魚堅日記的個人專頁

路經見到間店舖好搶眼，充滿香港懷舊風格，而且勁多打卡位📸，原來係香港創立嘅品牌《品曲奇》响旺角開咗新舖，當然要入去朝聖下喇。佢哋有創意之餘，仲好有港式風格，而且口味獨特，同時包裝設計亦好用心。店內好多款式都可以試食，可以試到啱先買；仲有多款得獎產品，好似有夏威夷果仁鳥結糖、原味牛油蝴蝶酥、鹹蛋蝴蝶酥、紅棗曲奇、朱古力果仁脆片等。另外仲有好多創意口味曲奇🤩，例如有：蝦膏、XO醬、蔥油雞、紅棗等，最緊要係不含防腐劑及色素，真材實料👍。無論送禮定自肥都一樣咁正，今次買咗👇：🍪果仁脆脆：有原味及朱古力味，曲奇口感非常香脆，美國果仁超新鮮，朱古力味更於2025獲獎🎖。🍪鹹蛋曲奇：曲奇口感鬆化，鹹蛋味濃郁，港式風格亦甚濃。🍪快樂果醬曲奇禮盒：禮盒內有原味、果醬牛油、果醬朱古力及菠蘿果醬荔枝，曲奇口感同樣鬆化，配合面頭口感QQ不同味道嘅果醬，最鍾意菠蘿果醬荔枝，濃郁甜香嘅菠蘿醬配合芳香嘅荔枝曲奇，創意及味道滿分😋。…查看更多

九龍城好食嘅店舖往往亦好平易近人，價錢親民，就好似呢間集港式茶餐廳及大排檔風味嘅小菜館，食過一定會回頭。小菜供應時間由早上11點至晚上11點，餐牌好吸引，好多款式，有豬、牛、雞、海鮮小炒及煲仔，應有盡有，最正嘅就係每碟小菜送一罐指定啤酒，啱哂我哋呀🤩。鮑魚滑雞煲$178煲上熱辣辣，香氣四溢，份量唔惹少，鮑魚厚肉大隻，口感軟腍滑溜亦不失口感，濃郁味鮮；選用文昌雞，皮薄肉嫩，口感Q彈，雞味濃郁，以青紅椒、洋蔥、薑、蔥等爆炒，惹味又滋味😋。🥢爆炒香辣海蝦$158炒得非常有鑊氣，海蝦鮮甜爽彈，少少辣，相信大人細路都能接受，餸酒下飯都好正👍，轉餐加$12，有白飯及湯/餐飲。另外，每日11：00至18：00星期一至日都有供應10款不同款式嘅午餐，星期日有我喜歡嘅黃豆醬蒸鯇魚腩$64，包中湯/西湯及餐茶。🥢黃豆醬蒸鯇魚腩：鯇魚腩新鮮嫩滑，除咗鹹香黃豆醬之外，再加埋薑絲及蔥花，仲有鹹度適中嘅豉油，令魚嘅鮮味倍增。粉葛湯：完全唔係例湯咁簡單，湯頭濃郁又足料。☕️熱檸茶：有湯仲包埋餐茶，你都咪話唔抵👍。…查看更多

每次去開新城市廣場都會諗起呢間餐廳嘅梳乎厘pancake，無論係賣相定味道都係無有得頂👍，當然佢哋其他出品亦都不容 忽視，有供應特色小食、薯條、漢堡包、意大利麵、意大利飯、扒類、窩夫等，都好多選擇。🍴Chicken & Cheese Quesadilla $82墨西哥薄餅夾住濃濃香料味嘅嫩滑雞肉及淡淡奶香又有拉絲口感嘅Mozzarella芝士，並配上清爽番茄莎莎、輕盈順滑酸忌廉、綿滑牛油果醬及柚子醋沙律菜，整體配搭清新又好味。🍴Tom Yum Seafood Risotto $182意大利飯上面全部蓋滿海鮮，珍珠帶子雖然細細粒但口感都好Q彈，原隻虎蝦夠鮮甜，比目魚嫩腍，青口就正常發揮；意大利飯口感煙靭，並附上鹹鹹酸酸嘅泰式醬汁，無論係 拌飯或蘸海鮮都能增添不少風味。🥞Mango Pomelo Sago Pancake $138梳乎厘pancake超有蛋香味，充滿空氣感，口感軟綿入口即溶，芒果醬好有芒果嘅鮮甜味，果醬中帶有西米，增添口感，另外仲有肉嫩多汁嘅甘柚及超鮮香特別嘅血橙醬。🥞Butlery's Pancake $109呢度啲梳乎厘pancake咁正，當然要叫多份喇，呢款簡簡單單，有焦糖牛油、楓葉糖漿及新鮮雜錦水果，同樣有超好味嘅梳乎厘pancake兩件。🍹湄公芒果梳打$35帶有芒果香甜味道嘅特飲，清爽唔甜。…查看更多

呢間串燒店最平都只係$10，而且仲有多款選擇，除咗串燒之外，仲有沙律炒菜、特色小食、飯麵，飲品方面有無酒精特飲、雞尾酒、果酒、清酒，仲有啤酒買一送一超抵。🥢泰式燒墨魚鬚$10口感Q彈煙靭嘅墨魚鬚配上泰式酸辣汁，十蚊雞超抵食。🥢蜜糖燒菠蘿$10甜甜酸酸嘅菠蘿，多汁清爽，確實係食串燒清新口腔嘅好拍擋。🥢樟樹小青椒$10爽脆微辣，帶濃郁嘅青椒香味。🥢鹽燒日本清熱銀杏$15Q彈口感好過癮，燒銀杏嘅獨特風味，一試停唔到口。🥢鹽燒雞腿肉$20燒到雞皮脆卜卜，肉嫩兼爽彈juicy。🥢紫菜鵪鶉蛋卷$20外面係脂香豐盈嘅豚肉片包裹住鵪鶉蛋，再配上紫菜絲，口感豐富。🥢鹽燒牛舌芯$28牛舌芯質地Q彈，油膩豐盈，簡單鹽燒已經好好味。🥢蒜蓉欖角燒蟶子(隻)$38蒜蓉夠哂多，啱哂蒜頭控，蟶子爽彈鮮甜，帶孜然香及微辣，粉絲充分吸收哂蟶子嘅湯汁及蒜蓉香，超惹味。🥢蒜蓉燒蠔2隻$48又係超多蒜落，生蠔大大隻又juicy，滑溜鮮甜，連蠔汁都好濃郁。🥢山椒鰻魚汁燒白鱔$48白鱔皮燒到夠哂香脆，肉質彈牙，脂香甘甜肥美。🥢雞油炒豆苗$58用雞油炒嘅豆苗，特別清甜，爽口唔膩。🥢墨魚滑+紫菜+大蝦$68面層係炸到脆卜卜嘅紫菜，包裹住爽彈墨魚滑，中間係鮮甜大蝦，口感超正。🍺Sapporo生啤$48食串燒當然配生啤喇，仲要買一送一添，啱哂我哋。…查看更多

呢間餐廳，性價比超高，送薯條、送青口大蜆、特惠價一打蠔$98、全晚任飲$158…，食物質素仲好高添，另外仲要有Live Music及open mic時段，咁多優惠，玩成晚每人都係二百幾蚊，今個聖誕真係要book定位。🥢蟹肉牛油果卷幼滑牛油果內藏咗好多鮮甜蟹肉，伴以黑醋，清新又好味。🥢燒紐西蘭羊鞍伴時令蔬菜配燒汁(9安士)羊鞍鮮嫩軟腍中帶口感，羊味濃而不騷，配菜有又香又綿滑嘅芋頭蓉、紅菜頭、雞髀菇及西蘭花苗，配搭豐富。🥢焗龍蝦尾配龍蝦汁意大利飯好細心龍蝦已起肉，輕輕一挑已食到厚實鮮甜嘅龍蝦肉；龍蝦汁超濃郁creamy又鮮甜，汁醬內有鮮茄粒及洋蔥，使得味道豐盈中帶清新。🥢即開法國生蠔 12隻$98已經享有一打生蠔，超抵，呢個優惠係逢星期四五及六皆可享有，生蠔新鮮鮮甜，爽脆中帶點creamy。🥢白酒煮藍青口及白蜆每款6隻(免費)呢個優惠要單點主菜，逢星期一至三及六，送嘅都完全冇揸流灘，青口及白蜆鮮甜新鮮，無沙而且煮得生熟度剛好，配以濃郁嘅白酒汁，帶濃郁嘅洋蔥及牛油香。🥢任食薯條 (免費)星期一至六，單點主菜、意粉或飯就可享有任食炸薯條優惠，仲要係粗身薯條特別有口感，新鮮炸起熱辣辣，薯味夠香，伴以黑松露蛋黃醬及茄汁，夠哂有heart 喇。🍰檸檬芝士餅芝士味濃郁，帶清新嘅檸檬香，食落唔會好甜。🍹The Crunchy Spark 記得要攞定手機打卡，燃點起星星火點好有儀式感；用百香果乾做裝飾好特別，飲落酸酸甜甜，並帶百香果嘅味道，好清新。🍺Suntory黑生啤黑啤係我嘅至愛，帶濃厚嘅烤麥芽及咖啡香；發現原來只係以$158就可以無限free flow紅白酒、啤酒、single mix、果汁及汽水，下次再來嘅時候都要飲free flow。最正嘅係有Live Music 時段，大概19:30左右就有歌手上台獻唱，超級好聽，而且音響仲唔會好嘈，同朋友傾計都絕無問題，大概21:30就有Open Mic環節，係有琴師伴奏㗎，可以同駐場歌手或朋友一同jam歌，氣氛超刺熱。…查看更多

同長輩朋友飲茶除咗要食物質素高之外仲要坐得舒服，今次去呢間酒樓環境高雅有氣派，早茶時段仲有75折添。🥢彩虹鮮蝦餃 $60賣相好靚，餃皮Q彈，蝦肉餡料夠哂juicy。🥢翠玉鮮蝦腸粉 $68粉皮幼滑，鮮蝦大大隻，爽脆又有鮮甜。🥢鮮蝦帶子菜苗餃$58面頭隻帶子鮮甜爽彈，餡料充滿菜苗之餘仲有好多蝦粒，口感豐富。🥢原味蒸小米糕 $48口感軟糯Q彈，帶淡淡嘅小米香，甜度剛好。🥢鹵水豬腳仔 $88豬腳仔鹵水色夠潤澤，豬皮Q彈又軟滑，肉質嫩腍中又有口感，鹵水汁夠香入哂味，濃而不鹹。🥢鎮江水晶肉 $88 豬皮彈牙，凍膠晶瑩剔透，瘦肉酥香，口感豐富，清爽開胃。🫖茶位 $20…查看更多

呢間餐廳食嘅係日本菜，但係裝修走英式華麗型格路線，燈光柔和昏暗，不知不覺間令人放鬆心情。餐廳推出咗全新餐單，今次我哋品嘗咗Tasting Menu 每位$498，包前菜、刺身、主菜及甜品。前菜🥢煙燻日本枝豆煙燻過嘅枝豆特別香，並灑上紫菜及海鹽，佐酒一流。🥢粟米天婦羅外面脆卜卜，內裡粟米爽脆甜香，而且仲好juicy，食落清爽唔油膩。🥢香辣炙燒和牛薄片炙燒過後使得牛味更加濃郁，口感軟嫩多汁，配以香辣醬汁更惹味。🥢香蔥吞拿魚他他+$68綿密鮮甜海膽、卜卜脆三文魚籽、鵪鶉蛋及肥美鮮嫩吞拿魚蓉，混合一齊後再放在脆片上一齊食，口感超豐富。刺身🥢蝦刺身散壽司又綿又甜嘅蝦配上鹹香卜脆嘅三文魚籽及飛魚子，再加上紫菜及芝麻，精緻又好味。🥢柚子炙燒三文魚薄片三文魚與三文魚籽嘅配搭已經無得輸，再加埋清爽洋蔥碎及甜脆小豆苗，並淋上柚子味噌汁，食落清新輕盈。🥢4款頂級刺身+$78件件都好厚切，有帶子、池魚、三文魚及吞拿魚，款款鮮甜好味。主菜🥢薑蔥烤皇雞烤到雞皮微微焦香，雞味濃郁，帶點蔥香及孜然味道。🥢油甘魚鮫煮物唔好睇少個魚鮫位，都幾多肉，魚味濃郁，醬油夠入味。🥢龍蝦尾熱石鍋飯+$138半生熟嘅藍龍蝦尾配以三文魚籽、飛魚子及照燒冬菇粒，與蒜香牛油飯拌混，石鍋熱力迫出蒜香牛油香味，趁熱入口，無論層次與口感都非常豐富，呢款龍蝦尾石頭鍋飯係四手menu中熱賣嘅菜式，原來係Honjo主廚嘅創作，唔怪得之咁正喇。甜品🍧黑芝麻焦糖燉蛋面頭塊芝麻薄片超香脆，中層係甜蜜焦糖雪糕，底層係creamy嘅黑芝麻燉蛋。🍧柚子雪葩雪葩柚子味濃郁，雪葩內仲有柚子皮，口感清爽。🥃Hibiki Japanese Harmony $250帶有煙燻木嘅香味，沉穩柔順，餘韻悠長細膩。🥂Perrier Jouet Campaign $150帶有花香及果香，層次多變，口感細膩。…查看更多

今次去呢間彩福皇宴尖東店大堂超大，枱與枱之間都有適當距離，坐得舒服，仲要由12月1號起，逢星期一至五午市全單有88折優惠，唔怪得知睇下張收據平咗咁多喇。🥢蝦頭油海皇銀芽炒鴛鴦米米粉與粉絲炒得非常清爽，畫龍點睛嘅蝦頭油令到整體味道豐富起來，香口惹味，海鮮有帶子、鮮蝦及蚌片，另外仲有豐富嘅配料，包括有蛋絲、韭菜、韭黃、芽菜、唐芹及洋蔥。🥢蜜汁叉燒表面微微焦香，蜜糖與醬油味道平衡，濃而不膩，口感軟嫩。🥢彩福蝦餃皇餃型飽滿漲卜卜，內裡蝦肉充實，最鍾意加咗筍粒，增加清爽口感，食落仲好juicy 。🥢原隻鮑魚燒賣皇原隻鮑魚口感軟滑中不失Q彈，豬肉與鮮蝦比例剛好，質地爽彈，仲添加咗菇粒，增添豐富口感及香味。🥢特色百花羊肚菌鮮香濃郁嘅羊肚菌下面係墨魚滑，並混合咗甘筍及唐芹，質地Q彈中帶份爽脆清新口感。…查看更多

餐廳嘅素食多元化，有點心、小食、湯羹、廣式小炒、特色川菜等，有室內及室外座位。🥢金邊帝苗餃$39菜苗充實住整隻餃，漲卜卜，餃皮晶瑩Q彈。🥢黑松露野菌餃$46野菌口感十足，帶濃郁黑松露味，餡料juicy，餃皮軟滑。🥢煎素菜鍋貼$42炸到金香卜卜脆，口感惹味。🥢香煎蘿蔔糕$39煎到表面夠金黃色夠香口，質地軟硬適中。🥢金牌榆耳竹笙煲(配時菜)$268熱辣辣，大大煲，湯汁帶有南乳味，除咗有榆耳及竹笙之外，仲有枝竹、雲耳、雪耳、筍、珍珠筍、冬菇、馬蹄、萵筍、生菜等，非常豐富。🥥原隻椰皇燉桃膠$88現燉嘅椰皇熱辣辣，飲落超清潤，桃膠大大粒啱哂而家咁乾燥嘅天氣。🫖午市茶位$12…查看更多

坐下就有杯welcome drink百香果梳打送上，潤一潤都唔錯。🫕香濃豆乳蜜瓜龍躉雞湯鍋$328賣相超打卡，煲底舖滿龍躉件，中間放咗大大個蜜瓜，紹菜做花托，放咗3朵豆乳白玫瑰，店員即席將豆乳濃雞湯倒入鍋內，溢出白煙仙氣滿瀉，先飲啖湯頭帶濃郁雞味，等到蜜瓜煲到稍為軟腍，湯頭變得更柔和清甜。🥢大滾友牛肉拼盤(細) $428拼盤有6款之多，有封門柳、本地手切牛頸脊、和牛牛展、牛肉粒、牛舌及花雕酒浸牛肉，全部都好新鮮，當中最鍾意嘅有3款，牛肉粒有口感肉味濃郁，牛頸脊軟嫩中帶嚼勁，花雕牛肉酒味濃郁，口感煙靭。🥢手打蟹子鮮蝦丸(4粒)$72 蝦丸爽彈juicy，可以叫4粒，啱哂人少少。🥢日本廣島蠔 $118大大隻，蠔肉超新鮮，爽滑鮮甜。🥢脆鯇魚腩片$118食得出係好新鮮，腩位口感爽脆彈牙，魚味濃郁又鮮甜。🥢珊瑚桂花蚌雙拼$158珊瑚蚌爽彈，口感之選，桂花蚌爽脆，鮮嫩之選，一次可以試哂兩款蚌，啱哂我哋。🍺藍妹生啤(330ml)$58火鍋與生啤嘅配搭當然不可缺少，冰火配搭。🍯講到冰火配搭少不了呢款豆腐花，在冰凍嘅豆腐花上點火，係我哋最愛嘅結尾甜品，係會員嘅福利嚟㗎。🧂醬介每位$26OpenRice 訂座19:30前埋單仲有78折添，好抵呀。…查看更多

呢間灣仔嘅人氣居酒屋，進入店舖內猶如置身於日本嘅居酒屋之中，感受到濃濃嘅熱鬧氣氛，有備長炭烤魚、鐵盒燒蠔等日本地道美食，睇見個餐牌已經超興奮。🥢鐵盒燒廣島生蠔(6隻)$240 加配芝士$48蠔肉鮮甜飽滿，連湯汁都鮮度十足，加咗芝士嘅燒蠔多份濃郁奶香口感，另外仲配上青紅糖辛子、檸檬角、芫荽及超鹹香辛辣嘅青椒醬。🥢炭燒雞 $168 用上日本三大地雞之一嘅名古屋交趾雞，一啖一口雞肉，食得非常方便，肉質爽彈，炭烤味濃郁，配上酸辣醬，蘸點更覺惹味。🥢 醃製螢光烏賊 $48鹹鹹香香嘅螢光魷魚非常嫩滑，內裡爆漿juicy ，送酒一流。🥢洋蔥焗湯 $40湯頭鹹香濃郁，內裡嘅洋蔥軟腍甜香，麵包索滿湯汁夠哂滑溜，充滿風味。🥢明太子天婦羅$98明太子飯糰食得多，估唔到用嚟做天婦羅都咁好食，鹹香鬆脆，佐酒一流。🥢燒魚餅$68燒到表面焦香微脆，咬落口感Q彈。🥢本鰹沙律 $118見到師傅即場將鰹魚炭烤，火光熊熊好有feel，炭烤味濃，肉質鮮嫩，配合洋蔥及酸醋汁一齊食，非常之夾。🥢子持鮎魚$128用上備長炭去烘烤鮎魚，皮脆肉質細嫩，肚內充滿綿密魚卵。🍶中六純米吟釀(下圖左) $80「三井の寿」の酒造與炭兎嘅特別限定酒，一定要試下，酸度平衡，順滑醇厚，飲落好舒服。🍶麦 焼酎Iichiko(下圖右) $58口感細膩順滑，麥香回甘。…查看更多

呢間潮州菜館裝修新派時尚，並以傳統融合創新元素，製造出精緻美食。🥢潮汕鹵水炸乳鴿$49外皮酥香，肉嫩多汁，鹵汁夠入味。🥢酸菜龍躉$149金黃色嘅酸湯夠濃郁，微酸帶花椒香，龍躉大大件新鮮超爽彈，除咗酸菜之外仲有薯粉、萵筍、唐芹、芽菜及芫荽。🥢女兒紅醉蝦$99甜蜜醇香嘅女兒紅完全滲入哂爽彈鮮蝦內，使得蝦肉酒香濃郁，食落juicy回甘。🥢花雕醉蟹$89 大閘蟹完全沉醉於花雕酒內，使得蟹肉與蟹膏滿滿酒香。🥢酒醉文昌雞$89呢款係第三道以酒入饌系列，今次用上皮薄肉嫩嘅文昌雞，同樣都係酒香濃郁。🥢游水金魚湯餃$49超可愛嘅金魚响池塘嬉水，餃皮Q彈，漲卜卜餡料內藏好多鮮甜蝦肉，又打卡又好食。🥢鳳梨雀仔$49另一款可愛打卡點心，酥脆鬆香嘅外皮包裹着酸甜適中富菠蘿香嘅餡料，好味唔膩。🍯酒釀小丸子$49 酒釀湯酸甜醇和，小丸子口感Q彈煙靭，清潤暖胃。🍹手打鴨屎檸檬烏龍$39好搞鬼，個壺仔噴煙，好igable，清新鴨屎檸配烏龍，無得輸。🍹油甘茉莉茶冷萃咖啡$36咖啡味超香醇，富淡淡嘅油甘茉莉茶香，另外仲可以選擇常溫，啱哂而家咁凍嘅天氣。🍺深潛者冷釀IPA$39滑身口感，清香微酸，帶橘子味。🫖茶位$15如果叫茶飲的話，仲可以免埋茶位，超抵。…查看更多

去到K11見到呢間泰式餐廳裝修以開放式設計，清新簡潔，睇下個餐牌都好啱食，係泰西fusion菜，仲有好多特色cocktail及茶飲添。🥢泰式香辣醉貓炒豬肉手工卷粉$138手工卷粉口感煙靭Q彈，有點像薯粉，除咗有肉片外仲有豆角粒及芥蘭。🥢炭烤魷魚鬚青芒沙律$98魷魚鬚口感彈牙，配以爽滑微酸嘅青芒沙律，惹味又清新。🥢棕櫚糖炭燒三皇雞(半隻)$188新鮮燒起熱辣辣，外皮超脆，肉質嫩滑juicy ，配搭烤菠蘿，可減油膩感，仲有新鮮脆卜卜嘅合桃及腰果。🍹阿閒泰氮氣冷泡檸檬茶$58與一般檸茶不同，飲落比較厚身，茶味濃郁，有層綿密氣泡，仲以為自己飲緊檸茶氣泡酒添。🍹原味泰茶配自家奶茶雪條$68原條奶茶雪糕奶茶味濃郁，服務員叮囑先加熱奶稍為將雪條溶解，再加入樽裝咖啡，打卡度高，又可自己親身動手體驗，好玩又好飲。…查看更多

餐廳裝修好襌，清雅不失時尚，門口展示咗個好signature嘅日式燈籠組合藝術裝置；朋友食過呢間餐廳讚口不絕，雖然新開，但已經係北角嘅人氣店，主打10道菜嘅Rumi Menu每位$598 。🥢Fish Bone Tuile打卡度非常高又有驚喜，咁特別嘅魚骨造型原來係鯖魚茸所倒模而成，炸到脆卜卜，中間夾住肥美嘅拖羅蓉並混合清爽嘅意大利青瓜，食落有多層次嘅口感。🥢Burrata Cheese with 3-Year Aged Japanese Red Vinegar 用上奶香濃郁柔軟絲滑嘅布拉塔芝士，切開爆醬感十足，配埋酸酸地嘅醋漬車厘茄、沙律菜、櫻花蝦及師傅即刨鰹魚絲，用上3年熟成赤醋及醬油，混合所有食材一齊食，滋味無窮。🥢Sea Urchin Chilled Chawanmushi with Gauliflower Puree賣相極精緻，以海膽殼做器皿，茶碗蒸用上紫海膽，配上滑溜鮮甜椰菜花mousse，口感非常絲滑，最正嘅係上層添加咗甘甜嘅北海道赤海膽，非一般嘅茶碗蒸。🥢Pan Seared Scallop, Ponzu Beurre Blanc, Scallop Sauce 煎到微微焦香嘅鮮甜帶子配以柚子醋浸過嘅三文魚籽，仲有牛油果醬及白酒柚子醬，綿上添加咗條紫蘇花，成件事已經好完滿，但原來仲有重頭戲，師傅即席加入咗用柱貝炒香過嘅醬汁，湯汁勁鮮甜，成件事亦好有心思。🥢Charcoal Grilled Sanma秋天不能缺少嘅當然係秋刀魚，炭烤過嘅秋刀魚魚味濃郁，脂香爆發，配以味甘甜嘅秋刀魚肝醬及酸酸辣辣嘅杏仁混醬，前者味道比較濃郁，後者會較為清新。🥢Quail Gyoza with Chicken Liver Pate and Mushroom 香脆嘅餃皮包裹住原隻軟嫩鵪鶉脾，再配以味道濃郁嘅雞肝醬及juicy蘑菇，入口熱辣辣，外皮香脆內裡濕潤，原來餃子可以做到咁極致。🥢Abalone with Handmade Cavatelli Pasta自家手工扭指意粉，口感Q彈煙靭，沾滿濃郁嘅鮑肝醬汁，用上北海道鮮嫩滑溜鮑魚，同時配上時令筍，食落濃郁中帶清新。🥢Fatty Tuna Futomaki脆紫菜、口感軟糯嘅赤醋飯、爽脆青瓜再加埋肥美鮮甜嘅拖羅所整嘅太卷，充滿幸福嘅飽足感。🥢Matsutake Chicken Soup睇落雖然清清地，但飲落超濃雞味，並帶着淡淡嘅松茸香味。🥢Dessert自家製雪糕，用上迷迭香及焦糖化牛油所製成嘅雪糕，口感非常滑溜，味道就帶濃濃嘅迷迭香及生薑味，配上焦糖脆榛子及鮮橙，整體配搭清新，超有心思。今次所品嘗嘅10道菜，睇得出每道菜都花咗好多心思，又好有創意，食材配搭獨特，打卡度高，最緊要當然係好味。…查看更多

餐廳牆身掛咗好多獨特風格嘅掛畫，而且燈光昏暗柔和，令人好放鬆，提供西班牙及日式料理，同時亦有不同嘅酒類，啱哂與三兩知己傾談歡聚。🥢北海道帶子沙律 $128嫩滑嘅薄切帶子與卜卜脆嘅三文魚籽超夾，再加埋爽脆青瓜、蘋果等蔬果，配搭鮮甜、鹹香又清新。🥢鹽烤西班牙鬼椒 $68鬼椒味濃而甜，簡單鹽烤已經超好味，份量都幾多。🥢明太子蟹肉西班牙蛋餅 $118蛋餅非常足料，內藏綿腍薯仔粒、並混合明太子及蟹肉，口感鹹香豐富，煎到微焦更覺蛋味濃郁，蘸點微酸嘅開心果醬，減低油膩感之餘仲可增添風味。🥢七味粉炸白蝦 $88酥脆微辣，蝦味濃郁，佐酒一流。🥢地中海煎烤智利海鱸魚 $288超厚肉，皮煎到脆卜卜，肉質緊緻亦不失嫩滑，魚味濃郁，油脂豐盈，配菜豐富，有法邊豆、櫻桃蘿蔔、車厘茄、青黑橄欖及椰菜花，並配上黑醋汁。🥂Prosecco Brut Zonin (Italy) $65帶橘子味，清新酸爽，與海鮮非常匹配；順帶一提，晚上8點前都有Happy Hour㗎。…查看更多