可能我夜晚入去食粥，所以粥舖無乜人。

今晚要去炮台山返學，我對呢個地方唔熟，上網見食評推介呢間食店，就去試下！

我點左一碗皮蛋艇仔粥同一碟炸両。

先講碗粥，真係足料炮製，碎牛比我預期多，而且成碗都係配料，好豐富！

再講炸両，我以為即叫即整，點知都係預先製作，沒有驚喜，不過都幾好食！員工方面，態度都唔錯，有住婆婆應該係熟客，雖然佢講o既唔係廣東話，係福建話，唔係每個員工都聽得明，但係每位員工都對佢好好，又俾水佢，總之婆婆想要乜野，員工都會盡量俾。呢d就係呢間餐廳有，大部份香港餐廳所欠缺的人情味啦！

曾經喺香港風靡一時的台式餐廳真係愈來愈少，以前開過好多間分店的仙跡岩，已經俾咖啡店取代，真係感到不是味兒。今日出開去葵芳，就入去回味一下。

以前餐廳以台式飲品及小食作賣點，宜家生意難做，連飯同粉都賣埋。我地2人入去正是食晚餐。我點左一個台式牛肉麵線加花生吐司，老婆就點左一碗雞翼新竹米粉+熱飲。先講我碗麵線，完全食唔出嗰種台灣麵線感覺，我只係覺徥似公仔米粉。老婆的新竹米粉亦唔見突出，只係比一般米粉爽口。至於花生吐司就保持一貫水準，都幾好食！除左食物之外，最重要係員工態度。佢地唔係太有經驗，落單時成日聽漏客人點餐，態度又麻麻！

雖然我都嚮往舊日的台式餐廳feel，但係食物質素真係下降左，希望可以改善一下。

由於位處food court，因此唔洗等位，不過要搵位。

我經常都有幫襯呢間食肆，因為我貪佢d客飯做得夠平，而且味道唔差。今日，我決定食貴d，叫左個客飯套餐，只因我想飲酸辣湯！我點左個糖醋排骨飯，配雪菜大豆、酸辣湯同豆漿(可轉汽水)。同午市客飯唔同，小菜同飯分開上，感覺上小菜多d，不過事實上唔係多好多啫！糖醋排骨好多脆骨，我最鍾意食，所以慢慢食曬落肚。輪到主角酸辣湯，果然同我平時食酸辣湯麵唔同，因為無俾麵湯令到酸辣湯稀釋，真正完汁完味。個湯酸辣適中，好啱我口味！

聽朋友講，屯門新墟開左間專門食蕃茄o既食店，成日想話去試下，點知講左成年先去得成。

一入到去，店員就帶我地上閣樓。閣樓都唔錯丫，冷氣夠，而且寧靜d！

我點左招牌菜：蕃茄濃湯！蕃茄濃湯魚柳螺絲粉。

老婆點左焗蕃茄牛脷意粉！

焗意粉需時約15分鐘，所以我地先食蕃茄濃湯魚柳螺絲粉。呢碗粉果然係招牌菜，蕃茄味夠濃，完全唔似落好多茄膏煮成。啖啖都有蕃茄，絕不欺場！魚柳煎得香而唔燶！再講埋隻蛋，好夠滑，但係完全無生蛋o既感覺！我都差不多食完碗粉，焗牛脷意粉先到。雖然係遲左d，但係真係熱辣辣。牛脷完全唔會靱，總之好好味。我同老婆用餐時，咁啱撞到我父母同哥哥，令呢餐飯食得更開心！

今天，屋企人同我提早慶祝生日。早前，屋企人問我想去邊度食飯慶祝，我思前想後，決定去食齋。屯門區素食館以大力齋廚最有名，但係今次想試下另一間素食館，於是就決定去位於新墟的妙法齋。

其實，呢間舖頭開左好多年，我細細個就食過。唔知係咪星期六中午，唔洗等位，呢樣野好過大力。

服務員態度好殷勤，不斷介紹我地食呢樣食嗰樣，但係就過份殷勤左少少，因為我比較鍾意慢慢睇、慢慢揀。我地總共有5個人，所以可以叫多d食物。

點心方面，我地叫左：
雞扎、蘿蔔糕、鹹水角、豬肚、素鴨

另外，我地叫左：
芋頭魚、羅漢齋炒麵、xx鮮魷時蔬(唔記得左個名)、味菜豬大腸我本來想要芋頭糕，點知賣曬，唯有叫蘿蔔糕，味道ok。鹹水角同普通酒樓食無乜分別。雞扎同豬肚就分別較大，不過都係用類似豆干之類的用料，口感好似。食完點心後，我地叫左個小菜套餐，包括左芋頭魚、xx鮮魷同埋味菜豬大腸。豬大腸同鮮魷都係用豆干，所以食唔出有乜野分別，而且d味菜好鹹。至於芋頭魚就好好食，始終即叫即製，外皮夠脆，內裏夠熱。羅漢齋炒麵就令我有d失望，雖然賣相好靚，但係d麵淋左。我食炒麵都係想食脆口麵啫，點知第一次夾就已經淋左……

其實我仲有好多野食想試，好似馬拉糕、雞球大包咁，不過好多點心都賣曬，加上已經食到飽飽，所以放棄左。

總括黎講，呢間齋舖員工服務唔錯，但係食物真係一般，如果下次食齋，我會去返大力囉！

今次係我第一次食日式放題，心情有d緊張。由於我同老婆用餐後有野做，所以提早黎到，點知太早到，餐廳未開始營業。我地喺商場行左一陣，終於可以進入用餐啦！

由於預早訂位，因此我地唔洗等位。不過，店內座位實在唔多，如果唔訂位可能要等一陣。食放題的顧客會被安排坐喺店旁邊座位，食其他食物就會坐喺店中間位置。

我點左：

1. 刺身 (三文魚、八爪魚) (刺身係厚切，好好食)
2. 壽司 (火炙三文魚、燒鰻魚、花之戀、芝士炸蠔、加州卷、加州反卷) (只係芝士炸蠔麻麻，因為唔太熱，而且炸蠔淋淋地)
3. 手卷 (軟殼蟹) (紫菜夠脆)
4. 軍艦 (蟹籽) (紫菜夠脆)
5. 粒粒魚生飯 (好多魚生，無花假！)
6. 東京什錦鍋+熱烏冬 (烏冬爽口，什錦鍋有海鮮，老婆見到人叫佢先至叫，唔錯！)
7. 串燒雞軟骨 (軟骨好脆)
8. 金菇肥牛卷 (好juicy)
9. 清酒煮蜆 (無乜清酒味，但啱唔飲酒的我)
10. 鹽燒鯖魚 (熱住上枱，好新鮮)
11. 三文魚蟹籽沙律 (沙律醬唔會太多，反而三文魚比我預期多)
12. 蝦天婦羅 (好熱)

點左但係無黎：
1. 燒三文魚頭、魚鮫、魚腩
2. 雪之戀人

總括黎講，食物質素好高，每件份量唔算多，等我地可以試多d唔同野食。以上叫左無黎的食物，原來係當日暫停供應，但係店員無同我地講，咁啱個告示板喺我上面，最初根本留意唔到，我覺得店員應該主動同我地講，唔洗我地白等。不過，雪之戀人係無暫停都無黎，好在我剛剛食飽，唔係實問店員。

放題限時2個鐘，最後半小時店員會提醒客人last order，值得一讚！