Kabii的個人專頁

兩個唔食辣嘅人，為咗酸菜魚，竟然膽粗粗走入「祥仔辣辣」！一坐低，見到有個套餐幾抵，包咗6款餸，另有甜品，原價$398/2位，如果係The Food Story會員，$288/2位，一來個餐已經有酸菜魚，二來又唔駛諗再點啲乜，諗都唔諗，即刻落單...阿姐問我哋要咩辣，我哋兩個異口同聲：「𝐁𝐁辣」！• 川味口水雞雞肉嫩口，亦冇乜骨，雞皮爽口唔肥，雖然見佢成碟都係紅油，但入口又唔係想像中咁辣！• 水晶酸辣粉薯粉口感煙韌有咬口，每條粉都好掛汁，越食越辣，而且幾油，要放落碟酸菜魚度浸下，以減低辣度，我哋兩個食到投降...• 祥仔招牌酸菜魚酸菜魚賣相幾吸引，湯底味道帶酸，無骨魚片入口嫩滑，而且份量幾多，配菜亦有大荳芽、萵荀等，唔錯！• 乾煸四季豆好鍾意呢道菜，四季豆煮得乾身唔油，入口爽脆，連埋肉碎一齊食都幾惹味！• 高麗菜豬肉餃 / 酸菜牛肉薄餅呢兩道菜冇乜特別，味道一般！• 甜品(核桃包)賣相幾得意，包身軟熟，核桃餡料幾多，而且唔甜，可以試吓！…查看更多

上環應該冇人唔識「科記咖啡餐廳」，佢哋以豬扒打出名氣，所以小店門外總是擠滿人龍！- 金牌豬扒飯+凍檸茶 - ($58)看似單調的碟頭飯，只有豬扒、豉油汁和白飯。小店會將一大塊連骨豬扒剪成小件，方便客人進食。即叫即煎嘅豬扒醃得好入味，啱啱煎起比較辣口，豬扒厚薄適中，加上用人手搥鬆，咬落去肉質軟而扎實，而且豬扒帶有少少肥膏，一啖豬扒一啖飯，好容易就食晒成碟！- 沙嗲洋蔥鮮牛多士 - ($52)呢個多士係我有史以嚟，食得最貴嘅多士，的而且確，貴得有道理！多士對角一開為四，攞上手辣手，明顯係即叫即整，裏面夾咗熱辣辣嘅沙嗲餡，咬落去多士烘得酥脆，嗰種酥脆感，我好鍾意！餡料多汁但又冇整濕塊多士，將炒香咗嘅洋蔥同鮮牛夾係中間，份量都幾多，牛肉食得出係鮮牛，而且醃得入味，嗰種沙嗲香同洋蔥香味，喺口腔裏面纏繞，好味到不得了，貴還貴，但係佢交足貨俾你，呢個我真心極力推介👍🏻👍🏻👍🏻門口幫手落單嗰位伯伯手字幾靚，我忍唔住影低左😂…查看更多

呢間「嘉寶」，唔係獨沽一味，只賣牛嘅Burger，佢哋有雞、豬、羊、蝦、素嘅Burger可以選擇，有好多唔同嘅配搭，悉隨尊便！- 雙層芝士牛堡 - ($50+$13配小食同飲品)兩邊包身烘到脆脆地，漢堡扒算幾厚身，質感唔會實的的，有肉汁都幾Juicy，同埋煎得幾香，夾埋蕃茄生菜一齊食，一啲都唔膩，溶溶地嘅芝士又唔會太鹹，不過食到最尾，啲醬汁流晒出嚟，食相都幾狼狽！薯條炸得脆身香口，份量都幾多，食完成個餐，真心覺得飽！整體而言，每個包都係誠意之作，餡料有返咁上下厚度，係一間性價比幾高嘅burger 小店！…查看更多

之前見杜汶澤有推介過呢間餐廳，路經炮台山，一定要去試吓！- 鹹魚煎肉餅豬扒飯 - ($50)看似平凡嘅碟頭飯，其實一點也不平凡！呢度啲豬扒都幾大塊，帶香茅味，肉質軟腍，咬落去有口感，配埋佢啲甜豉油，都幾好佐飯！鹹魚肉餅煎得燶燶地幾香口，好香鹹魚味，一個人可以好快清晒成碟飯！佢哋每日都有唔同嘅湯水供應，湯料都幾足，真材實料，起碼飲完唔會口渴，好滋潤，有住家湯水feel，呢個價錢仲包埋老火湯，算係好經濟了！小店性價比幾高，會回頭幫襯！…查看更多

呢間魚湯店，係我荃灣嘅食堂！- 吉列豬扒蕃茄肉碎魚湯飯 - ($50) 因為下午茶時段，仲包埋凍檸茶/凍檸水，好抵👍🏻豬扒同魚湯飯係分開上，所以豬扒冇因為浸湯而影響口感！豬扒即叫即炸，所以入口有啲辣嘴，幾香口！豬扒炸得金黃，剪成小塊狀，方便進食。肉質雖然偏硬，有咬口之餘又唔會太嚡，仍保持住肉汁！講返個魚湯，食咗咁多年個魚湯都keep到水準，蕃茄同肉碎嘅份量，好似多到唔駛錢咁，最重要佢呢個魚湯完全冇味精，食完唔會口渴！…查看更多

西半山開咗間簡約嘅cafe，命為「骨子裡」，之前因為人潮太多，所以一直未有到訪！店舖面積不大，只有幾張細枱。店內的餐牌繪功頗有心思！- Apple Honey Toast - ($45)賣相的確唔錯，係舖頭嘅signature toast，烤烘過嘅多士磚上面放咗5薄片蘋果，灑上少少肉桂粉同加咗啲蜜糖，味道唔錯，幾清新，但索價$45的確有啲貴！- Latte - ($40)Latte拉花一般，同我個friend 嗰杯Matcha Latte相比較為細杯，咖啡味道未算突出，比較失望！進食期間不時有人等位，所以食得比較拘謹，而且性價比低，若果不用排隊等候，可以一試！…查看更多

尖沙咀新開咗間越式咖啡店，店內裝璜簡約，色調以淺白為主！- 招牌火車頭牛肉粉 - ($92)呢碗牛肉粉份量都幾多，幾足料，有肥牛、牛𦟌、牛丸、牛柏葉、蘿蔔...之外，芽菜、辣椒、青檸同香葉另上...食客可因應自己喜好添加！呷一啖湯頭，味道幾濃，湯溫夠熱，越南河粉彈牙又滑，成碗都幾大堆頭！- 蒜蓉牛油雞翼 - ($58 / 4隻)雖然雞翼唔係幾食得出蒜蓉同埋牛油味，不過炸得幾香口，外面脆身唔油，肉質唔係乾爭爭，加分！- 流心芝士蝦多士 - ($70)多士烘得脆口，裏面嘅蝦膠份量啱啱好，熱溶咗嘅芝士有拉絲效果，旁邊嘅side dish蝦片好脆，點埋牛油果醬嚟食，唔錯！- Hot Chocolate with Marshmallow - ($45)朱古力味幾濃，上面有大粒、細粒嘅棉花糖喺度浮下浮下，望落都幾治癒！**整體食物賣相同味道唔錯，唯獨是餐廳內的吧枱和長櫈位置坐得較為逼夾，希望店主可以稍作調整！…查看更多

的而且確，我係為咗佢杯靚靚拉花而嚟！- 雞胸肉三文治配薯條 - ($74)份三文治都幾足料，烘過嘅酸種麵包有麥味，包邊脆口，但包身較韌，比較難咬，雞肉嫩口唔嚡，夾埋沙律菜同蛋黃醬一齊食，整體味道唔錯！薯條份量都幾多，炸得乾身唔油，慢慢食下、點下茄汁，可以將成份薯條食晒！- 黑芝麻Latte ($40)呢杯latte好吸睛，影咗一陣相，杯拉花都冇走樣，芝麻味濃，又唔會太甜，飲到最底，仲有芝麻嘅沙沙口感，大讚，💯！餐廳樓底夠高，較開揚，起碼冇侷促嘅感覺，窗邊吧枱位靠近落地玻璃，陽光照入嚟都幾舒服，的確可以hea足一個下晝！…查看更多

「吾子廚房」一直係我想試嘅食店，唔打唔撞嚟到西營盤，喺冇做booking嘅情況下，膽粗粗走去Walk in，居然有位，我哋行運了！- 月見浮雲親子丼 - ($118)的而且確，呢個係一個好吸睛嘅丼飯。泡沫狀嘅蛋白造成浮雲，中間仲有隻流心蛋黃，好有立體感，真係唔捨得攪勻佢嚟食。蛋白口感綿綿，醃過嘅雞柳好滑，炒飯匀咗鰹魚汁，成件事好夾，好日式嘅味道！- 4.3牛奶富士山奶酪 - ($48)震騰騰嘅富士山造型可愛，奶味香濃滑溜，甜度啱啱好！- 等 一期一會 冬片靑茶 - ($58)茶具幾別緻小巧，茶溫夠熱，茶味回甘，唔錯！呢間小店唔止擺盤靚之外，食物質素都幾有水準！…查看更多

上環有間主打大麻素CBD嘅咖啡店，位置都幾隱蔽，小店座落在斜波之上，店外有幾張小檯櫈坐下，環境唔錯！- Flat White - 咖啡味道中規中矩，冇咩特別，唔好期望飲完之後，會有好大嘅CBD反應，可能我冇加$20，加大劑量啩...😂(𝐂𝐁𝐃有舒緩緊張情緒、減輕壓力、改善睡眠質素嘅功效，同令人精神亢奮、感覺迷幻嘅𝐓𝐇𝐂，大大不同)不過，呢度室外嘅環境都幾超Chill、幾舒服，的確可以令人喺心情放鬆嘅環境下，嘆一杯咖啡！…查看更多

因為「吾子廚房」未開門，我哋就去咗隔離嘅Fineprint嘆咗杯咖啡先！水泥的牆身，黑色窗框，呢度嘅環境幾有外國feel，最鍾意坐喺望窗嘅高櫈位，睇住啲車來來往往，的確可以放空一個鐘！- Cheese Pretzels + Flat White - Pretzels芝士味幾濃，而且包身幾有咬口帶點煙韌，我幾鍾意！Flat White，拉花幾靚，擺低影咗陣相都依然冇走樣，咖啡味幾香，口感順滑！喺一個舒服嘅環境享受一個light breakfast ，夫復何求！…查看更多

「營致會館」貴為米芝蓮二星，食物質素同服務都有返咁上下！- 行政午餐 - ($680+10%)•花雕醉香鴿伴意大利陳年黑醋日本溫室青瓜花雕味幾香，鴿肉夠嫩，青瓜爽口清甜，點上黑醋開開味蕾，一道唔錯嘅前菜！•點心拼盤最欣賞係春卷，炸得脆口連一滴油都冇，蝦餃皮夠薄，裏面嘅蝦仁好大隻，彈牙夠爽！•松茸菜膽燉原隻南非鮮鮑一道幾清嘅燉湯，每碗都有原隻鮑魚，唔錯！•豉汁帶子蒸白玉豉汁味道幾香，帶子夠爽，連埋豆腐一齊食，味道啱啱好！•豉椒京蔥爆澳洲和牛柳牛柳夠嫩，醬汁夠濃，但唔係點食出有牛味！•魚湯雲吞稻庭麵魚湯夠濃，稻庭麵雖然唔係太彈牙，但整體味道唔錯！•營致甜品有我最鍾意嘅蓮蓉西米焗布甸，💯！整體來講，賣相同味道俱備，所用的餐具亦講究，每道菜食得出師傅嘅心機同功夫，性價比甚高！…查看更多

西營盤這間小店相當出名，門外長期排有人龍，是一間主打內臟的粉麵店！- 豬黃喉+鮮牛肉+牛柏葉米粉 - ($43)食材份量幾多，鋪滿碗面，先呷啖湯頭，湯溫夠熱，味道夠濃，絶不是味精貨色。黃喉口感爽脆，灼得剛剛好，雖然本身沒什麼味道，但以爽脆完勝！牛肉灼有八成熟，略帶點粉紅色，沒經過分醃製，肉質鬆軟有咬口，頗有牛味！未經漂白的黑柏葉，煙韌中帶點爽脆，可見師傅灼淥時間準繩，我就是鍾意這原汁原味！- 豬什米+紫菜 - ($38+$5)P先生那碗的豬什種類頗多，有豬肺、豬粉腸、豬潤、豬脷、豬肚..等，師傅清洗功夫了得，入口完全冇腥臊味，尤其係豬粉腸，入口夠粉且肥美。雖然豬什沒有特別的烹調技巧，但食材新鮮遠勝一切。再加幾滴小店自製的辣椒油，立刻刺激了味蕾！- 炸魚皮 - ($14)他們的炸魚皮不是用碟盛載，而是用膠袋端上，魚皮酥脆，厚度適中，咬下去有「咔咔聲」，而且沒有油炸那種「油溢味」！本身想試蝴蝶腩，可惜一早沽清，所以如果要食好嘢，必須早到，否則後悔莫及！…查看更多

有一段日子冇幫襯勝香園，咁啱要去中環睇牙，見冇乜人排隊，就直接坐低！- 蕃茄牛肉通粉 - ($33)蕃茄湯顏色紅得有啲假，望落去好似落咗茄膏整成，同「星座冰室」嘅茄通色水好有分別...先呷啖茄湯，茄味並唔係想像中咁濃，味道微酸，湯身較稀...牛肉入口較靭，冇乜牛味...雖然食完唔會口渴，但整體味道冇以前咁好，而且份量好似縮咗水咁，唔係成碗滿，有啲失望！- 凍檸茶 - ($15)茶膽幾靚幾有茶味，呢度啲凍檸茶會預先幫你篤埋檸檬...究竟係食物質素下降？抑或係我變得嘴刁？…查看更多

我一向都幾鍾意同啲朋友叫餸食飯，「楚撚記」好有港式大排檔feel，佢哋嘅菜式選擇幾多，食物質素頗高！- 香煎黑松露手打蓮藕墨魚餅 - ($95)墨魚餅煎得乾身唔油，食落香口仲有好香嘅黑松露味，再加入爽脆蓮藕增加口感，唔錯！- 酥炸黑松露芝心手打乒乓球牛丸 - ($95)呢個芝心牛丸食嘅時候一定要小心，因為會爆漿，而且射程都幾遠😂，牛丸輕輕炸過彈牙，一定要趁熱食！- 金沙蛋黃九肚魚 - ($82)九肚魚蘸咗鹹蛋黃去炸，食落有沙沙嘅口感，非常邪惡，鹹蛋黃味濃，而且炸衣唔厚，炸得乾身唔油，咬落去外脆內軟，新鮮滾熱辣炸起，然後即刻上枱，冇得輸！- 豬潤蒸排骨另加陳村粉底 - ($76+$15)呢一個餸份量幾多，滑滑嘅陳村粉吸收晒豬潤同排骨嘅精華，好入味，豆豉幾多，令排骨好有豆豉味！- 難忘海港蝦醬骨 - 海山骨($96)一節節嘅豬仔骨，沾上蝦醬去炸，咬落去好香蝦醬味，肉質唔嚡而且香口，餸飯一流！- 金銀蛋浸時蔬 - ($63)食得咁多煎炸嘢，清清地叫一道菜，唔想食咁多濃味嘅朋友，呢一個係比較健康嘅選擇！- 猴頭菇蟲草花淮山螺頭煲豬骨湯 - ($95)湯溫夠熱味濃，夠滋潤，而且毫無味精，好有住家湯水feel！- 豬油撈飯 -($12)唔係度度都有得食豬油撈飯，白飯用一個砵仔去裝住，幾別緻。豬油同豉油，按照自己嘅喜好添加，一次半次，邊理得咁多所謂嘅膽固醇吖！- 黑金流沙奶黃壽桃 - ($10/個)黑沉沉嘅壽桃賣相可愛，咬一啖啲奶黃好澎湃咁湧出嚟，仲要熱辣辣啱啱蒸起，小心燙口！食完飯每位仲有糖水送，凍嘅有清補涼，熱嘅有番薯糖水，飽晒！小菜款式好多，而且價錢唔貴！我哋四個人，叫咗咁多個餸，埋單每人$200有找，抵食！…查看更多