澳門新馬路最近有間英式主題餐廳英國城新登場,佔地3層,裝修融合國會內廷同英國庭院設計,以深綠色為主調,無論廂座定係獨立房間都帶點復古感覺。餐廳主打多款英國經典菜餚,如威靈頓牛柳、炸魚薯條,又供應英式下午茶,嚟享用正餐、high tea或午後小酌都得。
前菜、小食推介
正式開餐前,先品嚐呢道開胃冷盤啦~煙三文魚配牛油果下層為澳洲牛油果粒粒,上層則有拌入秘製酸甜醬汁嘅挪威三文魚,配上特製墨汁脆片、食用花作點綴,味道清新,口感層次豐富。
![](https://www.openrice.com/userphoto/CMSContent/0/7W/001K8Z8C4EEE129CB29397j.jpg)
煙三文魚配牛油果,墨汁脆片
英國人氣菜式之一嘅炸魚薯條,呢度亦有供應。魚條裹上特製麵漿,炸衣薄脆香口,魚肉鮮嫩;薯條則選用美國粗薯條。蘸少許他他醬、特製番茄醬或清新青豆醬會更惹味。
![](https://www.openrice.com/userphoto/CMSContent/0/7W/001K9058F3DF34B624F7F8j.jpg)
炸魚薯條(3條炸魚/小份)
精選海陸空招牌菜
海鮮料理之中,名貴魚類都值得一試,好似法國白鱈魚帶子黑松露野米嘅白鱈魚,係供應量較少嘅魚款,皆因佢生活喺800米以下嘅深海,而且受管制捕撈。魚肉厚實嫩滑,鮮甜且油香十足;沾上香料煎至金黃色,連同以黑松露汁調味嘅加拿大野米、日本帶子等伴菜一齊食,飽肚又有咬口。
![](https://www.openrice.com/userphoto/CMSContent/0/7W/001K926BD046F9D433D8FDj.jpg)
法國白鱈魚帶子黑松露野米鮮味十足
至於「陸」方面嘅經典英國菜,不得不提威靈頓牛柳,相傳係英國威靈頓公爵擊敗拿破崙後,開慶功宴時設計嘅菜式。餐廳將約280g上等安格斯牛柳,以大火煎至略帶金黃色後,依次用蘑菇蓉、意大利火腿片、法國頂級酥皮一層層包裹,烤至外酥內嫩。伴以食用花、各式蔬菜,色香味俱全。
![](https://www.openrice.com/userphoto/CMSContent/0/8L/001P79BDB8C2FAAD31F902j.jpg)
威靈頓牛柳切開顏色粉嫩
紅肉菜式之中,蘇格蘭烤羊仔架亦係唔錯嘅選擇,一份有4件羊架,肉量十足。羊架低溫慢煮後,輕煎至外皮呈金黃色,再灑上堅果碎、配以秘製濃汁同多款蔬菜,入口軟嫩,唔會好羶,平時怕羶嘅朋友都可以一試。
![](https://www.openrice.com/userphoto/CMSContent/0/7W/001K949EE1748F68C5157Ej.jpg)
蘇格蘭烤羊仔架
倫敦西敏寺烤鷄肉量十足,啱晒一班人開心share~原隻鷄隻用秘製方法浸醃,然後加入新鮮檸檬、多款香草烤焗,外皮香脆,入口清香多肉汁,連鷄胸肉都好軟滑,係餐廳嘅人氣菜式之一。
![](https://www.openrice.com/userphoto/CMSContent/0/7W/001K951AF861E0B337EF2Fj.jpg)
倫敦西敏寺烤鷄配上薯角、車厘茄、焗蒜頭
英式下午茶二人套餐
想試多幾款甜品嘅話,不妨約埋朋友試英式下午茶二人套餐,鹹甜點會按是日款式作出微調,有時重可以轉換部分款式,增加一點自由度。其中「T2英式休閒下午茶」,包括英式女王司康鬆餅、蘇格蘭迷你牧羊批、馬卡龍、伯爵茶法式千層蛋糕、自選法式千層蛋糕同英式紅茶;你亦可以用1件千層蛋糕,轉水果塔或牛油果三文魚等鹹甜點。
![](https://www.openrice.com/userphoto/CMSContent/0/7W/001K967C467CE2486B5753j.jpg)
英式下午茶二人套餐
甜品、飲品精選
單點甜品主打嘅法式千層蛋糕提供9款口味,主要為果香同茶香款式,如黑芝麻鐵觀音、芒果藍莓草莓等,另外焦糖海鹽、英式紅絲絨都好啱鍾意甜蜜口味嘅朋友,下午茶時間或飯後嘆返件都唔錯。
![](https://www.openrice.com/userphoto/CMSContent/0/7W/001K975C59BCE7D8B1AF3Ej.jpg)
提供件裝、原個4/6/8吋選擇(圖為玫瑰口味)
餐廳亦緊貼大眾口味,供應一系列台式奶茶、鮮果茶同latte,如芝芝士多啤梨、手打香芒鮮橙綠研茶、抹茶latte,口味幾多元化,大人小朋友都啱飲。
![](https://www.openrice.com/userphoto/CMSContent/0/7W/001K98EC1C88D7DE8FE0C9j.jpg)
芝芝士多啤梨、手打香芒鮮橙綠研茶
![](https://www.openrice.com/userphoto/CMSContent/0/7W/001K9940E293114A748820j.jpg)
餐廳內外、獨立房間均採用英倫風設計,環境舒適
![](https://www.openrice.com/userphoto/CMSContent/0/7W/001K9CCE188368E9A69514j.jpg)
英國城
地址:新馬路板樟堂巷4號地下,1樓及2樓
電話:28858585