便所主題餐廳 (已結業)

聽聞香港開左一間便所主題餐廳，而這餐廳在台灣更有12間分店咁巴閉，抱住好奇的心態去見識見識。早午食飯時間也沒太多人，或許是地方太隔涉。全餐廳都是廁所用具，椅子是馬桶，牆身有廁所板，天花都有廁泵，是這餐廳的最大賣點。睇睇餐牌，種類都幾多，甚至火鍋都有供應。當然，中午時間，我只是來見識，也無謂吃火鍋。就要午市套餐，揀咖喱牛肉飯，另加$10要一杯尿兜飲料。先來尿兜飲品，好鬼似樣，最似就係有點死積在上面，也不是太乾淨那感覺。再加上我點的峰蜜檸檬汁，顏色正像小便一樣，配上去像真度簡直爆燈，真有如拿枝吸管去飲料一樣。不過，飲品味道認真麻麻，檸檬汁酸到眼都盲。再來咖喱牛，用馬桶上。有如馬桶上的一堆爛屎，好在沒有那種臭味。套餐另有一碗飯和一小碟粟米粒，粟米粒也是用屎形狀的蓋蓋上。咖喱份量好小，牛肉也只得幾片，既無咖喱的香味之餘，也沒有一點辣，牛肉也不好吃，最後要靠粟米粒送飯。食物質素不如快餐店。見周圍檯的人都忙著影相，可以食裝修去形容此店。當然，呢類既餐廳，見識一次便足夠。