德美壽司 (新都城中心1期) (已結業)

今晚係三號風球，緊係唔買餸，落商場食就最方便。呢間德美壽司，上次幫襯完都幾好味，見今晚無咩人，即刻食返轉，平日等位等到天昏地暗。一入到去即刻叫左個活鰻魚朴葉飯定食，個定食都幾抵，包括有沙律、麵豉湯、甜品。先講個鰻魚飯，份量都唔少，有成半條。鰻魚質感軟綿，有些少燒焦味。飯ge份量較多，但鰻魚汁卻唔夠，而且朴葉作用唔大，初以為飯會有葉ge清香味，但整體黎講個飯都幾好食。麵豉湯味道正常，唔會過咸，沙律味道有d似凱撒沙律，都唔錯。甜品係豆粉蕨餅，豆粉味道稍重，但蕨餅口感軟糯，都幾好味。黎得呢到，緊係要幫襯埋d壽司，叫左三文魚腩壽司、炙燒左口魚邊壽司、帆立貝壽司各一客。三文魚腩壽司肥美，無腥味。帆立貝壽司鮮甜。炙燒左口魚邊壽司，入口即溶，口腔充斥油香。可見，壽司質素十分之高質。