fffunny的個人專頁

新舖開張！！嚟試新嘢先呢度環境都幾好，夠清靜，店舖細細，枱就係得幾枱，幾好坐。我地一行四人去到唔洗等位就有得入座喇。今晚餓餓地，一口氣叫左兩個burger, 一個fidh & chips, 一個ribs, 同埋兩隻龍蝦！第一個burger係羊扒堡，未上到枱已經聞到勁香，食落口係少少辣，羊味濃得黎又唔覺好so。第二個burger一致好評！係軟殼蟹堡！啲蟹腳係叉晒出黎架！勁足料！一咬落去脆到呢…軟殼蟹burger我呢啲鄉下妹真係第一次食驚喜十足！Fish & chips更有驚喜，fish行啲講句真係好有魚味一啲雪藏味都無，完全做到外脆內軟，同chips都炸到岩岩好，其實個人認為…好食過西貢某名店好多。重頭戲係兩隻龍蝦！一碟一隻咁上枱已經勁搶眼。龍蝦真係好新鮮，肉咬落去勁爽，啖啖肉，用呢個價錢就食到真係以為係勁細隻，估唔到都有返咁上下份量，抵食！食到最後，份量十足嘅ribs登場。真係有相逢恨晚嘅感覺，個個都食到飽飽地，不過好彩個ribs都勁正，肉汁多到呢…個個都嗌飽，最後都係清晒所有野食。最後不得不提老闆！初初以為佢係伙記仔，人少少同佢傾偈，先知佢係老闆！年紀輕輕，落手落腳咁做，又肯聽我地啲客仔嘅意見，好抵讚！到我地食到八點，人開始多，開始要排隊等位，好彩早左嚟食炸…查看更多

大圍呢邊好多糖水舖，今次試下呢間叫左呢個叫咩名我都唔記得喇。。就係抹茶布甸底，加個抹茶味雪榚球，側邊有丸子同紅豆。雪糕球考唔唔到呢家店嘅真功夫，反正都係現成，抹茶布甸個味唔錯，比起得個甜字我更鍾意佢帶點澀味，口感都夠滑唔會鞋，可惜。。個布甸雪得唔夠凍個温度對布甸黎講係有啲尷尬。。破壞晒整體感覺，個布甸都因為咁減晒分。丸子更加係扣分位，稔到一啲口感都無，真係一pat野咁，温度同樣係暖得好尷尬。。不過有紅豆配抹茶就一定唔死得，一定好match, 如果能夠雪凍啲啲野就好喇。…查看更多

呢間野長期都要等位，難得下午茶時段經過有位，就入去食個下午茶啦叫左個下午茶set 蕃茄湯米線配炒蛋同花枝丸，見有得揀辣咁得意就揀左個最小嘅辣試下，食落其實都幾辣辣到唔係幾食到個蕃茄湯嘅味，嘥左。。 個炒蛋都幾出色嘅，花枝丸都幾爽口，但下次黎我一定唔要辣湯底。。。…查看更多

呢度最出名係B仔涼粉，但兩個人食唔晒一個，就叫左個雜果涼粗，B仔雞翼尖同芒果pancake兩份食。講真雜果涼粉咪就係涼粉上面加啲雜果，都唔預有咩咁特別，就算加左花奶都唔覺有奶味，可能個底太多涼粉水，反正個涼粉就係無咩特別啦芒果pancake係幾足料，係好多cream.... hahahaaa 芒果都夠甜嘅重頭戲係雞翼尖，開頭第一啖真係滑溜溜，又入味，但食多幾隻，就越食越辣😂不過真係好和味，又扺食，幾過癮。…查看更多

早幾日行行下旺角，又唔係咁肚餓，就求其揾間cafe坐下食下野，呢度感覺都唔錯，坐得幾舒服，同格黎枱又唔會好近搞到好逼咁。叫左個all day breakfast, 朱古力香蕉窩夫，兩杯野飲，薄荷梳打同香蕉朱古力，明明加埋我地都係得三枱人，但係啲野都係好耐先黎，all day breakfast啲炒蛋係幾滑，不過上到枱居然已經凍左大半，如果熱辣辣咁食相信會更好。煙肉略嫌煎得過左龍，全塊都係硬嘅，脆卜卜咁.....我就真係唔多接受到喇，火腿就正常好多，但兩者都偏向多油，同埋都係凍左大半.....窩夫就正正常常咁，外邊脆得剛好，又唔太甜。朱古力香蕉窩夫相對下就好好多，香蕉有火炙過，幾得意，朱古力雪糕都好正呀，有朱古力薄片喺入面，窩夫都烘得ok, 整體感覺都好match。野飲就爭少少喇，香蕉朱古力得朱古力味，得好微弱嘅香蕉味，而且朱古力感覺都粗糙啲，唔夠滑。薄荷梳打就ok,好fresh,唔會澀。…查看更多

呢間pizza店，咁多年黎都係平靚正！一講話想食pizza, 會諗黎呢度食，會多過幫襯某連鎖pizza餐廳。呢次黎到有少少失望，店員妹妹啲態度同面口真係唔要得，全程冷淡無笑容，不過緊要嘅，都係黎食好野姐，叫左個二人世界餐，有個八吋pizza, 一個飯，一個意粉，兩罐野飲。今晚兩個人都麻麻地肚餓，叫左個巴西八吋pizza, 有肉碎，青椒，洋蔥，配茄汁，雖然啲料好簡單，但食落就覺得好有誠意，超多肉碎，而且粒粒都大大粒，料好多，餅邊同餅底又夠爽，食落好香又有咬口，八吋兩個人食真係差唔多喇。意粉揀左茄汁司華力腸意粉，其實我係想嗌辣肉腸意粉，不過都好好食，茄汁夠多可以撈晒成個意粉，喺出面食最驚汁唔夠搞到成個意粉好乾又無味，次次黎呢度食都無呢個擔心，因為知佢一定足料！由於我地唔太餓，將原本個飯轉左雞翼，要加$5，呢次真係叫錯野喇，叫左香辣雞翼，我唔記得左影相，但呢個香辣雞翼真係幾搞笑，係原味焗雞翼上面吱左一大堆辣椒醬上去，咁樣就係香辣雞翼@@係一大堆！食落仲出事，呢隻辣椒醬係平時食乾炒牛河落果隻....講真真係唔多夾，原味好食好多，以後一定要叫返原味！…查看更多

路經呢條新屋邨，岩岩夠兩點半，揾個下午茶食下先：p金鳳都算係響噹噹老字號，估唔到會喺度開分店！食下午茶又要飽肚嘅話，雞脾沙律真係一個好選擇，雞脾係炸嘅，老老實實有啲失望，好似炸過左龍，啲肉乾左水，無咩肉汁，有少少鞋口，不過皮就真係幾脆，我個人鍾意食雞皮，所以加返啲分啦沙律簡直係我嘅大愛！唔係薯仔沙律，係鮮果沙律！而且係加左西芹嘅鮮果沙律！哈哈 我知有好多人唔鍾意，但我真係大愛呢個沙律，食落又新鮮又爽口，咬落烚烚聲架！呢個下午茶$25，環境不錯又幾好坐，Nice!…查看更多

次次一買左vip卡都要食多幾次，食返抵張卡去今次又4個女仔過黎食，例牌要叫返個自助沙律，一隻碟任你夾滿佢，青瓜片夠爽好新鮮，次次都夾好多，通粉類，水果選擇都好多，仲有5種醬可以揀。黎得一定會食ribs, 邊位燒到脆卜卜，汁夠惹味，易甩骨，入面啲肉又juicy, 不枉我對佢念念不忘。肉眼扒五成熟就最正喇，內裏帶點血紅，肉質剛剛好，黎ruby簡直係肉食動物嘅最高享受…查看更多

朝早好想去飲荼，遠遠地都要行去稻香飲，因為真係好扺！十點半去到都唔洗等位，不過去得稻香都預左搭枱多架喇，無所謂啦，黎返壺普洱先，夠晒濃，水都好夠滾！首先叫左個孖寶餐，鳳爪排骨飯加油生菜都係$17！ 排骨飯都幾入味，飯底粒粒分明又夠軟，排骨都剛好夠甩骨。次次黎都會叫花枝餅，但今次個面煎得唔夠脆，次次食蝦餃有啲悶，所以叫左貢苗餃，都幾驚喜，皮係滑溜溜，入面餡好甜好多汁！不過叉腸就曳啲喇，皮厚又唔滑！牛肉就普通，無特別。以呢個價黎講，真心好滿意。…查看更多

同好友相約黎呢度嘆high tea,前一日book枱都仲book到，好彩炸～一黎到坐低waitress好好笑容咁招呼我地，好nice架。我地叫左個蘋果主題嘅high tea set, 等個set期間仲有現場演奏，又好聽又浪漫。個tea set黎到不免要影返一輪相先，因為真係好靚好精緻，特別欣賞咸點，好多detail位，少有地我鍾意咸點多過甜點, 有個用蝦整嘅我最鍾意，真係想食埋朋友果份 哈哈呢個set話係蘋果主題，我都好鍾意蘋果，有蘋果薄批，蘋果饀嘅小點，其實好多我都講唔出佢個名堂，但啲有關蘋果嘅野食都好fresh，甜甜酸酸，係用好新鮮嘅蘋果整嘅，唔會一味得個甜字，好滿意呀，仲好飽tim!遲d等佢轉主題要再黎試過…查看更多

本人真係好鍾意食雞煲，但今次雞煲經歷真係嚇得我怕怕......叫左個小辣雞煲，老老實實，我唔係食得好辣嘅人，呢煲野食到尾唔麻又唔辣，可能我唔好叫左小辣啦，但啲雞肉真係好鞋，啲雞份量係好多嘅，但我食左幾舊就收手喇，留返俾朋友繼續食埋去。到打邊爐果part算正常啲，但我始終覺得肥牛梅梅地，花膠真係有膠味.....埋單每人150係好抵，但呢下次有人請我食我都唔會黎喇…查看更多

聽聞呢間隱世拉麵有特色又好食，特登同朋友黎試下。間舖真係幾隱蔽下，所以都揾左陣。去到咁岩有位唔洗等，內裡先睇到係用木板圍間舖出黎，啲凳係用汽水箱疊成，講真係幾唔好坐，但勝在夠特別。我點左個赤伝拉麵，朋友點左黑伝，拉麵上枱時店員都好細心咁講解一次，要將拉麵浸入湯食。我個赤伝拉麵係蕃茄味，咸味較重，無乜甜味，食耐左會覺得太咸，同埋越食越口渴，睇黎落左不少味精。叉燒口感不錯，仲俾左全隻溏心蛋。店員見我地食到咁上下會主動加清湯。加左清湯後就無咁咸，易入口好多。朋友對於佢個黑伝(即黑蒜油湯)，都係話太咸喇。…查看更多

早幾日得9度10度，喺旺角掃完街，先5點幾，仲係好肚餓，趁早去陸陸度碰下運氣攞位，去到陸陸應該岩岩開始晚巿，我地無book枱都有位，時間限左個半鐘，6點入座可以食到7點半~坐底黎左火龍果同橙做餐前水果，即刻嗌左個中辣雞煲(半隻), 個雞煲攞到上枱無開始煲已經好香。隔住個煲蓋望住入面啲紫洋蔥，真係流晒囗水.....呢個雞煲真係好正啊，又香又入味，中辣岩岩好，雞肉同雞皮都滑溜溜，紫洋蔥 洋蔥同青椒真係要趁一開始索左少少汁就食，咁先食到麻辣味同佢地原本嘅香味，仲有保持到個爽口感覺，太耐浸稔左就無咁好食喇！食晒啲雞後，就落清湯開始打麻辣邊爐~嗌左花枝片 響鈴 肥牛同wu冬，兩個人食已經夠晒有突。花枝片極讚！又鮮又爽口！Wu冬係幼條嘅，索晒個湯非常入味;p全程店員都好好招呼，時不時都會過黎攪下個煲，驚會痴底。呢餐食得非常愉快~兩個人飲左三罐啤酒兩罐可樂，埋單$365，抵啦~ 仲送$50現金卷，心思思又想食過喇…查看更多