113
35
29
等級4
2010-05-20 6 瀏覽
早一陣子師傅好榮幸得到“開飯”嘅邀請出席一個名為 “openrice食家殿堂晚宴”, 得到呢個邀請著實令師傅受寵若驚, 雖然被歸納為資深食家, 但師傅絕對有自知知明, 愧不敢當; 不過難得有咁嘅機會, 適逢當日得閒, 所以就答應出席! 而晚宴地點亦鐵定於呢間食店!由於師傅係第一次出席呢類型嘅飯局, 所以心情亦戰戰兢兢; 預定時間之內到達會場, 由侍應帶到去已預訂嘅貴賓房, 入到房間內感覺當然係陌生, 可幸有兩位美女嘅協助, 安排入坐; 如果師傅冇記錯, 兩位美女應該叫做Maggie 和 Natalie, 真的衷心謝謝您們! 坐底後還有一份小禮物送給各食家, 師傅起初都唔知係咩, 拆開後原來係一對筷子, 咪好為係一對普通筷子, 其實係一對刻有各食家大名嘅筷子, 呢份禮物真的好有心思!二十人分開兩張枱, 十個人張枱, 師傅當然唔知邊個打邊個, 可幸是每位食家嘅枱前都有一個名牌, 望一望個名牌, 個個名字都係熟口熟面, 同席有鼎鼎大名Smashing Pumkins, 陳真, 搵食能手, Herbert, 美食焚化爐, 菲比熊, Billy, 唔食都知唔好食; 雖知師傅生性低調, 能置身其中
更多
早一陣子師傅好榮幸得到“開飯”嘅邀請出席一個名為 “openrice食家殿堂晚宴”, 得到呢個邀請著實令師傅受寵若驚, 雖然被歸納為資深食家, 但師傅絕對有自知知明, 愧不敢當; 不過難得有咁嘅機會, 適逢當日得閒, 所以就答應出席! 而晚宴地點亦鐵定於呢間食店!

由於師傅係第一次出席呢類型嘅飯局, 所以心情亦戰戰兢兢; 預定時間之內到達會場, 由侍應帶到去已預訂嘅貴賓房, 入到房間內感覺當然係陌生, 可幸有兩位美女嘅協助, 安排入坐; 如果師傅冇記錯, 兩位美女應該叫做Maggie 和 Natalie, 真的衷心謝謝您們! 坐底後還有一份小禮物送給各食家, 師傅起初都唔知係咩, 拆開後原來係一對筷子, 咪好為係一對普通筷子, 其實係一對刻有各食家大名嘅筷子, 呢份禮物真的好有心思!

二十人分開兩張枱, 十個人張枱, 師傅當然唔知邊個打邊個, 可幸是每位食家嘅枱前都有一個名牌, 望一望個名牌, 個個名字都係熟口熟面, 同席有鼎鼎大名Smashing Pumkins, 陳真, 搵食能手, Herbert, 美食焚化爐, 菲比熊, Billy, 唔食都知唔好食; 雖知師傅生性低調, 能置身其中感覺十分奇妙同興奮!

經過一陣熱身, 終於到左大廚出現, 大廚喺起菜前分別介紹幾道菜嘅名稱同煮法, 然後先至開始上菜! 是晚一共有五道菜, 順序為鵝肝肉醬小丸子, 意大利青瓜花釀龍蝦伴鵝肝, 日式牛肉壽司, 炸鴨肝藍鯨吞拿魚, 主菜燒羊腿!

未食頭盤, 先吃麵包; 雖知麵包一向都唔係師傅嘅至愛, 仲要係無比堅硬的法式麵包, 但說到底還是要試少少, 於是師傅就揀左件稍為軟熟, 入口後麵包水準一般, 冇特別驚喜, 但令人最失望莫過於麵包唔熱; 既然如此, 師傅立即轉戰第一道菜, 頭盤有鵝肝肉醬小丸子, 呢道菜賣相幾靚, 入口後發覺鵝肝醬香濃, 極度吸引, 而碟底有一塊多士亦甚為香脆, 呢個食法其實有少少似多士配鵝肝醬, 作為第一道菜算是不賴!

接住落黎就係意大利青瓜花釀龍蝦伴鵝肝, 呢道菜賣相好靚, 成大朵花, 而伴碟係蒸蛋, 入口勁滑, 加上入口後浸出濃濃嘅龍蝦味, 絕對有提高食慾, 而意大利青瓜花入口後基本上食唔出係咩, 有少少似芥蘭, 可以啦; 而個花心較為特別, 皆因內裡釀左龍蝦肉, 但師傅覺得入口略嫌乾身, 而且食唔出有鵝肝, 整道菜夠特式但未算出色!

日式牛肉壽司分別有兩款, 一款燒一款炸, 炸嘅壽司師傅覺得冇咩特別, 望埋去唔油但入口都算幾膩, 口感立即驟降; 而燒嘅壽司牛肉比較香, 而且飯身比較鬆軟, 唔會散但唔會硬, 但都係冇咩特別, 作為間場亦可以理解; 接住就係炸鴨肝藍鯨吞拿魚, 炸鴨肝師傅都係第一次食, 鴨肝炸得香脆, 入口即溶, 但略嫌油膩, 師傅覺得鴨肝配上油炸似乎並不適合; 藍鯨吞拿魚外面用紫菜包住, 藍鯨吞拿魚肉質頗鬆, 入口唔腥, 感覺不錯!

其實食左四道菜後, 師傅都飽左八八九九, 最後當然仲有主菜燒羊腿要試啦, 所以幾飽都要食, 羊腿係拆晒骨, 成件都係肉, 拆左骨係非常可取, 師傅十分欣賞; 而羊肉都幾肥, 但咁肥亦不見得酥香, 似乎差左少少; 師傅反而欣賞伴碟嘅茄子, 茄子燒得香腍, 作為中和羊肉嗰份肥膩嘅感覺確實不錯, 但整個主菜未見有甚麼驚喜!

未講甜品前, 師傅再講下是晚嘅兩款酒, 一紅一白嘅配搭係意料中事, 頭幾道菜最主要配以白酒為主, 白酒酒身太新, 酸味過盛, 未能令人開胃, 師傅就不太欣賞; 而紅酒最主要係配主菜, 紅酒酒身亦係較新, 未算太乾身, 而且單寧較重, 所以比較澀口! 最後甜品係鴨肝焦糖梳乎里同朱古力雪皅, 眾所周知師傅一向對甜品都不甚喜愛, 但見咁特別所以點都要一試; 鴨肝焦糖梳乎里賣相可以, 但入口後真係唔知吐出黎好定吞下去好, 味道真的怪怪的, 師傅食左一啖就扯白旗, 再回與四個字『不倫不類』! 朱古力雪皅反而黎得簡單, 容易接受!

總括黎講食物水準,可以, 服務殷勤, 地方就舒適, 價錢就唔知, 不過喺師傅以消費者角度去睇, 唔使錢當然叫抵食, 但如果要錢, 是晚會係幾錢一位呢? 心想都要三舊水呱, 若然師傅猜對就真係唔抵食喇! 師傅首次現身開飯飯局, 感覺是幾開心, 最難得係可以認識到咁多位食家, 所以師傅係會比笑臉的! 最後衷心再次多謝開飯的盛意邀請!
16 瀏覽
0 讚好
0 留言
白酒
7 瀏覽
0 讚好
0 留言
餐包
8 瀏覽
0 讚好
0 留言
鵝肝肉醬小丸子
28 瀏覽
0 讚好
0 留言
意大利青瓜花釀龍蝦伴鵝肝
34 瀏覽
0 讚好
0 留言
日式牛肉壽司
12 瀏覽
0 讚好
0 留言
炸鴨肝藍鯨吞拿魚
21 瀏覽
0 讚好
0 留言
藍鯨吞拿魚
32 瀏覽
0 讚好
0 留言
紅酒
19 瀏覽
0 讚好
0 留言
燒羊腿
16 瀏覽
0 讚好
0 留言
燒羊腿
27 瀏覽
0 讚好
0 留言
甜品, 餐茶
9 瀏覽
0 讚好
0 留言
(以上食評乃用戶個人意見 , 並不代表OpenRice之觀點。)
張貼
評分
味道
環境
服務
衛生
抵食
用餐時段
晚餐
推介美食
鵝肝肉醬小丸子
意大利青瓜花釀龍蝦伴鵝肝
藍鯨吞拿魚