大小肥貓的個人專頁

好多年無寫食評，呢幾年照顧小朋友，忙上加忙。難得今日與先生均放假，送左小朋友返學後，就試下呢間1直心思思想試既酒樓，前身叫伯爵酒樓，翻新後轉叫呢個名(其實可能都係同1個老闆……嘻)。既然放假，梗係想食得豐富d悠閒d,。來到坐低，整體比以前企理，墊檯布同食具餐椅都新淨。再來睇下點餐紙，有A,B孖寶可選，$26.8~28.8，就來叫2個孖寶加個蘿蔔糕。(抱歉掛住食唔記得影相)叫個蝦餃併牛肉球，雞札併手撕雞春卷，點心來到全部即叫即蒸，熱辣辣，春卷脆卜卜餡夠多，內裡有蘿蔔、芋頭絲、雞肉。蘿蔔清甜令春卷無咁油膩，好味。蝦餃夠大隻，皮同蝦餡都做得合格，又係好味。雞札味道賣相正常，最緊要係熱辣辣。牛肉球夠淋滑，用西洋菜墊底，雖然唔夠彈口，但睇你想食咩口感既牛肉球，個人認為佢算做得好食。最後蘿蔔糕，味道和賣相都正常，以只賣$8.8來講，合格有餘。整體所以點心即叫即蒸，亦交足質素，比上1間做得出色，以街坊價錢，可以食到呢個質素，算抵食好食。如果我住嗰區有呢間酒樓，我就開心死…查看更多

第2次食，都覺得正，上次食$188最平嗰隻，今次多$20，食下有乜分別，今次牛肉雪花比上次靚仔，肉質夠淋，但牛肉味有部份肉出d,有d又冇咁出，不過$208來講，質素算不錯，其他例如串燒，刺身同壽司，同外間放題冇分別，款式當然比純放題少，但亦已經滿足到我食壽司刺身同涮涮鍋3樣要求，最喜歡飲品同甜品，甜品細細件但質素好好，飲品選擇好多，罐裝以至樽裝，汽水啤酒韓式飲品台灣飲品都有。其實以呢個價錢同質素算合理同滿意…查看更多

天寶之前係嘉年華，嘉年華已經好耐冇食，味道冇乜印象。今日約朋友聚聚，打算試下呢間，屋村酒樓從來不敢寄予厚望，唸住味道正正常常就算。1入去唔洗等位，茶芥7蚊，點心有21蚊孖寶，選左4樣，有皮旦粥，豆沙軟餅，蝦餃(3粒版)，羅漢齋腸，最好味係豆沙軟餅唔太甜豆沙餡細軟綿，粥都夠大碗但皮旦較碎濕，齋腸夠份量但料較單薄，蝦餃都紮實。再叫牛肉球，調味幾好夠滋味，金錢肚一般，雞札最後來，入面冬菇入味芋頭好粉淋，好好味，豬皮亦處理得乾淨。 7點心3茶位埋單$130，算抵食，味道好過好多連鎖酒樓好多。 喜出望外，值得再試…查看更多

一向買親團購,不論食得定唔食得既野,都容易買到質素差又因為貨不對辨而換來一肚氣.今次團購印度菜自助晚餐,見佢$118全包價又即管試下,抱住團購會貨不對辦既心態,降低要求,10分滿分比5分既保守心態去試下,食完後我都幾滿意,即刻由5分升返去7分室內環境: 幾有情調，開住柔和既印度音樂，燈光微暗，每檯都有花有蠟燭，雖然餐廳空間細d，但都比8分食物：一盤盤自己夾，有咖哩雞、魚、羊、雜菜，沙律，印度三色飯，燒雞，番茄湯，甜品(只有一種，味道好似煉奶麥皮)， 飲品只可飲一杯，但都有酸奶選擇，飲一杯都$30啦，整體款式唔算多，但味道唔錯，比7分服務：3位印度/外籍侍應，2位男侍應整晚保持微笑，睇得出佢地雖然做得緊張(因當日全場爆滿)，但都服務周到， 又識講下笑，比8分整體上今次用團購價來食，都算滿意，亦都食得開心，如果下次佢再做團購，我都會再幫襯…查看更多

食物質素唔差,不過配給制,張食物紙唔准寫食物數量,只可以剔食邊種食物,寫紙又漏單,張紙仔寫2人佢又真係每次比2人份量,蠔2粒,牛肉3小塊...寫3張就來得一張紙既食物,最終食菜(出去任拿,唔係配給制所以可以食好多)食飽,最貴既海鮮就只係食左一轉,仲要係只有2人份量,每人淨係食左一隻蠔咁大把!!!特價時段去都要$128~~~~食完仲成身勁臭既火鍋味,抽風系統"一流"~~~…查看更多

是日同朋友一家三口來富臨,原本想來個$98任食火鍋,但見到5歲以下小朋友要收$88,覺得唔化算,所以轉食小菜三大人一小童,叫3個餸,芝麻脆皮雞($48)+木魚豆腐番茄($58)+鐵板黑椒豬手($78)芝麻脆皮雞:果真做到皮脆且薄,雞肉尚算嫩口,雞味就唔太濃,但有薑蔥同沙薑汁點,$48呢個價都算抵食木魚豆腐付竹番茄:麻麻地,賣相唔好,d玻璃獻汁杰到似透明鼻涕,豆腐係超市盒裝豆腐貨,滑得來無乜豆腐味,木魚碎放多一陣就濕同淋晒,變成一pet鐵板黑椒豬手:上檯時來個黑椒汁淋落鐵板到,好似去左大x樂食鐵板咁,拿毛巾隔住塊面同衣服,但個豬手就無乜點特別處理過,人地豬手係要先炸過外皮等佢鬆化d,但佢就無,死實實一大舊,睇住侍應落手剪,都剪得幾辛苦下,因為d肉同皮太實,最後個豬手比佢剪到碎濕濕,賣相即時扣分總括來講,佢小菜既價錢都唔算貴,加埋白飯2碗同花生茶芥加一,埋單$268,只係小菜之中仲要花d工夫去處理d小細節,咁先可以做到賣相同味道俱佳…查看更多

早前用團購買左10隻旦撻,分5張劵,由5月食到7月,但每次食每次都失望記得以前係觀塘分店食都幾香旦味,旦漿又滑,$4.5都覺得值得,之後見團購有半價可以買來食,更加覺得物超所值,所以好快決定買5張點知由第一次食,食到依家第三次,比左三次機會佢,都係令人失望皮無牛油香,旦無旦香又唔滑,如果以咁既質素就成為招牌貨的話,大抵佢會連招牌都比自己拆埋希望呢個係個別分店問題啦...…查看更多

金葉子係黃埔時,我地都好鐘意去食,貪佢多款式,又任飲任食,都係百五蚊,好抵食自從佢結業後,我地當經過黃埔時,都好想見到佢重開,不過一次又一次失望直係係飲食雜誌見佢賣廣告重新營業時,我好開心"嘩"左一聲出來,仲要價錢不變,加左喜力啤酒任飲,所以即刻係facebook組個為食團去試食...用好期盼既心情去食,首先叫左龍眼冰同炸物,都仲keep到水準,只係蝦餅細塊左串燒就應該係番炸,好油但無燒既味道,牛肉串燒亦無牛味食左數粒已經無食,呢個係第一個失望柚子沙律碎濕濕,仲有陣魚腥味,有d怪,第二個失望椒鹽豆付真係好唔得,唔信既讀者即管可以叫一碟試試,不過唔好叫佢炒大大碟出來呀,費時浪費,呢個係第三個失望其他如薄餅(太薄又太油),蒜蓉多士(麵包太甜),炒通菜(梗太老)...都麻麻地...不過值得一讚既係佢炒粉麵同樓面服務都幾好,推介泰式炒河,炒金邊粉,好惹味.侍應亦好細心,見我地book4人但成個鐘都係得2人坐係度,佢都問我地點解唔叫野食住等朋友再加上新裝修,卡位好大張,坐得好鬆動,環境都唔迫,所以係服務同環境上都加番唔少分數以呢個價錢,其實加上食材漲價,食物質素用以前比,真係比唔到,但佢舒服既環境+喜力啤酒可樂泰式飲品任飲+惹味炸物炒粉麵,呢幾樣都令我感覺餐廳價值存在,所以雖然對佢有失望,但亦不至於絕望,下次應該都會再返來食…查看更多

一早5月中訂左位,成20幾人,原本以為可以坐另一邊餐廳,有長梳化位,可以自成一角,點知去到SITE VISIT先知餐廳已經封左,得番一幅牆但一心唸住有8折劵,加上之前食既下午茶都幾好,就決定落訂$2000訂位食自助晚餐,最後選左7個卡位(包起一個角落).當晚主題係澳洲和牛,$338(SUN)1位,但出到食物區,似乎有和牛食物/款式唔多,當晚只係食過牛肉刺身(只有一蚊銀咁大,但仲薄過銀幣),黑椒和牛柳同炒薯仔和牛粒(呢個係配給制,每人只有一粒牛同數片蔬菜),其他食物就已經都與和牛無關刺身切得勁細,只有2隻指甲咁大,親戚都忍唔住叫師傅切厚D,冷海鮮一般,生蠔唔新鮮,蟹腳亦都唔夠肥,咖哩算多種類,但我就無興趣食.甜品最正係雪糕同朱古力旦糕,其餘都係一般,侍應服務態度各異,當晚有2個主力侍應,1個就還可以,另1個就做到有D黑面,仲同另1個侍應細細聲講,眼斜住我地,好難唔令人唸起係話緊我地呢班人囉,當晚親戚加錢飲嘉士伯啤酒,起碼飲左10罐,連侍應都忍唔住開口"讚"呢位親戚最後綜合各位意見,大部份都評今次自助晚餐為"麻麻地,但又收費唔算平"....下次都係食返下午茶...至少淨係食熱盤,甜品,雪糕同飲品都賺番…查看更多

一行12人連同親戚去完大酒店辦事,都成9點幾,大家來左呢間食晚餐食左10樣餸...有咸爆有un爆,有貨不對辨,最慘係未試過食椒鹽都食到咸到眼都咪埋第一咸:椒鹽鮮魷...食2塊都咸,咸過咸魚第二un:炸大腸,賣相唔得,似炸田鼠,勁肥勁un,皮又唔脆,食第1塊因為咬唔爛條腸,差d比佢鯁死第三貨不對辨:叫西檸肉排,指定肉排唔係排骨,以為係金沙骨(一字骨),點知來左個西檸豬扒件即時食慾大減蠔餅:唔夠大件,蠔都唔夠多...鹵水鵝件: 普通,唔夠味豬紅九菜:正常鹵水併盤:又係唔夠味肥牛粉絲煲:正常炒通菜:又係偏咸炒聖子:最好味,夠鮮又無沙,所以賣$88都好過上面0個d餸total食左$800幾基本上我唸我地都係叫錯餸,或者叫晒海鮮會好d,又或者叫佢地餐牌減左d難食小菜,咁會挽回多d讚賞…查看更多

認識呢間店,係因為一次星期日出席公司活動,要係地鐵站口集合...個個都未食早餐,眼屎都未抹乾淨就要出來見仲未上車,立即到處搵食,搵到呢間店,再望一望價錢~~~~嘩~~!!!!!!!唔係呀嘛...$5/4個小法包,$4/磅方包~~~點解可以平得咁緊要,仲要係港島區?!點夠賺鋪租呀!!~~~一般餅店九龍新界區,$7-8/磅方包已經係正常價,法包$10-14一條都屬正常,佢係平人地足足一半...家住新界區,難得來一次港島.又有咁平既麵包,梗係唔放過機會啦~~最後買左$15法包,$4方包,拿起手時整袋包頗有份量..証明包含足夠麵粉,唔係輕飄飄一陣風0個種未食先愛死它lu!!第二日用小法包沾黑醋同橄欖油來食,麵粉既香甜被帶出...噢..不得不讚美一句"ma ma me ar"一路食一路唸.....點解佢唔係開係我屋企附近呢~~~T.T我肯定敢講,我每次來呢區,一定會搵佢!!!!!!…查看更多

同朋友來試試鮑魚魚翅餐，見$400都唔算平，希望佢既品質都物有所值啦...試過之後，整體上無甚大驚喜，不過份量較少，男仕食的話就會唔夠食。但以呢個價錢就偏貴，要$400，其實可以有好多選擇....…查看更多

一家14人浩浩蕩蕩訂位6:00pm~9:00pm三小時自助放題，因為人多，索性訂房，餐廳要事先收$500訂金先肯留間房，一坐低不斷叫刺身同串燒，其實唔係因為佢呢2樣野好味道，而係食物款式太少,無乜野可以重覆食刺身款式少又唔算好新鮮，但唔食又番唔到本，唯有大家食6-7回，真係送到侍應手都軟串燒又係一般，牛頸脊肉"un"，蝦唔新鮮肉霉又燒得太乾，好食既就有羊鞍同煙肉車里茄飲品以啤油最抵飲,因為係喜力,其他就一般，甜飲比較淡口...總括來講，以香港咁多放題餐廳，我選擇既頭3位就一定唔會有佢，因為佢款式少食物質素一般價錢又唔平($200@位/3小時任食)…查看更多

同事見到有報紙介紹佢既美食，一直話想試，今晚就由佢帶路，試下係咪真係咁掂...當晚6個人去，叫左7樣餸同4支大啤酒，埋單位位$75，都幾抵食，同人啤啤呻呻工作苦況，人生一大樂也!!講講小菜：西檸雞：大碟雞肉亦算嫩，夏天食最好燒腩：又係大碟，皮幾脆，肉唔會太咸，有青芥辣同濃豉油比你點，淨食都好味炸墨魚咀：炸漿夠脆夠薄，唔會食到一口粉，又唔會太咸，送酒一流釀茄子：用鐵板上好夠熱辣，侍應係你面前剪開錫紙，睇到朋友口水流，釀茄子既除左豬肉外，仲有咸魚，食落咸香惹味，好快比人食清晒蒜香骨：切得細件唔會食得論盡，醃味夠，又係好快比人清晒小炒：又係送酒吹水既必備餸菜，腰果香脆，蝦乾、菜脯、魷魚同九菜花都咸香惹味雙丸浸莧菜：由門鱔同鮫魚打成魚丸，無彈牙口感但有魚既鮮味埋單咁平，d食物又大碟，仲可以同朋友吹足水，呢餐真滿足睇來我又多一間九龍區食堂啦!!!!…查看更多

燒烤癮起，剛搬來沙田，元朗嫌遠，西貢又嫌貴，上來OPENRICE搜查，得知沙田只有呢度有得燒烤。2個傻人就決定係夏日炎炎既天氣走去BB蕉6:30PM左右來到，全場無人，店員見到有人來燒烤，都好似打左個突咁，因為話就話6PM開始有得燒,但我地去到個場連同食物都未準備好。可能佢見大熱天時，都照計無人來燒，所以連場都費時擺。店員都話下次如果訂左位先來就好D!上到五樓穿過桌球會再經過麻雀房，到達天台花園............去到係1個人都無?!原來我地係今晚第一個客人，真係佩服自己為為食而付出既能耐!望住店員將食物一盤盤拿出來，磨拳擦掌....拿住一隻好薄既紙碟全力衝刺，司華力腸、墨丸、魚柳、雞翼....野飲就得一罐，少得可憐2個傻人一直燒，燒到差唔多8PM先有第2檯客來，到我地走既時候，加埋我地，都只係得2檯客,真係要做蝕本生意總括來講，食物算有質素，價錢除左開爐費比較貴D之外，都算合理。野飲少D，得一支，連水都無，但都算係就腳，廁所又比其他燒烤場既乾淨好多，燒到熱又可以入去涼冷氣...冬天應該會帶同沙田友再來.....…查看更多