德美壽司 (新都城中心1期) (已結業)

難得山長水遠入到將軍澳，唔好好hea一日對唔住自己。六點左右開始肚餓，咁啱經過新都城中心嘅德美壽司開市，記得網上風評唔錯，就一於試試。壽司定食配牛肉烏冬｜沙律、味噌湯（$171）壽司總共六件，同餐牌上嘅圖示有少少唔同，我呢份有帆立貝、三文魚籽、熟花竹蝦、三文魚腩、池魚、吞拿魚，另外仲有兩塊玉子燒。每件壽司嘅肉都好鮮甜大份，很是正。牛肉烏冬嘅湯唔會太濃，略為清淡健康清甜。牛肉比得都幾多，烏冬拿捏到分寸，好食。洋風鰻魚班戟（$62）驚喜之作！本身已經好好奇到底會係點嘅料理，結果發現好正好正。班戟裡面包住嘅唔單止鰻魚，仲有牛油果同芒果。食落口首當其衝係班戟不軟不硬嘅嚼感，然後係入口即散嘅芒果甜，同鰻魚柔軟嘅質感、照燒汁嘅甜，再到牛油果嘅淡泊作為收結。講咁多，其實都係想話真係好好食好好食，超大驚喜。———————————————#德美壽司德美壽司 (將軍澳)將軍澳貿業路8號新都城中心1期地下99-100號舖