紅茶館 (已結業)

我今日同班朋友諗住搵地方睇波，又未食飯，諗左好耐邊度可以又飲番杯，又可以坐得舒舒服服睇場世紀之戰------曼聯對阿仙奴。周圍搵，咁岩喺我個friend屋企附近有間紅茶館，呢間野好多地方都見到，但係未試過，見到有得睇波，就入去試下啦，殊不知又幾得喎。八個friends仲有長檯坐，兩部大電視直播添，氣氛very good。講埋d嘢食先，我成日聽人講食和牛好貴，成千銀落樓，平日都唔捨得叫，但聽到個經理介紹，話四百幾蚊就有得試，一試之下又真係估唔到咁好食喎，肉質真係寧捨唔同，好滑好香囉。有牛當然要開番枝紅酒，一邊睇波一邊飲紅酒，仲以為自己拍緊「壹號皇庭」咁有氣氛，咁high格調。個經理見我地幫襯開左三枝酒，仲比我地每人十蚊叫一隻特大虎頭蝦送酒，勁正。叫左八樣嘢食，加埋三枝紅酒，埋單都係千二蚊，圍起每人都係百五蚊到，又有得睇波，都真係幾抵。