帝廷酒家 (已結業)

夜晚同屋企人黎食飯,座位寬闊,而且人流唔算多,淨淨地幾舒服。我地叫左個4人餐,388蚊,竟然有4個小菜同埋冬瓜盅!先黎既係翠玉瓜炒斑塊同燒味拼盤!翠玉瓜炒斑塊:翠玉瓜爽口而且鮮甜,斑塊大件而且彈牙。燒味拼盤:重點係叉燒度,佢就係傳說中既半肥瘦叉燒!有爽口既肉質又有肥美既肥膏,有住黃金比例(7:3),加上蜜汁既昇華,好好味道!至於雞就正常發揮;燒鵝就有少少瘦,但個皮都算香口;同埋有中華海藻有少少surprised.碧綠花姿珊瑚蚌:西芹新鮮可口,花姿片淋淋地,唔會太''un''好難咬,珊瑚蚌口感爽脆!帶蒜香既''獻''汁巧妙地將三種食材融合!咕嚕雞球:口感香脆,雞肉嫩滑,甜酸醬較得岩岩好,唔會太酸。青椒同洋蔥唔會太多,唔會喧賓奪主!冬瓜盅雖然睇落細細地,但每人都飲到兩碗!而且都好足料:蝦肉蟹肉雞肉粒有齊,而且選材新鮮!遺憾係d冬瓜煲得有少少唔夠淋。