四喜麵包西餅

營業中

休息中

過年前去長沙灣工作，時間有啲趕，原先諗住去王孖記買個外賣飯盒，點知佢落咗閘剩係畀攞糕嘅人入去😂，於是過對面馬路四喜，睇下有咩飽肚嘅買嚟食。一行到門口，就畀玻璃櫃入面啲蛋批吸引住，因為好少街坊麵包舖有蛋批賣，所以即刻買咗件三文魚味試下。廿零蚊大大件可謂性價比甚高，味道方面，蛋同芝士味頗香濃，三文魚肉都算多，再加上洋蔥，幾種食材加埋一齊，估唔到係咁好食😍！我又買咗個原味泡芙做甜品，咁大個先賣八蚊真係平到笑😆，咬一啖，口感偏硬，同一般嘅泡芙有啲唔同，可能有人會覺得唔夠鬆軟，但係我就好鍾意呢種口感。入面啲忌廉則屬正常貨色，唔太甜👍。聽講四喜最出名嘅係月餅，有機會一定要試試。