湖越

營業中

休息中

今日落住毛毛雨又入咗大美督行陣，因為唔想出商場去迫，又唔想返大陸咁遠，香港好多集團式經營越南菜，味道已經做到好一般，入到嚟見到呢間湖越，有午餐，都幾抵食都係60至$70。我哋三個人，二話不說叫咗兩杯啤酒，有一個唔飲，夠晒凍有冰杯。我哋各自叫咗嘢食，有麵包有湯粉有小食，特別要講吓呢個法包，外脆內軟，滿滿嘅材料有雞絲同埋扎肉，肝醬同牛油，配料都有好多，好少做得好食，呢個真係推介。另外叫順化黑豚豬湯河，嚟到碗嘢真係嘩咗一聲好豐富，有豬肉，鴨血，豆卜，蜆，河粉幼滑，非常好食，湯底係用蝦湯，濃郁非常。生熟牛河（走蔥），店舖話明係60斤牛骨當然要試吓，上到台個湯夠晒熱唔在講，真係好香，牛肉靚，成碗嘢即是味道昇華，高分。另外香茅雞翼同埋越南春卷都做得非常正宗及入味，呢間越南菜真係我喺香港食過數一數二。