釜之魂釜飯專門店 (淘大商場) (已結業)

睇戲前去食餐好的，揀左呢間釜之魂，每人叫一個飯 share 食，得喎！一入門口已見 open kitchen, 一排釜飯齊齊火滾，忍唔住要影返張先。店內人山人海，好彩啱啱有個位置。全店主打釜飯，有好多款選擇。揭幾揭，目光已經俾呢個鳗魚飯吸引左，當然要試試佢。另一個震撼人心的選擇，鹽燒牛舌飯。金魂贅沢 $138呢一刻我想講，真人係靚過上鏡架！件鰻魚真係好厚好大塊，超肥美。熱辣辣的鰻魚，咬落啖啖肉，軟綿綿得來又結實，配合自家製鰻魚汁，咸甜比例啱啱好，口感堅一流。鰻魚之下舖滿蔬菜，再有暖笠笠白飯，越食越滿意。古味塩麴牛舌盛薈 $98份量都幾多吓，好香油香的牛舌飯，離遠已經聞到人流口水了。牛舌有長有短，口感亦每條不同，有淋滑有煙韌。喜愛牛舌人仕亦不容錯過。跟餐的日式麵豉湯同醬蘿蔔，開胃小點。蘋果蜜夠凍夠大杯，唔想飲汽水都有好多其他選擇。