麵麵 (已結業)

收工約朋友喺旺角食晚餐，搵到呢幢成幢都係食肆既大廈，決定行樓梯上一樓快快脆搞掂一餐。呢間野都幾靚，裝修花咗啲心思，好多波波燈，又有啲綠色植物，打卡唔錯。坐低見到有得揀定食，好似幾豐富喎。我同朋友一個揀咗安格斯牛肉食定食（$148），另外揀咗燒鰻魚定食（$138）。定食可以揀白飯或者魚麵，呢度出名係食魚麵我梗係揀咗魚麵啦。係等緊嘢食嚟嘅時候，侍應俾咗我哋每人一杯細細杯嘅魚湯試吓。魚嘅味真係非常之濃郁，令到我好期待我個餐嘅一大碗魚湯。食物嚟到個樣真係幾吸引，有前菜沙律，番茄仔係剝咗皮嘅，非常之甜，另外有一條秋葵同埋幾塊魚脆脆。魚湯非常之濃郁，另外仲有豬骨一齊煲，感覺飲咗好多營養落肚呀。魚烏冬非常之彈牙，咬落去索索聲架，又係一個健康之作。Like & Share Facebook嘅話就可以得到雪米糍。咁正嘅嘢就梗係要返兩粒啦。呢度約同朋友傾計非常唔錯啊。人均$150左右算係咁啦。