紅茶冰室 (已結業)

喺觀塘番咗工咁耐,見到呢間人氣茶餐廳<紅茶冰室>都已經開咗一段時間,但係每日嘅中午時段仍然都仲係大排長龍,人流不絕,睇嚟都真係得到唔小人嘅鍾愛。但係聽見食過嘅同事講,其實味道都唔係話咁出眾,所以我自己就唔會排喇,係見今日朝早比較空閒,同埋早餐時分佢就唔洗排隊嘅,咁不如試下佢哋嘅早餐先啦。 堂食嘅關係,一入到去有位坐已經可以感受到呢度嘅員工服務態度好好,有笑容又講早晨,睇完餐牌之後,叫咗個A餐：鮮味仿鮑魚絲火腿通,另配西煎雙蛋同埋自家製鮮油餐包,包一杯熱飲(咖啡或茶),咁樣都係$31蚊,都係合理嘅收費。 Um......食完嘅感覺係唔錯嘅,味道算做幾好,但係又未去到話好世界級正咁囉,所以係可以encore嘅,但又未至於話令到我要排隊排半粒鐘都必要嚟食咁囉。唯一一個缺點就係呢度嘅咖啡口感偏鞋,味道較澀,扣咗小小分咯。