佳記甜品 (已搬遷) 新店位置

4人遊元朗，本身約好去食華嫂，點知行到入去撞正佢地休息時段，唯有搭返輕鐵出去b仔記涼粉食。因為正值四五點，好多學生哥都放學，而佢地唔少亦去左嗰到食野，所以等左一陣先有位。之前係又新街嗰間食過芋頭西米露，今次決定挑戰自己，點大大兜b仔涼粉😏，仲叫左幾份小食，包括魚蛋、腸粉、雞翼尖、瑞士雞翼。涼粉可以話好足料，好多好多生果，除左見到嘅西瓜、蜜瓜、桃之外，入面仲有大樹菠蘿、荔枝、海底椰等等。佢地仲會附上一兜仔淡奶俾你食涼粉用。魚蛋同腸粉一齊上，魚蛋雖然細細粒，但係好有口感，夠彈牙，加埋甜酸醬一齊，效果都唔錯。魚蛋唔一定配咖哩嘅﹗腸粉就中規中矩，味道可以接受啦。瑞士雞翼1小都算OK，食落有少少汁流出黎，好入味，甜甜地，唔錯唔錯。雞翼尖係b仔必食，佢地先醃一醃，之後再煮，所以好入味，蒜茸味重加埋辣辣地，少食雞翼尖嘅我，都食唔停口！總而言之，有禁好嘅食物，唔怪得佢紅啦﹗下次再黎，除左上面嘅，都要嗌埋芒果腸粉。坐隔離班學生哥嗌左好多，佢地係禁話好食。