近排一到週末就落大雨，所以一切戶外活動都做唔到，無得行山，無得踩單車，最佳節目就喺同老婆平平哋睇早場。呢個星期六又嚟到「荃新天地二期」睇戲，睇完剛好11:30am左右，喺地下層打個轉睇下有咩餐廳啱食，初頭以為呢間「一町目茶室」喺食日本嘢，其實喺間茶記，餐牌貼晒喺門口，睇落啱食喎，所以，就選咗喺度食午餐。內部裝修其實感覺都有少少日系，一室以鮮紅色為主調，配以淺木色系嘅傢俬，感覺幾舒肢。由於我哋嚟得早，就算得兩個人都可以揀坐入門口左邊嘅4人卡位，故此，坐得更寫意。但隨飯市開始，就越嚟越多客人。如果唔睇餐牌，唔拉開側邊擺餐具嘅櫃桶，淨喺睇店名同裝修，真喺以為佢買日本菜，哈哈。喺門口已經研究過佢嘅餐牌，有咩食先入去，所以，入到去即刻二維碼落單，不過，都影番啲餐牌俾大家參考。法式龍蝦湯蝦球烏冬 $76 老婆一向都偏愛烏冬，加上呢個配白肉，更加啱晒佢口味，簡直喺不二之選。雖然嚟到個烏冬比餐牌相片有好大落差，賣相做得有啲hea，唔喺咁靚仔，不過，味道方面絕對稱得上高水準，因為第一個龍蝦湯味道真喺好濃郁，蝦鮮味突出；第二就喺啲蝦球睇見都知高質素，又大隻，色澤新鮮，入口鮮甜，非常爽彈；第三就喺個烏冬煮得咬口，卻好滑溜，有麵粉香味，絕對唔喺啲平價貨可比。黑松露炒滑蛋、牛油厚多士 個烏冬仲配咗個炒滑蛋同多士，炒滑蛋嘅份量睇樣起碼都兩隻蛋啦，非常之大份，而且，炒得好嫩滑，再者，面頭嘅黑松露醬落得一啲都無手軟，混埋啲炒蛋度食，真心一流，老婆走牛油，但啲多士烘得夠脆身，夾埋啲黑松露炒滑蛋非常之好食。西班牙海鮮焗飯 $68 雖然掛住個西班牙之名，但其實我覺得跟同咩西班牙海鮮飯無關係，主要都喺加咗好多海鮮嘅焗飯，不過，食落都好有質素。首先就喺用炒飯底，飯粒爽身，呢點都值得加分，再者就喺啲海鮮料都好足份量，同埋質素唔錯，有大大件魚柳、鮮蝦、蜆肉同蟹柳，個蕃茄汁底酸香好味，撈飯一流。熱奶茶、熱檸水 都喺老規矩，老婆飲熱檸水，小弟就揀熱奶茶，茶色少少偏淺，飲落茶味算喺幾幽香，只不過個人覺得落奶就有啲偏多，故此，茶味雖香卻有少少淡，但口感就幾順滑。 今次偶然嚟試呢間新餐廳，味道唔錯，鳥冬、炒蛋仲有啲驚喜，招呼亦唔錯，輕輕鬆鬆食餐晏仔。

接續上文，我哋兩公婆加埋表哥3人行由美孚經馬騮山行到嚟大圍，喺預定時間之內到達咗紅梅谷燒烤場，再慢慢行落去大圍。咁途經隆亨邨就走入去搵下有咩食，剛好有家「福盈酒家」，飲茶食點心就最襟坐。開得喺隆亨邨裡面，就知道喺一間街坊酒樓，內裡地方都幾大，裝修都喺好傳統嗰一款，目測所見超過八成都喺上年紀嘅，明顯就喺主要做街坊生意，相信區外客無乜。今次好hea，點心紙都無影，連啲食物相都喺求求其其搵手機影。午市優惠孖寶 $53
通常啲街坊酒家就好興啲乜寶物寶， 所以，揀咗個孖寶，計返散點都只喺三五七蚊。先介紹過香煎虎皮椒，3大隻長青椒，煎得都幾靚，而且，已經一開二，方便我哋食，咁啱我哋3個人 可以一人一隻。隻青椒都幾辣吓，但喺煎得幾香口，中間釀滿魚肉，亦都好彈牙。碟潮式韭菜餃又喺一客3件，啱啱夠分，如果4個人嚟 就真喺有啲難搞。外皮都夠薄，睇外觀已經透到少少裡面嘅韭菜餡，而餃底煎得非常香脆，咬落外皮又唔黏牙，滿滿韭菜香，是日最好食嘅點心就喺佢。鮮蝦菜苗餃 $29
同樣都係餃，但嗌呢個真喺盞搞，其實外觀都OK嘅，味道方面亦都OK嘅，不過，一夾已經好撈搞，外皮黐住蒸籠裡面張花餅紙，一夾就爛晒，再入口，外皮好削，完全無煙韌感，而且，好黏牙。蜜汁叉燒腸 $35
碟叉腸又喺令人有少少失望，雖然腸粉皮好薄好透，但入口口感好削，啲叉燒無乜味，亦都唔鬆化，總之，整體感覺就喺麻麻哋。茗茶$10位，但就無加一， 因為大家今朝喺「燉奶佬」食嘅早餐都好豐富，夠份量，所以，仲有少少飽，故此，今餐都喺墊吓肚，兼搵個地方打躉抖吓。老實講服務麻麻哋，明明有啲細枱又要我哋搭枱，最唔掂嘅喺4款點心有兩款唔得。如果唔喺行開山順路經過，根本都唔會入到嚟搵食，所以，「福盈」相信絕唔會再重複幫襯。

晌尖沙咀「天文台道」完咗聚會，算喺時間尚上就不如食個糖水先打道回府，上網摷一摷附近就有間「糖宮」。雖然未幫襯過，但上網睇一睇風平不俗，同埋見佢勝在款式夠多元化，又有榴槤系嘅甜品，啱晒小弟喎。餐廳樓高兩層，從門面睇，以為是以白色為主調，但走入餐廳，一室水泥地、水泥柱，有少少工業風；而廚房設晌地下入門口位，所以，下層嘅用餐區座位唔太多，有幾張卡位，亦有少少對住街嘅吧枱位。然而上到二樓地方就大好多，有種別有洞天嘅感覺，加埋牆上少少霓虹燈裝置、動物掛飾，成為少少打卡位。部分櫈面又有啲幽默語句，都幾搞嘢。不過要數到較為亮點嘅喺有貓店長駐守，其實內裏有一處喺佢哋嘅地盤，不過，貓店長就晌餐廳週圍走。雖然小弟本身對貓無特別喜好，不過，睇見佢懶洋洋週圍行，啲毛色又好靚，隻眼又精靈，得意得嚟幾惹人喜愛。翻一翻餐牌，選擇真多，由奶凍布甸系列、椰皇系列、精選系列、精選系列、刨冰系列、烘焙系列、窩夫系列、芋圓系列、中式糖水系列……等等，仲有啲特飲系列，全部都圖文並茂，夠晒清楚，用二維碼落單，版面設計易用，而且，兼有其他微細選項，具彈性。綠林（加湯圓）$55
餐牌就列明喺以抹茶奶凍、紅豆、小丸子、抹茶雪糕組合成比較和風嘅甜品，再倒入煉奶，晌雪糕方面亦可以轉款，老友就轉了雲呢嗱口味。佢嘅食後感喺奶凍好滑身，又夠重抹茶茶香味，紅豆清甜又綿，小丸子煙韌有口感，雲呢嗱雪糕亦好軟滑富奶香。椰皇燉蛋白（加湯圓）$70
老婆就喜歡燉蛋白，貪佢清甜夠滋潤，加埋椰皇就更加正啦！我都有試少少，啲蛋白燉得非常嫩滑，口感輕盈，一入口就滑落喉嚨咁，仲帶有少少椰香味，食起嚟味道就更香。食到近尾，當然唔可以錯過啲椰皇肉啦，因為燉到軟透晒，輕易就刮到出嚟，大片大片咁放入口，清甜軟熟，食得夠爽。另加咗啲芝麻湯圓，外皮煙糯唔黏口，芝麻餡好香濃。邪榴圓 $60
小弟一心想試啲榴槤甜品，所以，就相中呢一款，因為有榴槤果肉，又有榴槤雪糕，仲加埋西米、三色芋圓，全部都喺小弟嘅心水嘢，真喺無理由唔揀佢。啲榴槤果肉夠晒熟，榴槤味濃，好軟綿綿，正呀喂；而榴槤雪糕亦唔錯喎，同樣好有榴槤香味，口感軟滑；三色芋圓煮得啱啱好，煙韌有咬口，帶有榴槤香味嘅汁底混有唔少西米，更加好食。地方大，又撞正未喺食糖水嘅高峰時段，自然好坐，感覺更輕鬆。其實，食碗糖水啫，唔使咩攻略嘅，隨心就可以啦！

應該已經是我第三次來到這個地方，喜歡是他的格局，喜歡也是他的私隱，大前提各樣都符合自己，今年決定在此吃一個簡單生日飯
遇上農曆假期，店內用上中午餐取待平日午外飯。。。
價錢是HK$618. 另加一服務
當日餐前麵包依舊係外脆內軟熟酸種包，好吃，是現時自己吃過那麼多之中最認為心意的一款⭐️⭐️⭐️⭐️前菜分別要了生蠔魚及Egg Benedict. 生𧐢尚算鮮， 【沒有照片】水波蛋在刀鋒界下之一刻每每都很療癒，煎過鬆餅有脆口，加上荷蘭醬，味美⭐️⭐️⭐️⭐️主餐分別揀(蟹肉意粉同埋牛面頰)，蟹肉意粉料多便是味美加上簡單的天然調味（香蒜/香茜/檸檬/辣椒及巴馬臣芝士）這一份絕沒有閃失⭐️⭐️⭐️⭐️牛面頰烹製得很稔，側邊的不是一般薯蓉，而是用上芝士製造成的玉米蓉，配上西式菠菜及牛肉汁感覺蠻好⭐️⭐️⭐️⭐️甜品分別要了一份菠蘿片Pineapple carpaccio及泡芙
老公的一份甜品自己就沒有嘗試，出來的評價是比較酸反而我覺得芒果雪葩較好吃而自己的一份泡芙外圈為了一層小小的梨肉粒，就略嫌餡料比較少了一點
⭐️⭐️⭐️
【沒有相片】
這裏的套餐是包括餐飲，我們自己各要了一份凍的Cappuccino和latte
味道及份量也屬正常
至於平時午餐會贈送的朱古力及甜橙皮條，由於在訂位上已經寫上是慶祝生日，所以送上枱上就作為餐廳給我們一份小小的助興品，有總好過沒有算是一個小心意！

☆整體上餐廳服務出品自己是屬於滿意的，若然唔係都唔會再三重返，不過自己就覺得平日更為抵食。
此店有另加一服務。☆

上次嚟到土瓜灣北帝街一帶食完晚飯後，經過見到呢間「Lamees」，餐廳門面裝潢幾特別，又有個電視不停播放短片，原來喺賣地中海菜，喺小弟比較少接觸嘅菜系，所以，啱啱約咗位住晌土瓜灣嘅學弟，就諗起呢間餐廳，與期周圍搵就不如試一試吓佢。推門內進，餐廳地方唔大，目測所見大概廿個位左右，但裝修幾精緻，一室淺泥黃色，加上牆上富異國嘅裝飾，配合燈效，立時彷彿好有種身在異地嘅感覺。而且，枱上嘅餐碟亦非常精緻。見到枱角有個二維碼，原來唔喺點餐用，喺一個線上餐牌，咁趁學弟未到，就睇睇有咩選擇。方便大家參考，小弟就將個餐牌做咗截圖出嚟。第一頁就有關主廚及餐廳嘅詳細介紹，原來主廚都大有來頭，而餐廳嘅經營都有佢嘅理念，好似肉類都喺以天然、無激素為主，食材都會用嚟自自家農場嘅。再細閱餐牌，都有非常多選擇，分類嘅大致分為湯品、沙律、點醬菜式、頭盤、飯品、意大利麵、阿拉伯式BBQ、烤焗類及甜品。而飲品方面，有紅白餐酒、啤酒、汽泡酒、中東茶、咖啡、果汁、汽水及Lamees特飲。Baba Ghanooj $85
點醬菜有經典嘅鷹嘴豆泥，亦有香氣複雜嘅雜果仁醬，不過，我哋就試咗烤茄子蓉口味，而每一款都會配一份彼得包。茄子經過炭燒之後，再搓成泥，加入燈籠椒、意大利蕃茜及蕃石榴，塞到個彼得包漲卜卜，咬落非常滋味，再者，啲彼得包輕烤過嚟，變得好軟熟。Mankeesh Flat Bread (Zatar) $95
第二道菜亦好有特色，大概直徑七吋嘅扁麵包切成八小件，包面睇到加入大量百里香同黑芝麻，入口包身有點脆，又有啲煙韌，香草味非常濃郁，又富芝麻香。伴碟仲有少少白芝麻醬及青瓜片作為間場，清清味蕾。另外仲有兩款口味供選擇：黑松露野菌、蒜蓉孜然。Baid ganam - Lamb Testicle $160
店員問過我哋對內贓會唔會抗拒，就推介咗呢一道新菜式「香煎羊蛋蛋」，即喺羊嘅睪丸，膽粗粗就試吓，反正嚟呢間餐廳就喺想試吓新嘢。從餐牌所知，喺約旦傳統嘅家常頭盤，多數冬天食。同食羊肉唔同，無嗰種羊羶味，味道溫和，再者，加咗蒜蓉、檸檬汁、香草及橄欖油去煎，香味豐富；而咬落去口感軟綿，又確喺有種食帶子刺身嘅口感。Arnab - Rabbit Leg $220
主食喺烤法國野兔脾配上米飯，印象上，我幾敢肯定喺第一次食野兔脾，睇賣相隻兔脾燒得幾靚仔，原來兔脾都幾大隻，口感個人覺得幾似雞肉，因為加咗啲香料去焗，所以，幾入味，又幾香；而啲米飯似喺印度米，因為外形較為修長，食落比較爽身，伴上薄荷蕃茄醬，香濃得嚟又帶點清新。Katayef $75
最後當然以甜品作結，據店員介紹呢一款甜餡角甚富地道色彩，喺中東地區人士齋戒月會食嘅甜品。一客有兩大件，外形有啲似我哋過年時食嘅炸角仔，一件屬甜食，包住合桃椰絲，仲有陣陣玉桂香；而另一件屬鹹食，包住中東芝士，因為都淋上糖漿，所以，味道又幾夾，加上香脆嘅外層，真喺既特別，味道又唔錯。雖然，未算喺第一次食地中海菜，不過，依然好有新鮮感，而且，招呼亦好唔錯，侍應態度有禮，讓我哋都有個稱心美味之夜。

大概半年前嚟過「享和街」嘅「小越廚」食晚飯，當時離開時就見到呢間「金潮海南雞」，喺門口睇咗陣，覺得啲價位好抵食，又多選擇，就已經諗過如果嚟開呢頭，就會幫襯吓呢間小店。今晚，就同朋友試試店家嘅雞煲，當然，仲有海南雞啦。餐廳屬小店經營，目測估計大概30個座位左右，襯返個招牌，一室黃色為主調，裝修簡簡單單，樸實唔花巧，兩邊牆身都掛咗個大電視，啱晒我哋香港人電視撈飯嘅習慣。而有一邊牆身掛咗兩幅維港嘅油畫，都幾靚架，都幾搶眼。成間餐廳都幾乾淨企理，已餐具就放喺枱下拉櫃之中，整整齊齊排列晒，都睇得見店家嘅細心。順帶一提，啲店員嘅招呼非常之好，既有禮貌，動作又快手，真喺好過去茶記（個別）受氣啦。雖然店名冠以海南雞，但其實選擇非常之多，有雞煲、多款打邊爐配料、即叫即做嘅串燒、小食、招牌海南雞、各式各樣嘅飯餐，仲有啲公仔麵餐、下午茶餐……等等，更提供小菜套餐、二人套餐、四人套餐，讓客人食得更划算。最後我哋點咗個二人套餐（$198） 再加 一個雞煲，超豐富，4個人都夠食呀，3個人都飽到上心口！姬松茸雞湯 (二人套餐) 唔係大隻講，碗碗都真喺有啲姬松茸，貨真價實，加上雞湯底，所以入口非常之香濃，尤其天寒地凍嘅日子，飲落去更加暖胃窩心。蔥油海南雞 (二人套餐) 3款海南雞中，揀咗呢款蔥油口味，原來都非常特別，因為啲蔥油唔喺平常好似茶記嗰類，而喺蔥都炒香晒嚟做。講番隻海南雞，啲肉質真喺嫩滑到不得了，好有雞鮮味，皮下脂肪又少，加埋層外皮好爽口，當然去晒骨食得更加盡興。椒鹽豬扒 (二人套餐) 麻甩佬一向都喺鍾意惹味啲、又唔健康嘅小炒，所以，揀咗呢個椒鹽豬扒，估唔到份量十足，不過最緊要喺啲豬扒炸得鬆化，而且，又唔油膩喎，加上除咗椒鹽，仲有洋蔥、香蒜，確喺惹味都不得了。蒜蓉炒白菜 (二人套餐) 有白菜、菜心同生菜供選擇，阿姐話當造啲就喺白菜，所以，就揀嚟蒜蓉炒，估唔到一樣喺大大碟，炒得好有鑊氣，白菜食起嚟唔會太腍身，仲有少少爽脆感，每口都充滿蒜蓉香。油飯 (二人套餐) 有相你睇，每粒飯都呈淺黃色，入口好香，而且飯粒分明，就算一碗飯，都感受到用心製作，無hea做。金朝雞煲 (半隻) $138 雖然只喺半隻份量，但差唔多滿滿一煲，可以講童叟無欺，開著火滾起之後，嗰陣陣香味一湧而出，真喺引到人流口水。如果食得辣嘅，更可以考慮吓試試冬陰功口味或麻辣口味，相信更加正。呢個原味嘅，其實都有些微辣，但辣勁點到即止，相信唔食辣嘅朋友都接受到。啲雞沾滿晒自家特製嘅醬汁，香濃惹味，同樣啲雞肉真喺鮮甜嫩滑到不得了，仲有，唔好錯過啲紫洋蔥，煮腍之後，沾滿汁嚟食，味道一流。凍檸樂 +$13 二人餐可以加錢配飲品，比散點正價平一截，咁食雞煲，當然要揀返啲凍飲，凍檸樂就最啱喇，因為酸酸咪咪嘅檸檬，可以平衡返啲濃味嘅嘢食。成晚不停有客人進進出出，堂食嘅，外賣嘅，其實，睇返佢啲飯餐都喺五十零蚊，定價相宜，加上有啲特色嘛，所以，就有咁多客人嚟幫襯！

事隔差不多兩年再來到Holt’s 依舊感覺裝修典雅有氣派，早在官網預約時間，所以很快便安然入座。。。

午市分別有套餐，當然亦有單點～
我們總共三人用膳，兩個人分別要上套餐，而自己就叫上單點～當日分別叫上了一份中及一份西嘅套餐HK$358. 餐包中有法包亦有甜包, 可能天氣凍法包比從前吃過的沒有那麼脆身★★★中餐包括前菜，芝麻蝦多士
芝麻蝦多士，入口脆卜卜，而且完全不覺油膩，抵讚⭐️⭐️⭐️⭐️主菜蒜香黑椒汁炒澳洲牛肉粒配白飯
這份主菜就略嫌失色在黑椒汁太過於辣，席間每人試一口都同出此言，朋友一邊吃一邊要喝水來沖淡⭐️⭐️甜品揀選了士多啤梨楊枝甘露
這份楊枝甘露充滿了士多啤梨香氣，推翻了我們以往一貫用芒果的做法，甜度剛好⭐️⭐️⭐️⭐️西式方面選擇了牛油果吞拿魚沙律
這一份上枱我們都感覺有點驚訝，因為份量十分之大，半煎香的吞拿魚夾雜在沙律及牛油果身上清新又健康⭐️⭐️⭐️⭐️ 主菜香烤雞配羊肚菌汁
西式嘅烤雞亦都沒有令人失望，熟性到剛剛好，而且夠入味整個配搭都很好吃，加上兩個剛剛細細件的伴菜薯仔，夠晒飽肚⭐️⭐️⭐️⭐️甜品方面選擇了法式香梨撻
甜品也做得不錯，總括而言甜品不過於甜，我都會比滿分⭐️⭐️⭐️⭐️自己單點了一份個人獨享是海南雞飯HK$290.曾經好想比拼半X酒店及君X酒店的海南雞飯衝着而去,今次見到餐牌有當然不能放過，（有雞胸及雞髀選擇）自己當然揀雞髀，上枱間拆肉的雞髀看似有兩隻，啖啖肉且入味，油飯亦做得恰到好處，沒有過於油，用上廣東米粒粒分明，加上廚師的餐湯，今次的海南雞飯絕對值得（回購）⭐️⭐️⭐️⭐️二杯餐飲是正常表現，由於早年叫過熱咖啡，甚為不濟，所以今日就算叫上單點都係要上凍咖啡，出來的效果屬正常⭐️⭐️⭐️

今次嘅用餐體驗推翻了早兩年在此熱咖啡的不快感，自己覺得以食物/招呼及裝修都是值一再回頭⭐️⭐️⭐️⭐️
此店是有加一服務。

趁假期有同老婆嚟到荃新天地二期睇早場，我哋不時有啱嘅戲都會選擇睇早場，因為一來早場平啲，二來睇完啱啱12:00pm左右放飯時間。荃新天地二期地下原先喺先施嘅散貨場，依家搬走晒就變咗好多間食肆，感覺唔同晒，兜咗個圈覺得呢間「Craps Table」環境好，價錢又相宜，啲菜式睇落唔錯，啱老婆口味，就決定揀佢。因為餐廳喺由原來嘅散貨場改裝，所以環境設計比較喺開放式，喺外面已經睇到晒成個餐廳環境。一室柔和淺木色系為主調，又擺放咗好多乾花、乾草、木系傢俬，所以好有文青風，而餐廳餐廳尾尾有幾張半圓嘅馬蹄形座位，予人感覺更特別。此外，喺餐廳嘅另一邊角落，又有幾張細枱，又佈置得好好，不過，同主用餐區隔開咗少少，我諗坐喺度飲下咖啡都唔錯，食正餐可能麻煩啲，因為搵侍應比較唔方便。我哋喺門口已經睇過個餐牌覺得啱食先入去坐嘅，午市共提供12款菜式，套餐包餐湯或沙律，及附送一杯果汁，定價為$78-$138，如果果汁唔啱飲，都可以轉其他嘢飲，有半價優惠。今次想嘆啲，所以，小分弟就轉咗杯鮮奶咖啡嘆吓！是日餐湯
點兩個餐，就當然一份要沙律，一份要餐湯，是日喺南瓜湯，入口綿密有南瓜嘅清甜香味，最正喺唔太重忌廉，啱晒老婆嘅口味。是日沙律
沙律就簡單啲，係啲沙律菜加個車厘茄再淋上胡麻汁，特別就無咩特別架喇，不過，勝在食材夠新鮮，沙律菜食落嗦嗦聲，車厘茄好清甜。慢煮黑松露野菌雞卷意大利飯 $98
個意大利飯賣相幾精緻，因為加咗少少食用花做點綴，而且，睇啲飯嘅外觀，已經覺得好對辦，入口帶有隆濃濃嘅松露香，飯內又混有好多野菌，加埋飯粒口感帶韌勁，確喺煮得唔錯；而個雞卷以慢煮手法處理，所以，肉質好嫩滑，裏面捲住好多野菌，所以，味道特別。西京比目魚•櫻花蝦醬油大阪燒 $103
老婆唔喺太好肉，所以，揀咗個比目魚，同樣賣相精緻，絕對討人歡喜。件比目魚都幾大嚿，雖然用上日式西京燒嘅方法，但又淋上薄薄一層忌廉汁，食味唔錯，再者，啲魚肉又好嫩滑，煎得啱啱好。另外，個大阪燒有驚喜，原以為好似傳統嘅大阪燒成個圓餅咁，但依家就做到比較西化，老婆最欣賞喺裡面加入勁多蔬菜絲，好食又啱佢健康嘅喜好，讚呀！果汁
始終喺餐飲，所以，本身就無太多期望，預咗會加唔少冰落去，所以，實際杯果汁其實得半杯左右，幸好個味道都唔錯，飲落有少少桃香味。鮮奶咖啡 +$27
杯咖啡亦都沖泡得唔差，雖然個拉花嘅線紋未喺好細緻，不過，都叫做工整對稱，飲落口感都算均勻順滑，咖啡味醇厚有果仁香氣。今餐飯真喺隨機撞吓，但卻喺食到餐好，而且，環境舒服，招呼唔錯。唔知喺咪屬於新場，客人唔多，所以，感覺更輕鬆悠閒，少咗份城市人嘅匆匆忙忙。

啟德Airside在9月28日開業了，最讓人期待的是場内食肆眾多，又多個約會飯聚的好去處。前天跟妹妹到Airside朝聖，目標便是預覽場内的餐廳！當中有幾家是本地首發的新店，當然要先試為快！在眾多餐廳中選了Relish Kitchen by ALOT，是進口傢俱店Alot Living聯乘Relish Kitchen的最新餐廳。 ALOT主打日系簡約進口傢俬，而Relish是和洋創意料理餐廳，是故Relish Kitchen by ALOT予人簡約清新的感覺，是喧鬧Airside的一方「靜土」，的確在人潮為患的AIRSIDE，找個寧靜角落放空才是正事。 位於三樓千呎的寬闊空間，走簡約和風木系綠意風格，品牌日本進口傢俱配以鮮花綠植，再加上窗邊引入的日光，舒適休閒又充滿打卡元素，相信會成為Airside注目餐廳之一。餐廳主打和洋風格創意料理，作為Kitchen比Cafe選擇更多，主食有沙律、意粉、扒類、甜品等，也有咖啡、特飲，都幾多元化。價格在百元上下，在Airside高消費餐飲水平下，性價比算是不錯。午市提供附飲品、是日餐湯或沙律的套餐，在Airside新開業之際，仍有午市優惠甚難得。

日本宮崎番薯烤合桃溏心蛋田園沙律配柚子蜜糖沙律汁($130)
這款沙律是清新甜美之選。宮崎番薯甜美而軟糯，加上合桃、溏心蛋的沙律令口感更有層次，帶果香的柚子蜜糖配搭清新。

芝士西班牙黑毛豬漢堡伴烤菠蘿田園沙律炸蕃薯條配黑松露醬($148)
是Relish必食推介，份量十足男生也能吃飽，黑毛豬漢堡肉汁豐盈，口感鬆軟肉嫩，比傳統的牛肉漢堡更特別。烘烤過的包身外脆內軟，配芝士番茄生菜，還配上田園沙律菜，能平衡漢堡的膩感。特別欣賞炸蕃薯條，比平時吃到的更香甜軟糯，不用沾黑松露醬已經十分美味。是日餐湯是蘑菇湯，不是罐頭貨色，新鮮蘑菇打得細碎，能嘗到蘑菇的細蓉口感，滿滿是蘑菇的香氣。飲品可選熱茶或凍茶，強烈推介加$2選凍茶。Genmai-Cha（隨午餐附送）是滿有茶香的玄米茶。而Jasmime Four Season Jade Tea(+$2)淡淡的茉莉茶，加上微微果香，清新之餘顏值又高，是所費不多的隱藏特飲。作為全新商場，最初以為食肆會人頭湧湧，但在中秋正日下午前來，店方採取票模式，還有半小時空間到隔壁看「想飛」特展，再加上沒有用餐限時，在舒適的環境下可以好好放鬆，而寵物友善更是加分位置。Relish Kitchen by ALOT店裏處處都是一道風景線，期待下次能倚在窗傍位置，居高臨下靜觀啟德的美景。

Nana's Green Tea是Airside的注目新餐廳，是品牌進駐香港的首店，是故引來不少食客朝聖。Nana's Green Tea在日本有80多間分店，每次旅日都會看到它的蹤影，朝聖Nana便能喚起旅日的回憶。位處B1地庫，靠近地鐵站和即將連通的地下街，感覺是似曾相識，通常這家都是在日本車站，或是地下街發現店家的蹤影。Nana's Green Tea分堂食和外帶兩個部分，由於太受歡迎最少要等上30分鐘。外帶和堂食分設兩個餐單，前者以軟雪糕脆筒和飲品為主，堂食就可以選雪糕特飲芭菲甜點，甚至是主食。是日攜帶寵物犬逛商場，問過店員表示可以坐在門前半開放的位置，盡量不要讓寵物「露面」就可，都算是半寵物友善吧！抹茶牛奶雲呢拿軟雪糕($57)加白玉($5)
雲呢拿軟雪糕約圈半左右，奶味濃郁幼滑無冰感，味道令人滿意。抹茶牛奶茶味夠濃奶香亦足，但論風味還是配糖漿更好，可請店員提供一小勺糖漿作調味。咖啡配雲呢拿軟雪糕($42)
咖啡就是平常在日本喝到的哪種速溶咖啡，沒有加奶喝起來就更加寡淡，同樣適合加糖漿飲用，建議選焙茶或抹茶為佳。霖迪最愛白玉，覺得和風甜品要加入白玉，味道和顏值上才是圓滿。但可惜加錢添加白玉後，卻沒了白玉的芳蹤，店員竟表示白玉放在杯底。以以霖迪對和風甜品的認知，甚或是餐牌上的食照「見本品」，白玉不應是置身於杯底之物。帶着滿腦子的疑惑，把抹茶牛奶一飲而盡，最後仍是找不到那顆白玉。結果仍是要請店員添補，還擔心被誤會自己私吞白玉，直到如今仍對白玉應置在何處充滿問號，有誰能解開我的疑惑(笑)？口味上而言，Nana's Green Tea跟Matcha Tokyo相去不遠，喜歡抹茶甜品的可以一試。