點點心 (已搬遷) 新店位置

當日去既時侯係夜晚八時左右，都要排隊，但係我係兩個人就等左十分鐘就入得喇，雖然我地係兩個女仔，都叫左八樣野，流沙奶黃包（係豬仔造型，味道唔錯不過出到黎又唔係好流沙），蝦餃同燒賣都算新鮮好食，沙嗲金錢肚好軟身d汁又好入味👍菜苗餃，小籠包就好一般，可以唔使嗌。另外，紅油抄手就岩我地呢d食bb辣既人喇，小小辛辣味又甜甜地，易入口，正！最後食埋個原隻陳皮燉雪梨，味道好清甜，呢d天氣食黎潤喉嚨岩哂。整體黎講佢d野食唔錯，不過職員唔多，我地食緊第三籠野食都冇拎茶壺比我地，要我地叫左兩次先比我地。另外千其唔好嗌茶飲，佢個價錢係逐杯計，一杯成十幾蚊，好唔抵，好在職員都誠實同我地講係一杯既價錢，我地即刻唔要喇。野食上枱都好快，不過枱就較細張，我地嗌左八籠都唔夠位放要疊高，個場地就較細，如果多人去食就可能要分枱喇，依家佢算新開試業中剩係收現金，記得禁夠錢去喇。最最後，兩個女仔食八樣野係超級飽，完。