒都好出色，特別喜歡鹽燒雞心，燒得剛剛好再加入適量調味，咬落爆汁爽彈。汁燒免治雞肉棒味道好香，雞肉棒軟中帶軟骨，食落夾雜脆脆口感，好過癮。鹽燒雞皮香脆中保有雞皮些微彈性，好適合送酒啊！最後再嚟多碟鐵板豆腐，豆腐淋上肉碎同醬汁，有啲似擔擔風味，加上滑嫩嘅豆腐，味道平衡得嚟又惹味！飲品我地點咗清爽嘅巨峰梳打。點鍋物會附送一款甜品，我地額外再點了一款。開心果雪糕奶滑有堅果香，咖啡味雪糕咖啡味都好出，咖啡控要一試。另外奶凍好滑溜，值得試。整體食物質素都高，不過位於銅鑼灣難免價錢稍高。…查看更多

朋友好鍾意食傳統粵式菜又鍾意西式有靚靚擺盤嘅餐廳，今次我就搵到呢間位於上環嘅fusion菜比佢嘆。頭盤首先嚟三樣中式小食，一見到芝麻蝦多士，賣相好吸引。唔單止係金黃色，佢做到酥脆，蝦肉亦都有彈牙嘅感覺，食落唔會好重油分嘅感覺。另外陳醋蜜汁排骨味道酸酸甜甜，排骨腍滑，細細舊唔會太Heavy。仲有脆皮素春卷，都係炸到金黃色，睇到都食慾大增。之後就上湖區海鮮羹。話到明粵式菜又點可以冇湯呢？呢個湯用料十足，有唔同嘅菌類同海鮮，味道清甜，用嚟過一過頭先食嘅頭盤，再期待嚟緊嘅精彩主食。蒜蓉粉絲蒸扇貝一上枱嘅時候，我同朋友都不禁咁嘩咗一聲，份量好大，而且面頭鋪滿咗蒜蓉，店員仲好熱心咁提我哋要盡快食。成粒扇貝連埋蒜蓉粉絲擺落口嗰種感覺好滿足，既有蒜蓉嘅香，帶子嘅甜味，粉絲更加係吸滿晒所有食材嘅精華。之後就係棒棒吉列蝦掛包，睇落同一般掛包唔同，佢裏面係脆脆嘅蝦餅，配埋軟熟嘅包，口感好好。乾燒薑汁鱈魚擺盤似係食緊西餐嘅煎鱈魚，但係個味道同煮法都係中式嘅。佢嘅魚好滑 ，充滿油香又吾會食到膩。甜品試到佢地嘅芝士蛋糕同檸檬撻，喜歡後者酸酸甜甜，幾啱我。今次仲飲到鍾意嘅Riesling，配埋啲美食都好夾。…查看更多

好耐無食廚師發辦，聽朋友推介依間好對佢味，我就特意來試下。恰巧餐廳做緊優惠$1580就嚐到18道菜，入座後侍應更同我哋講兩人同行有清酒優惠，邊吃日料邊飲清酒真係特別加分。前菜係水雲醋同埋三文魚籽菠菜，兩款都幾清新。前者甜酸平衡，後者食到菠菜原味嘅清甜同埋雜菌嘅脆感、多汁。打頭炮嘅刺身係鱈魚白子，睇落好滑嫩，入口嘅感覺都一樣，調味剛好亦令整體更加分。鰤魚配上芥末、芝麻碎及山桃漬，魚肉帶少少爽口之餘幾油潤，芥末及芝麻碎幾脆配搭得宜。金目鯛幾厚身，加埋大蔥碎同埋洋蔥汁都幾夾，仲配咗可以清清口腔嘅柑橘啫喱。之後有生蠔嘅部分，來自岩手縣，一口塞好滿足，上面加咗醋味嘅foam及新鮮紫菜，鮮味噴發啊！笠貝一片片鮮味好突出，柚子汁襯托亦好適合。不嬲鍾意魚油感重嘅銀鱈魚，炙燒到魚油出晒嚟，配上一小撮松露醬，再撒上金箔外觀更昇華。鮟鱇魚肝配搭香脆最中餅，就好似小點心咁，魚肝香滑幾濃郁。依家季節仲食到香箱蟹真係好幸運，蟹肉混入蟹膏同脆卜卜嘅蟹籽，加埋清爽嘅醋茨好豐富層次。磯煮鮑魚好爽彈，有埋肝醬更加分。完左刺身部分，師傅上了一道和食。吞拿魚下巴燒得好香，肉保持到鮮嫩度，魚脂位幾多，係滿滿膠質好滑。赤貝壽司有柚子皮點綴，新鮮嘅貝類爽度特別高。甜蝦壽司用上蝦頭膏醬油調味， 入口食得到好新鮮，而蝦身甜度充斥住口腔。黑鯥魚壽司同其他魚肉不太一樣，肉身口感有彈性，魚皮有嚼勁。期待以久嘅海膽，師傅選用馬糞海膽，鮮甜度滿分，入口好順滑。兩款拖羅疊埋一齊，漬過嘅拖羅加上燒過嘅大拖，有柚子胡椒調味中和，口感同味道都讓人好滿足。食完一系列刺身同壽司，來一碗魚湯暖暖身，濃郁又好重魚味。最後一道係甜品環節，係Tiramisu味嘅千層蛋糕呢！平時超愛食Tiramisu，今次形態以千層蛋糕咁present好特別，味道都唔錯。…查看更多

Pentola開到去觀塘啦！之前去過大埔店比較偏遠，依家開咗分店就可以就腳啲啦～一入座即刻奉上餐包，蘸吓醋同橄欖油開個胃。睇睇餐牌發現觀塘店無咗主食嘅選擇，之前大埔店食過封門柳係幾推介的。黑松露薯條配黑松露蛋黃醬一嚟就點個小食試吓啦！薯條好香脆又熱辣辣炸起，黑松露蛋黃醬好creamy又香濃，仲有啲黑松露碎更加分。意大利燉海鮮湯滿滿嘅海鮮啊～兩人分享剛剛好呢！燉湯幾重茴香味，朋友咁啱唔太喜歡依隻香料味同埋訂價比較高，下次會想試其他湯或前菜多啲。慢煮牛面頰番紅花意大利飯牛面頰好軟腍份量又多，唔洗用刀切，用羹一壓都可以分開到啲肉。依個部位仲含有豐富骨膠原，最鍾意就係個啲少少黏口、漿漿地嘅位。意大利香草醬大蝦闊扁麵香草醬好多，掛滿麵條的～手工麵條有誠意，仲有好多蝦，鍾意青醬嘅朋友要一食。Tiramisu咖啡味好突出，連mascarpone都有輕微咖啡味呢！lady finger都算濕潤，整體再輕盈啲就更正啦！Oolong Breeze係gin base嘅cocktail，酒味同果味都幾平衡，整體幾清爽。Sunshine柚子味好出嘅mocktail，唔飲酒嘅朋友好推介飲依杯呢！…查看更多

最近同朋友去左間質素相當唔錯嘅omakase。我哋選咗江戶橋廚師發辦午餐，師傅好貼心，坐低時候會問我地有啲咩唔食。首先上嘅係前菜，跟住師傅嘅次序去試-高糖蕃茄，本身好鮮甜，平時唔鍾意食蕃茄嘅我都改觀了。之後再試風乾火腿，火腿嘅鹹香味同剛剛嘅蕃茄好夾，最後再跟埋水芋絲，調味撈咗啲芥末籽、芝麻，口感爽脆，食完好開胃。接續係刺身-天然野生中拖羅，肉身非常腍滑，油脂感好重，魚味都突出。牡丹蝦甘甜軟糯。最特別係活八爪魚，已經落咗啲醬汁，食落去酸酸甜甜，非常嫩口，口感潺潺的又非常鮮甜，令人回味。茶碗蒸同平時食嘅有少少，佢係用咗蟹肉、紫菜打左芡汁，中間有白果，每一樣食材都係好夾。之後就開始上主菜壽司。赤貝肉質厚身，再配上青檸汁，爽口鮮甜，唔會有貝類嘅腥味。師傅喺金目鯛表面磨上新鮮柚子皮，有一陣清淡嘅柚子香氣，魚肉口感滑身，魚味都濃郁。間八平時比較少食，師傅今次配上漬左嘅坂本菊，魚皮有少少爽韌，油脂感都好濃，跟埋菊花食就啱啱好。鮫鰈屬於右口科嘅一種，同平時食嘅左口魚些微不一樣。師傅配咗炙燒過嘅鮫鰈邊同紫蘇，油香十足。芝麻鯖，光紋魚嘅一種，面頭配上白昆布，味道酸酸地，配合本來魚味好濃嘅鯖魚，食落去好夾，肉質腍滑。喜知次不嬲都係油份重，而師傅輕微咁火炙過令到佢油份更突出，好適合香港人鍾意食濃味、油脂感嘅口味。天然野生大拖羅仍有魚肉細嫩感且唔會入口即溶咁誇張，口感實在啲。最後係北海道根室海膽，海膽好鮮甜，食完更有種回甘留喺個口，令人滿足。卷物係干瓢卷，係用漬左嘅冬瓜，切成一片片之後再整成卷，味道酸酸甜甜，仲冇咗冬瓜本來嘅質地呢。師傅仲有比玉子燒我地試，甜甜地又綿密，傳統又簡單嘅美味。湯品係蜆湯超鮮味，仲有啲蜆肉、滑溜豆腐等。最後仲有甜品-抹茶奶凍同泡芙，呢一餐我同朋友都好滿足。…查看更多

成日係旺角唔知食咩好，又唔想去樓上cafe咁hea，就試下今次呢間餐廳，地點夠方便，同時環境又闊落，好適合一大班人一齊去食野吹下水。餐廳仲有一幅由BEARBRICK砌成嘅feature wall，好有特色。呢到主打西餐食物，我地先叫左2款小食。炸魷魚圈食得出係新鮮炸起，香脆同裏面好軟滑，唔會好鹹。另一款係香煎西班牙辣肉腸，食落去有啲嚼口，味道香濃，兩樣小食都係好送酒。食完啲咁濃味，要食啲fresh啲去配返，我地就叫左個牛油果蟹肉沙律塔。牛油果本來就好健康，加上蟹肉做點綴，可以解小食嘅油膩感。開始到主食啦，先食明太子忌廉汁蝦球意粉，意粉係自家制手工幼麵，蝦球都算幾彈牙，醬汁個份量剛剛好，唔會太少又或太稀。我覺得呢到最出色係佢地嘅意大利薄餅，我地今次就叫左個classic嘅Margherita，批底個厚度啱啱好，脆口但裏面係軟熟。傳統Margherita係唔會有肉，只係用上簡單嘅番茄醬、mozzarella cheese同basil就已經好好食，而呢間餐廳都能夠呈現到出黎。最後我地仲叫左個香煎美國特選封門柳，味道唔會話唔夠，可以加埋少少鹽會更加突出個肉味，份量一定夠3-4人食。…查看更多

最近安排了一日同朋友去大埔一日遊，吃貨們最重視就係吃好西，當然要同朋友發掘一下大埔的餐廳。記憶中有間討論度好高，座落於大埔藝術中心入面嘅餐廳，就同朋友前往一試。前身係大埔官立中學，翻新後真係比人煥然一新嘅感覺。佢地有好多款創意雞尾酒，我就揀咗無酒精嘅Mystical Rosa，杯中有一朵玫瑰冰係洛神花汁製成，果汁以熱帶果味為主，仲有漸層效果，整體好清爽又好啱打卡。朋友揀咗Modern Irish Coffee，面層奶泡甜甜地中和咗下面香濃咖啡，令我唔愛咖啡嘅我都呷咗兩口。小食點咗意大利生牛肉薄切，鮮嫩生牛肉配上火箭菜、芝士、橄欖油等調味，剛好突出了香濃嘅肉味。手工意粉係佢地嘅招牌，款式都幾多，最後選擇咗新鮮波士頓龍蝦意粉，有半隻波士頓龍蝦當然係賣點，而佢地嘅手製意粉都好特別。濃郁醬汁掛滿意粉，亦保持到彈牙口感。炭燒安格斯封門柳配燒汁薯條份量恰到好處，封門柳炭香十足又十分腍嫩，薯條香脆唔油膩。甜品都係我地bookmark咗想試嘅item，就點晒兩款試晒佢。Tiramisu軟滑且幾重咖啡香氣，手指餅都唔會太濕呢！另一款甜品係奶凍配百香果醬，奶凍奶香好出又滑溜，百香果醬酸甜味道同奶凍本體截然不同，咁樣配搭一齊都係第一次試，好新奇呢！…查看更多

荔枝角工廈有間隱世私房菜，聽朋友介紹後就book咗dinner去食，兩人食到捧住肚走。先來頭盤36個月西班牙橡果黑毛豬火腿，咸咸香香再配埋蜜瓜片好夾呢！湯品係南瓜忌廉湯，好順滑又足料，香氣好出。沙律嘅部分係芒果蟹肉杯，整體好清新又鮮味，芒果好甜而蟹肉份量都唔少，特別鍾意佢配搭埋牛油果粒同蟹籽，口感更有層次。滿滿油香嘅鵝肝入口即化，多士香脆再伴以醋珠好提味，亦平衡了油香。紐西蘭肉眼扒好大塊，口感幾腍咬落有肉汁，牛味幾濃，不少得香滑薯蓉同蔬菜伴碟。主食係大蝦蕃茄乾意大利粉份量好足大蝦煎到剛剛好仲保持爽彈，蕃茄乾味道都幾濃郁，仲有豆苗點綴更清新。最後當然要試埋佢地嘅甜品，即製嘅雪糕窩夫好香脆，熱烘烘同雪糕冷熱交融，十分過癮。…查看更多

大愛星馬泰菜式，早前聽到朋友推介依間粉嶺馬來西亞菜，當然就要去一探究竟啦！食物選擇超多，我地都揀到眼花撩亂啊！最後就點咗啲小食、麵同湯。好愛肉骨茶嘅我發現佢地有款白胡椒肉骨油條，相較平時深色嘅肉骨茶，佢嘅湯頭睇落係奶白的，飲落白胡椒味好突出，冬天享用更暖胃。肉嘅部分都幾厚肉又唔會好柴，而吸晒湯嘅豆卜同油條我更愛啊！再試埋佢地嘅咖哩叻沙湯蝦肉魷魚摻摻，一上枱就見到份量好足海鮮都好多，下面嘅油麵同米粉仲吸晒叻沙嘅香味。下午茶時段，點依碗麵同朋友一齊分享都好足夠。小食少不了招牌嘅自家製班蘭咖央多士，焗得超香脆，中間嘅醬同牛油十分邪惡，同多士配合得天衣無縫呢！另外一口馬拉盞蝦多士都好吸引，香脆多士配上彈牙蝦滑，一口size超方便。好多人都介紹嘅焦香榴槤芝士蛋糕果然名不虛傳，榴槤味撲鼻芝士蛋糕亦軟滑，面頭焦香位焗得剛剛好，但整體如果少甜啲會更正。飲品點咗必試嘅凍馬來白咖啡同清爽嘅芒果冰茶。…查看更多

終於一試依間超高質又邪惡嘅和牛放題。最近佢地仲推出左冬日限定餐單同埋升級至150分鐘放題，有幾款冬日美食超吸引我，包括北海道白子、燒仙台生蠔同埋博多和牛牛腸鍋。當然唔少得宮崎 A5 櫻花牛拼盤，內容物都換上矜貴的牛柳、上後腰脊肉兩款稀有部位，推介大家節日大餐嚟食餐好嘅！北海道白子幾creamy夾埋酸汁蘿蔔蓉蔥花好對味！燒仙台生蠔幾厚肉仲有牛油香包覆住而博多和牛牛腸鍋清甜又暖胃。冬日限定item不設追加，轉戰進攻和牛啦。燒肉由赤身開始燒，有五花腩、牛肋肉、内外後腿肉、和尚頭等等。鍾意油花嘅就要食霜降部位，特別係好大塊嘅肉眼扒，由職員代勞燒得好靚，再按自己喜好燒多陣就可以嘆到油香滿滿肉汁噴發嘅和牛啦！另外壽喜燒蘸蛋汁滑嫩口感我都超鍾意！其他放題item仲有超多款，海鮮有牛油燒廣島蠔、甲羅燒等款款吸引！而燒內臟都係其一亮點，我超愛雞冠同牛肝，前者爽脆有口感後者甘香濃郁。好少係其他店見到所以都忍唔住不斷encore點嚟食。最後不忘食埋甜品，芝士年糕同埋3.6特濃牛乳奶凍必食，朋友仲推介撈埋抹茶雪糕去奶凍一齊食，真係世一，兩者都好濃但唔會蓋過對方，相得益彰啊！…查看更多

成日都會心郁郁想食泰國嘢，愛佢啲香辣及惹味，最近就比我地搵到間係荔枝角工廈內嘅泰國菜店。泰式火山排骨佢地嘅招牌菜一定要數到依款，見到好多枱客人都有點，有豬同牛嘅選擇。我地今次就揀咗豬肉版本，排骨超巨型，浸於酸辣汁之中。手套戴上就可以開餐啦！啲肉好易離骨，一絲絲豬肉被我地撕落嚟再蘸上酸辣汁，食落幾惹味呢！泰式肉碎生菜包係我其中一款好愛嘅泰國菜式，炒過嘅肉碎入晒味，酸辣酸辣嘅味道超開胃！仲有啲洋蔥、蔥花等食落都好刺激同提味。菠蘿海鮮炒飯最後當然要點款主食，炒飯超巨型，面頭鋪滿肉鬆，內有魷魚蝦肉等海鮮，飯粒唔會太濕都幾香口。椰皇三重奏甜品真係要大讚，一羹有3種口感，椰子奶凍加椰子凍仲有面頭嘅椰絲脆脆，大滿足啊！整體椰子味都好濃，上下兩層椰子奶凍加椰子凍好冰涼超清爽，椰絲脆脆增加口感多咗陣香氣。飲品我就試咗金鑽鮮菠蘿冰，菠蘿味幾出不過就無乜冰感。朋友揀咗椰汁珍多冰超多料。…查看更多

餐廳個佈置幾有特色，裝飾有好多武士元素。環境闊落，一班人食都幾舒服。呢度主打壽喜燒，但係成個場唔會好大油煙。未食主菜之前，嗌咗幾款唔同嘅串燒，牛舌厚肉但係唔會太淋，雞頸肉肉質幾嫩燒得香口。鰻魚唔會腥，有陣陣炭香。加碼嗌埋飯團，配埋蒜片，幾有飽肚感。當然要叫個壽喜燒二人前，有專人幫手燒埋俾你食。望住店員燒一大塊A5鹿兒島黑毛和牛西冷再浸入蘭王蛋嘅蛋汁，各種油香同蛋嘅香味係口腔混合一齊，難以形容嘅好食。仲有跟一份野菜盛盒同埋一份稻庭烏冬，食到好飽啊！飲品叫咗一杯佢哋嘅signature cocktail—練，上枱嘅時候會有煙燻效果，味道帶啲柚子同柑橘味，好易入口。…查看更多

平時係旺角唔知有咩飲酒吹水嘅地方，但最近去左間居酒屋， 環境舒服又近地鐵站，好方便呢！去得居酒屋，梗係揀咗杯酒先啦。朋友幫我發辦叫咗呢杯，賣相唔錯又幾好飲啊！餐牌有好多唔同嘅小食俾你揀，就揀咗個經典嘅燒燒賣，有置身街頭嘅感覺。炸一口芝士可以微微拉絲～咸香又creamy，外層酥脆都幾香口呢！除咗以上嘅兩款，仲有燒司華力腸，樣子雖然唔美，但係送酒好唔錯。當然唔少得試埋個燒茄子啦！燒到好淋亦冇燒燶，有香濃嘅孜然味，值得一試。呢度除咗有得食野之外，仲有得掟標，一班朋友食到咁上下都可以過去玩吓。…查看更多