Shinchan1993的個人專頁

油塘麵包店最多，但有質素嘅餐廳就冇乜，不過講到我成家最常幫襯嘅餐廳就係「栢檔極品海南雞飯」。佢位於大本營地下連接地鐵站嗰層，而且其實係主打外賣。我之前最鍾意用外賣App落單買一隻雞返屋企加餸，外賣自取有八折優惠，平過喺嗰度就咁買。不過呢日阿媽直頭乜都冇煮，所以就試吓栢檔嘅二人套餐。二人套餐($188)，套餐內容豐富，定價相宜。佢份量幾多，我認為三個人都夠食。極品海南雞(半隻)，呢度啲雞南雞好出色，一個字形容就係「滑」，雞皮滑，雞肉更滑。雞皮去毛去到乾淨，雖然無啫喱層，但亦無過膩。雞肉無雪藏味，肉身白𠽌𠽌，除咗雞翼，全部去骨，食得方便。隨海南雞奉上嘅三色醬料亦唔錯，口味正宗。如果鍾意醬料，可以叫店員比多幾個。豬頸肉整齊排列，脂肪含量唔高，食落油份適中，但邊位就未算燒至太脆，不過肉質夠軟腍搭救。麻辣鳳爪係套餐嘅特色小食，麻辣惹味，微微辣好開胃。鳳爪無醃到淋晒，反而保持彈性，幾有咬口。雞油香飯色香味俱全，飯呈淺黃色，飯粒軟硬均勻，粒粒分明，滲出啖啖雞油香。油飯裝到滿滿的，比起酒樓白飯還要大碗，男仔食都夠飽。油菜，完整嘅一餐唔少得菜，生菜份量都幾多。個個客都有嗌，後尾直頭賣晒添。細肉骨茶(+$10)，肉骨茶真材實料，藥材味偏重，有少少胡椒香，啲料就有豆卜同一字骨。皇牌無味精靚湯係南瓜蘿蔔湯，南瓜打到蓉晒，甜香濃郁自然，仲有一嚿仔粟米。最搞笑係個餐仲有兩粒迷你雪米糍，士多啤梨同抹茶紅豆味，誠意十足。總括嚟講，栢檔係香港數一數二好食嘅海南雞🐔，而且水準穩定，每次都無令人失望。最後，油塘店嘅全部店員服務態度都好好，有禮貌，笑面迎人，抵讚。…查看更多

阿爸生日，所以買個蛋糕同佢慶祝吓。之前喺IG見到網店「Kiuki Sweet Bakery」嘅蛋糕好似唔錯，加上有朋友親身試過話唔錯。小店人氣好高，想買的話，一定要記得早三至五前預訂啊。佢個網頁幾清晰，之後店主就會Whatsapp你畀錢詳情。我揀咗草莓百香果x水晶珠戚風Strawberry Passion Fruit，蛋糕有唔同呎吋揀，我要咗4 寸($450)，可供2-4人食用。蛋糕偏高身，造型非常可愛，帶點少女風，入面由外至內都有好多餡，層次分明。草莓戚風蛋糕口感鬆化，所以食落好輕盈，中間流心嘅係鮮草莓果肉果醬，食落竟然一啲都唔酸。然後再食就係百香果乳酪忌廉，佢有熱情果嘅香，令人開胃。為咗加添口感，小店仲加入咗水晶珠，煙煙韌韌，幾正。題外話，蛋糕可揀觀塘工廠大廈自取或者送貨，由於位置方便，所以我自己攞。小店提醒蛋糕要45分鐘內將蛋糕雪入雪櫃，並需要喺2日內食完，以保持最佳狀態。總括嚟講，蛋糕味道同設計令人滿意，小店從起源入手，揀選優質嘅食材，例如日本著名品牌麵粉同埋零膽固醇嘅食油，既好食又注意健康。…查看更多

去咗灣仔探朋友，我哋一行三人去食晚飯，地膽就帶我哋轉入巷仔搵食，仲要搭𨋢上一樓先至到「新嚐泰泰國餐廳」。從地下門面行入去，我會以為好噏耷，點知上到去發現室內環境唔錯喎。牆身畫上壁畫，色彩鮮艷，整體環境嘅光猛、闊落。餐牌設計簡潔，一眼睇晒，餐廳所提供嘅菜式選擇繁多，價錢屬正常水平，但原來份量超多。見到實物之後，我直頭改口話係抵食！黃咖喱海鮮跟薄餅($108)，咖喱有幾款口味可選，我要咗嘅黃咖喱香而不辣，仲帶微微椰香，實屬老少咸宜之選。醬汁正之餘，跟配嘅薄餅更加係畫龍點睛，蘸汁食一流，而薄餅本身都好軟熟。海鮮包括爽彈鮮蝦、青口同魷魚等，另外仲有三色燈籠椒同薯仔。曼谷海南雞($98/半隻)，半隻海南雞好足秤，海南雞既肥美又厚肉。除咗雞翼位置，其他部位經已去骨。雞胸位置白𠽌𠽌，肉質嫩滑，一啲都唔嚡。泰式口味主要係跟辣醬，辣辣哋幾惹味。粉絲大頭蝦煲($208)，我哋無嗌主食嘅原因，係因為嗌咗粉絲煲。大頭蝦煲真材實料，面頭兩隻大蝦先聲奪人，蝦頭充滿蝦膏，蝦香十足，唯一美中不足就係肉質結實啲就好。粉絲墊底索盡大頭蝦精華，而且仲加咗各種食材同香料調味，例如花椒八角同肉桂等，一啲都唔馬虎。串燒沙嗲($88/6串)，串燒有豬同雞可選，餐廳並容許雙併。估唔到串燒咁大串，每串有五至六嚿肉，並且充滿燒烤嘅香氣；而肉味亦比想像中濃郁。沙嗲汁幾香口，不過由於啲肉大大件，就顯得啲汁唔夠多，哈哈。飲品方面，原本覺得成四十蚊都有啲貴，不過個杯其實大到好似個榨咁，Share飲都夠。泰式青檸檬茶($40)真係唔同港式檸茶，佢並非紅茶底，而係用上泰茶底，有浸獨特嘅香氣。糖水另上，可自行調節甜度。椰汁冰($40)，呢個同樣大大杯，椰汁冰椰香突出，味道自然，口感幾順滑。總括嚟講，唔係朋友介紹，真係唔知道灣仔有間咁高質嘅泰菜店。不過可能我大鄉里，雖則佢係樓上舖，但晚市都坐滿人。無他嘅，佢平靚正嘛。…查看更多

棉登徑內有一間人氣頗高嘅燒肉店，我哋想幫襯好耐，呢日終於搵啱機會。一到步，店員隨即熱情招待，並簡單介紹菜式。餐廳環境都唔錯，有一大幅牆畫。餐廳菜式選擇繁多，無論肉類定料理都有好多選擇，而呢兩方面嘅出品都有質素。題外話，餐枱夠大張，食得暢快舒服，佢個爐火侯亦OK，係爐面細啲。老饕澳洲M5/M6和牛牛板腱($198)，雖然成二百蚊先得五塊，不過大大片之餘，而且堅係和牛。佢並非好重雪花、入口即溶嗰種，但反而肉味更濃郁。香蔥薄切牛舌($82)，薄切牛舌一客有七片，肉質彈牙，但唔韌，本身輕輕用咗胡椒吊味，如果想再香口啲，可以加香蔥。全天然豚肉五花腩($130)，豚肉不比牛肉遜色，厚切豬腩色澤鮮嫩，燒完之後，充滿油香，但未覺油膩。五花腩配埋生菜食，好搭調。揚櫻花蝦豆腐($68)，前菜我哋要咗炸豆腐，豆腐四四方方，好大件，外層經薄炸，而且蘸滿木魚同櫻花蝦，好惹味呢。旁邊嘅泡菜同中華沙律則係贈送嘅前菜。蘋果木煙燻松露和牛他他($158)，和牛他他用個樽仔裝住，皆因餐廳用蘋果木煙燻，再交俾客人將啲煙䆁放出嚟。店員建議撈匀晒生蛋、筍絲同黑松露醬一齊食，他他肉質軟腍，一啲都唔腥。櫻花蝦餃子($68)，餃子一客有四隻，上面佈滿櫻花蝦，而入面就包裹多汁肉餡，唯一挑剔嘅地方就係餃皮偏厚。松露肉碎炒飯($108)，朋友係澱粉質怪人，所以嗌多咗個飯，我其實食完上面啲嘢都已經飽咗七成。炒飯用石鍋上，有啲似韓式嗰種。炒飯帶有黑松露香，而肉碎就可揀牛肉或雞肉。呢度每枱都有自助啤酒機，但唔飲啤酒都有其他選擇，我哋就要咗富士高砂梅酒($68)，甜甜的，Cheers。總括嚟講，餐廳嘅食物質素有水準，而其他各方面亦令人滿意。我睇餐牌見到介紹寫，原來牛魔係由香港人自己打造嘅燒肉品牌🐮，佢哋果然做得到、做得好，無令人失望。…查看更多

我同男朋友不嬲都鍾意正日前後先慶祝情人節，因為愛大家嘅每日都係情人節，唔需要正日出去食咁多人。我哋揀咗位於K11 Musea嘅「Velo Italian Bar & Grill」。我哋預先喺網上訂座，一去到店員好快就有我哋資料同安排入座，整體服務態度幾好。餐廳面積幾大，環境都唔錯，雖然冇海景，但都感覺開揚。店員先為我哋送上麵包籃，食住包包再睇餐牌。餐牌中英對照，圖文並茂。我哋詢問店員菜式資料，佢哋都能一一回答同埋提供建議，抵讚。冷吞拿魚醬汁伴小牛肉片Vitello Tonnato($248)，呢款前菜好正，惹味開胃得嚟又唔重口味。喺其他地方食呢道菜，好多時都會見到好多醬汁鋪面，呢碟相反，但當食小牛肉嘅時候，你就會發現其實佢係蘸滿汁，呑拿魚蓉味道突出。香煎鵝肝配焗蘋果Foie Gras($178)，鵝肝邪惡到爆，煎到外脆內軟不特止，入面直頭係流心。好彩佢配咗多士同埋焗蘋果一齊食，所以整體感覺唔會太漏。霜降牛扒Wagyu Beef Sirlion Steak($648/300g)，一向係牛魔王嘅我哋見慶祝情人節，就食得靚啲。店員介紹牛扒係已經熟成，肉味特別濃郁，而三成熟就係最佳溫度。佢果然冇介紹錯，加上廚師火候控制得宜。牛扒肉芯呈嫩紅色，食落多汁，牛味一流，簡單點鹽食已經無得輸。牛扒本身原來配咗菠菜同新薯，300g嘅份量令我哋兩口子非常滿足。意式青瓜地中海紅蝦自家製扁意粉Red Prawn Linguine($298)，紅蝦意粉一上枱嘅時候，蝦香撲鼻，調味比較強，自家製嘅扁意粉質感富嚼勁，軟硬粗幼適中，佢中間仲加入咗意式青瓜，以添口感。芝士乾果拼盤Piatto di Formaggi($148)，Tiramisu賣晒，所以唯有轉其他款，我成日見芝士拼盤係甜品項目，但從未食過，因為覺得怪怪的。芝士拼盤出到嚟嘅感覺似前菜多啲，總共有四款芝士，不過配上蜜糖食又係另一番滋味，另外仲有提子同杮。奥利奥曲奇蛋糕配意式香草雪糕 Torta di Biscotti con Gelato($88)，呢個係我喺甜品櫃見到好吸引嘅款式，蛋糕好厚身，有好多層Layer。Orea曲奇忌廉同海綿蛋糕配合，令到佢冇一般芝士蛋糕咁Heavy。總括來講，呢個情人節晚餐唔錯，食物質素有水準，如果要挑剔就係甜品部份相對冇咁出色。餐廳定價雖然唔平，不過我認為係對得住個價錢。題外話，餐廳有做晚餐Buffet。…查看更多

情人節前夕，我都要加班到夜，所以男朋友就接咗我去公司附近食晚餐，慳緊啲時間。估唔到佢做足功課，知我鍾意食西班牙菜，就揀咗位於啟岸一樓嘅「Still」。我多數喺樓下食街買嘢食，甚至乎無上過樓上。餐廳裝修具特色，放咗植物以添清新感，但佢同時又係酒吧格局，成件事幾得意。餐廳設有5-Course Dinner Set($498)，但其實兩個人嚟食，唔使一人一份5-course，店員建議加一份主菜就OK。我哋要咗黑毛安格斯西冷配甜椒沙律($368)，菜式擺盤好靚，色彩繽紛，而牛扒肉芯就呈嫩粉紅色。牛扒本身靚，再加上處理得好，肉香濃厚，肥瘦適中。三色甜椒沙律切絲，煮到淋晒，好香甜、無草青味，色香味俱全。套餐方面，第一道菜Starter唔使揀，就係黑毛豬火腿及辣肉腸火腿，每款各有20克。火腿質素唔錯，特別係辣肉腸，帶煙燻鹹香。佢哋配以橄欖粒同自家製酸種麵包食，好搭調。第二道菜係Toast，我要咗生牛肉他他多士，原本有啲驚生牛肉會腥，不過佢混入咗青蘋果/青瓜粒，多咗一份甜香同添加爽脆口感。墊底嘅多士同前菜唔同，質感鬆軟好多。第三道菜係Tapas，香煎慢煮八爪魚，八爪魚腳幾大條，肉質比想像中軟腍，一啲都唔硬。八爪魚除咗煎香，調味上亦心思十足，其中泡菜蛋黃醬最特別，鹹鹹辣辣，似曾相識嘅味道。第四道菜係主菜Main，我哋揀咗招牌西斑牙海鮮炒飯。雖然個碟就唔巨型，不過份量都唔少，兼且相當足料，海鮮有三文魚籽、鮮蝦、魷魚同埋左口魚邊等。炒飯惹味得嚟，唔會太重口味，但同時又能吸收海鮮精華。第五道菜係甜品Dessert，我哋加$25要咗特濃朱古力心太軟配柚子雪葩。心太軟切開後，軟心朱古力一湧而出，蛋糕層有些少海綿感，朱古力味香濃，但又唔會太甜。柚子雪葩好大球，好似飲緊柚子蜜咁，但我覺得同朱古力唔算好夾。我加$78要咗西班牙果酒Sangria，佢係西班牙菜唔可以或缺嘅一部份。紅酒底感覺最原始，入面加咗唔少水果，開頭覺得酒味幾重，但飲飲下習慣咗，就直頭唔覺得係酒。題外話，伴旁嘅係餐前小食，有螺肉同芥末八爪魚。總括嚟講，估唔到啟岸竟然隱藏咗一間高質Fusion西餐廳，每道菜都感受到廚師用心烹調，而且食材配搭亦講究。我認為餐廳定價較進取，不過食物質素都對得住個價錢嘅。…查看更多

中午約咗舊同事食午餐，我哋幫襯咗旺角嘅「雙魚座咖啡館」，因為之前經過覺得店舖裝修好靚，係旺角鬧市中嘅綠洲。餐廳環境唔錯，裡裡外外都帶畀人小清新嘅感覺，而且我哋有幸坐喺窗口位，陽光照入嚟份外舒服。我哋嗌咗兩份午餐同一個小食，望落去已經覺得好繽紛，食完飽晒，未有機會食埋甜品。牛油果醬煙鴨胸粟米Pizza($88)，薄餅堅薄，餅底好似餅乾咁脆，所以食落唔飽滯。Pizza足8吋、可以分成6塊，餡料豐富，墊底有牛油果醬，而上面就有粟米粒同鴨胸。烤大啡菇野菌意大利飯($88)，意大利飯充滿醬汁，每粒都沾上濃郁嘅忌廉同芝士，中間仲加入咗唔少雜菌粒。除始之外，Risotto仲附有切咗片嘅烤大啡菇，菇香撲鼻。咸蛋黃單骨雞翼($38)，我哋加配咗小食，一客雞翼有四件單骨。雞翼外層被金莎鹹蛋黃醬所包圍，食落好惹味兼邪惡呢。即使係單骨，但其實都好大隻呢。飲品方面，我要咗熱伯爵紅茶，熱茶無糖，簡單好飲、助消化。朋友要咗熱鮮奶咖啡(+$25)，Latte嘅拉花好靚，飲落口感順滑，而且又唔會太苦。總括嚟講，餐廳各方面都唔錯，食物出品有水準，服務態度亦親切。雖然我唔好咖啡，不過我諗小店喺依部份幾專業，餐牌上列出超多款唔同來源地嘅咖啡，咖啡愛好者可以到訪試試啊。…查看更多

之前喺Freshlane食過西餐，今次就輪到中菜，店舖名叫「女鍋」，佢主打住家菜，即係家的味道。佢所提供嘅菜式幾特別，唔係四周圍都食到，而且以小菜為主，並唔係客飯，即係適合加餸，等阿媽煮少樣。滋味沙嗲牛腩邊($68)，牛腩煲超正，大大盒，無論汁定肉都勁多。沙爹味香而不辣，但並唔係東南亞沙嗲串燒嗰種。牛腩邊似鮮牛肉片，不過肉質就係一絲絲，出奇地幾嫩滑。香煎蓮藕釀蝦米鯪魚肉餅($48)，呢個係真蓮藕餅，面頭有一片完整蓮藕，造型逼真。鯪魚肉餅唔腥，落咗蝦米增添香氣，而且仲有粒粒爽脆蓮藕。香脆金沙軟殼蟹($78)，軟殼蟹好巨型，外層經油炸，並蘸上鹹蛋黃金沙醬，幾惹味。不過我就略嫌炸皮唔夠脆，偏硬少少。黃金鮮蝦腐皮卷($28)，腐皮卷有兩條，腐皮炸得酥炸，配上喼汁食，好搭調。腐皮包裹蝦蓉，雖然無原隻咁爽彈，但蝦香更勝一籌。總括嚟講，高手在民間，佢嘅菜式別具特色，沙嗲牛腩煲同鯪魚肉餅絕對值得一試。佢另外仲設有套餐同盆菜，有機會可以幫襯下！…查看更多

而家好多地方都開咗Freshlane，雲集咗唔同高手在內，呢日去開旺角又開App睇吓，就見到有間叫「CHEF'š LABS」。菜式選擇都幾多，而且亦有做到會服務。食物即叫即整，熱辣辣送上，份量都幾多，但當然價錢就唔算好平。松露野菌忌廉汁扁意大利麵($78)，扁意粉麵條彈牙，松露野菌忌廉汁惹味得嚟，一啲都唔覺漏，佢另外仲加咗大量雜菇同洋蔥，即使無肉都唔覺單調。普羅旺斯式蜆意大利飯($88)，意大利飯口感正宗，即係有少少似生米，而唔係單用汁煮到濕晒。蜆選用大蜆，蜆肉鮮甜肥美，其他配料仲包括多種雜菜粒。菠蘿乾咖哩燒雞墨西哥烤餅($58)，墨西哥烤餅一客有六件，烤餅皮軟熟，餡料層則唔算厚。菠蘿乾味道蓋過咖哩味，所以整體偏甜，有啲似鳳梨酥咁，我個人希望咖哩味重啲。脆蟹肉薯丸($68)，炸脆薯丸外層脆卜卜，咬開真係見到一絲絲蟹肉，算真材實料，反而薯蓉就唔係塞到滿。如果唔想乾身，可以沾醬食啊。 總括嚟講，外賣都食到精美西餐🍽，食物質素同賣相都唔會差過餐廳。不過扒類同海鮮嗰啲，我就感覺始終偏貴呢，或許一大班人食就化算啲。…查看更多

放假去咗離島玩，今次去咗坪洲，一落船好近嘅位置，就見到有間餐廳幾得意，因為係和食屋，仲要有榻榻米坐，名叫「茶屋達磨」，感覺別樹一格。我哋去到餐廳啱啱開門，不過店員們都幾好招呼，有禮貌。呢度採用QR code落單，菜式選擇主要係飯同烏冬，以及三文治。佢定價唔少改，主菜平均$70以內有找。明太子牛油烏冬配魚餅($68)，烏冬個樣睇落好頹，不過佢落咗大量明太子醬同埋一大舊牛油，所以其實都好夠味。另外仲有兩件魚餅同紅蘿蔔仔。牛丼($78)，佢同日式當飯專門店嘅出品好類同，不過味道就更加出色，首先牛肉份量非常多，完全遮蓋左啲飯。第二，佢個牛肉汁同埋啲洋蔥好惹味。免治雞肉軟骨串2串($40)，雖然免治雞軟骨串應該係入貨，不過都大大條，熱辣辣。入面蘊含雞軟骨，幾有咬口。提拉米蘇($58)，作為提拉米蘇達人嘅我，當然唔會錯過呢款甜品。提拉米蘇酒味顯著，但唔過火，再加埋軟滑嘅芝士，甜度適中，整體感覺都幾正宗。難怪係招牌菜。焙茶法式焦糖燉蛋($45)，我略嫌焦糖燉蛋有啲細個，但好在味道搭救。佢嘅蛋味同焙茶味好平均，再加埋面層嘅焦糖，非常搭調。紅棗黑糖薑茶($38)，薑茶熱辣辣，飲完個身暖笠笠，呢杯相當滋潤，佢甜得來又未到好誇張。佢個擺盤仲幾靚添。士多啤梨抹茶鮮奶($48)，抹茶鮮奶細滑，抹茶味甘醇，本身嘅甜味比較低，不過撈埋底部嘅士多啤梨醬，就會甜少少。個人認為可以先飲一半，然後先至撈埋，咁就好似有兩款嘢飲咁。總括來講，呢間和食屋水準唔錯，原本有諗過佢係咪做遊客生意，所以啲嘢食到一般，不過出到嚟發現佢好食過市區好多餐廳。如果離開坪洲遊玩，都不妨試吓哦。…查看更多

我久仰「Little Bao小包包」大名好耐，呢日去開銅鑼灣就決定試試。平日夜晚七點幾鐘都已經好爆場，人氣好高！另外環境同服務方面都唔錯。黑松露薯條Truffle Fries($98)，🍟炸薯條並唔係普通油炸咁簡單，而係伴上魯「肉」醬同黑松露沙律醬。魯肉其實係指魯香菇🍄，食落雙重菇香。鋪面仲有黃色一條條嘅醃日本大根，驟眼睇以為係菊花作點綴。薯條偏幼身，似麥記嗰種，薯肉比較薄。墨西哥炸雲吞Shrimp Tacos($98)，🥟炸蝦雲吞一客有四件，雲呑餡真材實料，有原隻爽彈鮮蝦🦐。由於餃皮厚身，所以炸起上嚟同酒樓點心嘅春卷皮有啲唔同，反而似墨西哥脆皮Tacos。炸物以甜甜酸酸嘅菠蘿莎莎同牛油果醬調味，既新穎又搭調。招牌豬腩包Pork Belly Bao($98)，餐廳嘅小包包(Bao)唔係一般漢堡包🍔，因為麵包用上饅頭包，質感非常鬆軟，而且甜甜哋，更能突顯醬汁同餡嘅味道。🐷豬腩係招牌口味，入面夾住四大件慢煮豬腩肉，肉質軟腍，滷得入味，配上pm海鮮茄汁，進一步提升滋味。其他食材仲包括酸瓜、大蔥紫蘇葉沙律同芝麻醬等，成個組合好正，連平日唔食大蔥嘅我都破例食埋😋。同時，我覺得呢道菜有啲似台灣小食刈包。天婦羅軟殼蟹包Soft Shell Crab Tempura Bao($138)，軟殼蟹包係期間限定款式✨，呢個包包比起另一款巨型，而入面隻軟殼蟹就比個包還要大🦀，麵包完全遮蓋唔住。軟殼蟹以天婦羅方式脆炸，炸漿層薄薄的，蟹肉肥美飽滿，仲滲出微微酒香。大包仲夾住一堆蟹籽蘿蔔沙律，蟹籽爆漿脆卜卜，醃蘿蔔都脆，但由於易出水，所以食到尾段個包濕濕哋，稍為影響口感。餐廳嘅甜品同樣係包包🍨，我哋要咗兩款口味，分別係鹽味雪糕包Salted Ice Cream Bao($48)同埋榛子意式雪糕包Hazelnut Gelato Ice Cream Bao($78)，後者係期間限定款式。雪糕包的骰可愛，麵包炸至金黃色，沾上少量砂糖，感覺有啲似四川小食炸饅頭。鹽味雪糕同焦糖醬互相配合，相映成趣。🌰榛子口味即係好似食緊Nutella咁，再加埋朱古力碎，甜甜的。如果兩者比較，我鍾意海鹽焦糖多啲。飲品方面，靚靚粉紅色嘅係🌸Cocktail: Sakura Breeze($88)，佢由伏特加、櫻花、檸檬同薄荷葉所溝成，櫻花味道自然，唔會太甜，而且酒精濃度唔高，易入口。另一杯係🍊Mocktail: Yuzu Maple Soda($58)，第一啖飲完全係衝突味蕾，味道富層次，百般滋味在口中。柚子味最為突出，並同時滲出楓糖香，最後仲有紫蘇葉同海鹽嘅回甘味道，海鹽唔係得鹹，而係帶點煙燻味。總括嚟講，小包包唔係浪得虛名，原本以為只係打卡噱頭嘢，點知味道都唔錯，又有特色，係好出色嘅Fusion菜，推介一試！…查看更多

每次由尖東天文臺道嗰邊行過去諾士佛台，第一間經過見到嘅就係西班牙餐廳「EL CID」。我想試呢間餐廳好耐，朋友接我放工食飯，我就提議不如幫襯佢😆。呢度環境幾舒服，整體裝修都幾靚，充滿民族色彩🌈。由於唔係純酒吧，所以冇隔離舖咁嘈雜，適合同朋友品嚐美食同埋暢談。餐廳菜式選擇繁多，從餐牌上可以見到多款經典西班牙菜🇪🇸。就算唔食嘢，齋嚟飲杯嘢亦OK。佢定價屬中上水平，始終係尖沙咀區吧。西班牙大蝦海鮮焗飯($380/2位)，西班牙大鑊飯Paella口味正宗🥘，飯粒幾有咬口兼入味，海鮮汁香濃而唔重口味，落少少檸檬汁就更加開胃🍋。焗飯真材實料，蘊含多種海鮮，包括四隻大蝦、三隻青口同鱈魚肉等；🦐虎蝦好正、好巨型，新鮮彈牙。焗香草田螺牛骨髓($130)，🦴牛骨髓上面放咗田螺一併焗製，呢個組合第一次見，估唔到又幾夾。🐮牛骨髓好邪惡，油脂滿瀉，鹹香味濃，一啲都唔腥；田螺口感微爽🐚，配上香草同牛骨髓 調味，比起出面用蒜蓉焗更惹味。題外話，墊底嘅鹽山純粹裝飾作用。西班牙特飲Red Sangria($108/杯)，每當去到西班牙餐廳，就會好自然嗌杯果酒Sangria，我鍾意紅酒底🍷，因為最搭調。果酒大大杯，抵飲；另外亦夠晒冰凍。佢酒精濃度同甜度適中，易入口，啱晒女仔飲。冬日特飲Asia Heat($68)，飲品名有個Heat字，原來真係熱飲嚟🔥。特飲由檸檬汁、碟豆花、荔枝同薑味糖漿等所溝成，薑味好突出，飲落暖笠笠，有潤喉嘅感覺。同時，飲品嘅酸味亦都明顯，但又有荔枝嘅甜味中和，可算係百般滋味。總括嚟講，呢間西班牙餐館唔錯👍，食物質素有水準。店員服務態度專業，並介紹主廚Danny曾經到訪西班牙深造交流，廚藝有保證。再者，唔講唔知，餐廳原來已經喺度經營咗三十年，多年來屹立不倒，相當難得！…查看更多

放工同朋友去咗銅鑼灣食飯，佢想食生蠔，所以就揀咗「牡蠣酒場」。雖然我唔好生蠔，不過餐廳仲有好多其他嘢食，唔使擔心😊。呢度環境同氣氛令人舒服，係放工到訪嘅好去處。店員服務態度有禮，清楚菜式內容，並主動提供協助👍。餐廳所提供嘅菜式涵蓋生蠔、串燒、小食同麵食等，當中融匯西日烹調煮法。顧名思義，餐廳主打生蠔，👨🏻並有師傅即場開蠔‍，佢引入日本各地嘅牡蠣，並用上地圖顯示來源地🗺️。朋友揀咗德島鳴門($98/中Size)同北海道Maruemon($88/中小Size)，兩款大小相若，共通點係重海水味同爽口，而後者則再濃郁啲同Creamy啲🦪。由於啲蠔靚，所以推薦原汁原味品嚐。不過如果想要新意思，可以試吓餐廳嘅特調口味，例如有泰式青檸同海膽牛肉清湯等。煙三文魚Mousse薯仔沙律($88)，🥗沙律好大份，上層係田園沙律菜，而下層就係由粒狀同糊狀嘅薯仔所混合而成🥔，食落凍凍哋，幾正；入面仲加咗煙三文魚慕絲，但煙燻鹹香味就未算突出。天婦羅明太子($68)，明太子菜式食得多，但原裝連薄膜食都係第一次。明太子以紫蘇葉包裹，再拎去油炸成天婦羅🍤，顆粒口感微脆，並散發辛香同鹹味，紫蘇葉則發揮清新作用，兩者相映成趣。醃帆立貝薄切($128)，帆立貝薄切有成十片，每片均配以爆漿三文魚籽同刁草🌿，再灑上少量胡椒粒。調味能夠突顯帶子嘅鮮甜，而且一啲都唔腥，開胃。蒜片欖油蝦($78)，🦐Tapas包含四隻去殼大蝦，蝦肉新鮮爽彈，而且用蒜片欖油爆香勁惹味，如果有麵蘸沾嚟食就一流。同時，小食仲配有蘑菇、車厘茄同洋蔥等伴菜，相當豐富。吉列千層豬柳($48)，🐷豬柳上碟時經已切件，一客有四件，份量適中。從平切面可見到佢真係一層層，而中間仲夾咗塊葉添。吉列炸皮酥脆唔油膩，同肉芯緊貼，而肉質亦唔嚡；沾蛋黃醬食好搭調，海膽忌廉意大利麵($198)，🍝意粉偏幼身，麵質富嚼勁，浸泡於淺黃色嘅海膽忌廉汁之中，味道濃郁，再配埋甘甜嘅海膽，非常邪惡🤤。不過記得要襯熱食，否則食到尾段就遲免唔到有少少溜。串燒: 玉子免治雞肉($40)，🐔餐廳自家製作免治雞肉棒，雖然餐牌無寫，但佢都混入咗雞軟骨，以添口感。免治雞肉本身多汁，再蘸埋玉子醬油食🍳，味道更有層次。串燒: 牛柳($58)，🥩牛胸腹肉斷貨，餐廳換上牛柳取替。牛柳幾高質，肉味濃，似食緊牛扒，但略嫌醬油落得重手咗啲，不過配送洋蔥，加分。串燒: 牛舌($38)，👅牛舌用鹽燒，簡單唔花巧。牛舌夠厚又爽口，但唯一挑剔嘅地方就係三件大小不一。串燒: 黑豚小排肉($38)，🐖黑豚小排用上腩位，燒起上嚟充滿油脂香，而食落又未至於一口油。飲品方面，我要咗沖繩雜果梳打🍹($48)，味道重橙香，亦有啲似Fruit Punch，最緊要係唔太甜。除咗特飲，餐廳仲有好多酒精飲品，如威士忌同燒酌梳打等。總括嚟講，呢餐食得好暢快，菜式選擇繁多，每樣都好味道😋，而且定價喺銅鑼灣區其實唔算貴，如果餐廳有埋甜品食就完美啦！…查看更多

有時中午放飯想散吓步🏃‍♀️，我都會行到去馬頭圍道、崇潔街嗰邊。新樓盤啟岸樓下有成條食街，入面充斥着各式食店。呢日想食台灣嘢🇹🇼，就揀咗「真台客」。小店係外賣店🥡，主打台式飲料、便當、拌麵、炸物同小食等。食物單價唔算貴，但只有學生優惠；如果有加配選項或套餐，定必更吸引。雙拼便當($65)，🍱便當可跟配唔同餸，而雙拼就可以一次過滿足兩個願望，拼完後每款餸嘅份量亦冇變到太少。唔鍾意食飯嘅我轉咗拌麵🍜，麵條呈扁狀，有一定厚度，口感軟硬適中。拌麵唔會太乾身，叫做有少少汁撈，如果有得揀麻辣味就正啦。拌麵本身跟唔少配料，例如有半隻滷蛋🥚、粟米粒🌽同埋爽口菜脯。滷排骨有半塊，🐷連骨豬扒肉質軟腍、多汁，滷得幾夠味，而且無油炸咁熱氣。鹽酥雞有六大粒，🐔炸雞具台式風味，皮薄酥脆，同肉身緊貼，食落唔會得層皮。花枝丸($36)，🦑花枝丸新鮮炸起，特別大粒。每粒花枝丸都好彈牙，而且食到魷魚肉，灑上辣粉同味粉食，份外惹味。花枝丸一開二，約有十二件，都算幾多。黑糖冬瓜鮮奶($26/700ml)，凡惠顧任何便當，加購飲品可減$10🈹，所有飲品均適用。飲品分兩個Size，其實細杯嘅都有成700毫升，我認為已經超級大杯。🥛鮮奶幾好飲，即使係黑糖，不過都唔會太甜，而且口感順滑，但冬瓜味就未算太突出。總括嚟講，呢間台式外賣店嘅出品唔錯，食物即叫即整，熱辣辣送到手中🔥。如果下次再嚟開附近，我都會考慮幫襯。…查看更多

放工約咗朋友去K11食晚飯，我哋不約而同地揀咗「NINETYs」，因為之前一齊喺灣仔幫襯過，而且K11店環境唔錯，中間有大大棵樹，感覺幾清新舒服🌿。餐廳所提供嘅菜式幾特別，每款都經過精心設計，食材配搭睇得出有花心思👍。但由於無做套餐，價錢稍貴，後尾我先發現網上訂枱有折，蝕咗😣。Boston Lobster Barley Risotto($238)，🦞顧名思義，主菜由半邊波士頓龍蝦同意大利飯所整成。龍蝦以芝士焗製🧀，穩陣地好食。意大利飯係變種版，因為餐廳以薏米取而代之。薏米大大粒，掛滿軟芝士同龍蝦湯汁，食落口感幾得意，而且冇咁飽滯，亦都健康啲。Asian Style Citrus Spring Chicken($198)，🐔春雞好大份，有兩邊脾同胸肉，即係集齊最多肉嘅部位。雞肉肉質細嫩，雞皮微脆，並滲出少少柚香。同時，菜式仲附上兩隻溫泉蛋🍳，一督即刻爆曬漿。我哋冇睇清楚餐牌細項，原來呢碟都配以薏米，同另一款撞咗，不過好彩味道都清爽，仲多咗粟米同果仁添。總括嚟講，今晚嘅晚餐賣相精緻🍽，味道別具特色，可能有人會認為調味比較淡，但就正正能突顯食材本身嘅味道。最後，店員服務態度有禮，抵讚！…查看更多