本佐日本燒肉料理 (已結業)

呢到嘅環境都好正，我地坐似bar枱嘅燒烤位，個位可以望住師傅整壽司。一坐低就聞到好大陣燒肉味，所以已經要落order食野。一黎就食前菜先，沙律都好新鮮，仲有生菜，食得多燒肉再食好清新。食日式燒烤都有刺身真係好正，食燒肉食到個嘴熱哂，食冰爽既刺身就岩岩好。刺身都好新鮮，每款都幾鮮甜，而且款式都唔少。肉類好多，真係令人目不暇及，數到數唔哂。牛方面最欣賞漬壺牛柳條，醃得非常好，入味又腍身，但又唔會冇左咬口同埋牛柳條本身既鮮味。而日式醬油黑豚肉亦非常高質，肉質腍身嫰口，而且味道雖然只係普通鹹味，但亦非常香。 海鮮好有心思，每款都會用碗裝住，唔驚燒燶。海鮮處理得好仔細，連最難搞既蜆都完全冇沙，值得一讚。牛油燒既味道調配得好好，唔單止牛油味重，而且鹹度適中。 估唔到一間日式燒烤既壽司質素會咁高，特別係火炙和牛西冷壽司同火炙三文魚壽司，師傅燒得岩岩好，令和牛同三文魚肉質半融但又保持到鮮味。炸物都好多款，每款都炸得唔錯，最特別係有薯格，雖然會幾熱氣，但食落卜卜脆。